رواية سر خلف النقاب الفصل السادس عشر 16 بقلم هدوء آل محمد

تنسيم:: اجتني ذبت سمها وطلعت

ومن حركة گلبي دعيت عليها وبقيت ابجي ومهضومة

وره شوية واسمع صوت صياح وصريخ ردت اكوم

أشوف شكو ما كدرت اتحرك ألم موتني بقيت مكاني

واسمع صريخ وتعجبت من سمعتها تصرخ

عبالي مشعان كتلها..

بس سمعت ميسون تصرخ

ميسون:- لحكووونا باسمة حترگت

گمت بيه مابيه ستندت على الدرج وردت انزل بس وقفت خفت لاتذب التهمة براسي بقيت واگفة على الدرج واباوع ضرار لافها بالبطانية عينها اجت عليه بقيت على درج واكفه وسانده نفسي بالحايط …..

رجعت لمكاني شوي وختفى الصوت

والبيت صار هدوء رجعت رأسي على الجرباية

اتلمست بطني ودموعي تنزل مابيه حيل حتى ابجي

تعبت حيل تعبت ما اعرف شوكت أرتاح.

مرت ساعه أو اكثر محد اجه ولا اسمع صوت أحد

بديت اغفى من تعب وبجي خليت رأسي على مخده ونمت بسرعة…….

مشعان:- هاا دكتور بشر

دكتور:- الحمدلله على سلامتها تعدت مرحلة الخطر

وماكو شي حروق سطحية والحمدلله على السلامه مره ثانية

مشعان:- الحمدلله تسلم دكتور

صرخ بلهفة

علي:-زين دكتور اكدر اشوف امي

الدكتور:- انتظروا على ما ينقلوها لغرفة ثانية

وتكدرون تشوفوها.

خابت اماله

علي:- تسلم

راح دكتور والكل صافن رغم حقارتها الكل يحبها بهاي لحالة ينطبق مثل الكلب مايحب الا خناگة

مشعان كاعد مخلي ايده على راسة

تكلم علي

علي:- عدت عدت لا تضوج

هز راسه بتعب

مشعان:- يوميه مصيبة واكعه على راسي تعبت

مالي طاقه بعد

علي:- الله كريم يابه

بين ماهم يسولفون طلعوها تون وتهذري كله من وراها دعت عليه يي هي لان كتلت ضناها هي السبب مشينا وراهم دخلوها لغرفة خاصة وملفوف ايديها ورجلها ونصف جسمها

مشعان هنا تعب كلش وخصوصاً بعد مافهم ان باسمة هي من قتلت ضنا رجعو للبيت هو گبل صعد ليفوك يشوفها

باوع الها نايمة ووجها كلو دمع

مشعان:-ضلمتج هل مرة وحوبتج ماتعدتها ولا راح تتعداني

خلى ايدة على وجهها فزت

..

فتحت عيوني بتعب يباوع الي رجعت ليورة خايفه لا يضربني

سحب ايده

مشعان:-لاتخافين

اخذ حسرة وزفرها

مشعان:- لا… سامحيني غلطت بحقج انزلي لغرفتج رتاحي

حجى هيج ونزل وخلاني بصدمتي بس معقولة عرف الحق؟

ضليت بمكاني افكر بكلامة مادري شلون غفت عيني

گعدت بعد ما مر وقت طويل واني نايمه كمت بيه مابيه اريد اروح للحمام نزلت دخلت لغرفتي القديمة كان نايم تسحبت بهدوء للكنتور عندي بي كم قطعة ملابس سحبت ثوب وطلعت

حتى محد كلف نفسه واجه بالجذب كال شبيج ميته عايشة

الضلم والحقارة العدهم ما شفتها عد احد ولا أتمناها لعدوي

أخذت منشفه وملابسي ودخلت للحمام بديت أغسل بصعوبة

خلصت نشفت وطلعت

رجعت لغرفتي باوعت على نفسي بالمـرايه وجهي لونه شاحب وتعبان ابتسمت بكسرة

دست على وجعي ونفسي وقررت أطلع واقوي نفسي واشوفهم

تنسيم منو

طلعت من الحمام لاقتني ميسون بس بتسمت بوجهي وراحت رجعت لغرفتي صح الكرامة نسحلت بس فوك ثلج مشعان يخابر والي فتهمته راح يطلعوها على مسؤليتهم سد الجهاز وسحب محفضته وطلع اجت فكرة شيطانية براسي

