رواية زهرة في مستنقع الرذيلة للكاتبة جيهان عيد الفصل الخامس والأربعون

رواية زهرة في مستنقع الرذيلة للكاتبة جيهان عيد الفصل الخامس والأربعون

فوجئت زهرة بنانا تأتى لزيارتها بالجريدة.
زهرة: أخيراً، أيوه كدة يا نانا اخرجى، الدنيا ما بتقفش على موت حد.
نانا: مراد جالى في الحلم، قولت له سامحني، قال لى مسامحك، وسامحينى أنتى كمان، إحنا الاتنين غلطنا، خلي بالك من نفسك ومن العيال.
زهرة: فعلا أنتوا الاتنين غلطتوا.

نانا: أنا عايزة أعمل صدقة جارية على روح مراد يا زهرة، عايزاكى تيجي معايا لمستشفى 57 نعمل حاجة باسمه، مراد تعب وشقى في الدنيا كتير وما لحقش يتمتع بفلوسه، يبقى يستفيد بيها في أخرته.
زهرة: برافو عليكي، أحسن قرار خدتيه.

وحسب الموعد المحدد لهما من سكرتيرة الجريدة حضر رجل وسيدة في مقتبل العمر لمقابلة زهرة.
مظهر الرجل والسيدة التي معه يدل على الثّراء والذوق الرفيع معا، هي لا تبالغ في ارتداء المجوهرات، فقط خاتم من الماس وسلسلة من الذهب اللازوردى فيها قلب صغير، به الحرف الأول من اسمها والحرف الأول من اسم زوجها.
رحبت بهما زهرة وسألتهما عن المشكلة التي جاءا للبحث عن حل لها.

زهرة: الاسم المتسجل عندى مدام حبيبة والباشمهندس أسامة.
أسامة: قصد حضرتك الباشمهندس أسامة ومدام حبيبة.
زهرة: ما علينا، الباشمهندس أسامة والمدام، مشكلتكوا إيه؟
أسامة: اسمحيلي أتكلم أنا الأول.
زهرة: اتفضل.
أسامة: لما أتقدمت لحبيبة، وافقت على كل شروط أهلها، جيبت أكتر من اللي طلبوه، في المقابل كان ليا طلب واحد، إننا ما نخلفش.
زهرة: جوازة تانية ومش عايز المدام تعرف؟
حبيبة: لا أنا الزوجة الأولى والوحيدة له.

زهرة: طب إيه الشرط الغريب ده؟ شايفة حالتكوا مستورة ما شاء الله، كنت قولت بسبب ظروف اقتصادية.
أسامة: أنا مهندس برمجيات، شغال في شركة أجنبية، بأقبض بالدولار، طول عمري عايش في مستوى كويس، الحمد لله ما قلتش عنه، بل على العكس.
زهرة: الأب والأم منفصلين عشان كدة خايف تخلف ويحصل انفصال؟
أسامة: لا أبداً، أنا الحمد لله أتربيت في أسرة مترابطة، متحابة، الاحترام والمودة بتربط كل أفراد الأسرة.

زهرة: طب ليه مش عايز تخلف؟
أسامة: العالم ده بالظروف اللى حوالينا دى مكان لا يصلح للعيش، أنا مش هكرر مأساة طفل يتولد على غير إرادته في عالم ظالم وحزين مليان أوبئة وحروب وصراعات.
زهرة: إيه الكلام الغريب ده؟ وهو أمتى الحروب والصراعات وقفت؟ ما أنت أهلك جابوك وكان في حروب وصراعات.

أسامة: ومين قال لك إنى سعيد؟ أنا طول حياتى عايش في صراع، لازم تذاكر عشان تبقى الأول، حتى بعد ما أشتغلت في حرب طول الوقت، لو ريحت شوية هأنداس، إحنا في طواحين، ما أحبش إن ابنى يعيش اللى أنا عيشته ولا يشوف اللى أنا شوفته.
زهرة: هي متعة الدنيا، في الحركة، في التحدى، في الصراع، والطفل اللى أنت مش عايزه ده هو اللى هيهون عليك صعابها.

أسامة: يعنى عشان ألاقى حاجة تهون عليا أجيب طفل أعذبه، مش يمكن هو ما يحبش يجي الدنيا دى ولا يعيش فيها.
زهرة: في حاجات بديهى تحصل، ما حدش أهله خدوا رأيه قبل ما يجيبوه، جيبه الأول وبعدين خد رأيه.
أسامة: الموضوع مش هزار على فكرة، وبعدين أنا عايز أنجح وأتقدم في عملى من غير أى معوقات.
زهرة: هو الطفل هيعوقك في إيه؟
أسامة: النهاردة عيان، بكرة عايزك في اجتماع مجلس الأباء، وبعده وبعده، مسؤليات أنا مش قدها.

زهرة: يعنى أنت عايز جواز من غير التزامات ولا مسؤليات؟ جواز زى جواز المتعة، ده مرفوض دينياً، ربنا خلقنا عشان نعمر الأرض.
أسامة: وهو أنا اللي هأعمرها؟ أنا مش مؤهل لتربية أطفال، أخاف أظلمهم.
زهرة: والناس الطيبة اللى ما كانتش متعلمة وأولادهم بقوا علماء ودكاترة ومهندسين كانت مؤهلاتهم إيه؟
أسامة: ما جاتش عليا، مش ابنى اللي هيعمر الدنيا؟
زهرة: منطق غريب، وطبعا أنتوا جايين عشان المدام عايزة تخل باتفاقها.

حبيبة: فعلا يا مدام زهرة، ونفسى تقنعيه يغير رأيه.
زهرة: أنتي إزاى أصلا وافقتى على شرط زى ده؟
حاولت حبيبة أن تتكلم لكن أسامة قاطعها قائلا: كانت بتهاودنى، قالت نتجوز وبعدها أحطه قدام الأمر الواقع، ومن أسبوع بتهزر وتقول لى لو حملت هيحصل إيه، على فكرة أنا كنت مأمن نفسى بوسايل تانية، هي اتفاجئت بكدة ومن وقتها وهي عمالة تتحايل عليا، لا يا هانم أنا ما خدعتكيش، إحنا متفقين.
زهرة: اتفاقكوا باطل.

أسامة: تقدر تطلب الطلاق.
حبيبة: أنا بأحبك يا أسامة ونفسى يكون لى طفل منك.
زهرة: اديها وادى نفسك فرصة، يبقى لك ابن حتة منك، امتداد ليك، يكبر قدام عينيك، تتابع تفاصيله الصغيرة، ده كفاية تشم ريحته، سالت دموع زهرة وهي تتكلم.
حبيبة: أنتى بتعيطى يا مدام زهرة؟
زهرة: سبحان الله ناس هتموت على ضفر عيل، وناس مش عايزة.
أسامة: أنا آسف يا مدام.

زهرة: لو أنت قادر تخلف يبقى أنت في نعمة كبيرة، احمد ربنا عليها، وبلاش تضيع الفرصة، في ناس بتدفع ألوف عشان يبقى لها طفل، خلف وأنت بصحتك، طفل تنسى هموم الدنيا لما تبص في وشه، العالم صحيح مخيف لكن اللى بيهون علينا وجود حد نحبه، ونخاف عليه.
انصرف أسامة وحبيبة ويبدو أنه غير مقتنع بكلام زهرة.