مفاجأة لم تتوقع سماعها وخاصة بعد مرور كل تلك السنوات كيف لها أن تصدق هذا الخبر وقد اخبرها الكثير من الأطباء بصعوبة حدوثه مرة أخرى لظروف مرضيه حدثت لها
حتى انها قد نست تماما حدوث مثل ذلك الأمر وقد ظنت أن ماتشعر به من أعراض قد يكون أعراض سن اليأس لا ليس إلا وخاصة أنها قد تعدت سن الاربعين منذ عامين فلم يأخذها التفكير سوى إلى ذلك ولكن أمر غير هذا فهو مستحيل بالنسبه لها
نائمه على الفراش يتفحصها الطبيب والاكثر من ذلك أنه يريها جنينها يتحرك أمام اعينها
مشاعر مختلطه تسيطر عليها لاتعلم اتفرح بهذا الخبر الذي انتظرت سماعه فترة من الزمن ثم سأمت الأمر ونسيته وخاصة فى فترة الجفاء التي عاشتها مع زوجها أم تقلق وخاصة بعد أن تعدت الأربعين ونسيت الأمر
بينما هو تكاد الفرحه أن توقف قلبه فكم تمنى أن يرزقه الله بمولود اخر يكون اخت او اخ لابنته الوحيده
الدكتور :الحمد لله الجنين كويس والدنيا تمام وحضرتك لازم تخلي بالك من نفسك كويس
أشرقت :دكتور بس الحمل فى السن ده مش خطر علية وعالجنين
الدكتور :سن ايه بس حضرتك اللي بتتكلمي عنه حضرتك فى عز شبابك وبعدين فى متابعه وفيتامينات وان شاء الله حيبقى كله تمام
عمار :انا بجد مش مصدق معقوله ده الف حمد وشكر ليك يارب الف
أشرقت :عمار انا خايفه أوي
عمار :متخافيش ياحبيبتى انا عاوزك تفرحي حيكون عندنا اخ او اخت لماسه
أشرقت :مجبتهاش ليه معانا ياعمار
عمار :حبيبتي انتي كنتي تعبانه اوي ومش حاسه بالدنيا وهي كانت بتعيط وموتراني قلتلها تفضل قاعده بس هي اتصلت وطمنتها عليكي إنك بخير
أشرقت :طب ياللا بينا انا عاوزة اشوف بنتي
عمار :حاضر يا حبيبتي
بعد قليل يدخل عمار واشرقت فتجري ماسه عليهم وترتمي فى احضان امها وتبكي بشده:مامي انا اسفه اوي انا مكنتش اقصد اعلي صوتي انا اسفه والله متزعليش مني يامامي انا بحبك أوي انتي اغلى عندي من الدنيا كلها
أشرقت :خلاص ياحبيبتى انتى نور عيني ياماسه معنديش اغلى منك ياحبيبتى
عمار:ممكن تستريحي بقى الله يخليكي
تعالي ياماسه عشان فى خبر حلو أوى حيفرحك
ماسه :خبر إيه يابابي
عمار :ان شاء الله حيجيلك اخ او اخت ياماسه
ماسه بفرحه :ايه مش معقول مامي حضرتك حامل ثم تحتضنها بشده ياحبيبتى يامامي انا كان نفسي اوى يكون عندى اخت او اخ
أشرقت :فرحانه ياماسه
ماسه :اوى أوى يامامي هيييه حيبقى عندي اخ ثغنون العب معاه
أشرقت :والله انا على اد ماكنت خايفه وقلقانه من الموضوع ده وحسيت برهبه اول ماسمعته على قد مافرحت لما شفتك انتي وبابي فرحانين ربنا يقدرني واحافظلكم عليه يارب
ماسه :حضرتك قلقانه ليه يامامي
عمار :بتقول كبرت والمفروض متحملش فى السن ده
ماسه :ههههههههه حضرتك كبرتي ده حضرتك قمر يامامي ده انتي لما بتكوني معايا فى اى مكان محدش بيصدق انك مامتي والكل بيفتكر انك اختى او صاحبتي
أشرقت :حبيبتي ياماسه ربنا يخليكي لية ياقلبي
ماسه :ويخليكي لينا يامامتي ياقمر وتجيبلنا البيبي الصغير بألف سلامه
ماسه :عمار بعد اذنك ممكن تسيبني مع ماسه شويه
عمار :موافق بس بشرط مفيش انفعال او عصبيه اه انا مش مستغني عنك او عن ابني
أشرقت :حاضر يا حبيبي متقلقش
يخرج عمار ليترك المجال للأم وابنتها ان يتحدثا سويا
أشرقت وهي تفتح ذراعيها لابنتها:تعالي ياقلبي فحضني
تستقر ماسه فى احضان امها لتشعر بالأمان الذي طالما احتواها ولم ينقصها شيئا
ماسه :انا اسفه يامامي انا اسفه والله ماكنت اقصد اعلي صوتي عليكي
أشرقت :ماسه انا حقولك كلمتين ياحبيبتي وعاوزاكي تسمعيهم كويس ممكن
ماسه :حاضر يا مامي
أشرقت :ماسه اللي لازم تفهميه اني انا وباباكي اكتر اتنين بنحبك فى الدنيا دي كلها ومش عاوزين غير اننا نشوفك أسعد واحده فى الدنيا ياحبيبتي
أنا عشت معاكي خطوة بخطوة من حياتك عمرك ماغيبتي عن عيني لحظه كنت بشوفك وانتى بتكبري ادام عينيه يوم ورا يوم لحد مابقيتي عروستي الحلوة اللي بتمناها تبقى أحسن واحده وأسعد واحده فى الدنيا كلها
وان ييجي اليوم اللي تختاري فيه الشخص الصح اللي تحبيه بس لازم يكون هو بيحبك واكتر مابتحبيه بكتير يلف وراكي بلاد وبلاد لحد ماينول حبك وقلبك
عارفه ليه عشان اللي بييجي بالرخيص بيروح بالرخيص أوى لكن اللي بنتعب لحد مانوصله بنحافظ عليه ونحاوطه برموش عينينا
اوعي تكوني فاكرة اني ضد انك تحبي ده منى عيني ان بنوتي الحلوة تكبر وتحب بس لازم يكون اختيارك للي حتحبيه يكون على اساس صح
ولا كمان ضد حسن بالعكس ربنا يعلم انى انا وباباكي بنحترمه وبنقدره جدا لكن مينفعش والله ماينفع ياقلبي
