غَنايم مَا جَبت وَياي . .
مَمصدِگ گِضت حَربي
رجَعت مصوّب ومَتعوب ،
مو بَس واهسِي المَكسور !
خلگِي ، وخاطِري ، وگَلبي .
══━━━━✥◈✥━━━━══
جــويريه:: امشي كاتلني الخوف بعدني ما واصله باب المطبخ واحس عصا اجتني طايره طكت بالحايط البصفي التفتتلله خايفه صاح بعصبية
صــيهد:: خل اشوفنج النوبه طالعه هيج حيوانه بتّ الحيوانه.
رديت بعصبيه بلا ما افكر بكلامي بس ردي من روحـــي المحروكه من الوكت اللي خلاهم بكل يوم يغلطون على امي رغم هي ميته
-انت الحيوان لاااا تغلط على امي.
حجيتها اصيح وارجف فتح عينه بصدمه واجاني بسرعة طاير، مشيت سريع دخّلت للمطبخ اريد اركض اصعد فوك وتذكرت البنات ما موجودت وكفت بالمطبخ خايفه ادي ورا ظهري مستنده على الحايط اباوعله دخل فاتح عيّنه بصدمة ويأشر على روحه
-انا حيوان؟
-واكبررر حيوان من تغلط على إنسان ميت
اجه بسرعة لزمني من زندي يعت بيه متخبل ويصيح
-بت النعاااال عليمن جاي تغلطين ووولج.
دفعت أيده مني
-وخر انت إبن النعال.
ارجف واجر بروحي منه دفعني بقوه على الحايط وافتر متخبل شال الكلاص من الكاونتر وشمره علي نركع بالحايط بصفي شهكت مغطيه وجهي بأثنين اديه وهو يصيح
-يشهد الحسين حظج أطيحه وولج زعطووطه السااانج اكصه.
ورجع متخبل شمر على الحايط مواعين بعيد عني هم غطيت وجهي خايفه واحس باحد لماني وضامني وره ظهره، وكفت كدامي تحجي بخوف
مــاسه ::هاا صــيهد هاا
مادري شوكت اجت وبدور بصفي وهو متخبل شعل الطباخ وخله السجينه عليه يهز راسه متحلف ويصيح
بحرگه
صيهد :: أعيّد تربيتج من جددديد ام الجكاير ام المصايب بت القندره.
مجلبه بظهر ماسه ارجف، ويشعل نار بگلبي من يغلط على امي مديت ايدي من وره مــاسه احجي بحركه وايدي تهتز كلها الغصه خانگتني
جــويريه::انتَ القندره لااااا تغلط على أميييي.
بــدور سدت حلكي وهو مد أيده يريد يجرني لزمته مــاسه حاضنته بأثنين اديها وتحجي وياه بخوف
مــاسه :: لا تطگها صــيهد لا تطگها، يتيمه وانتَ ألما ترضى عليها تنطك.
وهو رفع ايده بكل غضب وعيونه حمر وفاتحهن على وسعهن خازرني ويصيح
صــيهد:: خرب روح امج احتركت رووح اهل اهلج بت الچلاب خرررب .
وچلب بماسه يصيح
-هددديني وخري راح اطكج وخرري
بقوة لازمته كالتله وهي تبجي
-ما اعووفنك ما اعوفنك تتندم والله تتندم بس تطكها مو تكول حررام مو تكول يتيمه صــيهد حبااااب.
رفع ايده بغضب يهدد
صــيهد :: يشهد الحسين سلف مايوكفون بوجهي لو عدتيها، والجكاره الالكاج شاربتها النوب بحلكج اطفيها،بت السگط.
ماسه لازمته هو يم الباب الخارجي واني يم الباب الداخلي لازمتني بدور، باوعت شلون مــاسه هلكدوتها يمه ويكدر يدفعها ويجي بس هوه فقط تهديد وما يطك من شفت هيج حسيت أمنت احجي وارد ماراح يطكني، لزمت ايد بــدور نزلتها من حلكي احجي وفتحت عيني مثل عينه خازرته
جــويريه:: ميخصك بيه.
وبدور بسرعة رجعت سدت حلكي واني لازمه بإيدها وهو جاب مــاسه تدفع يريد يلزمني ويصيح
صــيهد:. لا ترادديني خرب روح امجج.
جريت ايد بــدور من حلكي حيل محروگ گلبي صحت ميته قهر
-حيوان لا تغلط على امي.
مــاسه:: اسكتتتي اسكتي.
مــاسه تصيح وتريد بس تلزمه جرتني بــدور تسكتني وهو انجن دفع مــاسه بأيد وحده وصلها يمنه وركض للطباج جر السجينه المخليها على النار واجاني متخبل وكفّن اثنينهن گدامي وهو من بينهن مثل الوحش مد ايده وجر ايدي صررخت اجر بيها منه والبنات مجلبات بيه يفلتنها من بين اديه صاح بغضب.
صــيهد :: على منو جايه تتجاسرين ولج؟ هاااه على منوو؟
مــاسه:. عليك العباس لا عليك الحسين صــيهد فدوووه.
ماسه تتوسل بيه واني صرخت اجر ايدي بكل قوّة خايفة وهو يغلط ويسب لمن صاحت مــاسه
مــاسه::چويني اننه جوويني وعوفها فدوه اروحلك.
شمر السجينه من ايده ودفعتني مــاسه لبعيد تبجي وانه اشهك بلا دموع وبدور لازمه بايدي رجع ليوره عيونه الماسه رفع أيده وهو يگول بتهديد
صــيهد :: اعديهاا اعديها وخل تنعاد لطلعلج گلب ثاني وامج كلساع اسبها وفنننج الفكيتي حلگج
حجه وهنه اثنينهن سدن حلكي عبالهن هم راح ارد عليه سحلني فوك صعدنه دفعتني مــاسه للغرفة ترجف وبدور وجهه اصفر مسحت وجهي كوه اتنفس صاحت بحرگة
مــاسه :: انتِ مسودنه شلون تغلطين عليه؟
دنكت عيني اكل بشفتي كارهه روحـــي وكارهه افعالي رجعت مــاسه صاحت
-وين جنتي ليش هيج صيح عليج.
