رواية يكفيني منك عقابا الفصل الخامس 5 بقلم عبير سليم
رواية يكفيني منك عقابا الجزء الخامس
رواية يكفيني منك عقابا البارت الخامس
رواية يكفيني منك عقابا الحلقة الخامسة
بسم الله الرحمن الرحيم
طبعا المفروض ان ده مش، معاد تنزيل الحلقه المفروض ان معادها بكرة الساعه عشرة بس انا اول ما خلصتها قلت انشرها و اخلص لأنها مبقتش فارقه معايا
انا كنت عامله معاد لتنزيلها على اساس انكم تكونوا منتظرينها لكن اتضحلي اني بضحك على نفسي و انكم لا بتكونوا منتظرينها و لا غيره و الحلقه بتنزل و بتعدي ساعه و اتنين و تلاته و انا قاعده مستنيه لايك و اللا تعليق حاجه تضحك الصراحه عشان كده قلت انزلها و خلاص
كده كده مبقتش فارقه معايا خلاص انا اصلا كتبت الحلقه من غير نفس و لا فكرت اراجع عليها و لا حتى اشوف انا كتبت ايه
و لا حنتظر منكم لايك و لاتعليق و بشكركم على تقديركم لية
في روايات تانيه بمجرد ما بتنزل بلاقي ما شاء الله اللايكات و التعليقات زي المطرة و الله ما قصدي احسد حد ربنا يوفق كل كاتبه و يديها على اد تعبها يا رب لكن انا بردو بزعل على روايتي بقول ايه ده للدرجه دي روايتي وحشه و انا كاتبه فاشله بجد انتوا افقدتوني الثقه في نفسي
و لولا اني بحب اكون عند وعدي و احترامي ليكم و لقرائي اللي بيحترموني كنت وقفتها خالص و وفرت وقتي لولادي و بيتي و صحتي و عنيه لكن انا على احترامي ليكم
بذمتكم في حلقه عالواتباد نسبة مشاهدتها تكون بالمنظر ده و لا في حتى كلمه تحسسني اني كتبت حلقه و تعبت فيها
عالعموم انا احتمال كبير اوقفها عالواتباد و اللي عاوز يقراها يقراها علفيس و اللي مش عاوز براحته هي اكيد مش فارقه معاه
و دلوقتى حقول بسم الله الرحمن الرحيم
كم من أمور تدور بعقولنا و قلوبنا و لا تستطيع الافمام النطق بها و الإفصاح عما بداخلها و لكن وقت اللاوعي نفقد القدرة و التحكم في أنفسنا ليتلفظ اللسان بما حاول أن يخبئه دائما و ها هو عامر في تلك اللحظه و هو لا يشعر بما يدور حوله لا ينطق فمه الا بما يستحوذ على كيانه فينطق اسمها اسمها هي فقط دونا عن بقية الأسماء و ما ان نطق اسمها و في نفس اللحظه التي ينطق فيها كلمة حاول مرارا و تكرارا النطق بها و لكن كان هناك من يمنعه من الإعلان عنها نعم أنها كلمه ستحييه سترسم له طريق السعاده و الأمل في الحياة كلمة بحبك
و لكن لضعف بنيانه فقد نطقها بصوت ضعيف يكاد ان يسمع بصعوبه
نجد الممرضه تفتح الباب و كأن القدر ارسلها في تلك اللحظه حتى لا تنتبه الفتاتان إلى ما نطق به عامر
يا للا من فضلكم اتفضلوا قوموا
عتاب : دجيجه واحده بس
الممرضه : من فضلكم كده غلط و خطر على صحة المريض
عطر : حاضر احنا جايمين اهوه و تمسك بيد اختها : جومي يا عتاب
تقوم عتاب و قلبها منفطر على ذاك الذي لا حول له و لا قوة
تمسك بيد اختها و يخرجان بينما هو أعاد الكلمه مرة ثانيه و لكن بعد ان كانا قد خرجا بالفعل : عطر بحبك
و بمجرد ان دلفت الفتاتان إلى الخارج حتى ظلت عتاب و عطر يبكيان على حال أبناء عمهما
في غرفة الطبيب
نعمان : خير يا دكتور ناصر
دكتور ناصر : خير ان شاء الله يا حاج نعمان
نعمان : لا شكلك مبيجوليش ان في خير جوللي في ايه الله يخليك حد من ولادي فيه حاجه عفشه و احنا منعرفهاش
دكتور ناصر : طبعا انت عارف ان مصعب انصاب برصاصتين واحده في كتفه و التانيه في جمبه
نعمان : دراعه حصلله حاجه
دكتور ناصر : لا يا حاج دراعه سليم الحمد لله لكن المشكله في الرصاصه اللي صابت جمبه للأسف
نعمان : للأسف ايه حوصل ايه جول الله يخليك
دكتور ناصر : اخترقت الكليه و الكليه تلفت و اضطرينا اننا نستئصلها و اني مرضيتش اجولك غير بعد ما تطمن على ولادك و تشوفهم بعنيك
نعمان : شلتولوا الكليه لا حول ولا قوة الا بالله العلي العظيم قدر الله و ماشاء فعل
يا ضنايا يا مصعب يا بني
يعني هو دلوك حيعيش بكلية واحده
و أكده مش خطر عليه
