رواية سجين وروح الفصل الثالث 3 بقلم الكاتبة آية

الحلقة الثالثة
٧٠٠ لايك ؟
//
//

خش بدر و قعمز وكانت اللي جايته بنت وشكلها صغيرة فالسن واول ما شافاته اضبطاته

ماركزتش معاهم قعدت ندور بعيوني بس لا لقيت هلي ولا لقيت غسان !

كانو كل الي فالزيارة معاهم حد من المساجين

الا بنت كانت شابه و لابسة نظارات طبية و تبحت في اوراق بس ماكنتش نعرفها واول مره نشوفها اساساً … كنت مصبي ونبحت وخلاص و املي خاب بكل

لعند البنت رفعت راسها وبحتت فيا وشيرتلي بيدها !!!

مافهمتش شن فيه بس مشيت شورها وكريت الكرسي و قعمزت

مدتلي يدها >> انا المحامية رُوح مصطفي

انا مديت يدي >> وانا المتهم صقر صالح

ابتسمت ابتسامة مجاملة وفكت يدها

انا >> بس انا الدولة معينتلي محامي

روح >> محاميك تنحى عن خدماته وتعينت انا في مكانه

انا>> وعلي اي اساس ؟؟

روح >> استاذ محمود بات غسان هو اللي عيني علي قضيتك

انا >> و انتي حاتقدري تحلي قضيتي انا ؟؟

طبست راسها و كان كلامي مستفز بالنسبه لها
شبكت يديها في بعضهن و حاولت انها اتمالك غضبها

روح >> عمري ٢٦ سنة
تخرجت من القانون في عمر ال ٢٢ سنه قريت القانون في مصر و حضرت الماجستير وناقشت رسالتي و كملت في عمر ال ٢٤ سنه ، سجلت في نقابة المحاميين ودرت الامتحان النقابي ونجحت فيه و بديت كمحامية متدربة … وبعدها درت الامتحان التحريري و الشفوي و نجحت فيهن و خذيت بطاقة محامية مزاولة في بداية ٢٦ سنه وبس

” ابتسمت ابتسامة صفرا و كملت كلامها >> وضحتلك قصة حياتي ؟؟ رغم انه مش من شروط شغلي اني نشرحلك بس عشان يكون فيه اريحيه و تعرف مع من اتعامل

انا وكنت متنرفز من طريقة كلامها اللي من راس خشمها >> يعني هذي اول قضية تمسكيها

سلحت نظاراتها الطبية وبحتت فيا >> ماسكة جنح بس هذي اول مره نمسك جناية بروحي ، شغلي كله تحت اشراف استاذ محمود بس المره هذي بروحي

*بنات معلومة سريعة
الجنحه >> اللي هيه الجريمة اللي عقوبتها اقل من ثلاث سنين *
الجنايات اللي هي مده عقوبتها تبدا من ثلاث سنين فما فوق “

انا >> قولي الغسان شكرا ، بس ما يسير شي

روح>> انا نعرف انه قضيتك معقده .. بس ماكنتش نعرف انه حتي شخصيتك معقده !

صبيت من حذاها ووخرت الكرسي >> سلميلي علي غسان

روح تلم فالاوراق فالشنطة >> حا يجيك بكرا سلم عليه بروحك

وخذت شنطتها ونظاراتها وطلعت

جيت بنطلع لقيت بدر يحكي مع البنت وواضح انه حديث مهم لانه ماكانش فاطن الشي حوله

فتحلي شاهين الباب و مشيت شور زنزانتي
ماكنتش متوقع انه غسان حا يوفي بوعده و يعينلي محامي او بالاصح محامية ! بس انا قضيتي ماتبيلهش محامي ، تبيلها رحمة من عند ربي خشيت و لقيت طارق قدامي عرفته حا ينفخلي راسي

طارق >> شن صار؟؟
انا >> المحامي
طارق>> كيف محامي له زمان ماجكش
انا>>اهو خطرله يجي