مسحت وجهي اباوعلها غاصه بالكلمه
جــويريه :: جنت بالمشتمل مالته.
شهكت بــدور وهي تصيح
-يممه.
ماسه :: شوداج جــويريه وشسالفة الجكاير؟
مــاسه :: احجي بحرگه عاينت لجويريه لمت رجليها الصدرها مدنكه عينها وتشهك بلا دموع تحسرت ساكته وبدور تأشرلي بأيدها عود خطيه لا تحاجينها، مشيت كعدت كدامها خليت ايدي فوك ايدها على ركبها رفعت راسها شفايفها يرجفن
-احجيلي جــويريه، شبيج؟
رفعت راسها وتحجي مخنوگه عبالك تبجي بس بلا دموع تغص بالحچايه گالت
جــويريه::من كلتي محد يجي رحت للمشتمل حتى اخذ جكارة ومن شفته اجه ختلت بالكنتور ولگاني سألني شتسوين هناه بعصبيه وبعدين لكيته يضحك بوجهي، وما سوالي شي بقى يگلي شنو بگتي ويحجي على كيف بدون صياح والنوب من ردت اطلع گالي خل ماسه تسويلي چاي وطلع وراي بس عبر باب المشتمل صار عصبي، وبقى يغلط على امي شعليها هيه مره ميته شبعت مسبه من وررااي
مــاسه ::طكيت على رجليه بأثنين اديه
-عززه بعينج خايبه
بــدور ::صــيهد يأمنج ويمشي وياج على ماي لمن تعترفين بجريمتج حتى يكتلج وگلبه مرتاح هيج جان يسوّي ويانه حتى لو امي تگله علينه سون هيج وهيج ما يطكنه يكول انتن سولفلي شمسويات حتى من اطك ما اتندم.
مــاسه :: مو صاحيه انتِ جــويريه شجابج على صــيهد مسودنه؟ النوب تغلطين عليه ما يفك منج بعد ولا ينسى.
دنكت مخليه راسها على رجليها ولاول مره تنزل دمعتها يمي مسحتها بسرعة وحجت بحرگة
جــويريه::مــاسه اني غبيه اني ضايعه ضااايعه ما اعرف شأتصرف راح اموت والله راح اموووت .
مــاسه :: اسم الله عليج لا تحجين هيج، والله حرت وياج ومصدومه هذا مو طبعج جــويريه من ليمت انتِ تغلطين هاه من ليمت تردين الغلطه بغلطه؟
رفعت راسها شفايفها يرجفن وهمست بصوت مخنوك
-لان غلط على أمييي قهرني والله قهرررني وحرك گـــلبي، احس گـــلبي من القهر يتچوه بنار مــاسه وحق الله اني روحـــي تنطحن كل يوووم.
جريتها الي خايفه عليها تمددت على رجلي لامه نفسها وبدور كعدت يمها تمسح على شعرها نحاجيها بخوف وهي بس فاتحة عينها الحمره گالت.
جــويريه:: جنت اموت اموت وما اخلي واحد يشوف خصله من شعري وذاك اليوم نزعت شالي عن قصد حتى صــيهد يشوفني هههه
فتحت عيني مصدومه اعاين الوجهه بــدور وارجع اعاين لجويريه اللي بس تنزل دمعتها تمسحهاا بغضب لمن صار داير ماداير عيونها احمر كملت حچيها مختنگه
-انتن من احد يحاچيچن عدجن وهـــب وصيهد يدافعولجن، وريمه تگول محد يحجي وياي سلطان وسليم وحتى ابوها يگلبون الدنيا علمودها، وبنات خالي شامل اخوهن طــروادة يدافعلهن، اني محد اله حق يدافعلي محددد يگدر يحميني، اني انام واحلم بخنجر جدي على رگبتي اني اليوم اللي اخلصه اعتبره أنجاز لان ما متت بهاليوم.
من يوم جابوني هنا لحد امس مافات يوم اذا ما جده گالتلي الليله اخليه يذبحج، اذبحنج وادفنج ياهوه اليطلع وراج، جده شيطاان شيطان سممت ايامي بحجيها، خلت الرعب يترس كلبي وروحي خلتني احس ماعندي سند ماعندي احد يدافعلي خلتني احاول احتمي بصيهد خلتني بس اريده يشوفني حتى يبقى يدافعلي ويحميني.
خاايفه وروح امي خايفه اني ما اريد امووت والله ما اريد اموت.
مــاسه ::دنكت عليها حاضنتها وهيه صوت شهكتها يمرد الگلب شويه وسكتت امسح على خدها بهدوء گالت
جــويريه::خفت يكشفجن،شلون لحكتن تجن؟
بــدور :: ولج انه ما ارتاحن الا كلساع اطلع اعاين اخافن ولد عمي خليل يجون، طلعت تشلبيت على السياج وشفت سيارة صــيهد اجت ردينه نركض ونتراجف گلنه كضانه بعد مابيها شرده وعلي صعدنه من الحبل البالشباج وكل وحده خاتله بفراشها والنوب حتى نسيناج ولا فگدناج لمن سمعنه الصياح.
جــويريه:: ردت اشرد اصعد فوگ قبل لا يلزمني بس خفت يشوفجن ما موجودات
ماسه :: فزينه على صوت صــيهد يصيح بغضب
-ماااسه.
وخرتها من رجلي وطلعت اركض واكفلي ببدايه الدرج رفع ايده بعصبيه يأشر ارجعيلها
-ارجعي جيبي منها باكيت الجكاير والجداحه البت القندرره.
رجعت ركض فتحت باب الغرفة اثنينهن يعاينن بخوف، عاينت لجويريه مرتبكه
-ماخذه باكيت جكاير وجداحه منه؟
هزت راسها اي ومدت أيدها بصدرها طلعتهن كالتلها بــدور بفهاوه
بــدور ::شلون ماطاحن انه احط الشي مناه امشي خطوه يطيح مناه وانتِ انسحلتي سحل وهنه ثابتات فلك.
