رواية سر خلف النقاب الفصل التاسع 9 بقلم هدوء آل محمد
بأي ذنب حقوقهم بتلك البشاعة سلبت
دموع اليأس على الجفون تناثرت
نوارس الامل بعيداً نحو المجهول حلقت
لـ هدوء أل محمد
________________________________________
الكل يركض دورنا البيت كله وهي فص ملح وذاب دخلت لغرفتي اركض ماكو غير راحت ويا طلعت رقمه اتصل بي وهاي كانت الغلطة الثانية الي رتكبتها بحياتي لان مشعان گبل فتح الباب وجر الموبايل من ايدي
نفتح الخط بيدة واجاني صوته مرعوب ومذهول
شامل:- تسنيم مهجة م ماتت مااتت والله مادري مادري هي ماتت ماسويت الها شي مادري
كلمات نطقها كانت كفيلة بنهياري صرخت صرخه هزت البيت هز
عيني على مشعان الي نگلب شيطان وما بالغ بهذا الوصف كل البيت اجى على صراخي
ضرار:- ولج شكوووو شبيج
باسمة:- وخرس ولج شجاااج تصرخيين
مشعان متيبس بمكانه مانطق ولا كلمه عينه عليه هزيتله راسي انفي واوضح اله بس هيهات عقله يصور اله ان انا متفقة مع شامل!!! تقدم الي وضربني كف وعيونه دم يمنع دموعة تنزل
مشعان:- راجعلج ياساقطة
ندار وسحب المفتاح من الباب صرخ بيهم
مشعان:- امشووووو
طلعو كلهم وباوعلي بنضرة اخيرة يتوعدلي قفل الباب وصرت اصرخ
_مشعان ماعليه والله ماعليه مالي دخل مهجة نبهتها منه بس ماسمعتني
صار صراخهم برة
ضرار:- ولج شجااااي تحجين نبهتي منوو مهجة وينهاا
نحب مشعان وصار يحجي وبچي
مشعان:- اختك نزلت راسنا بويه اختك نضحك عليها وراحت من ايدي بويه مرتي متفقة ويه اخوها الكلب شامل على بنتي
هل كلمة كفيله تخلي البيت ينگلب صياح الولد اسمعهم كل واحد
يهدد شكل ويتوعد بعقاب شكل
صرخ الشخص الهادء اللحنون!! هذا الهادء هيج لعد الباقين شلون شتاليتج ياتنسيم
ضياء:- بويه شمدررريك ويينهم هسه بويه بس دليني مكانهم
كانو يحجون بنهيار صعب اوصف هل لحضات مثل لفاقدين بالخصوص مشعان مايدري شيسوي لحضات مثل الكابوس ومن نفز منه تذكر بس مقتطفات هذا حالي شوي شوي اختفى صوت الولد وشتغلت السيارت وماسمع بس الشحطة مالتهن صرت الطم على وجهي واهذي مثل لفاقدة
_ گالها الي ايامج الجاية صعبة خوية نكسر ضهري يمه همام خويه شراح يصير بيه
الطم وابجي فاقدة وسمع برة هوسة باسمة الي مبين من نبرتها متشفية اشهگ يتيمه وطاحت بين ذيابة جسمي صار يتحرك عرفت اجتني نوبة الصرع تذكرت العلاج ماخذتة حاولت اسيطر على رجفتي سندت نفسي على ميز المراية بس بائت محاولتي بالفشل وگعت بالگاع وصرت اختض مثل لذبيحة المذبوحه على النص حتى دخلت بنوبة اغماء
.
.
.