ده خاطب وانتي عارفه هو بيحبها اد ايه وخلاص كلها كام شهر ونلاقيه بيعزمنا عالفرح
ترضيها على نفسك ترضيها على كرامتك انك تحبي واحد عمره ماشافك ولا بصلك
ليه ياحبيبتي هو انتي قليله ده انتي ماسه عمار الكاشف اللي يتمنى كبار البلد ان اسمهم يرتبط باسمك
وانتي بنتي حبيبتى اللي ربتها عالقيم والمبادئ حبيبتى ده احنا كنا فامريكا وعمر ماكان ليكي بوي فريند ولاعمر حد حييجي ناحيتك غير لما يكون يحل ليكي ياحبيبتى
وانتي بنفسك قلتيلي انك بتحبي عاداتنا وتقاليدنا ومش ممكن تتخللي عنها ولا تعملي حاجه غلط ابدا
ماسه :واناوعمري ماعملت حاجه غلط يامامي
أشرقت :وهو فى غلط اكبر من انك تخطفي واحد من خطيبته وتلفي عليه لحد مايسيبها وبجيلك
ضميرك حيسمحلك بحاجه زى دي ضميرك حيسمحلك انك تشتري سعادتك على جثث ناس تانيه ملهاش ذنب
وحتى لو افترضنا ان حسن باع ايمان واشتراكي تفتكري ده ممكن تديله الامان انه ميبعكيش انتي كمان بعد كده عشان غيرك ماهو اللي يبيع مرة يبيع كتير ياقلب مامى
والله صدقيني اللي انتي فيه ده مش حب حقيقي ده حب مراهقه مش اكتر
انا عارفه اني كنت قافله عليكي اوى ومديتكيش فرصه قبل كده انك تحبي او ان حد يقربلك بس كان من خوفي عليكي والله
انتي عارفه انتي لو اديتي لنفسك فرصه بجد تفكري حتكتشفى انك مش بتحبيه انتي بس معجبه بيه وبشخصيته مش اكتر
فوقي ياحبيبتي فوقي من اللي انتي فيه خلصي دراستك وادي لنفسك الفرصه انك تختاري الشخص الصح
وحتلاقيه ان شاء الله حتلاقيه وبعد كده لما تفتكري حسن وييجي على بالك حتضحكي اوى وتقولي يااه ده انا كنت هبله أوى
ماسه :انا فاهمه حضرتك والله يامامي بس انا بحبه غصب عني حبيته مش بأيدي انا عارفه انه بيعتبرنى زى اخته لكن انا شايفاه كل دنيتي
بس لاء يامامي انا مش وحشه اوى كده انا مش حاخده من حبيبته لاء انا مش حعمل كده ابدا انا حتمناله السعاده يامامي
انا مش حزعلك يامامي انا ححاول أبعد عنه على اد مااقدر بس خايفه مقدرش
أشرقت :لاء حتقدري ياماسه وانا مش حسيبك ابدا حتى لو اضطريت اني اخدك واروح بيكي اخر الدنيا
ماسه :حبيبتي ربنا يخليكي لية يارب انا بحبك أوى
أشرقت :وانا بموت فيكي يا نور عينيه
يمر يومان وقد استقرت الأوضاع والكل ينعم بحياته
يجلس الجميع وهم فى فرحه شديده لعودة عليا الى بيتها
هاله :ياحبيبتي يالولوالبيت مكنش ليه طعم وانتي مش موجوده ياقلبي
عليا :ربنا يخليكي يارب ياماما
شاكر :ألف حمد الله على سلامتك ياحبيبتى
عليا :الله يسلمك يا عمي ربنا يخليك لينا يارب
عشق :مامي بطنك كبيرة اوى
يزيد :ههههههه عشان مامي حامل فى اتنين ياحبيبتي
عشق وهي تقترب من بطن أمها:سليم ياحبيبي انا قاعده برة مستنياك تطلع عشان نلعب سوا وانتي يا إيمي ياللا بقى اخرجي انا نفسي اشوفك حتبقي حلوة شبهي واللا لاء
انا شايله كل حاجاتي وحديهالك ياايمي عشان انتي اختي حبيبتي
فيضحك الجميع على كلامها
يزيد :هو انتي خلاص سميتيهم ياعشق
عشق :ايوة يابابي انا خلاص سميتهم
عمر :واشمعنى بقى سليم وايمي
عشق :انا حقولك ياعمو بس يارب تفهمني
عمر :ههههههههه لا حفهمك ياقلب عمو انتي
عشق :اصل انس قاللي ان خالو على كان عاوز يسميه سليم على اسم جدو بس عهد هي اللي سمته انس
فانا قلت يبقى أكيد مامي عاوزة تسمي البيبي سليم على اسم باباها اللى هو جدو وكمان خالو علي حيفرح لما نسميه سليم صح يامامي
عليا :صح ياقلب مامي
عشق :طب انت باجدو مش حتزعل عشان حنسميه سليم على اسم جدوابو ماما ومش حنسميه شاكر زيك يا جدو
شاكر:الف رحمه ونور تنزل عليه الله يرحمك يااخويا ويجعلك من اهل الجنه يارب لا طبعا ياحبيبتي سليم ده اسم غالي عندي اوى كفايه انه اسم الغالي
عشق:هيييييه يبقى اخويا اسمه سليم
عليا :ومين إيمي دى بقى ياقلب مامي
عشق :إيمان يامامي
ينظر الجميع لبعضهم البعض باندهاش ايمان ولما تريد اسم اختها أن يكون على اسم ايمان
عليا :واشمعنى ايمان بقى ياروحي
عشق :عشان انا بحبها اوى يامامي كانت بتيجي وبتجيبلي حاجات حلوة كتير وبتلعب معايا وكنا بنلعب معاها انا وانس ونجري ونستخبى منه ويقعد يدور علينا ونضحك عليه
وكمان رحت معاها ومعانا شمس واتفسحنا وركبنا الملاهي
وهي قالتلي اني لازم اخاف على اخواتي الصغيرين ومزعلهمش مني ابدا وذمان قالتلي اني اخليهم يلعبوا بلعبي واديهم حاجتي
عليا :إيمان دي بنت حلال أوى وطيبه ربنا يسعدها يارب هاه يايزيد ايه رأيك فى الاسم اللي اختارته بنتك لأختها