مــاسه ::طكيتها على راسها ودنكت اخذتهن من ايد جــويريه ونزلت اركض واكف بالهول يدخن نزّلت بسرعة وصلت يمه ومديت ايدي اله اخذهن من ايدي ورفع ايده على صدره يحجي
صــيهد ::انا مو صــيهد اذا ما توبتها من الجكاااير،بت السگط تغلط، بت القندره تغلط، الخايسه بت الخايسه تغلط الحيوانه عبالها انا انسى.
هز راسه متحلف وضم الباكيت والجداحة بجيب الدشداشة واني واكفه مقابيله خايفه واسمع صوت واحد يصيح طلع هوه يركض، ركضت وراه خايفه اعاين من شباج المطبخ طــروادة واكف گدامه ويصيح عليه
-بسااع.
ورجع صــيهد للبيت يركض طب الغرفة امي وجر التفك من وره البوفيه وكفت بباب الغرفه وشهكت خايفه وهوه يجر بيهن وبالمخازن حجيت بصوت يرجف
-صي صــيهد وين وين رايح.
وهوه باستعجال يطلع بالشواجير ويركبهن بالتفكات الثلاثة خليت ايدي على حلكي خايفه عليه ومحد من اهلي هناه حجيت مختنكه وارجف
-فـــدوه خويه ووين رايح.
شال عينه علي وكام شايل التفگ صاح وهوه يركض
-ولج بريا انخطف.
حجاها وطلع يركض لطمت على وجهي وركضت فوك متسودنه واصيح
-ولجن برياا مخطوف ولجن.
“”””
رنـــه :: فزيت على عبود يفتح بالكنتور عبالي الدنيا الصبح كوه احجي
-بيش الساعة؟
التفتلي مرتبك طشر الهدوم بالگاع وجر صندوك الطلق كعدت على حيلي
-شني؟
عاينلي بطرف عينه ودنك يدور مخازن بعد صاح
-الدنيا احتركت وانتِ منطمره
وكفت على حيلي كاضه بالغطا
-ياهو الاحترك؟
-يمممه ليمت شلون؟
ما حاجاني طلع شايل صندوكين الطلق وصاح
-جيبي المخازن.
شلتهن وطلعت وراه للحوش عاينت للسما الدنيا فجر، من الباب لمحت سلطان واكف اخذ منه الصندوك ورجع عبود علي اخذ المخازن وصلهن السلطان اسمعه گاله
سلطان:: ضل هناه عبود خاف نريد شي نخابرك.
عبود :: من اخابرك رد لا تخلوني متسودن هناه.
ضل واكف بباب الحوش وسلطان صعد بالسيارة فراها وراح، مشيت يم عبود التفتلي ميت قهر
-شصار؟
طب يمي للحوش كعد يحجي بقهر
عبود:: ولج وهـــب وبريا جانوا طالعين ومن ردوا بالچول شايفين زلم كاطعين الشارع وهـــب عباله مقلب والواكفين سليم والولد ذاب بريا وفار الدراجه رايح بغير درب، لمن وصل للقريه لگه ســليم گدامه تسودن .
– من الوحده لهسه نفتر بالشوارع مثل المسودنين مــيثم راح يتخبل ووهب لو تشوفين حاله.
خليت ايدي على گـــلبي بخوف وادعي هز راسه عبود بقهر وهوه يگول
عبود:: من ردينه للمچان العافه بيه وهـــب لكينه وهـــب كاعد على اركبه وحاط اديه فوك راسه يصيح
“كالي مو مقلب انا عفته اناا عفت صاااحبي”
-يمه اسكتت مردت گـــلبي بجاه ام البنين يلكونه.
سكت وانا كاعده يمه ساعه مرت وسمع صوت سيارات طلع فتح بابا الحوش وضل واكف ركضت اعاين من فتحات السياج شفتهم اجوا بيهم عشر سيارات، ولدنا وصحبانهم الچانوا ملتمين يمهم بالكيعان ووادم السلف، نزلوا كلها شايله سلاح وملثمه.
اعاين الطرواده كاض وهـــب ووهب يريد يطح ركضت طبيت للبيت وهوه طببه للحوش كعده يم الحوض غسل وجهه
اعاينلهم من الشباج رفع عينه الطرواده يرجف يحجي كلمه ويغصّ بالثانيه
وهـــب :: انا ااانا شمرته الهم انا ذبيت صاحبي الهم انا بأيدي بأيددي سلمته الهم.
طبوا وراه مــيثم وصيهد وسليم، يحجون وي ميثم يهدون بيه وهوه صاح بكل صوته
مــيثم :: يا علييي يا ابو الحسنين يا حاضر الشددددات احضرني.
ورد على وهـــب يريد يطكه دفعه طــروادة عنه صاح
مــيثم :: ووولك مو تگول صاح وراي مو مقلب ولك صايح وررراك شلون ما تردله.
جراه ســليم لبعيد ووهب وكف عبالك مصدوم ما مستوعب يعيد بنفس الحجي گاله
وهـــب ::صاح وراي مو مقلب مو مقلب وانا عفته انا شمرته من الدراجة،صاح مو مقلب.
صــيهد :: ما اسمع صوووووتك سد حلكك سد حلكك.
طكاه صــيهد وطرواده تسودن دفع صــيهد لبعيد يغلط عليهم
طــروادة :: فوگ ظيمه وقهرررره تجي تطكه .
كعد مــيثم على حيله يطك على رجله ويصيح
-راااح اخوي راااح اخوي راح.
والودام البره بكل ساعة تمر يزيدون، طلعوا الولد يمهم ورد طــروادة اجاني تعبان وميت من القهر صاح
-اطيني دشداشة وجفيتي.
ركضت للغرفه جبتهن اله بدل وهوه يحجي وياي گال
-حطي كيتليين چاي على الطباخ الكبار وحطي بيهن هيل.