قعدت شوية علي خشت بدر

طارق بحت فيه >>زيارة من من

بدر عطاه نظره ومشا قعمز في مكانه ما ردش عليه

بحتت في طارق وضحكت… وقعدت نفكر فالمحاميه اللي جتني

//
//

قبل يومين

رد غسان الباته فالمكتب عشان يحكيله علي قصة صقر من جديد

غسان >> باهي انت اسمع بس شن قضيته وشن ظروفه

محمود>> لو نبي نسمع ظروف كل الموكلين لي نمسكلهم في قضاياهم معش حا نمشي في شغلي

غسان >> باهي ما تمسكش انت شوفله اي محامي

مع خشت المحاميه روح للمكتب و انا نحكي الباتي

روح>> استاذ محمود هذينا اوراق قضية المدعي ناصر واتيات

محمود>> تمام

غسان>> القضية صعبه ومعقدة انت بس دلني علي محامي كويس بس و الباقي ساهل انا نعرف نصرف فيه

محمود بنفاذ صبر من سكنان غسان>> روح تمسكي القضية؟؟

روح>> نشوف اوراقها ونقولك

محمود>> مافيش تشوفي قولي توا يا اه يا لا و فكيني من القصة

روح >> خلاص نمسكها

محمود >> يبقى من يوم وغادي اطلع من راسي وتفاهم منك لها

غسان >> نعليا منك يالشايب 
محمود>> اطلع برا اطلع قليل الادب
روح >> 

روح >> تعال المكتبي

طلع غسان ورا روح وخشو المكتبها

روح >> احكيلي شن القضية

غسان>> اول شي احكيلي انتي بس تقدري عالقضية؟؟

روح>> من غير ما نعرفها نقولك اني حانقدر عليها ، انا واثقه من روحي اني نقدر نحل قضية كبيره بس ولا مره عطوني فرصة !

غسان >> ماعنديش امل الا انتي حا نوثق فيكي

روح >> اطمن حانكون قد الثقه ، احكيلي بس شن القضية

غسان >> انا مش حانحكيلك عشان انا مش عارف التفصيل ، صقر اللي هو صاحب القضية
ما يحكيش ، يعني انا الوحيد اساسا الي حكالي تهمته بس مش بتفصيل

روح >> انا هكي كيف نقدر نساعده ؟

غسان >> المحامي متاعه معاه اوراق القضية
روح>> وفيهن اقوال صقر؟؟
غسان >> فيهن اقوال صقر اللي قدمهن فالنيابه بس
روح>> وماحكش مع المحامي شي ؟؟

غسان>> نحب نقولك انه صقر هله غالطين كان المفروض يسموه صخر من كثر ما هو راسه يابس !

روح >> قولي شن اسم المحامي و عطيني شوية تفصيل علي صقر والباقي عندي

غسان>> تمام

عطاها غسان اسم المحامي و وراها صورة الصقر من الفيسبوك متاع صقر عشان لما تمشيله للزيارة تعرفه .. و حكالها اللي يعرفه

روح >> انا حانمشي اليوم للمحامي في مكتبه دابينه الوقت مازال بدري بس اكيد نبو واسطة استاذ محمود فالموضوع هضا عشان المحامي يتنازللنا عن القضية وناخذ انا الوكالة

غسان >> احكيله انتي حاجات محاميين مش شوري انا  وبعدين شفتي باتي انتي كيف يعامل فيا تقول ولده بالتبني

روح بحتت فيه >> خلاص حا نخش نحكي معاه انا 

غسان >> اي شي تبيه خوذي رقمي و خليني علي تواصل بكل خطوه وقولي الصقر اني حانجيه فزيارة اللي بعدك

روح >> تمام

طلع غسان وروح علي طول خشت لاستاذ محمود ومحوتك وافق انه يكلم مكتب المحامي وبواسطه منه دبر الموضوع

وعلي طول روح مشت للمحامي وخذت منه ملف القضية ومشت للنيابه قدمت ملف بالوكالة وخدت اذن بالزيارة في اليوم الي جتني فيه