يزيد وهو يتحدث لعشق :اختك اسمها انا محدده ياقلب بابي
عليا :ايه ياحبيبي عاوز تسميها ايه
يزيد :عليا حسميها عليا ده أغلى اسم فحياتي معنديش اغلى منه فى الدنيا كلها
دورت بين الأسماء ملقتش أجمل منه عليا عشان انتي عليا وهي كمان حتبقى عليا أوى
أنا مش حقدر اسمي بنتي باسم غير عليا هي عليا وبس
عليا :ياحبيبي يايزيد ربنا يخليك لية يارب ياحبيبي
يزيد :ويخليكي لينا ياست الكل وتقوميلنا بألف سلامه
عمر :ياسيدي ياسيدي عالحب وانا كمان لما اجيب بنوته حسميها شمس مانا كمان معنديش اغلى من شمس
شمس :ايوة ياحبيبي بس الدنيا مفيهاش غير شمس واحده بس مينفعش يبقى فيه شمسين وانا عاوزة ابقى شمس واحده فحياتك مفيش غيري مليش دعوة
عمر :صح فى دي معاكي حق ياقلبي انتي خلاص ياستي هاتيها انتي بس وانا حسميها نجمه
علي:دي نجمه ابراهيم دي واللا ايه ان شاء الله
مروة :مين نجمه ابراهيم دي كمان ان شاء الله انتي عارف ستات علية ليلتك سوده ياعلي
على:ياسوادك ياقرمط لا وربنا ياحبيبتى انا مظلوم دي الممثله اللي كانت عامله فيلم ريا وسكينة
مروة:اللي كانت بتقول حنريحوكي ياشابه ياماما دي كانت تخوف أوى
شمس :لاء وكانت بتقول الوليه وانا بموتها عضتني تقولش عدوتها
فيضحك الجميع وتعم البهجه فى المكان
على:شفتي بقى انك ظلمتيني ياقلبي
مروة :بهزر معاك ياقلب مروة وهو انا عمري اشك فيك ابدا
شاكر :ياحلاوتكم ياجمالكم طب انا بقى حاخد حبيبتي واطلع احب فيها انا كمان شويه
عمر :ياسيدي ياسيدي ثم يقوم ويجلس بجوار هاله ويمسك يديها ويقبلها:لاء انا كده حغير انا محدش يحب مامتي غيري والا حرتكب جنايه النهارده
شاكر وهو يزيح يده:امشي يالا من هنا ناقصه هى لعب عيال عندك مراتك يابابا حب فيها براحتك
عمر : طب خلاص حب فيها ادامنا هنا عشان نتعلم ياباشا
شاكر :لا ياحبيبي احنا حنقول كلام كبار وانتوا عيال متفهموش الكلام ده خليكم انتم فى العك اللي بتعكوه
عمر :ياشاكر ياجامد ايه الحلاوة دي
شاكر :قلتلك شيل ايدك عن مزتي يابارد ده انت غتت والله انا ماعارف شموسه مستحملاك ازاي جتك الارف
على :ايوة بالظبط كده ياعمي كل واحد يلعب فحاجته محدش يلعب فحاجة غيره
يزيد :ههههههه يخرب عقلك ياعلي امال فين عهد مش شايفها يعني ده انا قلت حلاقيها واقفالنا عالباب
عليا :لا ياحبيبي هي لما جت الصبح قالتلي انها حتخرج مع سيف عشان الموبيليا
يزيد :ياربي هما كل ده ولسه مخلصوش
هاله :لسه يابني كل يوم تقوللي لسه بندور
على :حيشيللوني انا مش عارف شقة دى واللا قصر عابدين
شاكر :الله يرحم لما لففتنا على رجلينا عشان خاطر اوضة النوم
على :مش كنت عاوز حاجه تستحمل ياعمي ضرب النار واللا نجيب سرير ميستحملش يعني وننام عالارض
مش كده يارمانتي واللا ايه
مروة:سافل معلش يابابا اصله مش محترم
شاكر :عادي يعني وهو ده جديد عليه
طب ياولاد انا حسيبكم واطلع ارتاح شويه
عمر:وانا كمان حاخد مراتي ونطلع
يزيد :وانا حاخد عليا ونطلع احنا كمان
على:الحقيني يامروة ده احنا شكلنا بنطرد بالذوق
مروة :فشر ياقلبي مانا عندي اوضتي ياللا نطلع نريح احنا كمان يعني هي جت علينا
عشق :طب انا مش حطلع اريح شويه مع حد يابابي
فيضحك الجميع عليها وياخذها على فى احضانه:بنت اختي حبيبتى ومراة ابني الغاليه
يزيد :هههههههه امال فين العاشق الولهان صحيح
على :زمانه على وصول عنده تدريب فى النادي وجاي على طول
يزيد :زمانه جاي والبنت لوحدها لا انا حاخد بنتي معايا احسن يطلع بيها هى يريحوا شويه
يدخل شاكر وهاله غرفتهما وهم يضحكون ويدعوان الله ان يديم السعاده عليهم ولا يعرف الحزن لهم طريقا ولا يفتح له بابا
هاله :هو مش يزيد صحيح كان ناوي يسمي البنت ميرا ايه اللي خلاه يغير رايه ويقول عليا
شاكر وهو يستريح على الفراش:تعالي ياحبيبتى وانا حقولك
يزيد فعلا قاللي انه شاف بنوته جميله فى مسلسل اسمها ميرا وعجبه الاسم اوى وقرر يسمي البنت ميرا فعلا وقاللى انا وانتي بس
لكن لما عشق النهارده قالت انها عاوزة تسميها ايمي يزيد شاف فعين عليا الغيرة من انها تتسمى على اسم ايمان وسألته ايه رأيك فى الاسم عشان تعرف حيرد يقول ايه
وقتها يزيد رد بمنتهى الحكمه الرد اللي يخليها متشكش لحظه واحده فحبه ليها واخلاصه لحبهم وغير رايه وقال عليا
هاله :طب وانت عرفت ده كله ازاي ده انت كنت بتلاعب مليكه
شاكر :هههههههه انتي بعد السنين دي كلها ولسه عندك شك فقدراتي
هاله :لا طبعا ياقلبي استحاله بس استغربت من دقة ملاحظتك طب وازاي قدر يزيد ينقذ الموقف بسرعه كده
