//
//
خذت روح التلفون و مشت شور المحكمة و رفقت صورة من التهديد في ملف قضية صقر ، وبالحاجة هذي تقدر انها تمدد موعد الكفالة وتخلي صقر فترة اطول برا الحبس قبل موعد الجلسة النهائية
طلعت من المحكمة وهي اول مره تحس بشعور الخوف من لما مسكت قضية صقر كانت من اول لحظة حاسه انها هي قدها ، و انها حاتقدر عالقضية بس الموضوع خدا منحنى ثاني … وكبر اكثر مما كانت اتوقع
ردت روح للمكتب وحاولت انها تنسى موضوع الرسالة اللي جتها واكيد قررت انها هي ما تحكيش الصقر شي عشان ما يديرش اي ردة فعل و تخرب الكفالة ويرد للحبس من جديد
//
//
مرن كم يوم مافيش فيهن جديد علي حد
غير انه بات روح كل يوم يجي ويسأل امتي حا يجو رجالة ويتفقو علي كل شي
وفالمقابل كان صقر يجري عالموضوع هضا ومش ناسيه … حكى مع منذر وطلب من محمود بات غسان انه هو اللي يعدي ويطلب روح رسمي من باتها ويتفقو علي كل شي .. وفعلا بعد يومين
مشو منذر وغسان ومحمود وصقر و لحوش هل رُوح وحكو رسمي واتفقو علي كل شي والعرس كان بعد شهر بزبط … وكان هضا طلب صقر وماقالش الروح دغري بات رُوح وافق
//
بعد طلعو الرجالة خش خال روح عليهم جوا و حكالهم اللي صار وانصدمت روح بانه العرس بعد شهر !
عمر >> بس الراجل كويس الحق مش باين عليه انه محبوس
روح >> عشان انا عارفه انه برىء
عمر >> باهي تحشمي
روح >> 
خشت روح للدار و هي مصدومة من لقطة العرس اللي بعد شهر ، و كان خاطرها تحكي الحد و تقوله حقيقة القصة و الي بينها وبين صقر .. كانت تفكر وخايفه ف اللي حايصير قدام فالايام اللي حاتعيشهن مع صقر
و لما تنحل القضية و فكل شي
//
//
غسان >>الو
غفران >> الو
غسان >> نرن من مبدري وين كنتي
غفران >>فالحوش بس ماما تعبت شويه قعدت معاها
غسان >> كنها ؟؟
غفران>>شكله السكر نازل عطيتها دوا و تريحت
غسان>>نجي نشيلها للمستشفي؟
غفران>>لالا كويسه رقدت
غسان>> من في فالحوش
غفران >> انا وماما وخالي فحوشه فوق والاخرين طالعين
غسان >> باه حلي الباب
غفران >> كيف يعني ؟؟
غسان >> باب حوشكم يعني افتحيه بلا عبط
غفران >> انت برا ؟؟؟ غسان مش منجدك خالي فوق
غسان >>شكلي بنعلق عقد الزواج في جبهتي 
غفران >> يا ربييي
غسان >> شكلك مشفشفه هضا عليش ما تبيش تفتحيلي
غفران >> تعرف حا نفتحلك بمنظري هضا بلكي تغير رايك
صكرت غفران و طلعت بدون ما تشوف الروحها فالمرايه ، شعرها مرفوع فوق بطريقة عشوائية و لابسه بجامة سودا بنطلون و ماليه ومافيش ولا اي حاجه في وجها …. فتحت الباب لقت غسان ماسك اكياس في يده رفعت عيونها تبحت فيه
كان فرق الطول واااضح بكل بينها وبين غسان
طبس عليها >> رايفة عليكي
غفران >> الباب مفتوح نحن فالشارع خش بس
خش غسان وغفران وخرت و طبق الباب بكراعه
لصقت غفران فالساس و قرب منها
غفران>> لو اديرلي نفس حركات يوم الفاتحه حا نعيط
غسان ضحك >> لالا حركات يوم الفاتحه هذينا ساهلات