بعد مااجتي امي ضلليت بالغرفة دموعي تسيل على حظنا الاكشر لاطلعت ولاهتميت الى ان مادري شگد مر من الوكت حسيت بملل طلعت للطرمة ولكيتها گاعدة بالمرجوحة تتصفح بالموبايل رفعت راسها الي لاحضت على شكلي البجي سألتني شبيه وحجيت الها عسى ولعل تشاركني همي تخفف عننا تگول انا امكم محد يگدر يكسركم بس هيهات اجاني ردها الي يعكس تفكيرها ومايخفي قلبها
ام شامل:- وشكو بيها يحبها ويخطبها بلكي يتنعم بخير مشعان لو اختج تريد الخير بس الها هل شفتيها من رحنالها مدندشة بالذهب حلال عليها وحرام على اخوج
هزيت راسي بأسف على طريقة تفكيرها وعلى نفسي الي كنت ماشيه وراها طول ذيج السنين خسرت ابويه وخسرت اخويه الي راحم وهم مو راضين عني والسبب زرعها للحقد عليهم بداخلي
رفعت راسي على السماء الي متلئت بالنجوم الي احسها تحجي وتگول الحمدلله الذي جعلنا في السماء نضيئها ولم يجعلنا في الارض لكِ لاناكل لحم بعضنا البعض لحضات وتحولت النجوم الى حمار وشتغل الرمي مثل المطر صرخت وامي تصرخ
ام شامل:- يبوووووي نهجم بيتنا يبووي ندهرنا راح نتذبح
سحبتها وختلت بيها جو الشجرة ارجف الصوت ينخل الراس مرعب بشكل عبالك حرب سراج كان يصرخ طلع من جوة منگع ماي لان كان بالحمام يريد يطلع بس گمت اركض وسحبته
سراج:- بيكم شيييي ولكم صار الكم شي وخرري خل اطلع
لطمت على وجهي واصرخ لان صوت الطلق عالي
_وين تطلع ولك لاتموووت تريد تكسر ظهري
لحضات وتوقف الرمي واسمع صوت رجال يصرخ
محمود:- شااامل الكلب اطلللللع ليوووم دمك بدمهااااا
اتسعت عيون سراج بصدمة
سراج:- محمود!!!!
ترك ايدي وطلع يركض فتح الهم الباب يصررخ وانا ورا صرت اباوع من فتحة الباب ذياب وملتمين داير ما داير سراج
سراج:- شكوووو محمووود شصايرر
ضرار:- اخوووك ويييين طلعه ليوم انا كتاااااله
اباوع سراج مفرفح وحدة بينهم ومدهم ياكلوا صرت الطم على وجهي
سراج:-ول يرحم والديكم موووو هيج بسسس فهموني
نزل مشعان متكي على علي
مشعان:- اكرمتكم وشلتكم على راسي عزيتكم ورزيتكم تتفقون عليه وتكسوني لويش بويه شمسويلكم
سراج:- عمي مو هيج كلشي ينحل بالتفاهم انا حذرته ومايوصلها بعد
ابتسم بستهزاء
مشعان:- يعني تدري؟؟ خوش خوش لعد خل ابشرك اخوك نهب البنت داس عتبت بيتنا بينا وبينكم الدم يسراج بينا وبينكم الدم الكم مدة منا لباچر ان ماحولتو راح يصير الدم للركاب وكلمن اله صله بهل عائلة اخلص عليه… يالله مشينا
واگفه ورى الباب والطم تصخم وجهنا صخام لصخمني يايمه
وامي تلطم على رجلها
ام شامل:- يبووو على حضج يكواكب نهبها للبنيه صخام بوجهك شامل
وسط لطمنا ونحيبنا نفتح الباب ودخل سراج بس مو سراج لا شخص مكسور بدون لاحول ولاقوة باوع الامي وهز راسه بأسف
سراج:- هو هذا الشادة ظهرج بي يمه هو هذا الشيختي كل ذيج السنين علينا شوفي تاليته ناهب بنت العالم والله الي يعلم شمسوي بيها يمه تدرين شراح يصيرر؟؟راح ينكسر ظهرنا ويتصخم وجهنا تدرين لو ماتدرين ذيج المگرودة تنسيم اكبر ضحية ولكم الله يعلم شحالها هسه رتاحيتي هسه فاخ گلبج
رفع ايدة ودموعة جرت
من هاي اللحظة لاانتِ امي ولاانا اعرفج ولباب يتعذرج روحي لهلج واخوج رأفت الي هو احد الأسباب الي وصلتنا لهنا وخااف بيوم اموت لاتوگفين على گبري وتگولين ابني
حجاها ودخل باوعت الها كانت الدموع متجمهرة بعيونها سرعان مامسحتها ودخلت وي دخلتها طلع سراج بيدة مسدس ركضت وگل جسمي يرجف
_وين رايح سراج ويين وشايل بيدك هل غضب
مسح دموعة
سراج:- رايح اكتله انا قبل لايكتلوا همه وتصير ثارات الها اول مالها تالي
ترك ايدي وطلع گعدت بالگاع الطم وابجي
_دخيلك ربي شجاي يصير بينا دخيلك يالله ارحم ضعفنا وقل حيلتنا
اشهگ وابچي مادري شنو ادعي ندك الباب رحت فتحته دخلت حنين وجهه مخطوف
حنين:- ولج شكو شنو هل رمي
حجيت من بين شهگاتي
_تصخم وجهنا خيه
حجيت الها الصار كله وما بالها غير تنسيم مثل حالي
صارت تشهك
حنين:- ياخيه ياتنسيم شحالج هسه
واحنا نحجي طلعت امي تسحل بجنطتها وايدها الثانية تتوكة على الكازة
رفعت عيني الها مندهشة
_ وين!!