شاكر :مانا قلت محدش طالعلي غير يزيد محدش صدقني
طب تحبي اقولك على حاجه
هاله :قول ياحبيبي
شاكر:يزيد كان فعلا حيسمي البنت عليا
هاله :هو قالك كده
شاكر :هو مش محتاج يقول انا قريتها فعنيه يزيد بيعشق عليا وبيموت فى التراب اللي بتمشي عليه ومش حيقدر يشوف حياتها بتتعرض للخطر وميسميش البنت على إسمها
هاله :ربنا يقومها بألف سلامه يارب
شاكر :يارب باهاله يارب ميوجعش قلبي عليكي يابنت اخويا ياحبيبتى يارب فداكي الدنيا كلها فداكي عمري ياغاليه بس تقوميلنا بالف سلامه
فى احد المطاعم يجلسون جميعهم ليستريحون قليلا
عهد :لاء انا خلاص تعبت مش قادرة حرام عليكم ياناس حتهدوني
سيف :يعني الحق علية ياقلبي عاوز اجيبلك احسن حاجه
عهد :مااحنا شفنا حاجات كتير كويسه سيف انا تعبت بجد
ما سامر وحنين خلصوا اهم اشمعنى احنا بقى
حنين :معلش ياروحي بس لاحظى ان شقتنا أصغر من شقتكم عشان كده خلصنا بسرعه
سيف :خلاص ياعهد ناكل ونروح نخلص فى الاوضه الاخيرة تمام
عهد :ايوة تمام اوى كده هو ده الكلام
سيف :هاه حتاكلوا ايه بقى
حنين وعهد :بيتزا
بينما يجلسان بالقرب منهم وياكلان الطعام ولا ينتبهان لوجودهم
معتز:كمال بص هناك كده شوف مين اللى قاعدين دول
يلتفت كمال فيجدهم جالسين ومعهما شابين ويضحكان معهما
معتز :تفتكر مين اللي قاعدين معاهم دول
كمال :واحنا مالنا يامعتز دي حياتهم الشخصيه وهما احرار
معتز :غريبه اوي انا قلت انك حتضايق مش دى عهد اللى كنت حتموت عليها
كمال وهو يترك الشوكه من يديه :ايوة كنت بحبها فعلا بس هي رفضت حبي ومشيت يبقى خلاص مش كمال اللي يفرض مشاعره على حد يامعتز ثم يقوم انا ماشي يامعتز حاسب وحصلني
فى صباح اليوم التالي يجلس يزيد ومعه على وعمر يتابعان معه سير العمل بالشركه فى فترة غيابهما وانشغالهما بالاطمئنان على عليا
يزيد :برافو عليك ياعمر بجد برافو
عمر :ده مش مجهودي لوحدى الكل كان متعاون جدا معايا ومحدش قصرفى شغله نهائي
يزيد :تمام اوى اصرف عشر أيام مكافئه لكل اللي فالشركه
عمر :حاضر فى بقى ورق تعيين مهندسه جديده عاوزك تمضي عليه
يزيد :مهندسه جديده مين وفى اي قسم اتعينت
عمر:دي مهندسه كانت مقدمه من فترة ولما فضى مكان ليها طلبناها وجت وعملتلها اختبار لفيتها شاطرة وناقص على توقيعك
يزيد :ودي مكان مين بقى
عمر :مياده مكان مياده يايزيد
يزيد :مكان مياده ازاي يعني انا مش فاهم يعني مياده سابت الشغل
عمر :ايوة قدمت استقالتها ومشيت
يزيد :وحصل امتى الكلام ده ياعمر
عمر:يوم السبت اللي فات
يزيد :بس اكيد فى سبب مش معقول تكون مشيت كده لوحدها
عمر :مشيت وخلاص كبر دماغك بقى
علي:اه بس لما توصل ان ايمان تضربها ادام باب الشركة يبقى الموضوع كبير ياعمر ولازم نعرفه واللا ايه رأيك
يزيد: للدرجه دي لا بقى مانا مغيبش يومين ارجع الاقي الدنيا سايبه وانا مش حاسس
عمر :حاضر ححكيلكم اللي حصل
طبعا عمر خكى كل حاجه من البدايه للنهايه ودور ايمان ومحمد وعصام فى الموضوع
وطبعا على ويزيد مكنوش قادرين يستوعبوا الكلام ده
فجأة تطرق الباب وتدخل لترحب بعودتهم:طب والله العظيم الشركه نورت حمد الله على السلامه
يزيد :الله يسلمك ياايمان اقعدي
تحلس ايمان امامهم:مالكم شكلكم فى حاجه
عمر :كنت بحكيلهم عن موضوع مياده
إيمان :يااختتتتتي قطيعه تقطعها وتقطع سيرتها الهى تولع مطرح ماراحت
دى كانت بلوة سوده وارتحنا منها ياربي كابوس وفقنا منه اقسم بالله
يزيد :اقسم بالله انتي اللى مافي زيك ربنا يحميكى وميحرمناش منك ولا من جدعنتك ابدا
إيمان :ان شالله يخليك يارب انا معملتش حاجه وربنا ده تقدير ربنا عشان يكشف الظالم وكل واحد ياخد جزاؤه
والشهاده لله ان المخفى عصام هو اللي عمل كل حاجه وخليناه سامحناه حتى شمس وعمر سامحوه بجد اللي عمله يخلينا ننساله اى حاجه عملها فشمس
علي:مش معقول والله انا حاسس اني بسمع فيلم
يزيد :وهي الافلام ايه غير واقع ياعلي
فعلا ومن يتق الله يجعل له مخرجا ويرزقه من حيث لا يحتسب
اللهم اجعلنا من المتقين
تجلس وتندب حظها :يابختك المنيل فبنتك ياسماح انا مش عارفه عملت ايه فدنيتي عشان ربنا يبتليني ببنت زي دي
حسن :حرام عليكم ده انا راجع عشان خاطر وحشتوني اقوم الاقيكم ماسكين فبعض كده انا مش فاهم انتوا ام وبنتها واللا واحده وضرتها ده ايه ده
بسمه :مانا مش عارفه هي عاوزة مني ايه بقى انا زهقت وربنا يعني ايمان جت وقعدت معاها واقنعتها خلاص ورجعت تاني تتكلم بردو