غفران رفعت حاجبها
غسان نزل علي وذنها >> حتي وانتي سرافه سمحه ازح
غفران >> مش عاجبك ؟
غسان >> لا عاجبني ونص
برمت غفران وخشت للصالون لحقها غسان مدلها الاكياس
غفران >> عليش متعب روحك ؟
غسان >> مافيش تعب
شافت لقاته جايب عشا و عصير وشوية حاجات للحوش
غفران >> نحطلك تاكل ؟
غسان >> لا تعشيت لكي و الامك هذينا
غفران طبست راسها >> شكرا
غسان قرب منها وقعمز جنبها >> ليش الاحراج ؟ و الحشم ؟ من اول يوم شفتك فيه وانا نحس انك مسؤوله مني يابال قعدتي مراتي … انا عاطي وعد البدر مستحيل تنقصك حاجه
غفران ميلت راسها وبحتت فيه >> يعني عشان بدر بس ؟؟
غسان كر خشمها وضحك>> لا مش عشان بدر بس يانقصيه
غفران >> امممم
غسان رفع راسها
غفران بصوت واطي >> غسان عاد والله حا يخش خالو حايقلب الدنيا
غسان >> نقلبها علي راسه بعدها
غفران >> وحلت معاك انا 
وشوشلها في وذنها >> خليني نعدي عشان معش نقدر نمسك روحي اكثر من هكي ، جو الخطف معش قعد يلعّب معايا
غفران ابتسمت >> ياسلام
غسان باسها علي راسها >> تبي حاجه كلميني
غفران >> حاضر
طلع غسان وخشت غفران وهي في عالم ثاني اول مره تحس بشي من ناحية غسّان
//
//
عند رُوح …. كانت قاعده فالمكتب توتي في اوراق الجلسة متاع اليوم
علي خشتي انا >> طولت
رُوح بحتت فالساعة >> لا عالوقت
قعدت مصبي ونبحت فيها وهيه تشوف فالاوراق وتخاف تنسى حاجه صبت من المكتب و خذت نظارتها وانا كان عقلي مش معايا معاها ، اول مره نشوفها وهي جدّيه بس برضو اول مره نشوفها خايفه هكي
مرت من جنبي وجت بتطلع مسكت يدها
انا >> شن فيه
رُوح >> شي هيا تو نطولو
انا >> لا لا مش علي بعضك
رُوح >> تو نحكو بعدين
انا >> خوذي نفسك
روح خذت نفس وبحتت فيا ، هزيت براسي بمعنى شن فيه
روح >> ممكن تحضني ؟
انا بدون ما نرد بولا حرف ، فتحت يديا وخشت في حضني و قلبها يدق بطريقة غريييييبه
لفيت يديا عليها وراسها علي صدري وبشويه شويا بدا نبض قلبها يهدا ويرد للنبض الطبيعي
وخرت وبحتت فيا
انا >> هديتي ؟
روح >> اها ، هيا عشان نلحقو
انا حسيتها متوتره ومش حا تقدر تسوق >> نمشو بسيارتي
روح >> عادي عادي
ركبنا فالسيارة ومشينا شور المحكمه ، بدت الجلسة وكانت روح مقدمه للقاضي الاوراق كلهن
وجودي انا كان مجرد اجراء شكلي بس عشان يتآكدو اني ملتزم بحضور الجلسات وهكي كان الكلام كله بين القاضي وروح
كملت الجلسة وكانت اقل من ربع ساعه لانه القاضي كان شايف الاوراق قبل الجلسه
وعلي طول اعطي قرار بناءً عالمستجدات فالقضية ف حنكمل باقي الجلسات برا مش فالحبس و الكفالة مستمره
طلعنا من القاعة
روح تنهدت براحه >> الحمدلله
انا مسكتها من يدها ومشيت شور زاويه فاضية
روح >> اي يدي كنك شنو فيه
انا >> شن قصة التهديد هذي ؟؟؟؟ وامتي وليش ما قلتيش عليها؟؟؟؟ ومن اللي مهدد وكيف وصلك وكيف عرف رقمك
روح >> صقر اهدا بشويه لوسمحت مش هنا نحكو لو سمحت