ام شامل:- اخوج مايريدني بعد المن باقية
حنين:- احنا بيا حال خالة وانت جاي تتزعلين؟؟
تقدمت الها اشهگ
_ هاا هسه المن باقية بعد ماكسرتوا بذيج الي بس الله يعلم حالها هسه تحجين هيج انت شنوو بس جاوبيني انت امنا متاكدة طالعين من بطنج!!!
صوت هورن سيارة باوعتلي نضرة اخيرة وسحبت جنطتها وطلعت تركتني انا وافكاري حايرة وروحي يم تنسيم الضحية الاكبر والخاسرة الوحيدة بهاي المعركة روحي تلوب والوقت يجري لل10 وراحت حنين ماتگدر تضل اكثر وضليت انا وحدي مرت الساعات مثل السم مادري شنو انتظر صارت هوسة يم الباب خفت لارجعوا وانا وحدي تالي نفتح الباب
ودخل سراج وويا عمامي وولدهم وجههم مايتفسر اصفر مبين خوف عدى سراج الي راح حيلة ومنحني الظهر دخلت للبيت وصرت اباوع من الشباك على سراج الي يحجي وهو منحني الظهر
سراج:- قاتلها ومغتصبها وشارد وي ابنك النذل الثاني ماهر !! شفتو ابن اخوكم وين وصلت بي المواصيل من اول مابدى يشرب اجاكم همام وگال الكم ترا همام وماهر يشربون شجان جوابكم ردوووو؟ ليش سكتو؟؟؟؟ جوابكم يكبرون ويعقلون مراهقيين هاااااي تالي المراهقة من الشرب للكبسلة وراها الادمان وراها القتل حلووووها ياااالله ويييين وصلتونا ماتحجون تخورستووو
يصرخ ويحجي وعيونة ينزل منها بدل الدموع دم
دنگ راسه
سلام:- حقك شتحجي حققك احنا الي من البداية مارديناهم مشى هو وهل ساقط ابني
حجى عمي يحيى الي استغربت وجودة اصلا لان كافي خيرة شرة عنا وحتى ساكن بغير محافظة
يحيى:- اهدأ يابني انا شمدريني تدري كنت برحلة علاج وقبل يومين ااجيت وتلكتني المشاكل ولكم حتى مااحد بيكم بلغني بوفاه والدك نافيني ولاكأني اخوكم الكبير ولدي الي هم ولدي مانطقوا ولا حجوا خايفين على صحتي
رد العم الاصغر لي لايحل ولايربط وجودة وعدمة واحد اصلا اجى زيادة عدد
سالم:- انتو بلغتو الشيخ
يحيى:- يي بلغته انا وراح لشيخهم باجر العصر الگعدة
سراج:- وشراح يصير
يحيى:- راح نگعد ونشوف شيطلبون بس بويه انا خايف لايردون فصلية
حجة هيج وكان خنجر ونبت بگلبي فصلية شنو!! مستحيل لا
بهت وحجة بخوف يحاول يكذب عمي
سراج:- عمي احنا وين عايشين فصلية
يحيى:- كلشي يصير بويه ماندري شجاي يفكرون بي واحنا لازم ناخذ احتياطنا
سراج:- شنو عمي شجاي تفكر
يحيى:- اختك اعقد الها على عبد القادر
لطمت على وجهي عزا بعيني اطلع من نگرة يشمروني بنگرة ثانية عبد القادر مقعد وعلى الكرسي !!! لا يربي لا صرت انحب وابچي كاتمه بجيتي بيدي ومستمرة اسمع الهم واباوع على سراج وحتى على عبد القادر الي گاعد على كرسي
عبد القادر :- سراج مدة واطلقها مستحيل اظلمها وياي وانت تعرف حالي بس خل نخلص من هل سالفة