دكتور ناصر : في الحالات العاديه بنجول مفيش مشكله لأن الإنسان ممكن يعيش بربع كليه لكن في حالة مصعب صعب
نعمان : صعب ليه يا دكتور بس
دكتور ناصر : احنا بعد ما شيلنا الكلية اللي اتصابت عملناله اشعه و تحاليل عالكليه التانيه و للأسف لجينا ان كفائتها ضعيفه واضح انها تعباه من جبل اكده و مهتمش
و لسوء حظه ان كليته السليمه هي اللي اتصابت و الموجوده دلوك التعبانه
نعمان : يعني ايه يا دكتور يعني الكليه اللي موجوده دلوك محتنفعش محتجومش جسمه يعني
دكتور ناصر : حتجوم بمهمتها اه لكن بشكل ضعيف و هو حيتعب و محيستحملش
نعمان : يعني ولدي حيموت و اللا ايه يا دكتور
دكتور ناصر : اهدى يا حاج نعمان مش اكده كل مشكله و ليها حل
نعمان : طب جول الحل الله يخليك
دكتور ناصر : هو أجده أجده حيحتاج زرع كلية بس كل ما نسرع يبجى أفضل بكتير
نعمان : و حنجيب الكلية منين دلوك حنروح نشتريها من السوج يعني هي دي حاجه سهله يا دكتور
الدكتور: لا طبعا مش حاجه سهله احنا محتاجين متبرع و كل ما يكون بسرعه يبجى أفضل
نعمان : اني مستعد ادفع كل ما أملك بس ابني يجوم منيها
الدكتور : المشكلة ان المتبرع ديه حنجيبه منين دلوك
نعمان : أني أني أبوه خدوا كليتي و ادوهاله
الدكتور : مش بالسهوله ديه يا حاج لازم الانسجه تكون متوافجه
عشان أجده احنا حنعمل تحاليل لكل أفراد العيله و المجربين بيناتكم و اللي حتكون انسجته متوافجه معاه هو ديه اللي حنخليه يتبرع بكليته
بس ديه لازم يكون من دلوك عشان منضيعش وجت
و بالفعل بدءوا يعملوا تحاليل للكل عشان يشوفوا مين ينفع انه يتبرع لمصعب بكليته
و الكل خايف و مرعوب عليه انه يحصلله حاجه
تدخل رحمه بعد ما تقعد تعيط و الممرضه تستئذنلها الدكتور
مصعب يا حبيبي يا جلب اختك الف بعد الشر عنك يا نور عينيه
بجي أكده يا حبيبي تبجى تعبان و كليتك واجعاك و احنا مش حاسين بيك
بس معلش أن شاء الله حتخف و تبجى زي الفل
احنا مش نديك كليتنا احنا نديك عمرنا كله يا حبيبي
خف و النبي يا مصعب و حياة غلاوتي عنديك ما تسيبنا يا مصعب يا اخويا انت وعدتني و جلتلي انك مستنيني ابجى عروسه عشان انت و عامر تسلموني بيدكم لعريسي و كمان مش كل شويه تجوللي انك نفسك جوي ابجى دكتورة نسا و تجعد في العياده تعاكس الحريم اللي حياجوا يكشفوا عندي يا للا بجى يا اخوي خف اكده و اني اوعدك اني حنجح و حجيب مجموع عالي ان شاء الله و ادخل كلية الطب و ابجى دكتورة زي ما نفسك
يا حبيبي يا مصعب يا حبيبي يا اخوي
ثم تتجه نحو عامر و انت يا غالي جوملنا بالسلامه و اجف جار اخوك اخوك محتاجك جوي يا عامر
اوعوا حد فيكم يسيبني اوعوا حد فيكم يفرط في حياته اني بجولكم اهوه انتوا سامعينني صوح ايوة سامعينني و محيهونيش عليكم تزعلوني تزعلوا رحمه بتكم
الممرضه : كفايه كده يا حبيبتي
رحمه : خليني مع اخواتي شويه كمان الله يخليكي
الممرضه : عشانهم هما كده غلط معلش حبيبتى اتفضلي معايا
تخرج رحمه و هي بتبكي بشده و خايفه على مصعب يحصلله حاجه
في بيت محمد الطحاوي
يا فرحه ما تمت يعني معناته ايه الكلام ديه يا خيبة أملي
زكريا : زي ما جلتلك اجده يا خالتي
صفيه : سيب الطفح اللي فيدك ديه و كلمني زي ما بكلمك
زكريا : و ادي الطفح اهوه منيش طافح خير يا خالتي عايزة ايه
صفيه : خير و هو حياجي الخير منين بعد اللي سمعته ديه يعني الاتنين عايشين و محدش فيهم مات
زكريا : ايوة يا خالتي تنينتهم عايشين ربنا عايز اجده حنعترض إياك
صفيه : ربنا ياخدك يا شيخ و يريحني منيك
عائشه : ألف بعد الشر عليه يا صفيه ليه بتدعي عليه هو عملك ايه
صفيه : عمايله سوده و مهببه على دماغه
عائشه : عمايله سوده ليه هو مش نفذلك اللي طلبتيه منيه
صفيه : و هو فين التنفيذ ديه راح اتفجلي مع واحد ميفرجش عنه في الحموريه حاجه معرفش حتى السلاح بيتمسك كيف ضربلي واحد جنب جلبه و التاني رصاصه في كتفه و التانيه في جنبه ما كان لزمن يعيشوا و هي دي ضربه تموت المفروض كان ضربهم في مجتل كان فرتكلهم مخهم هما الجوز عشان متجوملهمش جومه تاني