انا كنت منعمي ما نشوفش قدامي ولا فارق معايا اننا قاعدين في محكمة
روح >> صقر اهدا لو سمحت بحت الناس كيف تبحت فينا مش في صالحنا هكي
سكتت وحاولت نهدا و بغل >> اطلعي تمام
وخرت وطلعت روح قدامي ركبنا فالسياره و علقتها دي ومشيت دغري
روح >> صقر وقف
انا >> احكي امتي جاك التهديد وشن اللي مكتوب فيه
روح بخوف>> وقف السياره ياصقر بلا تهور افهم بس
خففت السرعه ولفيت في شارع فاضي ودرست و طفيتها
انا >> هكي تمام سيادة المحاميه ؟؟
روح اتنفس بالقوة
انا لما شفتها كيف خايفه حاولت نهدي روحي شويه
انا بصوت اهدى من الي قبل >> روح ما اطلعينيش من عقلي
روح فتحت التلفون ووراته الرساله
انا>> ليش ما حكيتي
روح >> صقر انت طالع بكفالة يعني اي حاجه بسيطة بكللللل تردنا للصفر نحن ما صدقنا وصلنا الهنا ، وين كنا ووين قعدنا
كنت انت بروحك مش فاهم قصتك بس بعدها بدينا نفهمو وبدينا نحلو فالموضوع
عرفت قصة هلك و عرفة انك مش سبب في موتت باتك قدرنا نطلعوك من الحبس
“سكتت شويه ” و عرفت ليش امل دارت هكي
انا بعد سكتت شويه و جابت سيرة امل بحتت فيها
روح ميلت راسها بمعني شن فيه ؟
انا >> تنازلي عالقضية
روح رفعت راسها >> لو نموت
انا >> مستحيل نكون انا السبب في اي حاجه تآذيك ، مش حا نتحمل ولا حانسامح روحي
رُوح ما تآذيش روحك عشاني
روح >> صقر معش تفكر ولا تنفعل بسس ولا تعقدلي الموضوع اكثر ما هو معقد وصدقني انا وعدتك اني نحل لغزك و قاعده اندير في وعدي
حا نردلك حياتك كيف ما كانت ، انت مش مجرد قضية ! حياتي قعدت مرتبطة بحياتك
حتي لو كانت فترة بسيطة بس الرابط هضا حايخليني ندير اللي في جهدي ، ياتصيب يا تخيب
ومش حانآذي روحي اطمن
انا >> مش حانخليك تكملي الا لما ناخذ منك وعد
روح >> شنو
انا >> اي حاجه تسير جديده يكون عندي بيها العلم قبل حتي ما تفكري انك توريها للقاضي
روح >> اتفقنا
انا > خلاص تمام
روح >> حانردلك حياتك اللي كنت فيها قبل
انا >> بس حياتي اللي قبل انتي ماكنتيش فيها
سكتت وحطت يدها علي رقبتها بتوتر
انا >> لو رديتيلي حياتي القديمه خلاص معناها لا نعرفك لا تعرفيني
روح >> انت عندك حياه غيري يكفي اني خربتها لكي انا و ربطتك بيا ف من حقك بعد ما تنحل القضية تشوف حياتك
انا >> كان هكي رايك خلاص تمام
برمت روح وجها واتكت عالكرسي و انا علقت السيارة و طلعت من الشارع ووصلتها للمكتب وماحدش فينا حكى بعد اخر شي
//
//
” روح “
كنت اول مره نشوف صقر منفعل ومتعصب هكي
لدرجة خفففت عليه يضر روحه او يدير اي ردة فعل تجيبنا لاوره وتردنا من وين ما بدينا ، طول الجلسة وانا خايفه ومتوتره انه القاضي يحكم ب ردته للحبس
بس الحمد لله كان حكم الجلسة هذي الصالحنا
طلعت وحاولت نفهم صقر ونهديه حاولت نمسك اعصابي اللي كانن تالفات اشر منه ، كنت نجي علي حساب نفسي بس عشان مافيش ولا حاجه تخرب وبرضو عشان صقر محملني جميل زواجه بيا !
