لم نتخير من سنقابله فى هذه الحياة نسير فى دروبها ولانعلم بمن سنلتقي ولما يجعلنا القدر نلتقي بهم
هل سيكون لقاءنا بهم لا يتعدى لقاءا عابرا تسلم الأيدي على بعضها وترحل وتناسينا الأيام بمن التقينا فى يوم من الأيام؟
ام كان لقاؤنا بتلك الاشخاص انما هو من فعل القدر لبداية حياة لم تكن فى حسباننا ولم نسع لها فى يوم من الأيام؟
نحن لا نعلم ولا ندرك شيئا مما يخبئه القدر لنا فقط نسير فى تلك الحياة كالريشه التى تتقاذفها الرياح
تلك الرياح التي تجبرنا على اللقاء باناس لم تراهم اعيننا نعرف معهم الحب والفرح واحيانا الدموع والاهات
ولكن مايجب علينا هو ان نأخذ الحياة بكل مافيها نرضى بها بافراحها واحزانها ولا نجعل قلوبنا تنفر منها فهكذا هي الحياة
ياللي بتسأل عن الحياة خدها كده زى ماهيا
فيها ابتسامه وفيها اه فيها اسيه وحنيه
ياما الحياة فيها فيها اللى يكفيها وايه اللى يخليها
الدنيا ريشه فى هوا طايرة مابين جناحين احنا النهارده سوا وبكره حنكون فين فى الدنيا فى الدنيا
يتطاير شعرها الحريري على وجهها مبعثر بفعل تلك الرياح رياح البحر الجميله التي تبعث الاطمئنان فى النفوس
تحاول ان تبعده عن وجهها بينما الآخر ينتظر منها ردا على سؤاله لها ذلك السؤال الذي جعل الكلام يقف فى حلقها يعجز لسانها عن الرد فبم ستجيب عليه وبماذا ستخبره فهي لا تريد أن يتفوه لسانها بكلمه تندم عليها وتفقده الى الأبد
تحاول تجميع الأحرف على لسانها تحاول الثبات أمامه حتى لا ينتابه الشك من أمرها
مالك ياماسه هو سؤالي صعب اوى كده؟
ماسه:لا والله ياحسن انا بس احيانا كتير بكون زهقانه وبحس بالملل فبنزل اتمشى شويه واوقات بشوفك قاعد هنا دايما وبشوف سماعة التليفون على ودنك فبقول اكيد يعني بتكلم إيمان
حسن :طبعا اكيد حكون بكلم ايمان امال حكون بكلم مين يعني
بس بردو ليه بتسألى عن مدى حبي لايمان هو فى حاجه ياماسه
ماسه :لا ابدا مفيش حاجه طبعا ده سؤال بس جه فبالي كده
أصلي يعني لسه مجربتش الحب ومعرفش هو المفروض لما بنحب حد بنعرف نحدد مشاعرنا ناحيته ازاي
ونعرف ازاي اذا كان اللى بنحبه ده بيحبنا هو كمان واللا لاء وهل مشاعرنا ناحيته فعلا حب واللا دي اوهام
حسن :فى ايه يابنتي كل دي اسأله ده كل سؤال فيهم عاوز قاعده لوحده والوقت دلوقتى مينفعش خالص
ماسه :امال ينفع امتى ياحسن
حسن :بعدين نبقى نشوف الموضوع ده المهم دلوقتى ياللا بينا عشان اوصلك زمان مامتك وباباكى قلقانين عليكي
ومش عاوز اشوفك نازله فوقت متأخر زى ده تاني انتي فاهمه
ماسه :انت خايف علية ياحسن
حسن :أكيد طبعا خايف عليكي انتى زى اختي الصغيرة ولازم اخاف عليكي
تشعر ماسه بالاحباط تجاه هذه الكلمه ولكنها تحاول الاتظهر له استيائها من ذلك الرد
يصل بيها الى الفيلا حيث يجد عمار خارج الفيلا
عمار بلهفه:كنتي فين ياماسه ده انا كنت خارج ادور عليكي
ماسه :كنت بتمشى عالبحر شويه يابابي
عمار :وده ينفع بردو تخرجي كده من غير ماتقولي لحد دى مامتك فوق حتموت من القلق عليكي وكمان سايبه موبيلك حرام عليكي موتينا من الخوف يابنتي
حسن :معلش بقى يابشمهندس انا لسه والله قايللها الكلام ده دلوقتى وهى وعدتني انها مش حتخرج تاني متأخر كده
عمار :ازيك ياحسن عامل إيه معلش حقك علية قلقي عليها خلاني انسى اسلم عليك
حسن :ولا يهمك يابشمهندس مفيش حاجه المهم انها اهيه فى ايدك ياللا بقى تصبحوا على خير
عمار :والله ماحيحصل لازم تدخل تتعشى نعانا وتسهر معانا شويه مش كفايه الهانم جي تعباك معاها بالنهار و كمان بالليل
حسن :لا والله مش حينفع يابشمهندس خليها مرة تانيه انا عندي فوج سياحي الصبح بدري ولازم اروح انام
وبعدين تعبها راحه ده انا حخليهالك استاذه فكل حاجه تخص السياحه
عمار :يارب ياحسن عشان تقدر تساعدني بس المهم متكونش تعباك
حسن :لا والله ابدا دى حتى ذكيه جدا وبرغم ان الوقت بيكون قليل جدا وده بسبب شغلي طبعا بس والله استجابتها حلوة اوى ربنا يباركلك فيها يارب