سماح :وكسه عليكي وعلى ايمان يعني يرضيك ياحسن كل يوم والتاني نتعزم على فرح شكل ولما ييجي الدور علينا نقول معلش اصل بتي الهبله عاوز تقضي شهر عسل بالفلوس
ومتعمليش فرح اعزم فيه حبايبي وجيراني واطلع لساني للي كانوا عاوزينها تبور الموكوسه دى وافرح فيهم
يرضيك ياحسن يرضيك تشمت فية الناس واللي يسوا واللى ميسواش يتكلم ويقطع فسيرتنا
ليه متعمليش فرح زى بقية البنات ليه كنتي مطلقه واللا أرمله وسابحه وراكي عيلين يابت الجذمه
منك لله يابسمه ياقهراني هي خلفتك سوده من يومها طول عمرك قرفاني بس كل القرف كوم وقرفك المرة دى كوم تاني
بصي بقى وديني ومااعبد لو ماعملتيلي فرح افرس فيه الاعادي مانا داخلالك بيت انتي فاهمه واللا لاء
حسن : انا عاوز افهم دلوقتى طيب انتي مشكلتك فين بالظبط يابسمه فى فلوس الفىح واللا المبدأ نفسه مرفوض
بسمه :مبدأ إيه بس ياحسن فى الفلوس طبعا انا نفسي اقضي شهر عسل ياحسن ونجري عالبحر كده ويشيلني ويرميني فى الميه ويغنيلي ضميني وانسي الدنيا ضميني وانسي الناس
سماح:ياخي ان شالله يضمكم العفاريت الزرق انتوا الاتنين ماتخليه يضمك ياختي فبيتكم وانا سيبينى اضم الحبايب والجيران ياهمى الكبير
قال ضميني وانسي الدنيا قال عيشي عيشة اهل يااختي
وقال ايه يشيلك ويرميكي فى المية اصل المعصعص اللى شبه ايد المكنسة ده حيعرف يشيلك عشان يجيله الغضروف واللا ضهره ينكسر وبعد كده يقعدلك زي خيبتها وانتي بقى ابقي اقعدي جمبه اندبي حظك يابت الموكوسه
واللا ييجي يرميكي يكسرلك ضهرك انتي وتدوخيني عالدكاترة مانتي طول عمرك قارفاني جتك الهم
بسمه :حرام عليكي ياماما كفايه بقى خنقتيني وكرهتيني فعيشتى ماهي الفلوس اللى معاه متقضيش ياناس مفيش غير حاجه من الاتنين يا فرح ياشهر عسل
وانا نفسي فشهر عسل بقى ده هما دول اليومين اللى الواحد حيفرح فيهم بعد كده حندخل على مشاكل الحياة وهمها
سماح :ان شالله حتى يكون التتار اللي حيدخلوا عليكم انا مليش فيه فرح يعني فرح والا وربي مانا قاعدالكم فيها
يافضيحتي فى الشارع ده انا سيرتي حتبقى على كل لسان وحبقى مالسة الشارع كله واللي يسوا واللي مايسواش حيجيب فسيريتي يابت الجذمه
ده انا كل ادخل فرح
فرح بسمه امتى ياام حسن اوعي متعزمينيش ياام حسن اكيد حتعملوه فى مكان حلو ياام حسن
محدش يعرف خيبة ام حسن الكبيرة ووكستها فبتها
بسمه :بيه بقى انا زهقت وربنا انا مش عارفه ارضيكي ازاي انا تعبت منك ونفسي اسيبلك البيت وربنا ده ايه ده
سماح :ياختي بالسلامه الباب يفوت جمل ده انا حكسر وراكي زير بعد ماتمشي بس تعمليلي فرح الأول بردو
حسن :بابا متسيبك من الماتش اللي بتتفرج عليه ده وتركز معانا شويه وتشوفلنا حل
وبعدين ده ماتش متعاد بتشوفه تاني ليه
والده :ماهما المرة اللى فاتت دخل فيهم جون قلت يمكن فى الاعاده يخللوا بالهم ويدخلوا هما الجون
حسن :انا اعصابي تعبت وربنا انا ايه اللي جابني ياربي
بابا لازم حضرتك تحط فيصل للموضوع ده مينفعش كده
والده:والله ياحسن انا لو علية نفسي اسيبلهم البيت واطفش دول زي مايكونوا بينهم تار مش عارف ايه حكايتهم بقولك ايه متاخدني معاك يابني وان شاللله يولعوا فبعض
سماح :انا مليش دعوة وقلت اللي عندي خلاص
بسمه :هو انتي ليه بتكرهيني كده
سماح:اكرهك يالهوي اخس عليكي يابت الهبله ده انتى بنتي الكبيرة وروح قلبي ونور عينيه واللي يبصلك بصه اخزقله عينيه مش فاكرة لما كنتي صغيرة وحد يزعلك كنت بعمل فيه ايه
بسمه :ايوة فاكرة مرة روحتى بيت واحده ضربتني وبهدلتيهم والبنت بعد كده بقت تخاف تكلمني
سماح وهى تاخذها فحضنها :عاوزة افرح بيكي وانتي فى الكوشه مع عريسك ده اليوم اللي بتمناه طول عمري وانتي عايزه تحرميني منه ليه بس يابسمه اهئ اهئ اهئ
بكرة كل ماتروحي فرح وتشوفيهم بيرقصوا حتقولي ياريتني عملت فرح زي بقية البنات
يسكت حسن قليلا ثم يتحدث :اسكتوا بقوا شويه وسيبوني افكر حنعمل ايه
ماما انتي عاوزة فرح وانتي يابسمه عاوزة شهر عسل وانا وربنا عاوز اطفش واسيبلكم الدنيا
سماح :شهر عسل اسود على دماغها ان شاء الله
حسن :ماما ارجوكي بقى
سماح :اديني سكت اهوت متعصبش نفسك ياحبيبي ده انت داخل على جواز
حسن :وانتوا اللي يشوفكم يشوف جواز حرام عليكم وربنا اللي بتعملوه ده
ماما حنعمل الفرح اللي يبسطك ويسعدك ويرجعلك ضحكتك تمام ياستي
وانتي ياست بسمه حتعملى شهر العسل بس على الله يطلع بفايده وتعملوا بيه ولو اني اشك
سماح :بجد طب ازاي قللي ياحبيبي
حسن :حضطر اني اقدم معاد فرحي انا وايمان ونتجوز معاهم حاخد منهم الفلوس اللى معاهم واحطها على الفلوس االي معايا بتاعة الفرح ونعمل فرح كويس تمام