عائشه : نصيبهم و ربنا هو اللي نجاهم
صفيه : لا اني ما يلدش علية الحديت ديه
عائشه : ما يلدش عليكي يعني انتي عايزة ايه دلوك يا صفيه
صفيه و هي بتزعق فيه : ما تسيب الزفت الوكل ديه و تركز معايا ايه واجع من اخر جطر و اللا جاي من مجاعه و لا كنه اخر زاد ليك في الدنيا
زكريا : اخر زاد لية ليه يا خالتي بعد الشر عني اني جعان بجالي يومين من وجت اللي حصل و اني ماكلتش حاجه
صفيه : طب صحصحلي اجده و انت بتتنيل تاكل و اسمع اللي اني حجولك عليه
زكريا : عايزة مني ايه تاني يا خالتي يا دي النيله بعدي عني بجى
صفيه : ابعد عنك كيف يا جوز بتي يا غالي اسمع انت تسيبك من البهايم اللي بتتفج معاهم دول و تنفذ اللي حطلبه منك بنفسك حتروح المستشفى و تدي كل واحد فيهم ابرة هوا و اللا تكتم نفسهم المهم ميطلعش عليهم الصبح
زكريا : هههههه هههههه هههههه
صفيه : انت بتضحك
زكريا : امال عايزاني اعيط أيوة طبعا لزمن اضحك مستشفى إيه و نفس ايه اللي عايزاني اكتمه انتي بتجولي ايه يا خالتي
دول في مستشفى و البوليس مالين المكان و اهلهم مبيسيبوهمش واصل
صفيه : و انت يعني حتدخل تجوللهم اني اهوه مانت حتداري نفسك
زكريا : على اساس اني الرجل الأخضر و اللا تكونيش حتلبسيني طاجية الاخفا
بجولك ايه يا خالتي انتي طلبتي مني طلب و نفذتهولك و على رأي متولي اني مش مغسل و ضامن جنه
جال اروحلهم المستشفى جال اه ما هما ما شافوهمش و هما بيجتلوا شافوهم و هما بيتجفشوا
صفيه : انت سايبني و رايح فين
زكريا : طالع انام اني تعبان تعبان
صفيه : عاجبك عمايل ابنك دي يا عيشه
عائشه : بجولك ايه يا صفيه انتي اتجفتي معاه من ورانا و هو زعل ابوه منيه و مرضيش يزعلك و عملك اللي انتي عايزاه منيه و زياده كمان عايزه منيه ايه تاني بعدي عنيه بجى كفاكي لحد اكده انتي محترتاحيش غير لما تضيعي ولادي مني حرام عليكى كفاكي لحد اجده
صفيه : انتي بتزعجي فية يا صفيه
عائشه : استغفرالله العظيم يا ربي اني طالعه انام اني تعبانه و مصدعه
صفيه : ماشي اني بجى اللي حكمل الحكايه الواعره دي اللي معايزاش تخلص جاتكوا الهم عيله تغم
بعد مرور يومين و قد استردا كلاهما وعيه
يدخل وكيل النيابه لهما لمعرفة من قام بضرب النيران عليهما و لكنهما لا يخبراه بشئ
فيضطر وكيل النيابه أن يتحدث لنعمان برغم تمام علمه بأنه لن ينطق بكلمه : يا حج مينفعش أكده انت بالشكل ديه بتضيع حج ولادك
نعمان : ماجولتلك مبنتهمش حد حضرتك و معنديش كلام اجوله غير إللي جولته و ديه اخر كلام عندي
وكيل النيابه : أني مش عارف آخرة اللي انتوا فيه ديه حيوصلكم لفين
نعمان : خير ان شاء الله اللي جاصد خير ربنا بيوجف معاه
يتجه نعمان للدكتور لمعرفة نتائج التحاليل و لكن يعلم بأن نتائجها لم تظهر بعد
في المنزل
يعود الحاج نعمان ليستريح قليلا فيجد نسمه تتحدث إليه : طمني يا حاج عاملين إيه دلوك
نعمان : ادعيلهم يا نسمه
نسمه : بدعيلهم و الله ديه ربنا العالم غلاوتهم عندي
نعمان : عارف يا نسمه دول اخواتكم و انتوا كلكم متربيين سوا
نسمه : وعشان اكده اني لية حج عنديك يا حاج
نعمان : حج ايه يا بتي هو اني زعلتك في حاجه
نسمه : اني كنت مفكراكم معتبرينا منيكم زي ما بتجول لكن طلعنا اغراب عنيكم
نعمان : ليه بس بتجولي اكده يا نسمه
نسمه : يعني كلكم تعملوا تحاليل و اني و نورة منعملش معاكم يبجى انتوا شايفنا اغراب عنيكم و اللا لاء
يا حاج
نعمان : لا يا حبيبتي الموضوع مش اكده يا نسمه هو الدكتور اللي جال الأهل و بعدين انتوا أمانه عندي يا بتي أبوكم الله يرحمه موصيني عليكم اجوم اعمل فيكم اكده بردك
نسمه : طب و رحمة ابويا لو ما خلتني اني و نورة نعمل معاكم التحاليل لحكون زعلانه منيكم جوي ديه احنا مالناش غيركم يا حاج احنا لولاكم كان زمان كلاب السكك بتنهش فينا
