الحلقة الحادية عشر
//
//
منذر>> تعال قولي شن تبي فيا ؟
انا >> بنزوج
منذر >> كيف ؟؟
انا>> كيف مالناس تزوج
منذر >> قصدي فهمني ؟؟؟ مازال ملف قضيتك ما اسكرش ؟؟ وغير هكي وين بتسكنها ؟؟
انا >> متفاهمين علي كل شي نبيك تحكي الامك بس انا نتحشم نحكي معاها
منذر>> غالط مع البنت ؟؟
انا >> عليك قوبعه
لحقت نطلع انا بيش نغلط
منذر >> يستر الله 
انا >> احكي مع امك بس قوللها الاسبوع الجاي
منذر>> احا يا راجل ؟؟ اسبوع جاي مره وحده
انا >> وبعد فترة العرس هي توكل عدي قوللها
منذر >> لا رسمي غالط
خش منذر يحكي مع امي وانا مقعمز فالدار شويه ونسمع في صوت حد يجري
فاطمة >> قسسسسسسم بالله كنت حااااااسه والله عرفت
انا >> انعشكلك فجعتيني
فاطمه>> وتقول محاميييه بس ؟؟؟ تي علييي منننن مش علي فطومة
انا >> انتي من جهه وغسان من جهه و خوك من جهه وكيف عرفتي انها هيه ماقلتش المنذر انا من
فاطمة>> اصلا اللي يحقكم من اول مره يعرف
انا >> غير حكى منذر الامك؟؟
فاطمة>> اه استغربت فالاول بس فرحت انت عارف كيف كان خاطرها تفرح بيك
غمضت عيوني و اذكرت سكنان امي لما كانت تبيني نمشي نخطب امل
فاطمة فهمت الموضوع واسحبت روحها وطلعت من الدار
//
//
ثاني يوم كانت روح تشتغل فالمكتب و تراجي في ربيع يجيها في اي لحظة … وكانت ماسكه الورقة اللي كانت فيها الرسمه وترسم في جزء منها
دقيت الباب
رُوح>> تفضل
وكانت مطبسه راسها و ترسم
انا >> واضح انك اكتشفتي حاجه جديده
لما سمعت صوتي رفعت راسها وارتبكت ، دسة الورقة فالدرج وحطت القلم وبحتت فيا
روح>> اهلين تفضل
انا >> اكتشفتي شي ؟
روح >> انت لغز وتبيني نحلّك واهو قاعده نحل فيك
انا >> اهااااه قعدت هكي الحكايه هي
روح >> خليني بس نشوف شغلي و انت ما تفكرش في شي
انا >> يا سلام ؟
روح حولت نظاراتها >> ها بتشتغل محامي معايا ؟؟
انا >> تو بنسآلك سؤال قانوني
روح >> تفضل حضرتك
“حطت يدها علي خدها وبحتت فيا”
انا درتلها نفس الحركه>> توا لو اثنين متجوزين
المراه محامية و الراجل عادي يعني يشتغل
بس صارتله حاجه و خش للحبس ، تقدر مراته ادافع عليه ؟؟ تكون هيه محاميته ؟
روح حولت يدها من خدها ودرت لبسة النظارة عرفتها ارتبكت ، طبست راسها وحطت يدها علي رقبتها >> شوف ، لو كانت مراته قاضية او وكيل نيابة ف مستحيل تقدر تمسك اي شي يخص قضية زوجها ، بس بالنسبة للمحاماه ف عادي لانها هي تمثله
انا >> اوكيييي ، يعني انتي حاتمثليني
روح >> كيف ؟؟
انا >> نطمن بس لما نزوجو القضية كيف حا تمشي ؟؟
روح >> تحكي جد ؟؟
انا >> وانا عمري بصرت؟؟
روح >> من الناحيه هذي فعلا
انا >> يبقى لو فاضيين الاسبوع الجاي شوفي يوم و قوليلي
روح >> صقر مش مجبور ادير شي كيف هكي عشان انا طلبت منك ؟
انا سكتت وجيت بنحكي بس اختصرت الكلام >> شوفي يوم و بس .