عمار :يارب ياحسن يارب ياللا بينا ندخل بقى
حسن :مانا قلت لحضرتك مش حينفع والله
عمار :بقى كده ياحسن طب والله لو مادخلت لكون زعلان منك بجد انت ليه بتعمل تكليف مابيننا انت مش عارف غلاوتك عندنا واللا ايه ده انت حتى من ريحة الحبايب
حسن :تقصد مين بقى يزيد واللا منتي
عمار :هههههههه ربنا يخليكم لبعض يارب ويفرحنا بيكم قريب حسن :ان شاء الله
عمار:طب اتفضل قدامي ياللا من غير ولا كلمه العشا جوة بيجهز والا بقى اشرقت هى اللى حتزعل منك مش انا
حسن :لا كله الا زعل ست الكل حاضر
فى داخل الفيلا تتحدث أشرقت إلى ماسه :يعني ينفع كده تخرجي من غير ماتقولي يعني انام شويه اقوم أدور عليكي ملاقيكيش وربنا لو عملتيها تاني لاحبسك زى الاطفال
ماسه وهى تحتضنها:خلاص بقى ياشوشو قلبك ابيض
حسن :مساء الخير يا مدام أشرقت
أشرقت :مساء الفل ياحسن كده بردو ياهراب انا زعلانه منك على فكرة
حسن :ليه بس ياست الكل
أشرقت :عشان كل مااعزمك عندنا تتحجج بأي حجه هو احنا مزعلينك فحاجه واحنا مش عارفين واللا ايه
ده انت وإيمان غاليين عندنا اوى وبعدين ادينا فرصه نردلك حاجه من جمايلك
حسن :أولا بقى مفيش جمايل ولاحاجه وثانيا لا وربنا ابدا ده ربنا اللى يعلم غلاوتكم عندنا اد ايه والله ده مفيش مرة اكلم ايمان غير لما تسالني عنكم وحياة ربنا
أشرقت :موني دي حبيبة قلبي وحشتني اوى نفسي اشوفها اوى
حسن :حتشوفوها قريب ان شاء الله
فرح عهد بنت عم يزيد واخت على فرحها قريب اوي ان شاء الله واكيد طبعا حتكونوا موجودين
عمار :أكيد طبعا
أشرقت :بس مقلتليش انت شفت مقصوفة الرقبه دي فين
حسن :اتقابلنا عالبحر وانا وربنا زعقتلها انها نازله فوقت زى ده وجبتهالكم اهوه
أشرقت :ربنا يخليك ياحسن يارب
حسن :على ايه بس دى زيها زى بسمه وبسنت اخواتي والله
عمار :خلينا احنا بقى كده نفضل نتكلم ومناكلش وانا بصراحه عصافير بطني بتزقزق
حسن :ههههههه لا ميخلصنيش ياباشا اتفضلوا
يجلس حسن معهم لتناول وجبة العشاء ولا يخلو الحوار من الضحكات وسيرة ايمان التى لا تخلو جمله منها مما كان يبعث الضيق فى نفس ماسه
تنقضي الليله ويستئذن حسن فى الانصراف ويصعد عمار واشرقت لغرفتهما بينما تتجه ماسه لغرفتها وياخذها التفكير لحسن ومدى عشقها له الكامن فى داخل صدرها له والذي تخشى ان يظهر عليها او ينكشف امرها تجاه امها التى تركز معاها بشكل دقيق
فى داخل حجرة عمار واشرقت
عمار :انتي مالك مكبرة الموضوع كده ليه بس ياحبيبتى
أشرقت :قلبي مش مطمن حسه ان فى حاجه
عمار :يالهوي عليكي مجنونه وربنا
أشرقت :انا عمر احساسي ماكدب علية ياعمار خصوصا تجاه بنتي عمار انا لو محستش ببنتي ابقى مستحقش انى اكون ام وماسه بنتي الوحيده اللي طلعت بيها من الدنيا
عمار :يعني انتي متأكده انها بتحب يااشرقت
أشرقت :زى مانا متاكده ان انت عمار وان انا أشرقت كل تصرفاتها حركاتها اسألتها كلامها بتقول ان بنتك بتحب
عمار :ههههههه معقوله بنتي كبرت وبتحب
أشرقت :عمار انت حتشلني
عمار :الف بعد الشر عنك ياروحي انا مش فاهم ايه اللى يعصبك اوى في حاجه زى دي والله لو بتحب حد كويس يبقى فين المشكله
أشرقت :واحنا عارفين هى بتحب مين واللا مين اللى دخل حياتها بنتك صغيرة لسه ياعمار ملهاش تجارب واحنا مسافرين انا مكنتش بسيبها لحظه واحده لدرجة اني كنت بنيمها جمبي على السرير رجلي على رجليها فكل مكان عمري ماسمحتلها تصاحب ولد كل اصحابها كانوا بنات ربيتها على اخلاقنا وعاداتنا وتقاليدنا عرفتها الصح من الغلط الحلال من الحرام خايفه تكون اتلمت على حد مش كويس يلعب بيها وبمشاعرها
عمار :طب ممكن بس تهدي بدل العصبيه اللى انتي فيها دي
أشرقت :حاضر حاضر يا عمار بص انا حقولك انا ححاول كده بالراحه اتكلم معاها ولو مااتكلمتش يبقى حضطر انى افتش فحاجتها لما تنزل الصبح ماشي يمكن الاقي اى حاجه تدلني