//
//
في الحبس
كنت ماشي انا و غسان للحبس نزورو في بدر
بدر >> غسان ما نوصيكش اه
غسان >> عيب ياراجل فعيوني
انا >> مش غير فعيونك
بدر >> خففلي من المشي غادي بس 
غسان بحت فيا >> تريحت هكي ؟ نعن اصلك بكل
انا >> ساكن الامي بلكي اتربى شويه
غسان >> تو نحقك وانت مش قادر تسيب المحقق كونان اللي عندك
بدر >> تي خطرها قولي بس شن قصة خطبتك انت ما حكيتش راه
انا >> زمري 
غسان >> تحساب روحك بروحك ادف في حقن
انا >> غم بس
ونحن نحكو علي طلعت علاء عنده زيارة
انا >> تي هضا مش قتلي طار
بدر >> الفتره لي فاتت رد
غسان >> وغريبه علاء عنده زيارة
انا >> ملي مقعمز معاه هضا
بدر >> جايين تزورو فيا ولا تقيدو ف احوال الناس
انا >>
غسان>> صبي صبي ورانا شغل خير ما عمك محمود ينفصل علي راسي وراسك
انا >> علي اساس ادير في حاجه ماشي جاي عند نساباتك مسيبها الامي
بدر >> عليك قرون ازح عيني عينك هكي
غسان >> غم ازف را نطحنها معاك نردو انا وياك هنا لا تجي من المحقق كونان لانجي من المدام
انا>> احترم نفسك وقول حضرة المحاميه روح
غسان >> تي اوكي اوكي
وطلعنا انا وغسان ونحن نتناقرو كلمه بكلمه
//
//
عند رُوح كانت فالحوش بعد ما روحت من الشغل و جايتها صاحبتها سارة
سارة >> ياخيه اشري دبش علي حالك عرسك خلاص راه اقل من شهر
روح >> اوووووهو فكيني من سكنان ماما ويارا كذا
سارة >> ياستي باه شن صار فالقضية
روح >> قاعده نربط فالاحداث
في حلقة مفقوده صارت فالليله هذكي انا غايبة عليا ، في حاجه انا مازلت ما عرفتهش ولو نعرفها هي اللي حا توضحلي كل حاجه
سارة >> ما فهمتش ولا حرف ياريتني ما سآلت
روح >> اووووف معش تسأليني تخلي فيا نحكيلك
اسرار الشغل 
سارة >> علي اساس نفهم في حاجه بيش نقول اسرارك يلي ما اتحشمي
خشت يارا جابتلنا قهوة وقعمزت حذانا
يارا >> هضا حالها النقصية ديما مكذبتنا وشاكه فينا وفي روحها
سارة >> هضا حال جماعة القانون
رُوح >> وجك انتي وياها كذا
سارة >> غير والنبي قعمزي بس وجيبي ورقة وقلم وخلينا نكتبو الحاجات اللي بتشريهن
روح >> تي الحوش اجار و مآثث اخرى معنديش مانشري
سارة>> بتعدي للراجل بالدبش اللي عليك اشري دبش عطور مكياج
روح >> صقر يحب ستايل دبشي ف حنشيل معايا دبشي
يارا >> هضا حالها النكديه ياسارة فوتيها
سارة >> قسم بالله ماتسير صبي جيبي ورقة و قلم و انتي بحتي فيا هنا
روح >> بتبدا توا في طروح الشورخ
ياارا مدت السارة الورقه والقلم
سارة >> يا ستي بتجيبي دبش حوش اكيده هذي
ودبش طلوع برضو اكيده
و بتجيبي مكياج وعطور وكريمات
جيبي مناشف ، و جيبي حاجات المطبخ
اكيد الحوش مأثث بس يعني ما يبوش يحطولكم كل شي كواشيك بكرج براد