“ماكنتش قادر نقوللها انك انتي كنتي الروح لما كنت بلا روح ،ماكنتش قادر نطلع الكلام ولا نقوللها انك وقفتي جنبي لما كلهم خيبو ظني … من يوم ما خشيت للحبس وانا مش قادر نحكي ولا قادر نطلع اللي جوا “
روح >> صقر عادي نحكي معاك في موضوع قبل ما نديرو اي خطوة ؟ صح احنا مش حنكونو زوجين عاديين بس بنحكيلك وماتقاطعنيش
انا >> احكي
روح>> انا مشيت حكيت مع امل وتلاقيت معاها لما كنت فالحبس … امل متجوزه وعندها ولد و كانت تحساب انك محكوم عليك مؤبد
حكتلي روح اللي صار يوم ما تلاقت مع امل
//
//
لما تلاقن امل وروح
امل >> من بعد ما خش صقر للحبس كنت منهارة مش مصدقة ان حب حياتي كلها خلاص محبوس
انهرت وبكيت وكان عندي امل يطلع وكنت نحكي مع هله واصحابه شبه يومي ، بس ماكانش في امل من طلعته
راجيته سنه لعند سمعت انه حكمو عليه مؤبد
روح>> ومن اللي قالك؟؟
امل>>عرفت وخلاص
روح>> كملي
امل>> خلاص اكيد مش حانرجاه ولا حانقعد نبكي عليه طول عمري شفت حياتي
روح>> ماحاولتيش اتآكدي ؟؟ تسألي تعرفي الكلام هضا صح او لا ما حاولتيش تمشيله زيارة عالاقل ؟؟
امل>> مانعرفش مانعرفش ما عنديش اجابه ، فكرت بعقلي مش بقلبي لقيت حياتي معاه حتي لو طلع من الحبس مش حاتقعد حياه … ولما عرفت انه مؤبد خلاص قطعت الوصل
روح >> بس مش حرام هكي ؟؟
امل >> روح انا عندي بيبي توا مازال دوبه شهور … هضا سبب جيتي هنا .. مانبش اي حاجه تخرب حياتي … صقر دمرني وماصدقت وقفت
روح >> صدقيني انتي ظلمتيه
امل >> انتي محاميه !!!! مالكش علاقة بحياته الشخصية
روح >> اللي نبيه نعرفه انا نعرف شغلي كويس
امل >> قولي الصقر يسامحني بس ماكنتش نبي نآذي نفسي
//
//
رُوح >> وبس هضا اللي صار
انـا >> يعني هي متجوزه ؟؟
رُوح>> اها
انا >> وعليش تحكيلي فالقصة هذي توا ؟؟ يعني ليش اخترتي الوقت هضا بذات
روح >> حسيته موضوع حسّاس ولازم ينحكى فيه …
انـا>> بس ؟؟
روح بربكه>> و برضو تعرف انه لو فيه اي مشاعر اتجاهها او بعد ما يكمل اي شي بينا سوا القضية او اللي حا يصير شخصي بينا … تقدر ادير اللي تبيه
صبيت و جيت ورا الكرسي اللي هيه قاعده فيه طبست عليها وجيت عند وذنها حسيت برعشتها وحكيت بصوت وااطي >> لو نبي ندير اي حاجه مش حانرجي من حد يقولي دير هكي ولا لاء .. شوفي يوم مع هلك
وسكتت
روح والكلام ماحوتك يطلع منها >> صقر نحن فالمكتب
انـا >> ان شاء الله فالصين
روح>> بعّد والله نعيط
انا >> يجينا عمي محمود ما شور شي
روح >> قسم بالله المره الجايه نلبسك قضية تحرش
انا >> تقوليلهم راجلي يتحرش بيا ؟ عيب يا رُوحي ؟
رُوح بعصبيه >> ما روح ماحد انا 
انا وخرت >> ماشي يا رُوح ماحد 
طلعت وصكرت الباب
//
//
كانت طول ما روح تحكيلي علي امل وانا ماسك اعصابي … مانبيش نحكي ولا ندير اي انفعال … مش قادر نسأل اي سؤال رغم اني في مليون سؤال في بالي … وهذي الحاجه المليون اللي ندسها في قلبي …
وخرت السيارة ومشيت شور العريس غسـان كانت اليوم الفاتحه ، وصلت عند الجامع ولقيتهم دوبهم خاشين
انا >> العريس
غسان >> اوي ، عقبالك “وغمزلي”
انا>> بنبدو عاد
غسان >> خش خش
خشينا للجامع و صلينا العصر و بعد العصر بدا الشيخ في اجراءات الزواج و كان خال غفران هو وكيلها و عم غسان الكبير وكيله و بدو في الحاجات المعتاده و كملنا الفاتحه وطلعنا
انا >> مبروك يا حبي
غسان >> عقبالك يا رُوحي 