عمار :بس ده يعتبر تجسس يااشرقت
أشرقت :فى الحرب كل شئ، مباح ياعمار
عمار :حرب انتي وصلتيها لكده الموضوع ميستاهلش ده كله ياحبيبتى
أشرقت :لاء يستاهل ياعمار لما يكون متعلق ببنتي ومستقبلها يبقى يستاهل كده واكتر كمان وانا بقى مش حسكت غير لما اعرف مين اللى شاغل قلب بنتي بالشكل ده
يأتي الصباح وتمتلئ الدنيا بنور ربها ويتجه كل شخص الى وجهته تخرج عهد من البيت فتجد سيف فى انتظارها لتوصيلها للجامعه فتفتح الباب وتركب بجواره :صباح الخير
سيف :صباح الفل والياسمين والتمر حنه وقمر الدين والورد المنتور فى كل الرياحين والبساتين
عهد :ههههههه ههههههه كل ده ياسيف
سيف :واكتر بكتير ياقلب سيف ده انا مجهزلك قصايد شعر حقولهالك لما نتجوز كل يوم الصبح اول ماتفتحي عيونك الحلوين دول
عهد :ياسلام يعني انت بتحبني للدرجه دي
سيف :بحبك ده ايه ده انا بعشق أمك
عهد :الله يرحمها
سيف وهو يمسك يديها ويقبلها:اوعدك انى حكونلك ماما وبابا وانور وجدي
عهد :ههههههههه ههههههههه
سيف :يادين النبي لاء حرام عليكي بقى ده احنا لسه عالصبح
عهد :اممممم طب ماشي أكد بقى على حجز القاعه
سيف :بجد ياعهد يعني خلاص الفرح حيتعمل فى معاده
عهد :ايوة ياسيدي ارتحت كده
سيف :ياااه ده انا ارتحت بشكل ربنا يريح قلبك ياحبيبيتى زى ماريحتيني
عهد :ادعي للي اقنعتني انى مااجلش الفرح
سيف :أكيد عليا صح
عهد :ايوة هي حبيبتى عليا
سيف :ربنا يقومها بالف سلامه ان شاء الله
عهد :يارب ياسيف يارب
فى شقة عصام يجلس على الطاوله لتناول وجبة الفطور وهو يحاول التماسك امامها حتى ينجح فى تنفيذ خطته التى اتفق عليها مع علاء
يجاهد فى اظهار غير مايبطنه يحاول الايجعل تعابير وجهه تفضحه برغم ان به من الغل لها مايشعل النيران فى الهشيم بدون وقودا:انا حتاخر النهارده فى الشغل شويه
هاجر :حتتاخر لحد الساعه كام
عصام :مش عارف يمكن لحد سته او سبعه
هاجر :وليه كل ده مش تعب عليك
عصام :تعبكم راحه ياحبيبتى وبعدين كله رزق للبنت مينفعش اقول لاء
هاجر :طب ممكن استئذنك فحاجه بس من غير ما تتنرفز علية
عصام :قولي ياهاحر خير فى ايه
هاجر :يعني مادمت كده كده حتتاخر كنت عاوزة اروح ازور خالي شويه اصله تعبان أوى
عصام :لا ألف سلامة عليه ماشي ياهاجر مفيش مشكله بس متتاخريش
هاجر :متقلقش مش حتاخر هى ساعة واحده بس
عصام :وخللي بالك من دارين
هاجر :انت حتوصيني على بنتي بردو ياعصام
عصام :ماشي انا حقوم بقى عشان متاخرش لو احتاجتي حاجه ابقي كلميني ماتجيبيش حاجه والبنت على دراعك
هاجر :حاضر مع السلامه
تغلق وراءه الباب وتصفق بايديها فرحه بما ستقرر فعله
تجري على التليفون لتتصل بسلمى وتعرف منها ماحدث بينها وبين علاء:صباح الخير يا سلمى
سلمى :صباح النور ياهاجر
هاجر:معلش ياسلمى لو كنت صحيتك من النوم
سلمى :لا صحيتيني ايه انا صاحيه انتي نسيتي اني بقوم اصلي الفجر واستنى لما علاء يصحا وافطره وبعدين بقعد اخلص اللى ورايا واريح شويه لحد الضهر
اطمني ياهاجر انا عارفه انتي بتتصلي ليه انا كلمت علاء ياهاجر
هاجر:بجد كلمتيه وايه الاخبار طمنيني
سلمى :بصي هو فى الاول كان رافض تماما انه يسمعني لكن لما اصريت انه يسمعني اقتنع بكلامي واتاكد انك بتحبيه ومتمسكه بيه
هاجر :طب وبعدين ياسلمى
سلمى :بعدين دي بقى بتاعتك انتي انا لحد كده عملت اللى علية انتى بقى تروحيله الورشه وتتكلمي معاه وبصي متزهقيش زني عليه مفيش راجل مبيجيش بالزن الا اذا بقى كنتي رجعتي فكلامك يبقى ده يرجعلك
هاجر :رجعت فكلامي ده ايه لاء طبعا انا مش ممكن ارجع فحاجه ممكن ترجعني لعلاء
انا متشكرة اوى ياسلمى مش عارفه اقولك ايه بجد انا حلبس واروحله حالا
سلمى:طب ياللا بقى يخرببيتك عاوزه انام شويه انا صاحيه من الفجر
هاجر:ماشي سلام