نعمان : لا يا نسمه متجوليش اكده البيت ديه بيتكم اللي حتفضلوا فيه لحد ما كل واحده منيكم تروح على بيت عدلها و اطمن عليها و جلبي يطمن من ناحيتكم عشان لما اجابل ابوكي يوم الموقف العظيم اجوله اني حافظت على أمانته اللي ائتمني عليها
نسمه : ربنا يخليك لينا يا حج و يشفيلك ولادك يا رب
نعمان : يا رب يا نسمه يا رب
نسمه : طب ممكن بعد اذنك نعمل تحاليل معاكم احنا كمان
نعمان : نشوف نتيجة التحاليل الأول يا نسمه و لو احتاجتكم حجولكم
ربنا يبارك فيكم طمرت فيكم التربيه
نسمه : تسلم و تعيش يا حاج تحب اعملك حاجه
نعمان : لا يا نسمه متتعبيش نفسك اني طالع أريح شويه فوج جبل ما اروحلهم تاني
نسمه : اتفضل يا حاج
تدخل نسمه لأختها اللي عينيها وارمه من كتر العياط : ارتحتي يا ستي اديني جلتله أهوه
نورة : ربنا يخليكي ليا يا نسمه يا رب
نسمه : انتي فاكراني وحشه يا نورة لا و الله ديه اني ربنا العالم باللي فجلبي لكن اني معاوزاكيش تحلمي بحاجه و بعد اكده تصحي على كابوس خايفه عليكي يا حبيبتي
نورة : مش بيدي يا نسمه غصب عني عارفه يا نسمه يوم ما حتحبي ما حتجوليش اكده واصل و محتشوفيش حاجه في الدنيا غير اللي بتحبيه و بس
نسمه : لا يا حبيبتي اني لا لية فحب و لا غيره خليني في لجمة عيشي أحسن
و حرجع أجولك بردك فوجي يا حبيبتي فوجي و متبصيش لفوج اللي يبص لفوج يتعب يا خيتي
نورة : اطمن عليه بس يا نسمه و بعد اكده معاوزاش حاجه تاني أني كفايه علية اني اشوفه جدام عيني سعيد و متهني
نسمه : ربنا يشفيهم يارب
في المستشفى
تجلس زينب و حفصه بينهما ليطمئنا عليهما : ألف سلامه عليكم يا حبايب جلبي
عامر : الله يسلمك يا امى
زينب : الهي يتشل في يده اللي عملها اه بس لو اشوفه ديه أني حجطعه بسناني
حفصه : حاسس بايه يا حبيبي
مصعب : نار طالعه من جنبي يا عمتي
حفصه : ان شاء الله حتبجى زي الفل يا حبيبي
عامر : فين رحمه يا اما
زينب : رحمه في الدرس يا حبيبي من وجت اللي حصل و هي جاعده اهنيه مبتتحركش بالعافيه اتحايلت عليها تروح درسها حسني وداها و راح يجيبها
عامر : يا حبيبتي يا رحمه ربنا معاها يا رب. ااااه
زينب : ايه يا حبيبي تعبان اناديلك الدكتور
عامر : جلبي واجعني جوي يا اما
زينب : سلامة جلبك يا جلب امك يا ريتني كنت اني و انت لاء يا حبيبي
عامر : ألف بعد الشر عنيكي يا اما ربنا يطولنا فعمرك يا رب
اما هي……………..
تفهم أمه ما يريد السؤال عنها
كانت اهنيه يا حبيبي و دخلت اكتر من مرة بس انت كنت تعبان يا حبيبي و محستش بحاجه واصل
و روحت البيت ترتاح شويه و حتاجي
في الطريق إلى المستشفى
و الله ما عارفه المدرس كان بيشرح إيه اني عجلي مش فية يا حسني
حسني : طب و ديه بردك اسمه كلام مش احنا اتفجنا انك تركزي و تذاكري كويس عشان تفرحي و تفرحي الكل معاكي
رحمه : مجدراش يا حسني عجلي مش فية خايفه على اخواتي جوي
حسني : ما هما الحمد لله بجيوا احسن و خرجوا من العنايه المركزة
رحمه : و مصعب يا حسني اني خايفه عليه جوي
حسني : ان شاء الله خير يا رحمه
رحمه : هي نتايج التحاليل حتظهر امتى يا حسني
حسني : النهارده ان شاء الله يا رحمه
رحمه : يا رب
حسني : بس لو افترضنا انك انتي اللي طلعتي ينفع تتبرعي لمصعب حتعملي إيه يا رحمه
رحمه : و دي فيها كلام يا حسني
حسني : بس انتي لساكي صغيرة و كمان عنديكي ثانويه عامه حتعملي إيه
رحمه : صغيرة ايه و ثانويه عامه إيه بس يا حسني مصعب اخويا اهم عندي مليون مرة من أي حاجه اخواتي فداهم الدنيا كلها اني مستعده أعمل أي حاجه بس مصعب يجوم بالسلامه
ديه أني مش اديله كليتي ديه اني ادياه عمري كله دي كفايه حنيته علية
حسني : ربنا معاه يا رب
رحمه : يا رب يا حسني يا رب
يتحدث محمد الطحاوي إلى يحي عبر الهاتف
انت تيجي حالا
يحي : في إيه يا بوي حوصل إيه
محمد : في إني زهجت منيك و من اخوك اللي اهنيه خلفتي ليكم خلفه مطينه
يحي : ليه بس يا بوي عملنالك إيه
محمد : انت جاعدلي على طول في مصر معرفش بتهبب إيه على عيشتك السوده