طلعت دشداشة الي وسحبت مكياج أخذت كحل

بس بدلت وخليت كحل وخطيت عيوني

باوعت على نفسي بالمـرايه عجبني الشكل

سحبت شالي لبسته وطلعت ، على كيفي بعدني ما وصلت للنص وسمعت صوتهم اجو لان ساعة وانا اشخن بجهرتي

بقيت على درج واكفه وسانده نفسي بالحايط

باوعت إلها بشماته وضحكة

هي شافتني لو تسودنت بودها تاكلني بس الملك مشعان موجود

ابنها ساندها ويمشي على كيفه وولد وراه ما شفت مشعان وين راح مادري

دخلوها للغرفة كعدها وعيوني تراقبهم رفعت راسها

التقت عيوني الشمتانه بعيونهه كلهه حقد وغيرة

خليت ايدي على بطني وإني أتذكر شلون ضربتني عليهه حقد أكثر واكثر عليها. هل شي ماصرف الها تخبلت صارت تعارك ولسانها يلعلع هل شي خلى مشعان يمل شيلها واشمرها لهلها

وخلصت منها مؤقتاً

مرت الايام الى مابيوم

گاعدة ونفتح الباب بغرفتي ونفتح الباب مشعان عاقد حاجبة

مشعان:- گومي جاييچ ضيوف

ستغربت منو يجي؟؟ سالت بفضول

_ منو؟

مشعان:- صاحبتج

اتسعت عيوني بصدمة وصرخت

_حنين

هز رأسه گمت بدون وعي سحبت شال ولفيته ركضت للديوان فتحت الباب كانت گاعدة وتفرك بيدها من شافتني فزت وكامت تركض الي ضميتها بحضني

حنين:- شلونج يبعد حيلي

حاضنتها اشهگ وابچي بعدتني تتفحص وجهي وشكلي

حنين:- شصاير بيج يخيه

مكدرت اشكي ولا اكول الها شي كتفيت بهل كم كلمة

_هذا حال الي يعوفوها اهلها بلا حول ولا قوة مالها لاسند ولاقوة

دنكت وحسيت بلسانها كلام

_ احجي شبيج

جرت حسرة

حنين:- اجيت بطلب من اخوج ونوفل

_نوفل!!!! رجع للعراق

بتسمت بستهزاء اخفي رجفة قلبي على طاريهم

_ يي خير ان شاء الله

حنين:- ماتريدين تسمعين اخبارهم؟

حنين:- يي بييتكم باعوا واخذوا بيت يم بيت عمج يحيى

نمرد گلبي يعني راح لبيت وراحت الذكريات

دنگت دموعي تجري بهدوء

حنين:- وعمج يحيى خاطب اختج لبنه

رفعت عيني الها

_ يعني عايشين

هزت راسها بقهر

حنين:- عايشين بس مو مومرتاحين

_واضح كلش واضح

سكتت وانا هم سكتت ضلت يمي شوي وراحت كمت ورجعت لغرفتي حياة هادئة بدون روح بس ايام وتمشي مشعان مايرصى ترجع باسمة للبيت خصوصاً بعد ماتاكد منهم ان هم الي كتلوا ضناية بدى يتودد حتى يصلح الي نكسر وانا غصب ماعليه ارضى وين اولي اهل ماعندي استند عليهم

كعدت من الصبح بديت احضر ريوگ اله لان عندة طلعة للمحلات

واكفة احمي بالزيت كشيت البيضة وريحتها صارت بخشمي نمردت روحي مرد طلعت ركض للمغسلة الي برة خرطت الي ببطني كله

واگف وراي لتفت اله اخذ نفس وازفر بتعب

تكلم بنبرة فرح

مشعان:- حامل؟

بتسمت بستهزاء

_ يي عود هم كتلو مرة ثانية وابلوني

مشعان:- يعني حامل

_مادري اشم گفة ايدي

سحبني من ايدي وداني للغرفة طلع عباتي وشمرها عليه وتكرر نفس السيناريو مالت قبل كم شهر وطلعت حامل هل مرة من بدايته فرحت بس فرحة خوف يي خايفة على الي ببطني لا اخسرة مرة ثانية

رجعنا للبيت وطول الطريق فرحان وصلنا وشفنا سيارة عالية بالباب نزل وهو مستغرب دخل ودخلت ورا كان گاعد بالحديقة اول ماشفته تسعت عيوني بصدمة ….