تفتح الدولاب وتختار ملابس شيك وانيقه وتضع مساحيق التجميل التى تبرز جمالها وتضع العطر الذي كان يعشقه علاء لتثير مشاعره تجاهها مرة أخرى ترفع شعرها للاعلى لتظهر رقبتها حاولت بكل الطرق إبراز مفاتنها التى تجعل علاء يرضخ أمامها ولا يقدر على صدها مرة أخرى
يتجه عصام الى الشركه وعقله ليس معه يحاول ان ينضبط فى عمله وان يتقنه حتى لا يفقده فلم يعد لديه سواه
بينما هي تحمل الصغيرة وتتجه حيث تريد تحقيق أحلامها
بينما هو يمارس عمله بهمه ونشاط حتى ينجح فى كسب الزبائن تخترق أنفه رائحة ذلك العطر الذي طالما كان يعشقه ولكنه الآن اصبح يسبب له اختناقا شديدا ولما لا وهو يذكره باقسى سنوات حياته يمثل انه لايشم شيئا فيجدها تبدأ بالحديث :صباح الخير يا علاء
علاء :صباح النور ياهاجر خير إيه اللى جابك تاني مش قلتلك اياكي تيجي هنا تاني
هاجر:انت تقول اللى تقوله لكن انا اعمل اللى انا عاوزاه
علاء:وهو إيه اللى انتي عاوزاه ياهاجر
هاجر:نرجع لبعض تاني ياعلاء
علاء:حنعيده من تاني مش كفايه اللى حصل ايه مكفاكيش كل اللى حصل عاوزة يحصل إيه تاني
هاجر:مش حيحصل غير كل خير صدقني علاء اديني بس فرصه اتكلم
علاء:انتي كل فرصك خلصت عندي ومش ممكن حقدر اسامحك على اللى عملتيه فية
هاجر وهى تحاول الاقتراب منه وتنظر فى بؤرة عينيه :بس انت لسه بتحبني ياعلاء
علاء:وجبتي الثقه دي كلها منين
هاجر :من عينيك اللى بتحاول تهرب مني علاء كفاياك بقى متكدبش على نفسك اكتر من كده علاء الله يخليك كفايه علينا اللى ضاع جه الوقت اللى لازم كل شئ يرجع تانى لاصله واننا نكون لبعض
اديني فرصه فرصه واحده بس وانا اوعدك انك مش حتندم صدقني انا مستعده اعمل اي شئ فى الدنيا عشان اسعدك وافرحك
علاء :حتعوضيني عن اللى راح ياهاجر
هاجر :ايوة والله حعوضك اذا كان قصدك بالنسبه لسما الله يرحمها فلما نرجع لبعض حجيبلك دستة عيال صبيان وبنات وحهتم فيهم وارببهم واخليهم يملوا عليك الدنيا
علاء :طب وبالنسبه للفلوس اللى لية عندك اللى كنت عاملك بيها حساب فى البنك واللى سرقتيها ياهاجر دي مش فحساباتك
هاجر :لا طبعا ازاي دي فلوسك ياحبيبي وانا عمري ماحاكلها عليك واحنا أول مانرجع لبعض حتبقى تحت أمرك ان شالله تاخدها كلها المهم نكون مع بعض تانى
علاء:لا لا بصي انا مش حقدر ارجوكي ياهاجر متضغطيش علية اكتر من كده روحي لحالك وسيبيني لحالي
هاجر :مانت حالي ياعلاء الله يخليك ياعلاء الله يخليك اديني بس الفرصه
علاء :طب حتى لو افترضنا انى وافقت البنت اللى على كتفك دي حتعملي فيها إيه اانا معنديش استعداد اربي بنت مش بنتي
هاجر :حسيبها لأبوها
علاء :بسهوله كده حتسيبيها لأبوها
هاجر :لا طبعا هو مش بسهوله علية انى اسيبها دي مهما كان بنتي لكن حعمل إيه انا مش حعرف اكمل حياتي مع حد غيرك انت انا عندي استعداد اتنازل عن اي شئ فى الدنيا مهما كان غالي بس ابقى معاك
علاء :وانتي إيه عرفك ان جوزك حيوافق يطلقك مش يمكن يرفض ويتمسك بيكي واللا هو مبيحبكيش
هاجر :عصام بالعكس ده بيموت فية ده ساب خطيبته عشاني لكن انا بحبك انت
علاء:ولما هو بيحبك وساب خطيبته عشانك عاوزة ترجعيلي انا ليه
هاجر :عشان انا بحبك انت ياعلاء مش قادرة أكمل معاه اكتر من كده
علاء :طب اديكي قلتي اهوه بيحبك حيوافق يطلقك ازاي بقى
هاجر :عصام عنده كرامه ولو عرف اني مبقتش عاوزاه حيطلقني
علاء :طب ياللا وريني الشطارة بقى
هاجر :علاء انت بتتكلم بجد يعني انت موافق خلاص اننا نرجع لبعض علاء الله يخليك متلعبش باعصابي
تقع عين علاء على الكرسي الذي وضعت عليه هاجر صغيرتها فوجد الشمس مسلطه عليه فانخلع قلبه عليها وحملها سريعا:الشمس اكلت وش البنت
هاجر :مااخدتش بالي انا لما نيمتها عالكرسي مكنش فيه شمس
علاء:الشمس جت عليها ووشها سخن
هاجر وهي تحملها عنه:لسه قلبك طيب زى مانت ياعلاء
ثم تقبل طفلتها امامه:شفتي يادارين عمو علاء خاف عليكي ازاي ياللا عشان لما تكبري تيجي عندنا وتشوفيه وتلعبي مع اخواتك