//
//

طلعت روح من عندي ورنت علي غسان وحكتله اللي صار

غسان >> قتلك انه صخر ، يعني خلاص معش تبي تمشي؟؟

روح>> اكيد لا بس قتلي نقولك شن صار بس وقتلك ، لكن القضية هذي من اليوم قعدت قضيتي

غسان>> بس كيف وصقر ؟

روح>> انا محاميته وهو موكلي يبي ولا ما يبيش

غسان>>شكلي كنت في صخر واحد وقعدت في صخرين 

روح ضحكت >> تقدر تقول هكي 

غسان >> علي كل حال انا ماشيله بكرا

روح>> اها قتله

غسان >> تمام
روح>> نستاذن منك معايا مكالمة اخري
غسان>> اوكي

روح>> الو
يارا ” اختها >> محامية المستقبل
روح >> مازال فيها مستقبل هي 
يارا >> مازال مازال المستقبل وحانشوفك احلى عروس
روح >> حانقعد عروس بس مع اللي انا نبيه  و خلاص انهولي القصة
يارا >> هو انتي جبتيلنا من ابو حب دا واحنا قولنا لاء؟
روح>> فكيني من بوستات الفيس بوك وقوليلي شن دايرين غدا

يارا>> محاميه همها علي بطنها

روح>> يارا !؟
يارا>> دايرين رز ودجاج
روح>> عقبولي طالعه توا جاية
يارا >> اوكي

//
//

في الحبس

طلعنا للغدا وكنا نتغدو

محمد >> معش سمعنا اخبار عالذيب
انا >> قالو رحلوه العنبر ثاني
محمد >> احسن

كان بدر مقعمز يسمع فينا

بدر >> من الذيب
انا >> واحد مشكلجي كان طول الوقت عرايك هو وعلاء
بدر>> علاء اللي وريته ليا؟؟
انا >> اه

صبا بدر حط تبسيه و مشا شور الحمام كنت مطبس راسي ورفعت جت عيني علي شلة علاء و اللي استغربته انه طارق معاهم كان

حقيت بدر خش شور الحمامات و لحقه واحد من جماعة علاء وبعدين لحقة لاخر … وخش علاء وراهم وطارق كان مصبي ويبحت فيهم من بعيد

انا صبيت وبحتت في محمد >> خلي عينك عليا ولما نشيرلك نادي علي شاهين قوله فيه عركة

محمد >> شن فيه ؟؟
انا >> دير اللي قتلك عليه بس

صبيت خذيت كاشيك في يدي دسيته فالكم ومشيت شور الحمام وقبل ما نخش لقيتهم محاوطين بدر وبدر فالنص عرفتها تبي تلحم بحتت في محمد لقيته يبحت فيا شيرتله بيدي من تحت ومشا شور شاهين وخشيت للحمام

واول ما خشيت رفعت يدي و مديت الكاشيك البدر لاني انا كنت مدرب ونعرف كيف نضرب وشن ندير

و بدت الدنيا ضرب كنا انا وبدر فالنص و علاء وجماعتة محاوطينه…وكل حد يضرب من اي تركينه

كنت ماسك علاء بين يديا و علي قد ما كنت في حالي ومش جاي شور حد بس علي قد ما علاء كان شيطان علي هيئة انسان مستحيل يجيك اي شعور اتجاهه بالشفقة

خشو علينا الشرطة و معش قدرو يفكونا من بعضنا الا بالقوة

خذونا كلنا وشالونا المدير السجن … وفضت القصة ماعندهمش ما يديرولنا اكثر من الحبس ما فيش واهو نحن قاعدين فيه

طلعنا شور الزنزانه
بدر >> منور يا الصقر
انا >> اي خدمة

خشينا ولقينا طارق مقعمز مع محمد

محمد >> شن صار ؟؟
انا >> شي عدت

وكان في مراية مكسوره معلقينها عند الشيشمة رفعت نشوف في وجي لقيت تخبيش في خدي و جرة دم علي فمي

طلعو بدر ومحمد مشو عند التلفزون كانت الزنزانه مفتوحه جا طارق بيلحقهم مسكته من عند يده