انتبهت على سراج اختل توازنه ووگع طلعت الركض من دون حجاب مو مهتمه لشي بگد ماريد اشوفة روحي تركض مو رجليه وصلت الهم وعمي مخلي بحضنه ويطبطب على وجهه
يحيى:- لك ابني شجاك قوي نفسك وليدي
گعدت يمه سحبته من ايد عمي اشهگ
_ سراج لتعوفني انت هم فتحي عينك
اجى عمي سالم الي مادري شوكت راح وجاب مي اخذة عمي يحيى وصب على ايدة وبدة يغسل اله
يحيى:- بسم الله الرحمن عليك بويه
فتح سراج لو الدنيا فتحت الي ضميته بحضني انحب وابچي
رفع راسه من حضني يجر النفس بصعوبة بقيت بگاعي اشهگ وكل جسمي يرجف حسيت بشي تخلى على راسي رفعت عيني كان عبد القادر خلا الغترة مالته باوعلي بنضرة اسف ودنگ
رجعت عيني على سراج الي يجر النفس بصعوبة
يحيى:- شجاك ابني ليش هيج صدرك
حجيت بصعوبة وشهگة
_ هاي وحدة من اثار ضرب عمي سلام اله حتى يوافق يزوج تنسيم لمشعان
رفع عمي نضرة على سلام باسف وهذاك لو يخلوني بيدة يگطعني
اشرلي سراج بعيونه گمت دخلت ورجعت لمكاني شوي وشفت سراج گام واجى دخلو كلهم جوى للديوان وسراج وعمي يحيى اجوي يمي عرفت شنو مقصدهم
يحجي ومدنگ راسه
سراج:- خويه سمعتي الي صار
يحيى:- كلشي مؤقت بس تجنباً لكلشي الواحد يحتاط
باوعت الهم هزيت راسي بدون لاحول ولاقوة تقرب سراج وباس راسي ومسح دموعي عيوني تتنقل بملامحة التعبانة وشفايفة البيض طلع عمي جهازة ومادري وين اتصل ولكن من حديثة فهمت
يحيى:- شيخينا تكدر تجيني لبيت ابو همام…. ييي نفسة… فدوة لكلبك….. منتظرك في حفظ الله
رجع الجهاز بجيبه وباوعلي ببتسامة يطمني لو فرحان لگة فرصة حتى يزوج ابنه!! الي مارضت بي ولا بنت؟
مر الوقت واجى الشيخ دخلو للديوان شوي وصاحولي من ورى الباب وانا مثل الرجل الالي اتحرك سألني الشيخ ونطقت الموافقة
اسمع الشيخ يبارك هذا هم فسگان انا بيا حال طلع وانا رحت للمطبخ گلت اسوي الهم جاي لو شي عيب سويته وواگفه انتظرة يخدر ودموعي تجري سمعت طگطگة وراي نداريت كان عبد القادر الي يباوع الي ابتسم بستهزاء
عبد القادر:- لتبجين يوم يومين ويرجع كلشي لمكانه لاتخافين ماراح اچلب بيج
هزيت راسي انفي
_ مو على هذا الموضوع
عبد القادر:- لعد على اخوج الگلب!! الي فرفح هل ولد ولج اباوع السراج عبالك شايب وحمل الدنيا على كتافة ولا كأنه عمرة 16سنة
دنگت ودموعي تجري
_ تنسيم هناك يمهم! شنو حالها هسه
هز راسه ورجع فر كرسيه وراح الهم غريب هم گالولي شاخط بس ماصدگت كملت الشاي وحطيته بصينية ووديته الهم اخذة اخو الي يمكن اسمه قتيبة
عفتهم ورحت للمطبخ گعدت على الكرسي الي مخلي للحتياط اتصل على تنسيم بس ماكو ماترد شتعلت روحي نار طفيت الجهاز وسندت راسي على الكاونتر سهت عيني يمكن نمت حسيت بغطاء نشمر عليه فتحت على السريع فازة كان عبد القادر الي رتبك وفز
على فزتي
عبد القادر:- اعتذر بس كنت مارر من هنا وشفتج نايمه