علاء :وياترى أخواتها حتحافظي عليهم واللا حتعملي فيهم اللى حصل لاختهم
هاجر :انسى بقى الله يخليك انسى وانا اوعدك انك حتشوف هاجر تانيه خالص
علاء:ماشي يا هاجر انا حديكي فرصه تانيه بس هي فرصه مفيش غيرها انتي فاهمه
هاجر :ياحبيبي ياعلاء انا كنت متأكده انك حتسامحني
علاء :ادعي لسلمى هى اللى فضلت تزن على دماغي وتضغط علية اني اديلك فرصه تانيه
هاجر :ربنا يخليها يارب ويعوضها بابن الحلال اللى يريح قلبها
انا حطلب منه الطلاق النهارده وحكلمك واقولك اللى حصل
علاء :ماشي ياهاجر وانا حستنى منك مكالمه
تمشي هاجر والفرحه بعودتها لعلاء تكاد ان توقف قلبها بينما يتتبع علاء اثرها بابتسامه ساخرة ويلتفت الى السيارةالتى كان يصلح مابها ويستكمل عمله
فى داخل الشركه يجتهد الجميع فى عملهم الكل يعمل فى صمت خلية نحل تعمل بكل جد ونشاط
يدخل عمر مكتب يزيد:يزيد أوراق المناقصة جهزت خلاص يااه يايزيد لو المناقصه دي رسيت علينا الشركه حتتنقل نقله تانيه خالص
يزيد :ايه بتقول حاجه ياعمر
عمر:يزيد الله يخليك فوق معانا شويه كده مينفعش احنا صحيح كلنا بنشتغل بكل طاقتنا بس انت حاجه تانيه يايزيد
يزيد :غصب عني والله ياعمر مش عارف اركز ولا قادر اعمل حاجه احساسي بأن عليا ممكن
يسكت عن الكلام وتدمع عيناه
يجلس عمر أمامه ليتحدث اليه :يزيد ممكن تسمعني شويه
يزيد :عاوز تقول إيه ياعمر
عمر:عاوز أقول ان من يوم ماعليا وعلي اتولدوا وعليا مريضة قلب انا فاكر لما عملولها عملية وهي عندها اربع سنين عشان تقدر تعيش فترة مش اكتر
الكل بيتعامل معاها بحنية وطيبه وهى تستاهل واكتر كمان عشان عارفين ان عمرها قصير
صحيح الأعمار بيد الله بس حنعمل ايه والحمد لله كبرت وهي متكيفه مع مرضها
وبرغم ان مرضها وحالة قلبها تمنعها من الجواز مابالك بقى بالخلفه
إنما ارادة ربنا ورحمته بيها تعدوا كل الحدود وقدرت انها تتجوز ومش بس كده لاء وتخلف كمان
وانت عمرك ماقصرت معاها يااخويا ويوم ماربنا أراد ان خلاص ييجي الفرج وتعمل العمليه اكتشفنا حملها
وده أكيد لحكمه عنده مين كان يعرف لو عملت العمليه فعلا مش يمكن كانت ماتت وانت كنت حتحس بتانيب الضمير وكنت وقتها حتتهم نفسك انك السبب في موتها مكنتش بقى
حتقول انا كنت عاوز اساعدها لاء وقتها كنت حتقول ياريتني ماكنت عملتلها العمليه واهي على الاقل كانت عايشه فوسطنا
يعني فكل الاحوال انت مكنتش حتكون مرتاح يايزيد
يزيد الحيا والموت ده مش بايدنا ده بايد ربنا وحده
فاكر البشمهندس خالد يوم ما كنا رايحينله البيت عشان نزوره لما جاله كانسر وأول ماوصلنا ادام البيت وسمعنا صوت صويت توقعنا ان هو اللى مات طبعا ماهو اللى عيان يبقى اكيد هو اللى مات
واكتشفنا ان اللى مات اخوه الصغير اللى كان لسه متجوز ومراته حامل والغريب انه لاكان عيان ولاحاجه دخل ينام مصحاش
والله انا قلبي وجعني يوميها والدموع نزلت من عيني لما سمعت مراته بتحكي وهي منهارة وبتقول انه دخل المطبخ وشم ريحة الأكل وكان عاوز ياخد حتة لحمه وهي قلتله اصبر ياحبيبي لما ناكل سوا قاللها طب انا داخل انام شويه وصحيني اول ماالاكل يجهز دخلت تصحيه لقيته مات
وهي تعيط وتقول ياعيني عليك ياحبيبي مات قبل ماياكل اللحمه ميت ونفسه فيها ياريتني كنت سيبتك تاكل الحله كلها
وتقول يكونش زعل مني عشان مرضتش اخليه ياكل وحط فنفسيته مني ومات
انا بعد ماكانت الدموع فى عينيه اقسم بالله بقيت ماسك نفسي من الضحك بالعافيه وعلي يضربني فرحلي ويقوللى بس الله يخرببيتك
لاء والغريبه ان خالد لسه عايش لغاية النهارده مع انه كان محسسنا انه بيحتضر خلاص
محدش يعرف يحسبها ياابو عشق ربك ليه حسابات تانيه خالص
سيبها على الله محدش يعرف مين اجله قبل مين وعلى راي المثل ازي عيانكم قاللوا سليمنا مات
يزيد :ونعم بالله ياعمر انا عارف والله ان معاك حق فكل كلمه قلتها بس غصب عني والله