انا >> حركات العويله نسيناهن من رابعه ابتدائي ، فا متردهنش ليا را نحط غل الثلاث سنين فيك !العب مع اللي قدك ما تلعبش معايا وبدر طلع امه من راسك

طارق تخزرط >> كيف شن تحكي انت ؟؟

انا >> المره هذي مشيتك بجوي ومابيتش نطلعك عيل قدامهم المره الجايه حا نعزقك الهم يشربو من دمك … وانت تعرف اللقاق هنا شن يديرو فيه

علي خشت بدر

بدر >> بنلبس جاكة صقعة

وبحت فيهم لقا الجو مشحون

بدر >> شن فيه

انا >> شي نتفاهمو علي حاجه بس

وطلعت و سيبتهم ورايا

//
//

ثاني يوم

خش الشرطي علينا ونادا علي اسمي

انا >> نعم
الشرطي >> زيارة

طلعت وكنت عارف انه جايني غسان

انا >> توا كيف نور الحبس 
غسان اضبطني >> تشفط يا فرخ
انا >> معقوله قريب تلات اسابيع مختفي
غسان >> والله مشاغل  ” وحط كراع علي كراع”عرس البنت قريب حايسين فيه
انا >> غير نزل كراعك را نكسرها لكي 
غسان بحت فيا زين >> وجك كنه شن فيه مع من متعارك

انا>> تي حاجة تافهه مش موضوع

غسان>> من جاي شورك ازف احكي ؟ نقول الباتي ينقلك ولا شنو
انا >>مافي شي الجو تمام خلاص
غسان >> راس يابس المهم شن المعيله لي درتها مع المحاميه ازف ؟؟
انا >>ياراجل جايبلي وحده متدربه دايرها ليا محاميه

غسان >> مش متدربه هذي محاميه مزاوله ! و شاطرة بكل … سألت عليها باتي وقالي دماغها نطيف

انا >> فوت الموضوع وردلي المحامي لي قبل

غسان >> علي اساس دارلك حاجه ؟؟
انا >> وعلي اساس هذي حديرلي حاجه ؟

غسان>>انت بس جرب مش خاسر شي
انا>> بس خلاص انا قتلها مايسير شي

غسان>>وهيه ما خذتش علي كلامك ! و مازالت مصكرة راسها حا تجي وتحكي معاك

انا >> انت عارف ما عنديش خلوق نحكي

غسان>> صقر جرب !

انا >> خلاص خليها تجيني و يسير خير

غسان>> نجدو فيك عشان نطلعوك من قضية عليك محقنه شن جو الحبس بدوني

انا >> فيه واحد اسمه بدر جابوه لنا للزنزانه وطارق مازال حركات بنات

غسان>> مايهنيش روحه . من بدر هضا ؟؟

انا برمت ورايا لقيت بدر مقعمز مع نفس البنت >> اهوا

غسان>> اوكي

انا>> فوت بس وقولي شن صار في هلي

غسان وجه تغير

انا >> شن فيه ؟؟؟ ما مشيتلهمش!؟؟؟

غسان سكت
انا >> تي احكي ازح عادي لو ما مشيتش
غسان >> لامشيت

انا قعد قلبي يدق وبنسمع منه اي خبر

غسان >> عديت وقالولي هلك حولو من المنطقة
انا انصدمت>> كيف يعني ؟؟؟؟

غسان>> يعني انتقلو المنطقة ثانيه ..

انا >> ما قدرتش تعرف وين انتقلو وليش وشن صار معاهم ؟؟

غسان >> صقر باتك عطاك عمره
انا >> كيف ؟؟؟ تي شن تحكي انت !؟
غسان>> عظم الله اجرك

اول ما قالي غسان باتك عطاك عمره و معش سمعت ولا حرف من اللي قاله بعده … فهمت انه هلي معش يبوني او بالاصح تبرو مني اكيد باتي مات بسببي و هلي حولو من المنطقة بسببي ! و كل شي مني انا …