.

.

.

مرت ايامنا بهدوء تقى ونوفل هي تتودد وهو نافرها الى مابيوم كنا كاعدين قررت تحط حد لهل مهزلة وهي اتصلت وفتحت سبيكر

بعد مدة رد

نوفل:- هلا

تقى:- هلا بيك انت وين؟

نوفل:-بالمكتب ليش

تقى:- اممم خوش اريد احط حد لهل مهزلة

نوفل:- مهزلة!!! شبيج بابا شجاج ليوم

تقى:- نوفل اريد نلتقي وضروري نحط النقط على الحروف

ضحك بستهزاء

نوفل:- دخل الاقي النقاط عود ذيج الساعة احطها على الحروف

تقى:- برودك هذا راح يجلطني

نوفل:- هسه شبيج ياعيني شكو

تقى:- شوكت نلتقي؟

اخذ نفس يصبر نفسه

نوفل:-بدلي وانا شوي واجي

حجى هيج وسدة بوجها باوعت النا بقهر

تقى:- شفتوو

تقوى:- شبيج ويا على كيفج لتصيرين حنانة

رديت انا بحيرة

_ تقى يجوز يحب او مر بتجربة حب فاشلة لهذا هيج تلگي

بهت وجهه

تقى:-يعني شنو

_ يعني اهدي وگومي بدلي وافهمي منه

كامت تبدل وكلامي ضل ببالها لبست وجهزت وفعلاً نص ساعة واجى طلعت ويا وانا وتقوى صافنين بدنيانا

.

.

بالسيارة الثنين ساكتين الى ان مل ونطق

نوفل:-وين تريدين نگعد

بتسم بقهر

نوفل:- شحلاتها من گعدة يم العزاز

عدلت گعدتها وباوعت اله

تقى:- نوفل انا شنو بالنسبة الك

سكت صافن مايدري شيجاوب باوع بوجهي

نوفل:- هو هذا هم سؤال غير خطيبتي

عقد حاجبة

نوفل:- شمو اسأل

تقى:- انت شنو بالنسبة الي

بلع ريگة وباوع الها بتعب وقهر

نوفل:- شنو انا بالنسبة الج

شهكت ونزلت دموعها

تقى:- انت اول دگة گلب اانت اول واخر رجال من اخلي راسي على المخدة افكر بي من شفتك دخلت گلبي حبيتك وصرت اتمنى تبادلني نفس الحب الى ان خطبتني كنت اسعد انسانه بس مرت مرت ايامنا واحنا مخطوبين بس روحك لاهي يمي ولا انت رايدني تبدل الحب الى حزن وخوف ليش هيح نوفل انا مو حلوة لو شنو ليش نافرني

تقى:- لا هيج نوفل هيج انت مارايدني ليش خطبتني لهل درجة گلوب بنات الناس لعبة بيدك

ضرب على لستيرن بقوة وباوع الها

نوفل:- مااااااردت اخطب ولا ردت اتزوج عااايش على اطلال الماضي بيوووم وليلة ابوي حرجنيي وخطبج خلاني امام الامر الواقع

بتسمت بكسرة كانت متوقعة منه هل جواب

تقى:- والتالي

نوفل:- مادري مادري

اخذت نفس ومسحت دموعها

تقى:- انطي نفسك فرصة

باوع الها

نوفل:- فرصة شنو

تقى:- افتح الي گلبك

نوفل:- مقفول بمفتاح والمفتاح ضايع بديار الغرب

تقى:- اكسر المفتاح وخليني ادخل.. انت تحب

باوع الها ساكت

ردفت

تقى:- جاوبني انت تحب

نوفل:- شيفيد جوابي هسه

تقى:- يفيد جاوبني

نوفل:-يي احب من طرف واحد رتاحيتي

بلعت غصتها

تقى:-منوو

نوفل:- ماتعرفيها

تقى:- لعد ليش ماتزوجتها

نوفل:- كنت غبي وفرطت بيها ماكان ببالي راح تروح من ايدي وياخذها الماسهر ليل يرسم احلام واحلام ويخطط للمستقبل خذاها الي مايستاهلها