روح >> هضا كله بنطلع نشريه انا في يوم
سارة >> انا وياك حانديرو يومين فالاسبوع تقعدي فاضية فيهن من شغلك ، نطلعو نشرو الدبش
ورندة ويارا ولا حتي امك معاهن يجيبن الباقي حاجة المطبخ الحاجات الضروريه
روح >> يانا عليا عليك سريب كنت شايلته من راسي
سارة>> حتي مش كويس ماتشري ولا حاجه تشيليها معاك عليك فال الستر
روح >> بتبدا فدوة الصبايا خلاص تمام تو نطلعو
سارة>> غصبا عنك طالعين 
//
//
روحت للحوش و كلمت واحد صاحبي كان يشتغل معايا زمان اسمه نقولوله ” قبطان ” لما ورتني روح رسالة التهديد اللي جتها لقطت الرقم و حفظته
انا >> اوي قبطان
قبطان >> معلم صقر ؟
انا >> ايوه ، بنطلب منك طلب
قبطان >> عيوني لكي
انا >> نبيك تشوفلي الرقم هضا و اي معلومه عليه حتي لو كانت بسيطة بكللللل
قبطان >> اعتبره تم
انا >> نعبى عليك اه ما اطولش
قبطان >> عيب يالصقر
//
//
رُوح
كنت قاعده في داري نفكر في القضية و نبي نعزق اخر كرت اللي هوا نمشي الهل هيثم صاحب القصة كلها علي امل اني نطلع منهم بحاجه
رن تلفوني وكان الهادي اللي يرن
روح >> الو ؟؟؟
الهادي >> انتي دازه موكلك ؟
رُوح استغربت >> موكل من ودازته وين
الهادي >> صقر ران علي واحد يشتغل معايا اسمه قبطان ، قبطان هضا شغل تهريب و نهب و مخذرات! استغربت كيف يعرفه وكيف انه ران عليه في الظروف اللي هوا فيهن توا حايجيبله الكلام هضا شبهه
روح غمضت عيونها واللي خايفه منه بدا يسير صقر بدا يتحرك ومش حا يهدا
روح >> شن طلب
الهادي>> نفس الرقم اللي دزيتيه ليا دزه للقبطان وقبطان ما يعرفش حد متاع تلفونات الا انا ف دزلي
روح >> ما رديتش عليه ؟
الهادي >> اول ما شفت الرقم اذكرت انك طالبتيه مني رديت رنيت علي قبطان وسألته من اللي طالبه وقالي اسم صقر
روح >> تمام يالهادي ماترنش عليه وقول للقبطان هضا ينهيمع صقر انا تو نصرف
الهادي >> تم
صكرت من الهادي وانا دمي فايييييير ، رنيت علي صقر
روح>> توا تجيني فالحوش توااااا
أنا>> شن فيه صايره حاجه كنك ؟؟
روح >> تعرف تجي توا ولا نطلع ونجيك مكان ما انت قاعد
انا >> تي نجيك وين الساعه ١٢ هبله انتي ؟
روح >> صقر ما تجننيش
انا >> عشر دقايق ونكون عندك
قعدت روح تبرم و العشر دقايق عدن عشر ساعات عليها وخايفه من انه صقر يدير اي حاجه يأذي بيها نفسه ويبدو من نقطة الصفر ، ماكانتش خايفه لا من هلها ولا من حد
//
لما كلمتني روح كنت مكسد مع غسان في حوشهم ، طلعت بسرعة ركبت فالسيارة وفي اقل من عشر دقايق كنت عندها
انا >> برا انا
روح >> طالعه
انا >> تي طالعه وين هبله انتي
روح >> بنفتحلك الباب بلا حناطه
انا >> لا بتفتحي الباب تمام 
روح >> قليل ادببب