//
//

عند روح

روح>> مسكت قضية جديده
يارا>> شن الجديد كل ساعة تمسكي في قضية
روح>> المره هذي مش اي قضية
يارا >> كيف يعني ؟؟
روح>> مش زي اللي نمسك فيهن … يعني لو انا خذيتها و كسبتها حاتكون ضربة ليا
يارا >> وشن القضية هذي
روح>> والله مازلت ما نعرف !
يارا >> خديتي اوراقها ؟؟
روح >> اه بس عارفتيني ما ناخذش بلي مكتوب بالورق ! انا نشتغل بلي انا نحس بيه …

يارا >> بس انتي ديما تقولي انه القانون ماتحكميش فيه بظنك وقلبك .. لازم يكونن فيه ادله

روح >> احساس مع الادلة هن اكبر اثبات بالنسبة ليا

يارا >> انتي الكلام معاك كله لغز .. صبي لمي معايا المطبخ
روح>> لالا حانمشي بكرا للمتهم ف بنراجع الملف متاعه و نجهز اسآله
يارا >> يا عليك غموض حاطه روحك فيه

علي خشت ماما >> من اول يوم خشيتي فيه قانون وانتي حياتك كلها الغاز وتحليلات ما تريحتش عليك بكل يا بنتي را يتبدل عقلك

يارا >> عارفيني نحب شغلي ونحب اللي اندير فيه ماحدش يرد يحكيلي فالموضوع هضا عشان بديتو تكثرو … مش اول وحده تشتغل محامية

يارا >> عارفينك مش اول وحده … بس انتي مش عايشة في امريكا عشان تشتغلي بطريقتك هذي !!! كأنك في مسلسل CSI

روح >> درت حاجه غلط ؟؟ لا ! نشتغل علي حد المعقول فا محدش يزقبلي

يارا >> نعنك ما تردي هيا يا ماما هذي حيوانه تو انا نجوز و نجيبلك راجل سمح وعيال كيفه

امها ضربتها علي ظهرها >> اس يا جالطة

يارا >> يناعلي طلعتي مصارييني
روح>
طلعت يارا و روح مسكت الملف و قعدت تشوف فيه
كانت تفكر كيف ممكن تقدر تقنع صقر بآنه يقبل تكون محاميته …. كانت تحكي بينها وبين روحها

روح>> لازم لازم نخليه يوافق .. قضية كيف هذي مش ديما تصير ولازم نستلمها ونباشر فيها
بس كيف ؟ اللي شافاته عيني انسان معقد و حاصل في روحه مش حانقدر نخش فيه حتي من باب الصحبة !!

صحبة ؟؟ ليش لاء !

وخطرتلها فكرة و قررت اتنفذها

//
//

“صقر”

بعد يومين كنت عايش فيهن في عالم بروحي .. فاقد الامل من كل شي … كنت نحسب فالايام وندعي عشان نطلع من هنا كله عشان هلي ! وانا حاليا معش عندي هل … كل شي خرب بسببي ماعنديش عليش طالع من هنا ، هضا مكاني .

خش شاهين >> صقر زيارة

انا >>منو ؟؟
شاهين >> مانعرفش

مشيت بخطوات ثقال .. كنت كل يوم يكون فيه زيارة ومع فتحت الباب نتحمس و قلبي يدق
بس المره هذي فقدت الامل من كل شي كنت نمشي وعارف انه ما فيش شي يفرح
وصلت للمكان متاع الزيارة و لقيت المحامية !

مشيت شورها وانا مش طايق روحي ومانبيش نسمع ولا حاجه شور القضية … قعمزت وقعدت نبحت فيها وكان نلقاها اطير من قدامي ماعنديش خلوق … والغريب اني لقيتها عكس المره اللي فاتت … المره اللي فاتت كانت جديه المره هذي كانت مبتسمه في وجي 

روح>> حانقعدو ساكتين هكي ؟؟
انا>>ماعنديش ما نحكي ولا جاي نحكي
روح>> يعني نحكي انا

سكتت ما بيتش نرد عليها

روح>> انا حابه نساعدك جرب مش خاسر شي لو ما تريحتش ولقيتني ما درتلكش فايدة وكل محامي ثاني

انا >> لا نبيك ولا نبي محامي ثاني ، طلعه من هنا معش نبي نطلع شوفي قضية اخرى واطلعي من راسي

روح>> اول شي الناس كلها تمر بظروف بس ظروفك هذينا ما يمنعنكش تحكي مع الناس بذوق شويه !
ثاني شي انا حابه نساعدك حتي برا القضية كيف ليش مش عارفه !