و التاني اهنيه عامل شبه المعمي ماشي ورا خالتك اللي تجولله عليه ينفذه من غير تفكير
و اني معرفش أعمل فيهم إيه واصل الود ودي اطفشهم هما اتنيناتهم من البيت و ارتاح منيهم و من عمايلهم اللي محتجيبش غير الخراب
يحي : خالتي صفيه دي طول عمرها جادرة يا بوي و محدش بيجف جدامها معرفش مطلعتش طيبه زي امي ليه و الصراحه معرفش عمي الله يرحمه كان مستحملها ازاي
دي متتعاشرش
محمد : يحي اني عايزك تجيلي الصعيد في اجرب وجت
يحي : حاضر يا بوي
يغلق معه الهاتف و يتحدث للمخرج عز الدين : أني اسف يا استاذ عز
عز الدين : مفيش أسف و لا حاجه يا يحي بس انت عارف انت لو قمت في فيلم و اللا مسلسل دور صعيدي حتكسر الدنيا
يحي : امتى بقى يا استاذ عز
عز الدين : في دور حلو اوي ليك يا يحي في مسلسل حيضم عدد من النجوم الكبار و لو الحظ ساعدك انك تشترك في العمل ده حتبقى حطيت رجلك على اول طريق النجوميه و الشهره و صدقني لو قلتلك ان اسمك بعد كده حيكون في الصف الأول
يحي : بجد يا استاذ عز
عز الدين : طبعا يا يحي و انا عمري كدبت عليك في حاجه
يحي : لا طبعا يا استاذ عز انا مقصدش انا بس قصدي اني مش مصدق نفسي الصراحه
عز الدين : لا صدق يا يحي انت لو مكنتش موهوب فعلا انا مكنتش حقف معاك
يحي : و نيللي يا استاذ عز
عز الدين : و نيللي كمان يا سيدي هي كمان موهوبه و تستحق التجربه بس هي إيه حكايتكم انتوا الاتنين هو انتوا بتحبوا بعض يا يحي
يحي : بصراحه انا بعزها اوي بخاف عليها بحبلها الخير زي ما بحبه لنفسي بالظبط و انا بتكلم معاها بحس براحه مش ممكن انام و لا اقدر اغمض عينيه قبل ما اسمع صوتها لكن ده نابع من احترامي ليها و عشرة السنين اللي ما بيننا و لأني كمان بخاف عليها اوي لكن حب ما اعتقدش
عز الدين : طب و هي
يحي : متهيالي نفس االلي انا حاسس بيه هي بتحسه ناحيتي
بس ممكن اعرف سبب السؤال ده يا استاذ عز
عز : لا ابدا ده حب استطلاع مش اكتر ربنا يوفقكم أن شاء الله
المهم مش عاوزك ترجع من الصعيد المرة دي غير و احنا خطينا رجلنا على اول الطريق
يحي : ان شاء الله يا استاذ عز انا المرة دي مش حرجع غير و انا معاك مهما كان التمن
ينادي محمد على زينه
زينه : نعم يا عمي
محمد : اطلعي ناديلي المعدل جوزك
زينه : بس ديه نايم
محمد : صحيه اطلعي صحيه
زينه : حاضر حاضر جطيعه تجطع زينه و سنين زينه
تدخلله الأوضة تلاقيه نايم فتهزه: زكريا يا زكريا
زكريا يقوم و هو مفزوع : ايه في ايه البوليس تحت حياخدوني
عايزة مني إيه يا خالتي همليني لحالي اني محجتلش حد تاني واصل
زينه : اطمن يا حبيبي أني زينه مرتك مفيش حاجه اطمن
خد يا حبيبي خد اشرب شوية مياه بل ريجك
زكريا بعد ما يشرب المياه : كابوس كابوس يا زينه
اني كان مالي بالهم ديه يا ربي
زينه : طب جوم عمي عايزك تحت
زكريا : يا مرارك يا زكريا عايز مني ايه ابوي تاني
زينه : و اني حعرف منين انزل شوفه
زكريا : حاضر حاضر
ينزل زكريا لابوه : خير يا بوي
محمد : و هو طول مانت ماشي ورا خالتك دي حنشوف خير
بص يا زكريا اني لسه محاسبتكش عللى هببته مستني اما اطمن على ولاد نعمان الاول لكن اني بحذرك لو عجلك جل بيك و فكرت تجرب منيهم تاني و ربنا المعبود ما حتبات فيها اهنيه و تشوفلك مكان تروح تعيش فيه ديه غير اللي اني حعمله فيك
زكريا : لا و الله يا ابوي اني خلاص شلت يدي من الموضوع ديه نهائي مليش بيه صالح
بس اني في حاجه مستغرب ليها جوي يا بوي و نفسي افهمها
محمد : عايز تفهم ايه يا زكريا
زكريا : موقفك ديه يا ابوي ازاي تبجى عارف اللي جتل عمي و متفكرش تاخد بتارك منيه لا و كمان تزعل لما اخدنا بتاره احنا
محمد : لأن مش هو اللي جتل عمك يا زكريا نعمان برئ من دم عمك
زكريا : الكلام ديه معناته انك عارف باللي جتل عمي يا بوي
محمد : مالكش صالح
زكريا : كيف مليش صالح يا بوي هو اللي انجتل ديه مكنش عمي و حمايا ليه متجوليش مين اللي جتل و تريح نفسك و تريحنا كلنا