عمر :ربنا ينجيها يارب ويقومهالنا كلنا بالف سلامه أن شاء الله
يزيد :بس انا عاوز اعرف حاجه بقى ايه ياعم العقل اللى نزل عليك مرة واحده ده انا حاسس ان اللى قدامي مش عمر خالص
انت اتغيرت اوى ياعمر فين عمر المكابر اللى بيعند فى اى شئ المهم يعند وبس
اللى عمره ماحس بالمشاعر تجاه حد
انت اتغيرت اوى ياعمر بجد انا فرحان بيك اوى انا عمري ماتخيلت ولاجه فى بالي انك ممكن حالك يتغير بالشكل ده
عمر :شمس يايزيد وجودها فحياتي هو السبب فى كل التغيير ده مفيش حد قدر يحس بية ولا بمشاعري زيها مفيش حد عرف يخرج عمر الحقيقي من جوايا زيها
انا اتعلمت منها حاجات كتير اوي انا حفضل مدين ليها بيها طول العمر كفايه انها كانت السبب فى ان علاقتي بماما هاله تتحسن بالشكل ده انا عمري ماتخيلت انى ممكن اتعامل معاها مش احبها الحب ده كله شمس دى بجد اكبر نعمه وهديه من ربنا
انت عارف يايزيد برغم انها يتيمة الام زيي وعانت نفس المعاناه فى الحرمان من الام وكانت المفروض تلاقي اللى يحتويها لكن سبحان الله هى اللى قدرت تحتويني قدرت تاخدني فحضنها وتضمني ليها اوى زي مااكون ابنها الصغير اللى خايفه عليه اكتر من نفسها
انا بشكرك انت وايمان وعلى وكل اللى ساعدونا اننا نقرب من بعض وان الحب يتولد جوانا
يزيد :ياحبيبي ياعمر ربنا يسعدكم ياحبيبي يارب ويفرح قلوبكم وتفرحونا كده بنونو صغير
عمر :ان شاء الله يا حبيبي تخيل بقى البيت يتملى ولاد ده احنا حنبقى مدرسه
يزيد :يارب يزيدنا مينقصناش ابدا يارب
تطرق على الباب بهدوء وتدخل :السلام عليكم
عمر ويزيد :وعليكم السلام ورحمة الله وبركاته
إيمان :متجمعين عند النبي ان شاء الله
يزيد :يارب ياموني يارب
إيمان :بس تاخدوني معاكم مليش دعوة
عمر :ناخدك معانا ههههههه ههههههه
إيمان :ليه ان شاء الله مشبهش واللا مش اد المقام
عمر :لا وربنا يامنتي مااقصد ده انتي حبيبتنا ياقلبي بس قصدي انك حتخللى الحج مسخرة والحج كده حيتقلب ملهى ليلي وبدل مانكفر عن ذنوبنا حنركب نفسنا ذنوب جديده.
إيمان :تصدق انى غلطانه اني بفرفشكم واسعدكم يابني ده انا وظيفتي هنا في الشركه فرفشة الجميع
نحن شمعه تحترق من اجل اسعاد الاخرين
عمر :ههههههه مانا عارف انتي حتقوليلي
إيمان :بقى انت بتقول علية مسخرة امال لو قعدت مع حماتي حتقول عليها ايه
عمر:هي ام حسن من نوعيتك بردو
إيمان :عينه واحده وغلاوتك ياعمورةنفسي تتكتبلك وتقعد معاها عارف مسخرة السنين اقسم بالله فيلم كوميدي ده ايمان بجلالة قدري مجيش فيها حاجه
احلى حاجه بقى لما تكون مخنوفه من حد وبتتكلم عليه تفضل تتكلم تتكلم وبعدين تقول يقطعك يالساني بقى الزباله دول اسيبهم ياخدوا من حسناتي وهو انا ناقصه ده كل اللى حيلتي شوية حسنات يتعدوا عالصوابع
اقوللها متقوليش كده ياحبيبتى ده انتى طيبه
تقوللي وانا فى حاجه موقعاني على الاشكال الزباله غير طيبتي بس اهم بياخدوا من حسناتي بس اعمل ايه ماهما لو ما كنتش عمايلهم سوده مكنتش حتكلم
ياللا دع الخلق للخالق
عمر ويزيد:ههههههههه ههههههههه
عمر :لا وربنا انتي كده خليتيني نفسي اشوفها
إيمان :وربنا عشريه وعسل وبتموت فى الناس وقعدتها متشبعش منها ده انا بقعد معاها اكتر مابقعد مع ماما والغريبه انها تهزئني وتبهدلني وكل شويه تقوللي قطيعه تقطعك انتى وحسن واول ماتلاقيني اتقمصت تقوللى لا ياحبيبتى ده انتى اغلى عندي من بناتي
عرفت بقى اني عسل واللا لسه معرفتش
عمر :ده انتي عسل وسكر ياموني
يزيد : انتي على راسنا ياايمان كلنا وغلاوتك عندنا ملهاش حدود وكل اللى فى الشركه بيحبك ويقدرك عشان طيبة قلبك وخفة دمك وجدعنتك اللى ملهاش حدود
إيمان :ان شاالله يخليك ياباشا يارب ويقوملك مزتك بالف سلامه
ثم توجه كلامها لعمر:شايف الكلام الحلو مش كلامك الدبش انا عارفه البت شمس دي بتحبك على ايه
عمر :وانتي بقى بتحبي سي حسن بتاعك ده على إيه
ايمان :سونه وهو في زيه يالهوي عليه وعلى جمال امه ده حبيب قلبي