تعزمي فيه الجيران والحبايب واهالي المناطق المجاورة
وبعد كده حناخدهم معانا شرم واعزمهم على اسبوع معايا انا وايمان ايه رايكم في الفكرة دى
تهجم بسمه عليه وتقبله بشده :حبيبي ياابوعلي منحرمش منك يارب
حسن :يافرج الله اخيرا ضحكتي يابسمه يااختي ده الدنيا حتمطر وربنا
حبيبتى يابسمتي ده انتي اختي يابت
سماح:لووووولي اللهي يسعدك ياحسن يابن بطني ويفرح قلبك زى مافرحت امك ويرزقك بالذريه الصالحه يارب العالمين
حسن :طيب انا حروح بقى لايمان واكلم ابوها وامها فى الموضوع ده والله المستعان
بسمه:دي ايمان حتفرح اوى وما حتصدق
حسن :ان شاء الله
يجلسون جميعهم ويتحدثون سويا وقد أصبحت الالفه تجمع بينهم واصبحوا أسرة واحده ليس بينهم سوى الحب الذي الفه الله فى قلوبهم بدون ميعاد
معقوله دي يعني الشهر الجاي حنستلم الشقه ومتوضبه كمان مش معقول
علاء :مانا قلتلك ياعصام ان المقاول ده محترم وكلمته واحده وهو متعود يسلم الشقق سوبر لوكس يعني مش حتحتاج تعمل حاجه غير انك تنقل فيها العفش وبس
عصام :طب الحمد لله انا فعلا مكنتش عاوز انقل الموبيليا من الشقه لهنا للشقه الجديده كان حيتبهدل أوى
علاء :لا ياسيدي اطمن انت اصلا متفق مع الراجل اللي اشترى الشقه انك حتسلمهاله الشهر الجاي نكون نقلنا كل حاجه بامر الله
عصام :ان شاء الله ربنا يخليك لية ياعلاء والله مانا عارف من غيرك كنت عملت ايه
علاء :عيب عليك ياعصام ده احنا اخوات واللا انت عندك راي تاني
والدهم :رأي تاني ده ايه ده انا كان عندي ابن واحد بقى عندي اتنين ربنا يخليك يابني ويديم بينكم المحبه يارب
ويجمعنا فى الفرح دايما
عصام :طب بمناسبة الفرح بقى فى فرح جاي قريب ان شاء الله
علاء: فرح فرح ايه
عصام :فى عريس متقدم لنيرةيتحرك الكوب من يد علاء حتى كاد ان يسقط
نظر له والد عصام نظرة عن فهم لما حدث منه
بينما توترت نيرة بشده والتقت عينها بعين علاء، للحظه ثم سكتت ولم تتكلم
الوالد :عريس مين ياعصام ماتتكلم يابني وتوضح كلامك
عصام :ابدا يابابا ده محمد هو اللي جايبه يبقى اخو مراته هو شاب كويس محاسب فى الكويت عنده تلاتين سنه وعاوز يرتبط ولما محمد شاف نيرة قالله وهو نازل اجازة اخر الشهر وعاوز ييجي يتقدم ولو حصل نصيب نعمل خطوبه ويسافر وبعد كده ييجي الاجازة اللي بعدها ويتجوزوا ايه رايكم ياجماعه
تقوم نيرة وتدخل غرفتها وتغلق عليها الباب وتنهمر فى الدموع خوفا من موافقة والدها
الوالد :ايوة ياعصام بس احنا منعرفش حاجه عنه يابني وكمان انت بتقول انه عايش بره وحياخدها معاه وانا مش حابب ان بنتي تسافر وتتغرب بعيد عن عيني ده انا معنديش غيركم
عصام :ايوة يابابا بس محمد بيشكرلي فيه وفاخلاقه كويس والله وبيقوللي انه مش حيفضل هناك على طول دي فترة بس وبعد كده حينزل ويستقر هنا وكمان قاللي انه اصلا عنده شقه هنا فى منطقه راقيه حيفرفشها قبل السفر ايه رايك يابابا
وانت ياعلاء ايه رايك
ولكن بما سيجيبه علاء وهو يحبها من كل قلبه بل يعشقها وماكان يتمنى ان تكون لأحد غيره ولكنه كان يخشى ان يفتح معهم الموضوع فيرفضونه لأنه قد سبق له الزواج يقف الكلام على لسانه
ولكنه لابد وان يجيب على سؤال عصام له
والله دى حاجه تخصكم وربنا يكتب الخير ان شاء الله
عصام :مافيش تخصنا وحاجه تخصك ياعلاء هو انت مش معتبر نيرة زي سلمى واللا ايه
علاء:اه اه طبعا
والده :عصام ممكن نأجل الكلام فى الموضوع ده
علاء:معلش ياجماعه انا حستئذن دلوقتي
عصام :تستئذن ده ايه احنا مش متفقين حنسهر شويه مع بعض
علاء :معلش والله ياعصام حاسس ان عندي صداع ومحتاج اروح استريح
الوالد:ربنا يريح قلبك يابني يارب
علاء:يارب ياعمي
تصبحوا على خير
يمشي علاء بينما يتحدث عصام لأبيه :هو ماله علاء اتغير مرة واحده كده ليه
والده:عشان البعيد مبيفهمش
عصام :فى ايه طيب فهمني
والده:بكرة تفهم كل حاجه دخل البنت جوة بدل ماتبرد وانا داخل لاختك اشوفها
يطرق الباب ويفتحه فيجدها تمسح دموع عينيها
بقى معقوله يانيرة بتعيطي عشان جايلك عريس ياحبيبتى ده انا قلت انك حتموتي من الفرحه
نيرة :بس انا صغيرة ومش عاوزة اتجوز دلوقتى
والدها :صغيرة ده ايه ده امك وهي فسنك كانت مخلفاكي انتي واخوكي وبعدين انا عاوز افرح بيكي واشوف عيالك واطمن عليكي يابنتي قبل ماقابل وجه كريم
نيرة :ألف بعد الشر عنك يا بابا ربنا يخليك لينا يارب بس انا مش عاوزة ابعد عنكم واسافر وكمان ده واحد معرفهوش بابا وحياتي عندك مشيه قلله لاء