– غير الهاي الوادم الواكفه تتراكض ويانه من البارحه لليوم.
-شراح يصيّر هسه؟
تحسر يلف بالجفيه على راسه
-بلكن يخابرونه متانين.
طلع وانه رحت للمطبخ غسلت قواري الچاي حطيت ماي وعفتهن على الطباخ، من يطلعون من الحوش اركض اعاينلهم من السياج، ومن يردون للحوش اطب جوه واعاين من الشباج.
احنه عشيرتنه مطلوبه دم وضل كل واحد يخبطله بصفحة واحد يگول يجوز عشيرة فلان وواحد يگول يجوز ذاك، وكل شويه مكببين الولد ويردون يهدون، مــيثم ووهب حالهم يمرد الگلب
ضليت بالمطبخ اسوي چاي وكلساعه تارستلي صينيه وعبود ينگل ويرد ليوره رجلي طاحن وانه على فد وكفّه شويه وطب عبود جايب طبقات بيض
-گلي واطيني.
-شني جاي ياكلون لو يدورون على بريا.
طكاني على راسي ماراضي وينتر
عبود:: شنسوي نطردهم؟ غير من البارحه ويانه وكلساع واحد بيهم يگول نمردت روحـــي من الجوع.
درت وجهي منّه ادردم
-وخبز منين؟
-راح سجاد للمدينه يجيب من المخبز هسه راح يرد، سوي چاي انتِ وحضري صحونه كون اول ما يجي سجاد تطكين بيض.
حضرت كلشي بين ما اجه سجاد طب للهول بأيده علاليك الخبز، وعبود يمي بالمطبخ هوه وحسين وزهره، گليت وجبة بيض وعبود قسمها بصحونه ويطي لسجاد يطلع الهم بره، واركض اصب جاي احس كمت كوه اتنفس من الاستعجال.
جاي اصب چاي وگلبت القوري حيل انفتح القبق وانگلب الچاي على ايدي ضليت انكززز وعبود يسد بحلكي وجراني للحنفيه فتح الماي عليها احس رووحي فرفحت بجيت اغلط عليهم وادعي
-ياكلون سمم احنا بحال اكل هسه ويردون زقنبوت.
وهوه كاض ايدي جوه الحنفيه ويحجي
-انجبي اسكتي.
طبوا سلطان وطرواده وصيهد للهول وكفوا وطرواده اجه الباب المطبخ يسأل
-ها رنـــه؟
عبود:: احتركت ايدها بالچاي.
طب للمطبخ بخوف جر ايدي يعاين بيها بجيت اغلط
-وحدي انكز بين الگلي والچاي جعلهم اكلوا سم.
نفخ على ايدي وصاح على زهره
-جيبيلي روبه من الثلاجة
ركضت زهره جابتله روبه خله على ايدي صاح سلطان
-طــروادة جا ليش وحدها خل اجيبن البنات وياها.
حجاها وطلع وصيهد كاله.
صــيهد:: جا جبت البنات وياها بس مناه واكفين شلون اعبرهن.
عبود:: من وره البيت السياج مشلوع مجلبه بخشبه بس شيلها يكدرن يطبن.
هز راسه خوش وهوه مدنك طلع نترت بوجهه طــروادة
-لا يجيبون ريـــمه ما احجي وياها.
وهوه ساكت يدهن الروبه فوك ايدي وكف مد ايده يمسح دموعي گال
طــروادة :: الف عين لأجل عين تكرمُ، ميخالف الخاطر الولد والخاطر هالشده الاحنه بيها، عوفي زعلج منها على صفحة احنا هسه بشده هذا صــيهد جان ما يحجي وي سلطان وهل تشوفينه اليوم يحاجيه لان الاحنه بيه اكبر من زعل كبري عقلج لا تعلين گـــلبي .
يحجي بقهر، هزيت راسي اي حسين گاله
حسين:: خل اطلع يمكم.
هز راسه راضي اخذ حسين وطلع شويه وطبت ريـــمه لابسه عبايه وحتى بوشيه وخرتها من وجها عيونها تدورني اجت بخوف ترجف
-رنـــه وين احتركتي ها رنـــه.
جرت ايدي بأيدها الترجف خايفه علي، مسحت دموعي بسرعة نترت ايدي منّها مبتعده،وهي تعاينلي عيونها متروسه دموع خايفه علي، عبود واكف بالهول ظهره علينه طب صــيهد للهول گاله
-تعال عبود اطلع.
بس طلع عبود طبت مــاسه، سلمت علي وعلى ريـــمه، وخرت انه على صفحة وهنه كملن الريوك وغسلن المواعين ضلن يمي مــاسه تحجي وياي وريمه تعاين ساكته، كلنه ندعي كون يرد بريا سالم، والولد كلساع يا صاعدين بالسيارات ورايحين يا رادين وتكب هوستهم وصياحهم، البنات راحن گبل لا يردون.
للعصر اجوا اعمامي وجدي الولد كاعدين بباب حوشنه والوادم البقيه واكفين مسافه عنهم يم سياراتهم، جدي واعمامي حاروا شيسوون بوهب يغلطون ويلومون عليه وعلى ســليم لان يسوون مقالب وجدي مكابل مــيثم ويصيح
-انكتل اخووك انكتل شني متانيه يردلك راااح.
وميثم متسودن، وكف طــروادة گدام مــيثم وصاح على جدي
-لو تحجي شي بيه خير لو تكرمنه بسكوتك.
وجدي تسودن يصيح على طــروادة
-انتَ مالك شغل لا تحط روحك بنصنه.
طــروادة :: لا تخليني اهينك گدام هاي الوادم كلها وروح شامل مخزن افرغ براسك واصله وياي لهنااااه.
كضوه الولد يسكتون بيه وجدي يتهادد عليه يريد يطكه وعمي وليد يغلط ويسب بيهم وشاكر يشعل بأبوه لا تكض منهم حگ ولا باطل، صار الليل الوادم طشت لهلها كلمن راحله وميثم ووهب كاعدين يم بيتنا لان اقرب بيت للحرثة يعاينون للدرب ما يرضون يطبون للبيت واثنينهم ما ماكلين ولا شاربين شي الولد حاجوا مــيثم يتوسلون بيه وهوه يگلهم.