محمد : و انت خلاص متأكد إني اعرف اللي جتل عمك
زكريا : ديه اللي إني حسيت بيه و فهمته من كلامك يا بوي
بس انت مش عايز تجول عليه ليه معرفش تكونش خايف منيه و اللا يكون ماسك عليك ذله
محمد : تعرف تجوم من جدامي يا بني آدم انت و اديني حذرتك اهوه و دي اخر مرة يا زكريا بعد اكده تاخد مرتك و توريني عرض كتافك
زكريا : خلاص يا بوي فهمت عن اذنك
يطلع زكريا و محمد يقف ادام صورة اخوه اللي مات
يا حبيبي يا اخوي اتوحشتك جوي يا سالم
الحمل تجل على كتافي جوي يا اخوي بس خلاص هانت و هانت جوي كمان و بعد اكده يوحصل اللي يوحصل
في المساء في المستشفى
معناته إيه الحديت ديه يا دكتور
الدكتور : لزمن نشوف حد تاني يعمل تحاليل غير اللي عملوا
نعمان : يعني هو لازم نفس الفصيله يا دكتور
الدكتور : في بعض الفصايل بتاخد من بعضها لكن في اعتبارات تانيه لازم ناخدها في الاعتبار
يعني انت مثلا ياحاج عندك السكر و كمان عالي مينفعش ناخد منيك
و الحاجه امه عنديها الجلب بردك مينفعش
نعمان : طب و الباجيين
الدكتور : الانسه عتاب نفس الفصيله لكن عملنالها تحليل و لجينا عنديها سكر
نعمان : عنديها سكر عتاب ميته جالها السكر عتاب معنديهاش سكر
الدكتور : واضح انه لسه جايلها جريب لأنه لسه في بدايته لكنها بردك مش حينفع تتبرع
و رحمه بتك صغيرة لازمن تكون اكتر من ١٨ سنه
نعمان : لا حول ولا قوة الا بالله العلي العظيم طب مفيش حد ياخد اللي هو عايزه و يتبرع لابني
الدكتور : مفيش جدامنا غير اكده حنعمل إعلان و ربنا يسهل الحال يا رب
يعملوا اعلان و فعلا ييجي اكتر من واحد يقدموا خصوصا لما عرفوا المبلغ الكبير اللي حياخدوه مقابل التبرع بس المشكله ان مفيش حد منهم انسجته توافقت مع مصعب و هنا حالتهم كانت صعبه اوي و خوفهم على مصعب كان مموتهم من الرعب
و تصر عليه نورة و نسمه إنهم يحللوا هما كمان و رغم اعتراضه على ده إلا انه اضطر يوافق
إيه أخبار التحاليل يا دكتور
الدكتور و هو ينظر في نتائج التحاليل : نورة السيد تحاليلها كويسه و انسجتها متوافقه مع مصعب و الحمد لله هي سليمه و سنها مناسب يعني معنديهاش حاجه تمنع إنها تتبرع بكليتها لمصعب
اما نسمه السيد انسجتها غير متوافقه
نعمان : يعني نورة هي اللي ينفع انها تتبرع
الدكتور : أيوة يا حاج
مالك يا حاج في ايه حسك مش مبسوط أني كنت مفكر إنك حتطير من الفرحه
نعمان : لو كان حد منينا او من اللي اتجدموا كنت فرحت لكن أني مكنتش عايز حد من البنات دول يتبرعوا دول أمانه فرجبتي لو حوصل ليها حاجه بعد الشر اعمل ايه وجتها
الدكتور : معرفش أجولك إيه يا حاج بس اطمن ان شاء الله خير اللي حيعمل العمليه دكتور كبير جوي و ان شاء الله حتجوم بالف سلامه
نعمان : ربنا يستر
نسمه : يا لهوي لا يا نورة الله يخليكي
نورة : لاءة ايه يا نسمه امال احنا كنا بنعمل التحاليل دي ليه
نسمه : معرفش انا عملتها و خليتك تعمليها عشان الحاله اللي كتي فيها لكن اني متوقعتش ان ديه يوحصل
لا يا نورة دي كليتك هو لعب عيال اياك يا لهوي دي حته من جسمك عارفه يعني ايه حته من جسمك يعني ممكن يجرالك حاجه يا نورة و انتي لو حوصلك حاجه اني محجدرش اعيش من غيرك يا نورة
نورة : نسمه اني محجدرش اشوف مصعب في الحاله دي و اني في يدي الدوا و ما اتحركش و اجف اتفرج عليه هما عملوا اللي عليهم كله و منفعش و سبحان الله ربنا وضع الحل في يدي اجوم اجول لاء
نسمه : نورة اذا كنت بتعملي اكده عشان تصعبي عليهم و يجوزوكي ابنهم
نورة و هي تقاطع اختها : لا يا نسمه لا اني محعملش اكده عشان اصعب عليهم و يجوزوني ليه اني حعمل اكده عشان بحبه
بحبه و بس لكن كونه يتجوزني و اللا لاء فديه مش حيغير شئ في الموضوع
نسمه : بس ديه غباء يا نورة غباء منك جوي محدش يستاهل يا حبيبتي التضحيه ديه
البني ادم مننا مفيش حاجه ممكن تنفعه لو صحته راحت منيه و ديه حته من حسمك معرفاش بعد ما تتشال انتي ممكن يحصولك ايه انا خايفه جوي يا نورة