عمر :ههههههه ماشي ياستي وهو بصراحه يستاهل كل خير
إيمان :ايوة كده صلح
بقولك ايه يابرنس كنت عاوزاك فى خدمه كده
يزيد :اؤمري ياقمر
إيمان :فى بيت جمبنا بعيد عنك يارب ناموا ونسوا الاكل على النار وحصلت حريقه جامده اوى والحمد لله مفيش حد حصلله حاجه وكلهم بخير بس المشكله ان البيت بقى حتة فحمه كل حاجه ياعيني راحت هدومهم وعفشهم وعشان الببت يرجع زى ماكان عاوز مبلغ كبير اوى المهم يعني اهل الشارع كلهم ربنا يسترهم يارب جمعوا مبلغ عشان يساعدوهم عشان هما غلابه اوى واناقلت يعني لو حضرتك تحب تشارك معانا فى الثواب ده يبقى كتر الف خيرك
يزيد :تروحي معايا النهارده وتوديني البيت ده وملكيش دعوة بعد كده
إيمان :ربنا يسترها معاك يارب دنيا واخرة ويوقفلك ولاد الحلال فطريقك ويرزقك ويقوملك مراتك بألف سلامه يارب
يزيد :يارب ياايمان يارب
يفتح الباب وكأنما يفتح باب الجحيم يحاول الا يظهر شيئا مما يبطنه
يحاول أن يرسم على وجهه الابتسامه وبداخله نار موقده بقدرتها ان تشعل الأخضر واليابس :مساء الخير
هاجر :مساء النور ياعصام
عصام :ايه الجمال ده كله ياهجورة
هاجر :جمال جمال ايه
عصام :تعرفي اني حاسس انك وحشاني أوي النهارده
هاجر :اشمعنى يعني ده انت مبقتش بتطيقني ونظراتك لية كلها كره
عصام :كره وهو لو انا بكرهك ياهاجر كنت اتجوزتك ليه
هاجر :عصام انا عاوزة اتطلق
عصام :نعم انتي قلتي ايه
هاجر :بقولك عاوزة اطلق ياعصام احنا مبقناش طايقين بعض ولا الحب اللى كان فى قلوبنا بقى ليه وجود يبقى ايه لزمته اننا نعيش مع بعض انا شايفه ان الافضل لية وليك ان كل واحد فينا يروح لحاله لاننا خلاص مبقناش نافعين لبعض
يمسكها عصام من ذراعيها بقسوة :انتي إيه الكلام اللى بتقوليه ده انتي اتجننتي يعني انتي بعد ماخسرتيني كل حاجه فحياتي عاوزة تسيبيني طب كان ليه من الاول انطقي قولي كان ليه
هاجر :عصام من فضلك انت راجل متحضر وأكيد مش حتقبل على كرامتك انك تعيش مع واحده مش عاوزاك
عصام :انتي فاكراني اهبل واللا برياله انا عاوز اعرف انتي ايه اللى فى دماغك بالظبط عاوز اعرف انتي بتقولي كده ليه
عاوزة فلوس عاوزة هديه عينك على خاتم واللا غويشه وبتقولي كده عشان تضغطي علية واجبلك اللى عاوزاه
هاجر وهى تفلت يديها منه التى كادت ان تنكسر فى يديها :انا مش عاوزة منك حاجه انا عاوزاك تطلقني وبس انا مبقتش عاوزاك مبحبكش يااخي انا مش عاوزة اعيش معاك بكرهك افهم بقى ايه حتجبرني اعيش معاك بالعافيه حترضاها على كرامتك ياراجل
عصام :ولما انتي مش عاوزاني وبتكرهيني اوي كده اتجوزتيني ليه خليتيني اسيب خطيبتي ليه خربتي علية حياتي ليه ليه
هاجر :والله انا مضربتكش على ايدك انت اللى ماصدقت اول ماشاورتلك وقلتلك كلمتين جيت تجري ورايا لوم نفسك ياعصام قبل ماتلومني
متعملش نفسك مظلوم ياحبيبي ومتمثلش فيها دور البرئ المجني عليه وانا بقى الجلاد
انت لو كنت بتحبها أصلا مكنتش جريت ورايا اول ماشاورتلك ده زى ماتكون ما صدقت كنت على شعرة عملت نفسك الاول بتحبها وضميرك بيانبك وبعد كده قلتلها بالسلامه والقلب داعيلك كانت فين حنية قلبك دي وانتى بترميها زي ماتكون كوم زباله وماصدقت خلصت منها
فوق ياروحي ومن اعمالكم سلط عليكم ياعصام فبلاش تعملهم علية ده احنا دافنينوه سوى
واسمع بقى عشان ده اخر كلام عندي انت حتطلقني يعني حتطلقني
عصام:اه يابنت ال………….. ياواطيه يازباله انا اللي استاهل انا اللى عملتلك سعر وانتي ارخص واحده شفتها فحياتي بس انتي ليكي حق تقولي كده مانا فعلا اللى استاهل كل اللي جرى لي
اخذ يلكمها بالضربات فى كل مكان بجسمها
كان صوتها يدوي فى البيت كادت ان تموت فى يديه لم يبعده عنها سوى صراخ الصغيره التي استيقظت من نومها على هذا الصراخ واخذت تبكي بشده
جرى عصام عليها اخذها فى احضانه وكانما يحمد الله على انه انقذها من تلك الشيطانه التى لاتستحق ان تكون اما