مــيثم :: ما اكدر ولكم ما اكدر اخوي احزام ظهرري يا بووويه.
وهمه مكابلينه وكاعدين كلهم عيونهم على التليفون بلكن يخابرون واحد منهم بلكن يطلبون فلوس، اطب للبيت اسويلي شي وارجع ركض اعاينلهم من السياج ، للتسعة بالليل اجت عمه ام صــيهد عود بلكن تقنعه كعدت كباله بجت حط راسه على جتفها بجه يگلها
-انكسر ظهري عمه انكسر ظهري.
بجيت بلا صوت على صوته المهضوم وكسرته وكسرت وهـــب، طبت عمه يمي للبيت سوتلهم عشا وطلعت حلفتهم مــيثم اكل لگمه وشرب چاي ووهب بس يهز راسه لا لا، حاجته عمه رادت مارضى.
رجعت للبيت والولد ظلّوا كاعدين لا الشرطة لكتلهم حل ولا السلبوه خابروهم، نومت حسين وزهره واني دام همه كاعدين ماكدرت انام ضاله بقلق كلساع اطلع اعاينلهم، ل١٢ طب طــروادة انصدم من لكاني كاعده اخذ هاسكي يربطه
-ليش بعدج كاعده؟
-مادري ماجايني نوم مكسور خاطري على وهـــب وميثم، وافكر ببريا اكولن خاف كتلوه
– لا، لا تكولين هيج ان شاءالله يرجع النه بخير وسلامه بحقّ الحسين.
طب وياي للبيت اخذ حصيره وطلع فرشها الهم بره واخذ فراشات مداهن بره الهم كعدوا عليهن وانه طبيت يم حسين وزهره تمددت ادعي الحد ما نمت.
ندى:: حجتلي مــاسه وخلتني بقلق خايفه وهو مابين باقيه اتصفن والقلق ماكلني، شويه ورجعت ماسه يمي جايبتلي براسيتول لان راسي ذابحني من الوجع وكفت يمي واني اشرب بالحبايه واسألها
-ماكو اي خبر؟
مــاسه :: لا والله لا الشرطة لاكيتلهم أثر ولا همه مخابرين وهسه خايفين لا النوب ياخذون وهـــب يتهمونه هوه.
شرگت بالحبايه وي حجايتها كحيت وهي مدت ايدها تضرب على ظهري وتحجي
-اسم الله الزهره اسم الله.
-وهـــب شعليه؟
-هوه العافه سوده عليه سوووده بوجهي شصاير بحاله مصدوم ويلوم على روحه.
سكتت خايفه كالت
-ماتردين شي بعد؟ اروحن انه خاف امي تفگدني.
-بس اوكفي هسه اجي.
ركضت للغرفه شلت ملابسها العندي دشاديشها وشالاتها اخذتهن وطلعت مديتهن الها
-غاسلتهم كلهن.
-يااا صدك انتِ مسودنه خليهن الج شني السالفه.
-لا والله بقن عندي اثنين وي مالاتي كافي علي.
-وعلي ولا اخذهن شسالفه خيه البسي بيهن خليهن الج، انه اصلاً خيطتلج جديد وهـــب گالي.
حجت ودفعتهن بأيدي باستني وطلعت رجعتهن المكانهن وكعدت بفراشي عقلي متشوش ما ادري افكر بهمي لو بهم وهـــب وقهره، تمددت لازمه الگلاده بأيدي ومخليتها يم شفتي الحد ما غفيت وفزيت على فتحة باب الغرفة.
كعدت على حيلي وهو دخل حاني ظهره باوع الوجهي ودنك يمشي بحسره كعد مقابيلي ورفع عينه العيني يريد يحجي مخنوك مد ايديه اثنينهن وحجه بغصه وصوت يرجف
-اذا مات اموتن.
حجاها ونزلن دموعه مردن گـــلبي
-اشش اسم الله عليه اسم الله.
مد روحه خله راسه على رجلي ولم رجليه الصدره جمدت بمكاني وهو دموعه نزلن وحده وراه الثانيه ويهمس مخنوك
-عفته انا عفته، گاللي مو مقلب مو مقلب ما صدكته.
-لا تلوم نفسك انتَ ما متقصد تعوفه.
غطه وجهه بأيده وشهك مخنوك، بلعت ريك متوتره من وجوده على رجلي رفعت ايدي فوك ايده
-وهـــب فـــدوه لا تسوي هيج.
نزلت ايده من وجهه غمض عيونه وداير مادايرها غرگان بالدموع مديت اصابعي امسح دموعه وهو يردد
-صاحبي بريا صاحبي اخوي عفته عفته شمرته الهم ومشيت عفته يصيح وراي .
سكتت حايره بيا كلام اواسه حركت ايدي على شعره گال بغصه
-كون ميت باليوم التصوبت بيه ولا هاي سوايتي وي بريا.
شهكت ساده حلگه بأيدي بلا وعي
– وهـــب بغلاتهم عندك اسكت لا تحجي هيج لا توجع گـــلبي.
سكت مخنوك مغمض عيونه وكل شوي يتحسر بقهر، رجعت راسي على الحايط رجليّه خدرن وما اكدر احركهن الحد ما غفيت ومن كعدت مالكيته بس لكيت روحـــي نايمه عدل وموجه المبرده علي.
“”””””””””
ريـــمه :: بس يصبح الصبح تلتم الوادم كبار وصغار، حتى لو ما منهم اي فايده بس يلتمون وكلمن يحجيله بصفحة كل ساعة صايحين على چاي، سلطان من اول ما التموا صاح على مرته الاء سوي چاي وطلع غمته وهيه تگول
-اسوي مرض
صعدت الغرفتها كمت للمطبخ اسوي الچاي ماكلني القلق طب ســليم وجهه مايكصه السيف گال
-سلطان وين؟
-توه طلع.