بقيت صافنة علي ضعيف وملتحي وشعرة نازل على عيونه
حرك كرسيه وراح شبي هذا باوعت للساعة ب 3ونص مو مالت انام گمت توضيت وبديت اقرأ قران ودموعي مانشفت الى ان اذن صليت وكملت دخل سراج الي مبين مو غفيان اصلاً
سراج:- ليوم الگعدة العصر نشوف شيصير
تجمهرت الدموع بعيوني
_ وتنسيم؟اذا انا نقذتني من عذابهم بورقة وعقد!! تنسيم شراح يطلعها من هل نگرة
دنگ ساكت شيجاوب مثلا شوي وحجه
سراج:- امج وين
_ امك ماصدكت تحجي هل حجايتين لمت غراضها وطفرت
فرك وجهه وگام
سراج:- اذا مو كدها المن خلفت مادري بس يمكن حتى لاتضل بنفسها جربت الخلفة شلون تصير
حجاها وطلع ورجع دخل
سراج:- سوي اي شي عيب من عمي يحيى وولدة وله لباقي بنعال ماشتريهم
هزيت راسي وگمت للمطبخ احضر بالريوگ
.
.
نايم ومبين انه بكابوس مزعج بدى يصرخ وهل شي خلا والدة يفز
ويگوم يصحي بي
ابو نوفل:- نوفل نووووفل شبيك ابني اصحى
فتح عينه والعرق يتصبب من وجهه ويخاث شهيق وزفير بسرعة
ابو نوفل:- شبيك ابني
صار يحجي بهيسترية
_ همام يابه همام بويه كان واگف وعندة جناحين يباوعلي فجأة شي اسود وگص واحد من جنحانة صرخ وراها انت فززتني
ابونوفل:-تعوذ من الشيطان ابني وكوم صلي ركعتين الفجر مابقى اله شي ويوذن
هز راسه وگام بس بعدة بداخل تأثير الحلم
.
.
.
رفسات على بطني وخاصرتي خلتني افتح عيني كان واگف وعيونه دم وملابسه بيهن تراب اول مافتحت عيني سحبني من شعري بحركة سريعه لسه مامستوعبة صفگني راشدي
_ بس خل افهمك والله ماعلية والله
قرب وجهي من وجه ويحجي ونفسه الحار يضرب بيه
مشعان:- ليششش شسووويت الكم بس جاااوبييني لج مغتصبهااااا لج لكيتها ربي كما خلقتني غاركة بدمها لج ليش حركتووو گلبي عليها علمووود لفلووس خر** بيكم وبيهااا ولج والله لو طالبين انطيكم عيونييي بس عيفووووها الي ليششش هيح ليش
دفرني بالگاع صار يبيجي ويحجي ويدفر بيه مره على ضهري ومرة على بطني وانا الزم برجلة احاول افكة مني دفرني وصارت الدفرة على صدري صرخت بوجع
_دخيلك كافي يمه اخخخ بويه وينك همااااام
مشعان:- شتعلت روحة بنار ونفط
رجع يضرب بدون شفقة على ضرباته صار الدم ينزل منني بغزاارة الشي الي خلاني اتخبل وارجف وجع فضيع صار ببطني وضهري حتى حركتي احسها تقلصت
_اخ يمه اخ يابه اخ
ابتعد يباوعلي وماتحرك من عندة جفن
رفعت راسي بصعوبة ابعد خصلات شعري عن وجهي والشي الي خلا يتذكر باوع لشعري وتربع الشيطان بداخلة راح للجرار يدور وانا اجذب عقلي لا مستحيل لا مايسويها سحب المقص وتقدم ناحيتي صرت ازحف وارجع الى الوراء وهو يتقدم حتى نلطخ ظهري بالكنتور قرفص گدامي وانا دموعي ودمي يجرون والالم ماينوصف
مشعان:- راح اخذ عزيزة مثل ماخذتو عزيزتي
.