“قالها ويضحك”
انا>> ازف اعقل ياراجل
غسان >> عاقل 
انا >> لا بكل
غسان >> غير كنه جوك ؟؟
انا >> مافي شي ، ماتبوش تشربونا حاجه ؟؟
غسان >> ذل امنها علي قروة هالفاتحة
مشيت انا جنب الشباب و ركب غسان السيارة ورن علي غفران اللي كانت تراجي فيه يرن
غسان >> الو
غفران بصوت خايف >> الو
غسان>> مبروك
غفران>> الله يبارك فيك مازلت مش مستوعبة
غسان >> بنجيكم بعدين
غفران >> عليش ؟؟
غسان >> بنخليك تستوعبي
غفران >> كيف 
غسان يضحك >> تو بعد نجي نقولك
غفران >> تجي وين خوالي قاعدين
غسان >> مش عرس هوا خلاص قرينا فاتحه
غفران >> حيعليا بتجي فحوشنا ؟
غسان >> حي عليا انا وانتي مش فاهمه شي
غفران >> باهي باه 
غسان >> عالسبعة نكون عندكم
كمل غسان كلامه مع غفران اللي مازالت مش مصدقه انه فاتحتها نقرة علي غسان … كانت فرحانه ان في راجل قعد في حياتها وانه حد ج يحميها ويكون جنبها
بس كانت خايفه من فكرة انه كل شي جا بسرعة وانها ما تعرفش طبع غسان كويس …
//
//
روحت روح للحوش و حكت مع خالها عشان يحكي الباتها عشان يحددو يوم ويجو
عمر >> تي باهي احكي انتي مع باتك
روح >> ياخالو انت عارف اللي هناك
عمر >> ان شاء الله خير تو نحكي معاه ونقولك
روح >> تمام تمام
طلع خالو عمر و لقيت ماما تبحت فيا من بعيد
ماما >> ماتبيش تحكيلي منو الراجل اللي جاي يخطب هضا ؟؟؟
روح >> لما يجي حاتعرفو عليه
ماما >> باهي احكيلنا عليه
يارا >> نحكي عليه انا
بحتت في يارا >> انتي تسكتي ..
خشيت جوا و خشت ورايا يارا
يارا >> من جدك انتي
روح >> صقر مش كيف اي حد محبوس
يارا >> كيف يعني ؟؟ معجزه ولا شنو ؟
روح >> بلاش هزوة بس صقر شخص متأكده اني حانقعد معاه وانا مطمنه ..وانا مش خايفه هذي الحاجه الي انا ندور عليها ولقيتها
يارا سكتت
روح >> اطلعي بنغير دبشي
يارا >> باهي باه
طلعت يارا وانا مسكت تلفوني واستغربت كيف ربيع ما جانيش اليوم فالشغل … نرن عليه مره اخرى ؟؟ ولا نخليه هو بروحه يجي … باهي لو ما جش شن ندير ؟؟
روح >> اوووووووف ياربي امتي تنحل القضية هذي بسسس كل ما نحل لغز يطلع وراه واحد ثاني
//
//
عندي أنا … مشيت لمكان الشغل وسيبت غسان ماشي يشوف فالمدام 
كنت قاعد قدام المحل و رن تلفوني … وكان رقم علي
انا >> الو
علي >> وين قاعد
وصفتله المكان وصكر دغري
قعدت مصبي و نراجي فيه ، ماكنتش عارف شن حتكون ردة فعلي ؟ حتي هو مهددينه ؟؟
قعدت مصبي لعند شفته درس و نزل من السيارة ، و اول ما قرّب مني بحتت فيه وضربته بوني لعند قريب طاح
فرد علي جسمه و صبى قدامي >> حقّاتك
انا >> مش رفيق عمرك انا ؟؟؟ مش صاحبك اللي خشيت للحبس عشانك ؟؟
علي >> حقك تقول اللي تبيه ، بس مازلت نعد فيك رفيقي
انا ضحكت >> كان عندك تبرير كويس قوله كان ما عندكش وجك معش نبي نحقه
علي >> بتسمعني بدون غلط
انا مسكت اعصابي >> بتحكي ولا شنو ؟؟
علي >> من بعد السنة الاولى سمعت بقصة توفاية باتك و كنت لاهي في قصة الشغل و التوكات معش فضيت بكل .. في يوم فضيت فيه قلت نمشي نشوف هلك ونعزيهم و انصدمت لما لقيتهم محولين ما ريحنيش عقلي عرفت انه في شي غلط و مشيت وسألت لعند عرفت مكانهم وحسيت ان الوضع مش مريح … بعد فترة تعرفت علي بنت الحلال و اجوزت و درت حوش و خفت عليها وعلي روحي وفي نفس الوقت الدنيا لهتني
كنت نسمع في علي وانا مش مقتنع بولا كلمة من اللي يقول فيه ….