انا >> لا حول ولا قوة الا بالله ، غسان من وين جابك ليا !
روح>> من مكتب باته 

انا >> وخفة دم اخرى ؟؟

روح >> فُل اوبشنز 

انا >> زي ما لقالك غسان قضيتي ح يلقالك وحده ثانيه … انا كان عندي امل نطلع علي سباه اللي هوا هلي بس توا هل معش عندي راحو ما نعرفش وين .. انا حتي نطلع ماعنديش وين نقعد حتي الحوش انباع !
وكله بسببي نطلع بآي وجه ؟؟ نستاهل نقعد هنا وهضا مكاني

روح مش فاهمه بس فرحت انه حكالها وقعدت تعطي معاه فالكلام>> ليش تبحت لنص الكبايه الفاضي ماتعرفش شن ظروف هلك ماتعرفش شن صاير اطلع ودور عليهم و اعرف اسبابهم مرات تعذرهم … خلي عندك امل شويه

انا >> حتي امل راحت معاهم حتي هيه !

روح رفعت حاجبها ومش فاهمة

انا>> قصة بروحها

روح>> انت انسان مليان اسرار ! عبارة عن لُغز ؟

انا >> حليني

الشرطي >> الزيارة انتهت يا هوه هيا

روح >> الزيارة الجايه حانجيك !

انا >> نعرف اني معاندي بس كيف عنادك ما شفتش !

روح >> ومازال ياما ح تشوف .

جا الشرطي صباني وبحتت فيا روح وطلعت

‏” عندما لا يملك المرء شيئًا ليخسره، يصبح شجاعًا، نحن مترددون فقط عندما نملك أملًا .”

//
//

روح

اول ما طلعت رنيت علي غسان علي طول

روح>> غسان بنفهم منك موضوع هل صقر ضروري

غسان>> تي شن فيه
روح>> فاضي ؟؟
غسان>> نص ساعة ونكمل شغلي
روح>> ياريت تجيني فالمكتب
غسان>> باهي

مشت روح للمكتب و فتحت ملف صقر وتقرا فيه للمره المليون !مالقتش ولا ثغرة تقدر توصل بيها الحاجه جديده … حطت الملف فالارشيف و خذت ورقة وقلم و بدت فالقضية من اول وجديد

شوية وجاها غسان

روح>> كنت عند الافندي اليوم
غسان>> وقدرتي تقنعيه؟؟
روح>> فهمني شن صار بس
غسان >> قصدك علي هله
روح>> تي اها ليش ما حكيتلي ؟
غسان>> شن حايغير فالقضية
روح>> غسان اي تفصيله انا نبي نعرفها حتي لو خاصه بكل بكل احكيلي كل حاجه تعرفها علي صقر اي معلومه قالها لكي اي معلومه سمعتها اي شي

غسان>> بس هذينا اسرار مانقدرش نقولهن !

روح>> يكون في علمك اني انا حالفه القسم القانوني ! واي حاجه مش حا تنفعني فالقضية مش حا نستعملها ضد موكلي ، هضا غير اني حتي لو استعملتها ضده و ابتزيته بالمعلومات اللي عندي علي طول حا نتحاسب تنسحب مني بطاقة المحاماه الموضوع مش ساهل وعارفه مهنتي كويس و تقدر تسآل استاذ محمود واتآكد من كل كلامي

غسان >> خلاص خلاص تمام 

حكى غسان الروح الي يعرفه علي صقر …شوية معلومات ونهى كلامه بمشيته وسألته علي هله والي صار كله