.
سرح تفكير بيه بيوم كنت امشط بشعري وهو يباوعلي
مشعان:- شعرج حلو وطويل
بتسمت اله
_يي كان همام دوم يجيب الي زيوت للشعر ويخليني اعتني بي حتى اطرافه مايقبل اگصها يگول زينة المرأة شعرها
.
.
ابتسم الي بستفزاز عرفت ان راح ياخذ كلشي احبه حتى شعري هزيت راسي استنكر واتوسل بي
_الا شعري مشعان الا شعري لتحرگ گلبي بي
بس هو هيهات ينكسر گلبه ويشفق على اخت گتالة عزيزته
صرخ بصوت
مشعان:- ضرااار… ضررررار
دخل وعيونه مو اقل شر عن ابو يباوعلي وبودة ياكلني
ضرار:- امرني يابه
يحجي ويباوع الي
مشعان:- جيب ماكينة حلاقة ومرايه وتعال
بتسم بشر عرف غاية ابو شنو طلع يركض دقاق او اقل دخل
وبيدة ماكينة الحلاقة والمراية سحبني من شعري بدون لاحول ولا قوة والدم يجري بالگاع رغم الالم والوجع اصرخ بي
_ ابوس ايدك لاتكسرني مشعان بغلاة مهجة
مجرد لفضت اسمها دفرني على بطني خلى روحي تصعد للسماء
شمرني بنص الهول وسط انضارهم كلهم نضراتهم متشفين بيه والشر طاغي على ملامحهم الا علي باوعتله اتوسل بنضراتي اله غمض وصد راسه كميه الخذلان بهل لحضه مايوصفها كلام ولا احرف ستسلمت ييي ستسلمت يحرك بيه وانا بس صوت شهگاتي تنسمع اجتني ضربه منه على رگبتي
مشعان:- اگعدي لچ
سحب محمود المراية وثبتها امام وجهي سرعان ماغمضت عيوني
وخلاني افتحها على كفخه ثانيه
مشعان:- افتحيهن لو اقلعهن الج
فتحت بدون لا حول ولاقوة باوعت على وجهي الي صاير عباره عن دم من غير الوحمة هاي تاليها تضحيتج يتنسيم!! الذلة خاطر اهلي الي مايوم حسيتهم اهلي
سحب ايدي وطبگهن بيد وحدة وخلاها ليورة اشر لسيف اجى وگضبها دنگ راسي مثل الخروف الي يريدون يذبحوها سيف لازم راسي ومدنگة سحب راسي وثبته بالمرايه يريدني اشوف يريد يذلني امام انضار نفسي سحب شعري وگث اول خصلة من بداية الفروة غمضت ورجع گفخني
مشعان:- كتلچ فتحيييي
فتحت مرة ثانية وبدة يقص خصله تتلوها خصلة الى ان صبح شعري مثل شعر الولد مااكتفى بهذا
مشعان:- ضرار كمل
لزم وجهي بيدة واجى ضرار واكمل اجرام والدة صار يمشي المكينه على راسي بحراكات بطيئة يستلذون بعذابي
الى ان صرت گرعة كلت هاي هي راح يعتقني نزل الماكينه على حواجبي وشالهن هم من كمل ضربني على راسي الضربة الي هدت حيلي ورجعت الي نوبة الصرع صرت ارفس امامهم من جديد
ومن دون رحمة او شفقة انا ارفس وهو ضاغط على بطني برجليه ويعصر بيها والنزيف مستمرر بديت افقد عسى ان اكون هاي اخر لحظاتي بهاي الدنيا عسى ان اموت استسلمت من جديد لنوبه اغماء
.