تقى:-طلگني نوفل اذا مارايدني وهيج تحبها طلگني

باوع الها بتعب

نوفل:- على گولتج خل ننطي لنفسنا فرصة

تقى:- شراح تفيد؟

نوفل:- على الاقل نگول حاولنا

تقى:- شگد المدة

نوفل:- شهر سنة مادري

تقى:- خير ان شاءالله رجعني للبيت

باوع الها كانت عيونها مليانه دموع

نقهر على حالها وعلى حالة نقهر على حضه الي خلا ابو يسوي بي هيج شي ضناً منه انو راح ينسه بس مايدري انو وگع نفسه بتهلكة

رجعت للبيت كانت الساعة ب١٢ الظهر

تقوى مبدلة ملابس المدرسة وبيدها لفه تاكل بيها

تجاهلت الكل ودخلت للغرفة وقفلت الباب

ثريا:- اختج من نخطبت لهسه وهي متخبلة

تقوى:- يي هذا الزواج الخبل بعقل والعاقل يتخبل

كفختها بخفه على راسها

ثريا:-لعد بيها الخير انت راح تعقلين

ضحكت وكملت اكلها وطلعت للمدرسة تتمشى المدرسة مو كلش بعيدة بس كان اكو اعدادية ولد بطريقها من وصلتهم دنگت راسها سمعت صوت صفير

_ نعمة الله مطشرة بالگاع

رد ولد ثاني

_هاي الي يمعود انت ماشبعت دخل نسترزق… يحلوة شسمج.. زين رفعي راسج خل نشوف ابداع الخالق

بهل اثناء ولسوء الحظ طلعوا خالد وسراج من المحل

وشافوهم سراج گبل شمر الكوب من ايدة وخالد شمر الجنطة وطارو الهم

نطاه دفعة خلا يتكوم بالكاع

سراج:- شعندك هنا لك هتلي

صرخت وگامت تبجي

تقوى:- عزاا سراج عووفه خل يولي راح ننفضح

صرخ بيها

سراج:-كملي طريقج لو اجي اطيح حضج

راحت وگفت بعيد وتباوع الهم وترجف وتبجي

رجع سراج ضربه بوكس والثاني رجعة اله ولتموا الولد وصارت عركة شكبرها الا طلعو المدرسين من المدرسة يفاككون بيهم

سراج:- ولك والله اذا لمحت طولك بهل شارع اثرمك ثرم

رد بكل وقاحة

_ انت شعليك لتسوي نفسك البطل حتى تنعجب بيك

كان واحد من المدرسين لازمة هو فرفح يريد يتفلفص

سراج:- بس هدني يرحم اهلك بس هدني خل انوم سنونة بحلگة

وكفت سيارة نوفل ونزل يركض

نوفل:- ها شكووو شبيكم

خالد:- ماكو شي عركة بين حارة الضبع وحارة ابو النار

الاساتذة كانو معصبين ولازميهم بس من گال هيج ضحكوا

طبگ وياه على الخط

نوفل:- علمت على ابو النار لو لا

خالد:- كيف لكاان ياعيب الشوم

سراج مفرفح

سراج:- بس هدوني خل اربيي ارد اشوف شلون يخلي عينه لنگسة على بنات العالم

هنا نوفل دك جرس الانذار

نوفل:-هاي شنوو السالفة بيها بنات

خالد:- انت اذا شفت عركة بالشارع هذا تاكد السالفة على بنيه

تقرب يم اذن خالد وهمس

نوفل:- عاد تسوى تتعاركون عليها لو لا

خالد:- اخت مرتك وانت وقيس ههههاي

هو گال هيج لو نوفل تخبل صرخ

نوفل:- اسمعوووني زين انت ويا ويا واحدكم بطول النعال ويصجم بنات لعد من تصيرون كلية شتسوون انا الكم ادبسسزية

خالد:- كلشي وكلاشي يسوون المايخطر ببالك

رد واحد من الاساتذة

_ والله ياخويه هل كاعد يصنف كدامك اكثر واحد شلع فادنا مثل لثور لهايج دمى الولد تدمي

شوي وصفت سيارة مفرزة الشرطة شالو الشباب كلهم وعبوهم بالبدي

ونوفل طلع وراهم

دخل للمركز وراهم ونصدم بشوفة شخص كان مستحيل يتخيل بيوم يشوفة….