نورة: سيبيها على ربنا و جولي يا رب
نسمه : يا رب اجف معانا يا رب لكن بردك ربنا جال منرميش نفسنا في التهلكه
نورة تجدري تجوليلي لو كان عامر هو اللي احتاج العمليه دي كنتي حتتصرفي بنفس الطريقه
نورة : لا يا نسمه ارتاحتي اني بعمل اكده عشان مصعب عشانه هو عشان بحبه هو مش عشان اي حاجه تانيه و بعدها يوحصل اللي يوحصل
ادعيلي انتي يا نسمه ان ربنا يجومني منيها على خير
نسمه : للدرجه دي بتحبيه يا نورة لدرجة انك تفرطي في حياتك عشان هو يعيش
نورة :بحبه جوي يا نسمه بحبه لجرجه متتخيليهاش و أي حاجه اعملها عشانه جليله عليه
نسمه : يا رب استرها معاها يا رب
يتم نقل مصعب لغرفه غير الغرفه التي بها عامر حتى يتسنى لهم إجراء الفحوصات و التحاليل و الاشعه اللازمه لإجراء العمليه
مصعب : مين يا دكتور اللي حيتبرعلي بكليته
الدكتور : معرفش و الله
مصعب : بس اني عايز اعرف
الدكتور : و دي حاجه حتفرج معاك يعني
مصعب : أكيد يا دكتور
الدكتور : ححاول اعرف و اقولك عن اذنك دلوقتى
تجلس معه في الغرفه تطمئن عليه بعد ان استقرت حالته
الف حمد الله على السلامة يا عامر
عامر : الله يسلمك يا عطر
عطر : جلجتنا عليك جوي يا بن عمي
عامر : بجد يا عطر جلجتي علية
عطر : واه و اني لو مكنتش اجلج عليك انت و مصعب حجلج على مين إياك ربنا يخليكم لينا و ميحرمناش منيكم يا رب
عامر : تسلميلي يا عطر يا رب
عطر أني في حاجه عايز اجولهالك من زمان و كنت حايش نفسي لكن خلاص كفايه لحد اكده ان الأوان إني اتكلم معاكي و أجولك عاللي جوايا
عطر : خير يا عامر جول اني سمعاك
عامر : عطر أني
تخبط الممرضه على الباب و تدخل
عامر : استغفرالله العظيم يا ربي
الممرضه تغير المحلول و تطلب منه انها تقيس له الضغط
و تقيس له درجة الحرارة
عطر : طمنيني يا حبيتي عامل ايه دلوك
الممرضه بابتسامه : اطمني يا حبيبتي زي الفل احسن بكتير يا للا بجى اتجدعن يا عريس عشان تخرج بالسلامه
تخرج الممرضه و تنبسط اوي عطر من كلمة عريس طبعا الممرضه لما قالتله عريس توقعت ان بينه و بين عطر حاجه
عطر : ياللا بجى اتجدعن أكده و جوم بالسلامه عايزين نفرح بيك و تبجى عريس زي ما جالت الممرضه
عامر : و اني كمان نفسي افرح جوي يا عطر
عطر : طب يا للا بجى يا بن عمي مستني ايه كل حاجه موجوده ما فاضلش غير العروسه
عامر : العروسه موجوده يا عطر
عطر : بجد يا عامر دي ربنا بيحبها جوي على اكده
عامر : بس اني مش عارف رايها حيكون إيه
خايف متكونيش بتحبني زي ما بحبها
عطر : يا لهوي يا عامر أكيد طبعا حتوافج و حتزجطط من الفرحه كمان هي في واحده تطول ان عامر نعمان يحبها و يبجى رايدها و عايز يتجوزها
دي يبجى ربنا كاتبلها السعد و الهنا
عامر : بس اني نفسي جوي يا عطر اعرف مشاعرها و احساسها ناحيتي كيف
عطر : طب جوللي حاجه الاول و اني حجولك اذا كانت بتحبك زي ما انت بتحبها و اللا لاء
عامر : جولي يا عطر
عطر : هي من جرايبنا
عامر : أيوة يا عطر و عايشه معانا في البيت كمان
عطر بفرحه : بجد طيب كده خلاص ظهرت الرؤيه
عامر بفرحه : بجد يا عطر
عطر : و جد الجد كمان يا عامر اطمن هي بتحبك كيف ما بتحبها و اكتر منيك كمان
عامر بقلب يكاد ان يخرج من اضلعه : عطر انتي بتتكلمي جد عطر يعني انتي فهمتي جصدي و حسيتي بية و باللي اني حاسس بيه
عطر : أيوة طبعا يا عامر ديه اني بفهمها و هي طايرة
هههههههههه هههههههههه
عامر : هههههه. اااه
عطر : سلامتك من الآه يا واد عمي
عامر : تسلميلي و تسلملي ضحكتك الحلوة دي اللي ترد الروح
عطر : عارف يا عامر لما تاخد اللي بتحبها و جلبك رايدها الفرحه حتملى جلبك و ضحكتك حتملى الدنيا و هي اللي حتردلك الروح
عامر : عارفه يا عطر اني لو علية نفسي جوي من زمان اني اتجوز و ابدا حياتي مع اللي جلبي عشجها لكن عمك هو اللي كان معطلني و يجوللي لسه مجاش الاوان
بس خلاص اني مجدرش استنى اكتر من اجده