انا>> تعرف تمشي ومعش بنشوف وجك ؟ اعتبرني خذيت اعدام و طلعني من راسك
علي >> انا الي عندي حكيته لكي بس
جا علي بيحكي برمت وجي وخشيت للمحل ما نبيش نسمع كذب زيادة
//
//
عند العريس
وصل غسان عند حوش غفران و خش للصالون و قاللهم انه يبي يحكي مع غفران وماحدش قدر يحكي شي
غفران جوا كانت خايفه ومتوتره … لبست بنطلون و بلوزه و حطت الايشرب و خشت عليه
غسان >> مبروك
غفران بصوت واطي >> الله يبارك فيك
غسان >> ليش الايشرب و الصوت الرايح ؟ من شويه قرينا فاتحه راه
غفران بحتت فيه >> شن ندير يعني ؟
غسان صبى و قرب منها لفها شوره و حول الايشرب و قعد يبحت فيها
غسان>> قعدتي مكتوبه بآسمي توا ، يعني مراتي ياريت تستوعبي الفكرة
غفران >> غسان بعد مني
غسان >> لا بعد مني هذي ايام ما كنا اصحاب توا نقرب و نقرب بكل اخرى
غفران >> عيب يا غسان
غسان >> ارخي روحك بس
غفران غمضت عيونها وسكتت وغسان قرب منها
//
//
ثاني يوم فالشغل خشت روح للمكتب و قعدت حايسه فالاوراق و تبي تشوف لو ربيع ما جش اليومين هذينا حاتمشي و تحكي مع هل هيثم واللي هما اخر حاجه فالخطط اللي عندها
علي دقة الباب وخشت ربيع
ربيع >> السلام عليكم
روح >> وعليكم السلام تفضل
ربيع >> انا ربيع حضرتك كلمتيني
روح >> نعرف تفضل و نحكو
قعمز ربيع و هو متوتر شويه
ربيع >> ياريت تقوليلي شن الحاجه الي مكلمتيني عليها
روح >> صقر
اول ما قتله الاسم قرن حواجبه في محاوله انه هوا يذكر الاسم ، بعدين رفع حاجبه دليل علي انه اذكر
ربيع ما كانش صاحب صقر واجد كان مجرد معرفة شغل بس
ربيع >> صقر ؟؟
روح >> ايوه هوا
ربيع >> وشن تبي تعرفي علي قضيته ماهو محكوم وخلاص انتهت القصة !