روح>> انت كيف ما تقوليش حاجه كيف هذي
غسان>> وشن دخل الكلام هضا بالقضية ؟؟
روح >> له دخل ولا مالش دخل بالقضية انا لازم نعرف !!
غسان >> اهو عرفتيي
روح>> يعني عشان هكي صقر رافض اصلا انه يطلع !! ورافض اساسا حتي انه يحكي
غسان >> مش عارف بس الخبر اكيد صعب عليه
روح>> غير قصة هله في حاجه ثانيه !
غسان>> فيه بس
روح>> يا صبر الارض تي احكي ، اعتبرني صاحبتك يا اخي واحكي
غسان ضحك علي روح وهيه منفصلة >> فيه قصة بس لازم انتي تسأليه عليها ..
روح>> قصة شنو
غسان>> الزيارة الجاية آسآليه علي امل
روح رفعت حاجبها عشان الاسم مر عليها من صقر>> تمام

//
//

روحت روح للحوش غيرت دبشها و خشت تشوف في الغدا شنو

روح من اول ما خشت مجال القانون بذات لما تخرجت وبدت تخش للحياة العملية فصلت الشغل علي حياتها العائلية نهائيا …. فالشغل شخصية وبرا الشغل شخصية ثااااانية بنت عادية طبيعيه تهدرز وتضحك و عادي وعندها صحبات و تمشي للاعراس ولمات كآي بنت بس فالشغل انسانه جامدة لابعد الحدود لدرجة مجرد نظرة منها تخليك واقف مكانك.

يارا >> يا عم السرحان
روح >> شن اخبار الجامعة
يارا >> تمام محاضرات و دراه كبد

يارا اخت روح الصغيرة
روح هي الوسطية و عندها رندة اختها الكبيرة متجوزة و الصغيرة يارا وماعندهمش خوت

روح>> ماما عقبتلي غدا
يارا >> اه سخني وكولي بنرقد
روح >> تعرفي مش واكله تعبانه حانرقد
يارا>> تي كولي راك تموتي

روح غطت وجها بالبطانيه

يارا>> كنك الفترة هذي مش علي بعضك

روح حولت البطانية علي وجها >> جايتني قضيه معقدة هكي و قلبي مش قادر يبعد عليها احساسي من جوا يقولي في حاجه بس مش عارفتها شنو ! وانتي تعرفي احساسي

يارا>> هذي القضية لي قلتي عليها تي باهي سيبيها مش مجبورة تاخذيها

روح >> مستحيل نسيبها ولو خسرتني كل شي ! فيه حاجه مش مريحتني

يارا>> ردبالك را تطلع شي حاجه خطيرة

روح>> راسي داخ خليني نرقد بكرا عندي شغل واجد وماتواعونيش خلوني نعلق لعند بكرا

//
//

فالحبس عند صقر

اول ما طلعت مني روح ومشيت للزنزانه جاني بدر يهدرز معايا

بدر >> شن صار معاك

انا >> ولا حاجه
بدر >> مش علي اساس جايك المحامي ؟
انا >> لالا مانبيش محامي …
بدر >> يا صقر شن فيه ؟ ممكن نكون غريب عليك وماتبيش تحكي بس يعلم ربي الموقف اللي درته معايا يخليني نخدمك بعيوني

انا >> مادرتش شي انا اي حد مكاني يدير هكي

بدر >> لا مش اي حد .. المهم لو تبي تحكيلي انا نسمع صح يديا مقيدات ومش حا نقدر نساعد بس عالاقل حانسمعك

انا >> مايهمك شي لما نبي نحكي حانجيك

طلع بدر مشى شور التلفزون وخش طارق ومحمد للزنزانه غطيت وجي بالبطانية وغمضت عيوني.

//
//

عند روح ثاني يوم
كانت ماسكة اوراق القضية وتقرا فيهن للمرة المليون و تقرا فالجديد اللي هي كتباته

كانت تقرا في اليوم اللي صارت فيه الجريمة وتركز علي كل حرف مكتوب تبي تحاول توصل الاي خيط يخليها تخش في صقر وتبدا معاه

.
.

كنتو متوقعين رُوح تطلع محامية