دار هستوه يطلع وطب أبوي يسأل رد عليه من وره خشمه
شاكر:: ها ولك شني؟
ســليم :: متانين يخابرونه
شاكر:: عمي كتلوه وراح لو يردون فلوس من البارحة يخابرونكم
خزره ســليم بغضب
-لا تعيد هالحجي عايش بريا عايش ويرد لو يطلبون عيونه نشلعهن اللهم حتى يرد.
طلع من المطبخ وابوي يهز ايده
-يابه ليش هيج تحجي اسم الله عليه ان شاءالله يرجع خطيه شاب اشايف من حياته.
درت على صوت امي من طبت للمطبخ تدعي
ميلاد:: لا ان شاءالله ما يرجع الا ملفوف بچفن.
شهكن فاتحه عيني بصدمة
– يمه اسم الله لا تدعييين لا تدعين.
دعواتها هزتني هز وابوي نتر يغلط عليها ويعاينلي
شاكر:: لا تدعين سدي حلكج.
طلع ابوي وامي بحقد گابلتني كل ساعه وگالت
– كون محمل يرجع .
– اللهي بحق الحسين رده سالم غانم الاخوه .
كامت يمي كارصتني من زندي
ميلاد:: تعانديني ريـــمه تعانديني الخايسه.
جريت ايدي منها ودخلت هاجر تركض علي وكفت كدامي خازره امي وهيه تخبلت جرتها تطكها وتصيح
ميلاد:: الا اچويچ واعلمنج شلون تخزريني.
اجر بيها بس اريد افلتها من ايدها لمن طب سلطان صيح متخبل وهاجر تبجي وكف يسأل شكو وامي تكله
-مالك شغل، اريد اربيهن
سلطان :: شني المالي شغل، والله بلوه بالحسين الله يگول بر بالوالدين وانتم تگلولنه شبعونه نواعيل، لا انتِ تشفين الگلب ولا ابوي.
حجه وهي تغلط عليه وعلى سليم وتقارن بينهم وبين مرتضى، وكفت اريد اصب چاي صاح
سلطان:: چا وينها الاء.
-راسها يوجعها صعدت فوك.
ميلاد:: بالحسين كلشي مابيها تصيح اسوي مرض فوك مرض وخلت وصعدت الغرفتها تعترف بيك هيه الها شغل.
عاينت الامي عاجزه وهوه عاف هاجر وصعد فوك اسمع صياحة ونزلها متخبل وهيه تغلط شال قوري الچاي ركعه بالحايط ترس المطبخ چاي
سلطان :: هسسسه تسوين.
الاء:: اسوي احرريشي.
وسلطان تسودن تستفزه شلون ما يطك مره ودرت بيه ما يطكها توكف كدامه وتكله
-طكني يله طكني، فنك.
عافها وطلع بره وهيه وكفت وتصيح
-صاير علي زلمه كون صدك وطاكني اخلي اهلي يكسرونها اله.
وطب سلطان بأيده عصا وكفت كدامه بس أريد احميها بعمره ما مد ايده على وحده بينه ومن مرتضى يطك مرته يتعارك وياه ما يرضى، تسودنت من شفته اليوم فاقد كطعها كسر العصا عليها وكل هذا وهيه تغلط وصوت صريخها وصل وين طبوا سجاد وسليم جروه منها، جريتها انه على صفحة صاح عليها
سلطان :: هسسسه ترحين الاهلج هسه ترحين احركج وحك ابو الحسنين احركج ما تضلين.
صعدت الغرفتها تسب وتفشر والولد يتعاركون وي سلطان شلون طكاها وامي تبررله وتكلهم
-تغلط عليه جا شبيه هوه مو زلمه ويسكتلها
نزلت الاء لامه اهدومها صاح على سجاد
-اخذها اخذذها ودها الاهلها.
اخذها سجاد وراح طلع هوه ورجعت اسوي چاي من جديد وهاجر تمسح بالگاع لمن اجت امي تحجي بهدوء عود تقنعني
ميلاد:: انا شني اكرها هاجر من احاسبها واطكها لو اجويها غير حتى تخاف مني امها انه شني تخزرني.
-والله ما ادري غير بتج هيه كون انتِ الماترضين واحد يطكها، مو انه الاحميها منج.
– لا اطكها واچويها جا الها هذا تربيه هاي تكبر وتنسى.
-ههههه تنسى؟ اشو اني الهسه اتذكر جم مره چويتيني اديه كل اثر بيهن هلكده أثر خاشوكه واثر سجينه واثر شيش، كلهن جنتي تحمينهن على الطباخ وتچويني بيهن، يمه ما ينسن ما ينسسن.
خزرتي ما راضيه درت وجهي منها گـــلبي يدك حيل محروكه حرك عافتني وراحت اشرتلي هاجر تسأل
“لگوا بريا؟”
-لا بس ان شاءالله يلكونه ادعيله هجوره ادعي يلكونه.
رفعت اديها اثنينهن تدعي ابتسمتلها، اجوا اخذوا الچاي ومر اليوم بين هوسه وصياح لان الهسه محد مخابرهم، جدي يصيح انكتل خلونه نسوي فاتحه والولد يتسودنون، الحد ثالث يوم احنا القرية خبصه ناس رايحه وناس جايه، بالليل ســليم طب الغرفة وجهه اصفر وحاله يكسر الگلب سويتله عشا وفتت انطيه اله هستوه يگلي
-ما اريد.
ودك تليفونه كعد عدل بسرعة وفتح السماعة الخارجيه
-الو
حجاها يعاينلي وماكو اي رد رجع كالهم
-الو، االوو.
نسد الخط وهوه كام طلعلهم يركض.
“”””””
رنـــه :: انخبصوا وصوتهم عله واني بس أتصنت عليهم اريد افهم شكو ما فهمت شي لمن طب عبود وچلبت بيه
-عليك العباس كلي شصار.