روح >> بنعرف اللي صار في يوم الجريمه بس
ربيع >> مافهمتش ماهو اكيد صقر حكاه لكي بما انك محاميته
روح >> انا مسكت القضية جديد و نبي نسمع من اول وجديد
ربيع >> اسآليني نجاوبك
روح >> اوكي
بدت روح تسآل في ربيع و هو يجاوب فيها كان ربيع واضح بكل في كلامه وحكالها الي صار واللي متذكره بدون اي توتر
//
//
روحت رُوح للحوش و لقت خالها قاللها انه حكى مع باتها و خلي هل صقر يجو الخميس هضا … يعني بعد يومين … خشت روح الدارها ورنت علي سارة حكتلها اللي صار
روح >> ياربي متحشمه نكلمه نقوله بكل
سارة >> دزي مسج
روح >> قولتك هكي
سارة >> اه والله
روح >> تمام سكري خليني ندزله
صكرت روح من سارة و حطت علمسجات وقعدت تعصر في دماغها تبي اطلع كلام كويس ادزه لصقر تكتب وتمسح و تسكر فالتلفون وترد تفتح لعند ما كتبت المسج
“حكيت مع بابا وقالي لو الخميس فاضيين تفضلو”
دزت المسج وحطت التلفون بعيد بككككككل وكل شويه تبحت فيه تراجي في الرد
//
//
” صقر “
كنت قاعد فالحوش و نراجي في غسان يتكي عليا نمشو مع بعضنا شور المحل ، جتني رسالة رُوح
ضحكت من اسلوب الرسالة وعرفتها متخزرطة
دزيتلها ” تمام الخميس ان شاء الله “
حطيت التلفون وخشيت الفاطمة فالمطبخ و قتلها تقول الامي علي يوم الخميس
فاطمه >> تحكي مع جدك ؟ ما وتينا شي خليها السبت
انا >> يارا فكيني من الاوڤر شن بتوتو يعني ؟؟
فاطمه >> الناس توا تشيل راه يعني نمشو يدينا فاضيات
انا >> تو نجيب انا غير اس بس وبعدين انتي من قالك ماشيه
فاطمة>> نقه كان ما مشيت انا من بيمشي
انا >> باهي باهي غير قولي الامك بس
فاطمه >> عريس يتحشم وحركات
انا >> تحسابيني جالط زيك
فاطمة >>عدي رد علي تلفونك عدي
مشيت رديت علي تلفوني وكان غسان قالي انه قاعد برا
غسان >> سنه ازح نراجي فيك
انا >> كنك من لما قريت الفاتحة قعدت معيال
غسان >> كبرنا
انا >> غير اوكي بس
غسان >> شن صار معاك انت ؟
انا >> بيبدا عاد
غسان >> غير قول بس والله مانضحك
انا >>سكنان ازح خلاص اتفقنا عالخميس
غسان >> العبي
//
//
مرن الكم يوم و روح حايسه فالقضية و تلم فالمعلومات علي بعضهن كلام صقر علي كلام علي علي الاوراق القديمه علي كل حاجه وتحاول انها تلقى اي حاجه قبل موعد الجلسة الجايه عشان ما يسقطوش الكفالة ويرد صقر للحبس لعند موعد الجلسة النهائية
وصقر كان مش فايت موضوع القضية وحاس انه فيه حاجه غلط و كان يمشي ويسآل بس ما يبيش حد يفطن لا غسان ولا روح ولا هله
//
//
يوم الخميس
يوم جية هل صقر الرُوح
جت فاطمه وام صقر بس و كان فالحوش اخت روح الكبيره و يارا و امها بس
تعرفو وحكو كلام عادي و حكت الام علي ظروف صقر و ام رُوح انصدمت و بانت الصدمه علي وجها لما عرفت انه مازال ماحكموش عليه وف اي لحظة مرات يخش للحبس
من بعد ما عرفت ام روح الكلام هضا ملامح وجها تغيرن بكل ومعش شاركت فالحديث و قعدت اخت روح الكبيره هي اللي تحكي ، طلعت روح مدت القهوة و قعمزت شويه وصبت
ما طولوش واجد شويه وجا منذر وروح بيهم
ام روح >> انتي من جدك ؟؟؟؟؟ انتي اكيد انكلبتي مش بعقلك جايبتلي واحد محبوس ؟؟؟؟؟؟ واحد مجرم
روح >> صقر مش مجرم ماحدش له علاقه بيا انا اللي ماسكه قضيته وعارفه انه هو برىء معش حد يحكيلي فالقصة هذي خلاص تعبتوني