التى تجردت من كل مشاعر الامومه والإنسانية
خرج اليها وجدها مسطحه ارضا تنزل الدماء من انفها وعلى وجهها علامات الضرب امسكها من شعرها بقسوة :عاوزة تطلقي حطلقك وتغوري فداهيه
ووشك ده مشوفهوش تاني انتي فاهمه
هاجر :ايوة عاوزة اطلق انا حاخد هدومي وامشي ومش عاوزة ادخل بيتك ده تاني
عصام :مش بسهوله كده ياحلوة انا مش حطلق غير بعد ماتتنازلي عن كل حاجه
هاجر :كل حاجه ازاي يعني
عصام :حتتنازلي عن حضانة البنت حتتنازلي عن المؤخر حتتنازلي عن اي مستحقات ليكي عندي حاخد منك الدهب اللى اشتريتهولك خليني اسدد الديون اللي علية
حتخرجي من هنا بشنطة هدومك موافقه واللا عندك راي تاني
هاجر :موافقه موافقه بس تطلقني
يدخل عصام غرفته ويحضر كل الاوراق التى قد اعدها من قبل استعدادا لذلك الموقف
يضع الورق أمامها :امضي
تأخذ هاجر الاوراق وتمضي على كل الأوراق
هاجر :طب بنتي حتخليني اشوفها
عصام :هههههههه تصدقي ضحكتيني بنتك هو انتي اصلا بنتك فدماغك ده انتى اتنازلتي عن حضانتك ليها بمنتهى السهوله
عملتلك أيه عشان تعملي كده اذيتك فايه عشان تاذيني انا وبنتك بالشكل ده ده انا محدش حبك فى الدنيا ادي ده انا اديتك كل حبي ومشاعري
انتي مجردة من اى مشاعر طب انا وكرهتيني خلاص طب بنتك العيله اللى لسه في اللفه دى هانت عليكي ترميها بالشكل ده ده لبنها لسه فصدرك
لسه مشبعتش منه لسه ملحقتش تعرف طعمه
هان عليكي تحرميها منه طب لما تشوفي اللبن وهو نازل من صدرك وبيحن اانتى مش حتصعب عليكي بنتك
انتي ايه ياشيخه انتي لا يمكن تكوني بنى ادمه انا لولا خوفي على البنت الغلبانه دى اللى كل ذنبها فى الدنيا انك امها من انها تبقى يتيمة الام والاب لولا خوفي عليها من الدنيا الغدارة دى انا كنت خنقتك بايديه ومسبتكيش غير وروحك طالعه فى ايديه
لكن انتي اصلا بالنسبه لى بقيتي ميته وبالنسبه لبنتك بردو حتبقي ميته ولو فكرتي تقربي مننا فيوم من الأيام وقتها مفيش قوة فى الدنيا حتمنعني من انى اغرز السكينه فقلبك
قلبك اللى الحجر احن منه
غوري فداهيه مش عاوز اشوف وشك تاني اطلعي برة بيتى ياقذرة ياواطيه انتى طالق طالق طالق انتي طالق بالتلاته
يرميها خارج الشقه ويغلق خلفها الباب ويجلس على الأرض ويبكي بشده على ماوصل إليه
بينما هي تجري على بيت علاء وقد ظنت انها وجدت الخلاص وانها نالت ضالتها ولن يفرق بينها وبين علاء شئ
بينما هو يبكي يجد هاتفه يعلن عن اتصال :خلاص ياعلاء انا طلقتها واكيد جايالك
علاء :تمام كده سيبها لى بقى هى كده بقت فملعبي وهي اللى جبته لنفسها وحفرت قبرها بايديها
عصام :وجعتني اوى ياعلاء بس تعرف عندها حق فكل كلمه قالتها انا استاهل كده واكتر
، خلاص ياعم عصام اهدى كده اعصابك يجرالك حاجه احنا لسه عاوزينك فى الروايه دورك لسه مخلصش
مش طلقتها انفضينا بقى سيب علاء بقى يظبطهالك ويعملك منها بوفتيك وبطاطس محمرة
عصام :اعمل ايه بس يابيرو مانتي خليتيها عصبتني دى بنى ادمه زباله جاتها الأرف انا عارف بتجيبي الاشكال دى منين
بس ايه. رايك فيها بذمتك مش ظبطها
لا يااخويا انا مليش فيه الفانز هما اللى يقولولك رايهم ولاحظ انهم اصلا مش طايقينك ولو عليهم كانوا عاوزين يولعوا فيك مع هاجر مانت مش عدل يعني كفايه اللى عملته فشمس واللا نسيت 
عصام :حقكم علية والنبي محدش يزعل مني واوعدكم انى حصلح كل حاجه ومش حسيب شمس غير لما تسامحني وانا بقى ربنا يقدرني واربي بنتي كفايه علية لحد كده
تبت الى الله 
طب روح يافالح غير للقمر دى ريحتها طلعت فى الروايه
كفايه ادهم علية انا استويت بامبرز
عصام :حاضر ياام ادهم انتي تؤمري
هاه ياجماعه الراجل طالب منكم تسامحوه وبيوعدكم
انه يحاول يطلب السماح ريحوه قولوله اى كلمه تطيب خاطره مكدبش عليكم هو الصراحه صعب علية معلش اصل هاجر دى بنت لذينه حظها وقعها فى اتنين واحد طيب والتاني أهبل