فات يغسل ويحجي وياي
-ماكو بس خابرونه يهددون ما ننطي الرقم للشرطة ولا نكلهم خابرونه.
-جا تمشون بحجيهم؟
-جا غير يكتلون بريا.
-لا يمه اسم الله، تدري والله انه حتى بچيت عليه.
-شتردين نرجعلج دموعج؟ عود من يرد بسلامه ندفعلج فلوس بمچان دموعج.
-شمالك؟
ابتسم متحسر
عبود:: ولج ماعرفنه شي ماكالوا شنو يردون بس هددوا وكالوا البالمركز فلان وفلان واي معلومه توصلهم احنا هم توصلنه نسلمه إلكم جثة، وهـــب تسودن ضل يصيح عليهم انا اجيكم وين ما تردون وعوفوه بس عوفوه، وميثم لو تشوفين شصاير بيه هاي الليله الثالثة وهوه ما نايم ولا مغمض عينه.
تحسرت ساكته شويه وطلع يمهم الحد يوم الرابع رجعوا خابروهم گالولهم” عفيه عليكم امشوا ويانه عدل ابنكم يردلكم تدخلون الشرطه تستلمونه جثة” مــيثم من خوفه على اخوه عاف الشرطة
وبنفس اليوم بالليل رجعوا خابروهم گاللهم “حضروا مية وخمسين مليون واحنه باجر نرجع نخابركم”
بس هيج حاجين وسادين التليفون، طــروادة طلع الفلوس الچان متداينهن علمود زراعة الشلب عشر ملايين، يحسب بيهن ويسولفلي كعدت يمه اسأل
-جا وبعد منين تجيبون هواي مية وخمسين.
طــروادة :: صــيهد عده ١٥ ووهب عشره سلطان وسليم عشرين وهوه مــيثم عده ١٥ نلمهن ونشوف مشعول بلكن يطيهم.
رنـــه :: غصباً عليه جا غير ابن ابنه وهوه شكد عده فلوس نضدات نضدات كله حمر.
سكت كمل الفلوس اعاين الايده اخر شي ميتين حسبهن وعافهن كال
-مصرف هالشهر بين ما يجي راتب التقاعد مال ابوي.
هزيت راسي موافقه وهوه اخذهن وطلع.
مــاسه :: صعدنه نعاين من فوك الدرج لمن صارت هوسه بالهول الولد لموا ٧٠ مليون والتموا كلهم بالهول يگولون الجدي اطينه ٨٠ سودنهم من يكلهم
-ماعدي، ياخذون فلوسكم ويودونه الكم مكتول يضحكون عليكم.
مــيثم :: اردهن الك اررردهن بس لا تكلي ماعدي مره وحده اوكفلنه مره وحده.
صيح مــيثم ميت قهر ابوي گال الجدي
وليد :: يابه جا شلون نضل هيج ؟ ابني راح يموت على صاحبه، وهـــب يتسودن لو صار شي على بريا هم اخسر ابن اخوي وهم اخسر ابني.
يحجون وياه وانه كل ساعة ماده راسي اعاين وارجع اشرد خاف صــيهد يشوفني مــيثم ميت قهر وكوه يحجي يرجف وصيهد اعصاب وينتر على جدي ملتمين كلهم فوك راسه وهوه كاعد ويگلهم.
شعلان:: ولنهم ماخذين الفلوس ورادينه النه مكتول شسوي انا؟
وميثم دفر الدولكه البالگاع يصيح
-ما مكتووول ما مكتوول بريا عدل.
كضوه الولد وصيهد صاح على جدي
صــيهد:: يشهد الحسين لو ما تطينه ال٨٠ لروحن للمضايف اتداين واشهرك بين العشاير شعلان ما فك جفن الفلوس حتى يطلع ابن ابنه من الموت، مسودن واسويهاا تعارفني زين
وكف جدي يغلط عليهم ويسب كالهم
-اخذهن من عيونكم.
سلطان :: تاخذن تاااخذهن.
شعلان:: مــيثم لو رد بريا بعد ما تجي للقريه تضل بالمعامل.
هز راسه مــيثم راضي صاح على جده تجيبله فلوس گال الصيهد
– حالك حال مــيثم.
صــيهد:: ميخالف.
جابت جده فلوس وكعدوا يحسبون بالهول لموا ١٥٠ مليون وطلعوا وهـــب تمرض بالفراش لا ياكل ولا يشرب، باليوم الخامس خابروهم كالولهم الشرطه راح تجيكم لا تكولون تواصلوا ويانه وصدك ورا الاتصال ساعتين أجت للشرطة تسودنوا همه عرفوا اكو واحد يوصللهم من المركز نفسه .
وخلوهم لا هم السما ولا هم للگاع لامين الفلوس وكاعدين لليوم السادس خابروهم كالولهم باجر نحددلكم وين تجون
” نفر واحد يجي”
وهـــب ::ماكو شي اصعب من شعوري حتى من اتنفس اتخيله مخنوك والسبب انا كل ثانية مرت اللوم موتني بيها، عيونه ما فارگت عيني وهوه يصيح وراي مو مقلب، صوته يتردد بأذني ويذبحني بكلّ ساعة.
عيون مــيثم تلومني كل ما تصدلي صــيهد ساعة يواسيني ساعة تغلبه عصبيّته ويصيح، تمنيت افديه بروحي بس كون يرجع، اسبوع مر اسبوع مثل السم، لا انا ولا مــيثم رضينه ندخل الشرطة خفنه نخسره.
بيوم تسليم الفلوس مــيثم راد هوه يروح وكفت كدامه كوه احاجيه
-انا اسلمهن، مــيثم انا الغلطت وضيعت بريا خلني انا الاسلمهم الفلوس.
طــروادة :: مــيثم انتَ تعبان وترجف خاف تتخربط وتطيح خل وهـــب يروح، وانتَ وسليم وسلطان وراه بسيارة حتى لو تضلون بعيد عنه.
مــيثم :: وانتَ وصيهد ما تجون؟
صــيهد:: احنا عدنا شغل نجي وراكم.