يارا حست بروح انها علي اعصابها >> خلاص يا ماما بلاش حرق دم هي تبي و بابا موافق و هي تعرف صقر مش حايسير شي
خشت روح للدار و امها برا تهزب
//
//
روحو هلي للحوش و امي ماحكتش شي من بعد طلعتي من الحبس وهي مش قادره تحط عينها في عيني وما اعترضتش لا علي الخطبه ولا علي الهل ولا شي
فاطمه >> انقنها مزه 
انا >> احترمي نفسك ازح قدام خوك الكبير
فاطمه >> باه بس اسمع
انا >> نعم
فاطمه >> هلها عارفين بقصة حبستك ؟
انا >> باتها يعرف وخالها اه ليش ؟؟
فاطمه >> حسيت امها كيف اللي مصدومه بعد ما ماما حكت
انا >> وامك ليش تحكي
فاطمه >> كيف ليش تحكي ، قالتلها راه ظروفنا كذا وكذا
انا >> اوكي تمام
خشت فاطمه ومسكت التلفون ورنيت علي روح
انا>> الو
روح بصوت مخنوق>> ايوا
انا >> كنه صوتك ؟
روح >> شي نعسانه بس
انا >> في فرق بين الصوت النعسان والصوت المخنوق
روح سكتت
انا >> ليش ما قلتيليش انك مش قايله الهلك ؟؟
روح >> قايلتلهم ماما بس ما تعرفش
انا >> ليش ما قلتيلها
روح >> عشان حاتقول لا و حادير جو شين وماكانتش حاتطلع الامك ف عشان هكي ما قلتلهش
انا >> انتي راضية باللي اديري فيه ؟
روح >> انا راضيه ياصقر راضيه ! بطل تحسسني كل شويه باني وقحه و تذكرني اني انا اللي طلبت منك فهمتك وقتلك انه هضا الحل اللي قدامي و قتلك لو مش موافق ما توافقش وانسى القصه
انا >> اهدي
روح بعصبيه>> هادية
انا >> لا مش هاديه ، خوذي نفس
روح تنفست واسكتت
انا >> ايوه هكي تمام شفتي محلى الهدوء ؟
روح >> يا برودك
انا >> مش برود بس لو انتي تعيطي وانا عيطت حانوصلو الحل ؟ اكيد لا .. ف مش معنى هكي اني راضي بالكلام بس مانبيش نحكي و نتعصب عشان مش حا نوصلو النتيجه
روح هدت شويه >> اسفه بس انا الفتره هذي مضغوطه بكل
انا >> وانا عارف خلاص اهدي ومش حايسير الا كل خير
روح حست براحة عمرها ما حست بيها ابتسمت >> صقر شكرا علي كل شي
انا >> انا ما درتش شي ، انتي وقفتي معايا في ايام كنت فيهن بروحي ومازلت لعند توا بروحي و انتي واقفه جنبي ماتشكرينيش علي شي
روح >> ان شاء الله ربي يقدرني ونحل القضية هذي علي خير و حاتريح مني ومن هرجتي وكل حد يرد حياته الطبيعيه
انا >> ان شاء الله ان شاء الله
كانو هما الاثنين يحكو و كل حد كلامه من ورا قلبه
روح ما تبيش القضية تكمل عشان ما تنتهيش قصة صقر
وصقر ما يبيش القصة تنحل وكل حد يمشي في حاله
– لعل الإبتلاء الذي لا تحبه يقودك إلى قدر أفضل لـم تحلم به 
…
صكرت روح من صقر وكان هذي اطول مكالمه بينهم واطول حديث من لما بدت القضية
//
//
ناضت روح فالصبح وتت روحها وتبي تمشي للمكتب خذت تلفونها و شنطتها ومشت للشغل
خشت للمكتب لقت ملفات قضايا اخرى غير قضية صقر يبن تدقيق حطت الملفات وبدت تشتغل فيهن بعد شويه فطنت التلفونها
كانت رسالة من رقم غريب مكتوب فيها
” لو مش خايفه علي موكلك خافي علي روحك و اسحبي الكفالة و خلي صقر يرد من وين ما طلعتيه”
حطت عالرقم ورنت عليه و لقاته مقفل في نفس اللحظة
قعدت تقرا فالرسالة مره واثنين و ثلاثه و دزت الرقم للهادي عشان يشوفلها رقم من بس بدون اي فايدة الرقم مسجل باسم واحد ميت من زمان ومالش اي اثر
خذت روح التلفون و مشت شور المحكمة