عطر : غريبه جوي ان عمي يعطلك في حاجه حلوة زي دي بس أكيد ليه وجهة نظر بردك
بس اكيد دلوك وبعد ما ربنا جومك بالسلامه هو اللي حيطلب منك انه تفرحه
عامر : ان شاء الله يا عطر
بس جوليلي يعني اني احساسي كان في محله احساسي مخانيش و لا كدب علية
عطر : اكيد طبعا يا عامر و هي كمان احساسها بيك ميجلش ابدا عن احساسك بيها بتحبك جوي يا عامر و ان شاء الله حتكون معاها اسعد انسان في الدنيا كلها
انت لو لفيت الدنيا كلها محتلاجيش زيها واصل و لا حتلاجي واحده تحبك زيها دي كانت بتموت في الثانيه ألف مرة و انت في العمليات كانت حتموت من الخوف و القلق عليك
كان نفسها تكون هي اللي مكانك و فوج اكده اتبرعتلك بدمها يعني دمها بجي بيجري في عروجك عشان حبك ليها يزيد كمان و كمان يا عامر
عامر : عطر انتي بتجولي إيه
عطر : بجول ان عتاب دي اطيب و احن جلب في الدنيا كلها و معاها حتحس بطعم الحياة و كأنك اتولدت من اول و جديد. و كفايه الورد و الياسمين اللي حتجطفهولك بيدها الحلوة كل يوم حيخللي حياتك كلها ريحتها بريحة الورد
عامر : عتاب
عطر : بتحبك جوي يا عامر و أكتر ما نت بتحبها بكتير ياااه دي الدنيا مش حتساعها من الفرحه لما تعرف انك رايدها كيف ما هي رايداك عارف يا عامر هي يا حبيبتي كانت خايفه جوي لتكون انت مش حاسس بيها لكن الحمد لله اديك اهوه طلعت بتحبها كيف ما بتحبك ربنا يهنيكم و يسعدكم يارب
عامر : عطر انتي بتجولي ايه عتاب بتحبني أني
عطر : أيوة و الله دي بتحبك جوي كنك ما مصدجش عاد
عامر : عطر اني جصدي ما كنش على عتاب اني جصدي كان عليكي انتي يا عطر
عطر باندهاش و تعجب : علية اني كيف يعني مفهماش
عامر : عطر اني اللي جلبي رايدها و عايز اتجوزها و بحبها هو انتي يا عطر انتي مش عتاب
اني عتاب بحبها و بحبها جوي كمان لكن حبي ليها كيف حبي لرحمه اختي بالظبط لكن أني جلبي ما رايدش غيرك انتي يا عطر و لا عمره حب و لا عشج غيرك انتي
اني بحبك انتي يا عطر
عطر: ايه الكلام اللي بتجوله ديه يا عامر لا انت اكيد بتهزر او يمكن البنج اثر عليك فمعرفش انت بتجول ايه عامر يا ابن عمي عتاب هي اللي بتحبك و رايداك
عامر : و اني جلت بحبك انتي يا عطر و رايدك انتي مش عتاب
عطر : يا مرك يا عطر يا مرك الله يخليك يا واد عمي الله يخليك متجولش اكده انت اخويا يا عامر اخويا اللي بحبه و بحترمه لكن مش اكتر من اكده الله يخليك عشان خاطري لو لية خاطر عنديك بلاش تكسر جلب واحده عاشجاك عشان شوية اوهام في راسك
عامر : اوهام كيف يا عطر اني من يوم ما وعيت عالدنيا و حبك بيجري في دمي عمر جلبي ما حب و لا عشج غيرك اني لو كان علية كنت جلتلك من زمان و اني مكلم ابويا من سنين عليكي و هو اللي كل شويه يجوللي مجاش الاوان
عطر : عمي كيف عمي يجولك اكده و هو عالم بعشج عتاب ليك
عامر : انتي بتجولي ايه يعني ابوي عارف ان عناب رايداني يبجى اني دلوك فهمت هو كان بياخر طلبي ليه عشان عتاب مش اكده
اسمعي يا عطر اني بحبك انتي و رايدك انتي و مليش صالح بعتاب
عطر : و اني مليش صالح باي حاجه في الدنيا غير عتاب يا عامر عتاب ديه نور عينيه اللي بشوف بيها
فكر يا ابن عمي فكر زين الله يخليك جبل ما تجرح جلب حبك و عشجك فكر الله يخليك
تخبط عليهم الباب و تدخل خير يا جماعه هو حوصل حاجه
عطر و هي بتحاول تداري لا يا رحمه ليه بتجولي اكده
رحمه : اصلي و اني داخله من باب المستشفى لمحت عتاب خارجه بتجري بسرعه جوي و ناديت عليها مرديتش علية معرفاش مالها
عطر بذعر و خوف شديد على اختها : عتاب يا حبيتي يا عتاب
تخرج عطر تجري عشان تلحق اختها متلاقيهاش ادام المستشفى توقف تاكسي بسرعه و تدخل البيت بسرعه
تسمع صوت حسني ست عتاب مالك يا ست عتاب
تجري عليها عطر تلاقيها مرميه على الأرض و حسني بيحاول يفوقها و هي مغمى عليها
عطر : عتااااب أختي
يتبع…..
لقراءة الفصل التالي : اضغط هنا
لقراءة الرواية كاملة اضغط على : (رواية يكفيني منك عقابا)