والدها :طب بصيلي كده وجاوبيني بصراحه
احنا طول عمرنا صحاب صح واللا لاء
نيرة :حاضر يا بابا اتفضل
والدها:اللي انتي قلتيه ده هو سبب الرفض واللا فى حاجه تانيه مخبياها عن بابا حبيبك
نيرة :حاجه حاجة ايه بس لاء طبعا مفيش
والدها:متاكده يانيرة
نيرة وهي تبعد عينيها:ايوة طبعا يابابا متاكده
والدها:طب وعلاء
يدق قلبها بشده عند سماع اسمه:علاء ماله علاء يابابا
والدها:يعني مفيش اعجاب استلطاف
نيرة :حضرتك بتقول اي يابابا
يرفع وجهها بيده:بقول اني فرحان اوى ان بنتي الصغيرة كبرت وبقت بتحب كمان
متخافيش ياحبيبتى مني انا واثق فيكي وفاخلاقك كويس وعارف انك مش ممكن تعملي حاجه غلط والحب مش عيب ولاحرام
نيرة :بابا انا
والدها:انتي بنتي حبيبتى اللى مش عايز حاجه غير اني اشوفها سعيده ومتهنيه مع اللي يختاره قلبها وعلاء طيب وابن حلال وانا مش حلاقي حد زيه اامنه عليكي
نيرة وهي تحتضنه:ياحبيبي يابابا ربنا يخليك ليا يا رب بس يابابا علاء مقلش حاجه ويمكن يكون
والدها:علاء بيحبك زى مابتحبيه واكتر كمان
نيرة :بجد يابابا يعني هو قالك
والدها:ههههههه لا مقالش والله حاجه بس عيونه فضحاه كاشفه كل حاجه فيها
نيرة :طب ليه مقالش حاجه وسكت يابابا
والدها:عشان خايف ياحبيبتي لاحظى انه كان متجوز ومخلف كمان واكيد هو خايف اننا نرفض بسبب الموضوع ده
بس تعرفي يانيرة لو كان حد تاني كنت فعلا رفضت لكن علاء حاجه تانيه خالص وانا عمري ماحستخسرك فيه ابدا
نيرة :ياحبيبي يابابا انا بحبك اوى
والدها:وانا كمان بحبك اوى ياحبيبة بابا
مع بداية يوم جديد تجلس وهي مرتبكه امام شخص ما تنظر اليه خلسة وهو يتحدث بالهاتف
ينهي مكالمته ثم يتوجه ناحيتها بالكلام :اهلا يا مياده نورتي شركتنا
مياده :اهلا بحضرتك يافندم
الرجل :اسمي مستر آدم
انجي كلمتني عنك وقالتلي انك شاطرة في الشغل وانا عاوز اشوف الكلام ده
مياده:حاضر يامستر ادم وان شاء الله شغلي حيعجبك
ينظر لها بدقه :حنشوف
تقدري تيجي تستلمي شغلك من بكرة انتي حتشتغلي فى المكتب اللى جمبي وحتعملي اللي اقولك عليه تمام
مياده:تمام يامستر حاضر
ادم :تمام تقدري تقومي دلوقتى وبكرة الساعه تمانيه تكوني هنا
مياده :حاضر
تخرج مياده بينما يجد اتصالا من انجى:حبيبي انتي فين ياقلبي
انجى:موجوده ياروحي مياده جاتلك
آدم :ايوة جاتلي وقلتلها تيجي تستلم الشغل بكرة بس يارب تكون شاطرة انا وافقت اانها تشتغل عشانك انتي بس
انجى :حبيبي يادومي ربنا بخليك لية معلش بقى اصلها بنت غلبانه ومحتاجه شغل ضروري
المهم قللي بقى حتسهرني فين
ادم :فى اى مكان تختاريه ياقلبي
انجى :حبيبي ربنا يخليك لية خلاص انا حجهز واستناك عالساعه تمانيه
ادم:اوكيه
تغلق معه الهاتف وبعدها بقليل تجد اتصالا من مياده :ايوة يامياده
مياده:انا رحت الشركه و
انجى:عارفه عارفه
مياده:انتي لحقتي عرفتي ده انا لسه خارجه
انجى:انتي لسه صغيرة ملكيش دعوة بالكلام ده ياقلبي ادم ميقدرش يخبي عني حاجه نهائي
مياده :بس ده شكله غني وهاي اوى
انجى:مياده هو اكل واللا بحلقه خليكي فشغلك وبس ادم ده خط احمر بتاعي انا وبس فاهمه وواللا تحبي افهمك
مياده:بهزر معاكي ياقلبي ده انا جميلك مش عارفه حردهولك ازاي
انجى:طب ياللا سلام دلوقتي وتلتزمي فى الشغل عشان ادم ميضايقش
مياده:ده انا حبات فى الشركه بجد مش عارفه اقولك ايه لولا وقفتك جمبي مكنتش عارفه حروح فين
انجى:تمام ياقطتي سلام
تمارس عملها وهي فى منتهى السعاده ولما لا وهي اخيرا ستنال حظها من تلك الحياة وسيكتب لها الفرح والهناء مع من يهواه القلب
سيف :عيب عليكي ياايمان متقلقيش خالص
إيمان :سيف انا حغيب شهر عن الشغل بداية من بكرة عشان الحق اجهز حاجتى واعيشلي يومين من نفسي بقى امانه عليك ياسيف مش عاوزة ارحع الاقيك عكيت الدنيا
سيف :اخس عليكي ياايمان وراكي رجاله
وبعدين انتي حتستلمي الشغل واقوم انا بقى بالاجازة
إيمان :ياااه ياسيف يعني انا ححضر فرحك وانا متجوزة ياااه مش مصدقة وربنا حسه ان قلبي حيقف من الفرحه
يدخل عليهم عمر:سلامة قلبك يا إيمي
إيمان :جديده إيمي دي ياعمر
عمر:دى عشق هى اللي بتقول إيمي
إيمان :حبيبة قلبي ربنا بحميها يارب
عمر :طب ياللا يااختى الباشا عاوزك
إيمان :حاضر انا رايحه اهوه
تذهب الى مكتبه وتؤكد على كل من تقابله بميعاد الفرح ومكانه والكل يهنئها ويدعو لها بالسعاده
حتى تصل الى المكتب وتتحدث الى منى
منى:مبروك يامونتى الف مبروك ياقلبي اخيرا حنخلص منك