طلعت روح وكانت يارا راقده وامها راقده و الضي طافي بدون اي خوف علي روحها كان الخوف عليا انا واللي نبي نديره
فتحت الباب دفيتها وخشيت جوا
انا بصوت واطي >> هبله انتي ؟؟ عيت جدك جنبكم و امك واختك جوا
روح>> انت من قالك تكلم الزفت اللي اسمه قبطان هضا
انا استكيت >> ومن اللي قالك
روح >> مش معنى اني محاميه معناها ما نعرفش الاشكال الوسخه هذينا ، انت بعقلك ؟؟؟؟؟بعقلككككك تبي تودر روحك ؟؟ تخيل ورطك في مشكله ؟ هضا متاع تهريب ومخذرات
صقر ما تهبلنيش ماتخلينيش نندم اني طلعتك بكفاله وندير حاجه مش حاتعجبك
انا >> تبيني نشوف التهديد بعيوني ونسكت ؟؟ شنو عيّل انا ؟؟؟
روح >> قسم بالله نعرف انك راجل والله العظيم نعرف بس صقر حقك حاناخذه لكي بدون اي مشاكل و هرجه صدقني حتضر روحك وتضرني ! شوف الوين وصلتني ؟ قعدت معش نخاف علي روحي جايبتك فعز الليل عشان نقولك ياصقر ما تضرش روحك
انا >> خايف عليك
روح بحتت في عيوني >> ماتخافش عليا مش حايسيرلي شي
انا >> المره هذي حانوخر بس وديني اي تهديد يجيك وماتقوليليش حانقلب الدنيا
روح >> مش حا يسير شي ما تخافش
بحتت فيها وكان الضي خافت و قاعدين مصبيين فالممر و الباب مصكر ، و شعرها حايس و لابسه بجامة حوش وملامحها هادية قعدت نبحت فيها
روح وخرت عالساس >> هالوو ؟ شن فيه
انا >> امتي نجوزو قتيلي ؟
روح >> ولو اجوزنا شن حايسير يعني ؟
انا >> حاجات واجد تحبي نوريك حاجه بسيطة منهن ؟
روح >> مش حايسير بينا شي صقر اه بعد ماتخوفنيش
انا >> بعد هذي تقوليها الموكل ثاني مش انا
قربت منها و حطت يدها علي صدري بدفني مسكتهن بالقوه
انا >> اهدي
روح بصوت واطي >> صقر اطلع
نزلت راسي علي وجها وعيني في عينها
انا >> لو حد يمس شعره منك مستعد نقتل
روح ساكته و قلبها يدق بالقوه
لصقت فيها >> اهدي ماتخافيش
كريتها في حضني لعند هدا قلبها ووخرتها شويه
انا >> معش تهدي الا هنا ؟ ” وشيرت علي صدري”
روح >> صقر النبي تعدي وامسح رقم قبطان و ماتردش عليه
انا >> حاضر
قربت منها وبستها في خدها ، وطلعت
//
//
رُوح
كنت مستسلمه ! مش فاطنه الروحي ، مش واعيه بكل للي قاعد يسير !!
روح انتي مع متهم ، متهم مازلتي ما ثبتي برائته ! متهم ممكن انه يكون مجرم … افطني ركزيييي شن الي قاعده اديري فيه مش بعقلك انتي
انا مش بعقلي ماهو المتهم هضا هو اللي طلبت منه يجوزني ؟؟ واللي بعد اقل من عشرين يوم حانكون علي ذمته واسمه !!
يارب يارب عدي الايام هذينا بدون اي ضرر يارب … امتي نوصل في اخر جلسة وفي يدي دليل براءته
//
//
مشن الايام علي الاتفاق متاع ساره وروح قعدت روح بين القضية وبين السوق
ويارا و رندة خوات روح يطلعن يشرن في حاجات الحوش
لعند ما جن ايام العرس