.
روحي مثل الطير المذبوح الوكت يمرر بطيئ مايرضى يمشي
كملت الهم الريوگ وهم ما الهم نفس ياكلون الي راح رجع مثل ماهو بس شاربين الجاي اغسل بالمواعين ودموعي تجري ماحسبت الا على دخله حنين الي حالها اتعس من حالي
حنين:- ها خيه شلون صبحتي
_ شلوني خيه وانا اخيتي بنص الوحوش
شهگت وصارت تبجي وتحجي وانا حالي اطگع من حالها
حنين:- خايفة عليها كلش لج هاي المگرودة بحياتها مارتاحت والسبب اخوج وامج عساهم لا تهنو
سكتت شحجي مادري ماعدنا غير الدموع تواسينا طبخنا غدى واحنا رواحنا ماطايقيها والغريبة ولا وحدة من نسوان عمي اجت!!!! حتى عماتي لهل درجة النذالة لو خافو على نفسهم
مر الوقت و مااجى العصر الا وارواحنا منتهية تحضرو الولد واجت سيارتين نوب من العشيرة وطلعوا بس قبل كل هذا حلفت سراج يبقي الخط مفتوح لكن رفض ضليت الوب ويمي حنين الي مارضت تروح وتعوفني بوحدي بعد طلعتهم بنص ساعة اتصل بيه رقم غريب
على الواتس اب بس الصورة كانت صورة عبد القادر!!!
_ هذا قدوري ولج
حنين:- ردي خيه بلكي الله خير
رديت وانا ارجف لكن ماكو جواب بس خربشه وراها استقر الصوت بديت اسمع صوت هوسة وكلام
عرفت فتح الي مكالمة حتى لاضل بقلق!!!
شيخ طباب خير او مثل مانكول جاي يهدي النفوس هو وناس هواي حجه
_الله بالخير
الكل:- الله بالخير والعافية
_ اليوم اجينا بناء على رغبه وطلب اخونا وشيخنا ***(شيخ اهل شامل) نهدي النفوس ونكون محظر خير
رد شيخ اهل مشعان
_ ياهلا وميت هلا على العين والراس خوية حياك الله وجيتك عزيزة
وان شاء الله خير
مشعان:- من رخصة الطيبين والموجودين انا لاريد فصل ولاريد فلوس انا اريد دم بنتي بدم ابنكم
صار هوسه وناس تهدي وناس تايد وناس تقنع بالطرفين رجع حجة الطباب خير،
_ عمي تسمحولنا نحجي
اسمع وستهم الكل يكله تفضل
_حجي مشعان انت رجال صايم مصلي خايف الله وتعرف الحلال والحرام وتعرف العشاير اذا انت طلبت دم بدم راح تصير ثارات الها اول مالها تالي
_بس اسمحلي خل اكمل
_ انت كتلت شامل شراح يصير راح تصير بحور دموم ماتخلص لسنين انا وياك والي صار مو قليل بس احنا مانريد نتصرف ونتخذ قرارات نندم عليها بعدين
مشعان:- والحل شنو
_الحل افصلهم ياخوية وشيلهم من المحافظة
رد شيخنا
_بس ياخوية بنيتنا عدهم
_هاي تبقى يمه يريد يطلكها ترد وي اهلها
مشعان:- حرمتي مالها ذنب مادخلها بهل سالفة
الكل كام يحمد بي ويأيد كلامة
_وهسه ياحجي شكلت
مشعان:- خوش حجي شيخ لعد اسمعوني ياهل وجوه الطيبة انا اريد فصل (***) وويطعلون من المنطقة وينسون ان عدهم بنيه
سراج:- كل طلباتك على العين والراس بس الاخير شمعنى!!!
مشعان:- مرتي ماريدها تتوصل بعد وياكم لا من بعيد ولامن قريب
لو هل طلبات لو دمها بدمة!
توقعاتكم للقادم شنو؟؟؟