ايمان :اخيرا يابت يامنى وكتاب الله انا مامصدقه لحد دلوقتي معقوله انا حتجوز يااه حموت من الفرحه
منى :ألف بعد الشر عنك يا قلبي ان شاء الله تتجوزي وتفرحي وتتهني يارب
بصي بقى احنا اخوات ومفيش بيننا فرق انا عاوزه اجيبلك حاجه بس مش عاوزة اجيب حاجه وتكون عندك فانتي حتقوليلي ناقصك ايه واجيبهولك
إيمان :منحرمش منك يااحلى منى فى الدنيا لاء بصي انا عاوزاكي بس تعمليلي تورتايتين حلوين كده وتوديهملي الشفه بعد الفرح مع ماما وهي بتوديلي الاكل اللى عملاه فى اليوم اللى حنرجع فيه من شرم ماشي
منى:ياحبيبتى احلى تورتاتيتين وجاتوه وكل الحلويات الشرقيه والغربيه لموني هو احنا عندنا كام موني ياقلبي
إيمان :ربنا يخليكي لية يارب مانتي عارفاني بقى بموت فى الحاجات دي
منى:تاكليهم بالف هنا ياقلبي واشوفك متهنيه يارب
ايمان :يارب ياموني يارب عقبال ولادك ياحبيبتى
منى:يا رب ياايمان افرح بيهم
بقولك ايه ادخلى بقى للبشمهندس
ايمان :تمام وترمي لها قبله فى الهواء
تطرق الباب وتدخل والفرحه تملاء وجهها:صباح الفل ياسيد الكل
يزيد:صباح الياسمين عالناس الحلوين تعالي ياايمان
إيمان :معاك ياباشا
يزيد :الأول طمنيني اتفقتي مع سيف عالشغل
إيمان :اتفقت معاه والله خلاص وانا مظبطاله الدنيا كلها متقلقش خالص
يزيد :ربنا يهنيكي يارب ياايمان متعرفيش احنا فرحانينلك ازاي ربنا يفرح قلبك ويسمعنا عنك كل خير يارب
ايمان :يارب يابشمهندس عقبال ماربنا يطمن قلبك على مدام عليا ويقومها بالف سلامه يارب
يزيد :يارب ياايمان يارب
بس انا كنت عاوز اسالك عن حاجه وبراحتك طبعا بس قلبي عاوز يطمن عليكي
إيمان :سلامة قلبك ياباشا أسأل يابرنس
يزيد :من فترة كده كان حالك مش عاجبني وكانت فى حاجه مضايقاكي وسالتك وقلتي مفيش ممكن بقى تقوليلي واللا بردو مش عاوزة تقولي
ايمان :والله هى مكنتش حاجه مزعلاني هو انا بس كنت قلقانه شويه وكنت ناويه اعمل حاجه بس الشغل ومشكلة عمر مع مياده نسيتني ولهتني
يزيد :كنتي ناويه تعملي ايه اعترفي
ايمان :ابدا والله بس كنت عاوزة اعمل كشف مبكر واعرف اذا كنت حعرف ابقى ام واللا لاء
يزيد :وانتي ايه اللي خلاكي تفكري فحاجه زى دي
ايمان :حسن نفسه اوى اننا نخلف على طول عاوز ياسيدي يجيب على عشان لما حد يقولله ياابوعلى يبقى بجد
كل حلمه فى الدنيا يبقى ابو على وانا مكدبش عليك خفت اوى وكتت عاوزة اكشف واطمن بس الوقت جرى واتفاجئت ان ااننا حنتجوز خلاص
يزيد :طب وافرضي ياايمان بعد الشر طبعا كنتي اكتشفتي حاجه مش كويسه كنتى حتعملي ايه قتها
ايمان :كنت حسيبه طبعا
يزيد :تسيبي حسونتك حبيب القلب ويهون عليكي
إيمان :عمره مايهون علية ابدا لكن كمان مقدرش اشوفه محروم من حاجه نفسه فيها
يزيد :بشروا ولاتنفروا ياايمان وخللي ثقتك فربنا كبيرة واوعي تحطي الموضوع ده فدماغك سيبيها على الله يا ايمان وان شاء الله ربنا حيكرمك ياحبيبتى
ايمان :يارب يابشمهندس يارب
يزيد وهو بمد اليها يده بمظروف:خدي ياموني
إيمان :ايه ده يابشمهندس
يزيد :هدية فرحك ياموني
ايمان :لاء، يابشمهندس معلش مش حقدر حضرتك صرفتلي شهر مكافاة يبقى كده تمام
يزيد :بت انتي الشهر ده بصرفه لاى حد بيتجوز لكن انتي مش اي حد انتي مونتى اللى كان نفسي اشوفها عروسه من زمان ودي هديتي الخاصه ليكي
امسكي بقى يخرببيتك ايدي وجعتني
تمد اليه يديها وتأخذ المظروف:يالهوي ده الظرف تقيل اوى لاء كده كتير وربنا
يزيد :مفيش حاجه كتير عليكي ياست البنات تجيبي كل اللي ناقصك ولو احتاجتى حاجه تاني تكلميني
إيمان :ربنا يخليك يارب وميحرمني منك ابدا
يزيد :الشركه حتبقى وحشه اوى من غيرك بقولك ايه شهر واحد ولو منزلتيش حاجي اكسر عليكم الباب واجيبم من قفاكي
ايمان :لا وعلى ايه الطيب احسن
بدخل علي:خلاص ياايمان ماشيه
ايمان :ايوة اصلنا حننزل بكرة دمياط نشتري الموبيليا ان شاء الله
على :خدي ياموني
ايمان :لا وربنا البشمهندس لسه مديني
على:وانا مالي بالبشمهندس امسكي يابنتي
ويفتح يديها ويضع فيها المظروف:دي هديتي انا ومروة ولسه بقى لما نجيلك الشقه حنجيبلك هديه تانيه
إيمان :ده تنوروني وربنا انا مش عارفه اقولكم ايه ربنا يخليكم لية يارب
على :بس بقولك ايه عاوزين جاتوه حلو هاه مش من الراجل اللي على اول الشارع اصله الجاتوه بتاعه ردئ اوى
يزبد وايمان :هههههه هههههه
ايمان :احلى جاتوه فى الدنيا كلهاتخرج ايمان بينما تهرب دمعه من عيون يزيد
على:مالك ياام العروسه بتعيطي ليه بس
يزيد :ايوة ام العروسه عندك مانع ربنا يسعدك ياايمان يارب