وهـــب ::هز رأسه مــيثم موافق، اخذت جنطة الفلوس وطلعت بسيارة وحدي وهمه وراي، بنص الطريق خابروني
-الو.
-وحدك؟
-وحدي.
-اذا وياك احد لا تتعب روحك وتجي تلكاه جثة.
-ااجي وحدي.
-الفلوس اكيد ما ناقصات؟
-عود احسبوهم.
سد التليفون بوجهي مشيت مسافة ورجع خابر يوصفلي وين امشي سديته منه خابرت مــيثم
– مــيثم اوكفوا يم السده بعد لا تجون وراي.
-ديربالك على روحك.
-فـــدوه روحـــي الروحه بس خلي يردلك.
سديت التليفون منّه خابروني
-السيارة الوراك شني
-اخوي تابعني ما ادري بيه خابرته هسه ورجعته.
فشر وسب بحچي قذر سكتت منه غير الطريق مشيت وين مايريد كال
-اوكف يمك.
وكفت بشارع مگطوع رجع خابرني
-انزل من السيارة والجنطة بأيدك.
طفيت السيارة
جريت الجنطة ونزلت لمحتهم اجوا بسيارة كيه وكفوا مسافة عني اشوفهم وما آسمع صوتهم رفعت التليفون احاجيهم
-راح يجونك ياخذون منك الفلوس، من يوصلن يمنه ننزل اخوك من يمنه وتاخذه
-خل اشوف اخوي بالاول.
-انجببب لك انجبب.
-خل اشوووفه.
سد التليفون بوجهي نزلوا اثنين من السيارة شايلين اسلاح وملثمين اجوا علي، ضليت واكف بمچاني لمن وصلوا يمي، جروا الجنطة كعد واحد منهم فتحها ويعد بالفلوس چم شده
شالها ووكفوا
-خل يعوفون اخوي.
-نوصل للسيارة وانتَ عاقل تضل واكف هناه ما تتحرك حتى ماتخسر روحك وروحه.
رجعوا ليورا مشوا مسافة شلت التليفون اخابر على البالسيارة
-وصلوك عوف اخوي.
-تشوفهم وصلوا لو بنص الشارع؟
-وصلوك وصلوووك ماضل شي اريد اشووفن اخوي.
-هههه خلك عاقل.
افتريت بالشارع روحـــي محترگه وصلوا لسيارتهم وانا على التليفون وياهم مشيت بسرعة وراهم احجي
-وين اخوي يله وووينه.
ركضت بكل حيلي واشوفنهم اثنين تكابلوا على بطانية كل واحد من صفحة شالوه شمروه بالشارع وفروا السيارة بسرعة شخطوها وراحوا، ركضت بكل حيل احس النفس يخنكني بس اريد اوصل يمه
متت الف مره كبل لا اوصله اركض واصيح بلكن يفز ويريح گـــلبي .
-بريااا، برياااا.
وصلته ورييتني عمــري كله ما واصله، كعدت يمه على اركبي هذا مو بريا صاحبي وجهه امورم و اصفر وشفايفه بيض جريته الحضني متسودن
-برياااا بريااا خويه .
شلت راسي على صوت الطلق وصوت سيارة الولد أجوني وصوت سيارة شرطة وهوسه، بريا بأيدي جثة
حطيت راسي على گلبه يا ابو الحسن بس كون اسمع صوت نبضة
-عااايش بريااا ، يدددك كلبك يدك.
اجاني مــيثم يركض والف عثرة عثر كبل ما يوصل يمي جراه من ايدي الحضنه
مــيثم :: خوووويه بريا خوووويه.
وخرت البطانية من باقي جسمه قميصه مشكگ فتحت عيني مصدوم مضروب سجينه ببطنه نريد بس نجره من ايد مــيثم صاح عليه سلطان
سلطان :: خل ناااخذه للمستشفى.
ركض ســليم جاب السيارة يمنه وطبكت علينه سيارة صــيهد وطرواده وياهم سيارة شرطة ما جنه ندري بيهم متفقين وي الشرطة، مال المحافظة مو المنطقة.
صاح سلطان
-سوق انتَ وهـــب .
-ما اكدررر ما اكدر رجلي يرجفن.
صعد ســليم يسوق وصعدت يمه وميثم لام بريا الصدره لمن وصلنه للمستشفى واخذوه منعدنه اخذوه من بين ادينه مثّل الجثة.
اجوا ورانه صــيهد وطرواده يحاجون مــيثم ويصبرونه هز رأسه يحمد الله
مــيثم :: الحمدلله عايش الحمدلله.
طــروادة :: الحمدلله، والله هالضابط إبن حلال وياخذ حگ بريا من عيونهم.
مــيثم :: كضوهم؟
صــيهد::اي، واعذرنه لان خططنه بدون ما نكلك.
هز راسه مــيثم ساكت لمن طلع الدكتور ووضحلنه حالته ايام صاير لا ماكل ولا شارب صاير عنده جفاف حاد وفاقد دم هواي من ضربة السجينة اللي بيطنه من غير التعذيب مرد روحنه من گال اثار عض حيوان بكل جسمه “جريذي”
طلعت من يمهم مخنوك ماكدرت اسمع، كل اليمر بيه انا السبب
جان مات وأنا السبب.
رنـــه ::بيوم اللي لكوا بيه بريا جانت عفراء عدنا وفرحانين لمن اجه عبود بالليل سألناه عليه گال
عبود:: بالعنايه المركزة
عــفراء :: صحى حاجيتوه؟
عبود :: فاتح عينه بس ما حاجي، معذبينه ولد الچلب، يكول الدكتور جسمه فاقد سوائل ودم وبعد مادري شني بالكبد صاير بيه نقص الجلوكوز مادري شنو، وهوسه صايره.
عــفراء :: سوده علي ما يستاهل بريا.
عبود :: اي والله، الدكتور يكول صايره عده صدمه هسه هوه.
رنـــه :: كون ما يزعل من وهـــب خطيه.
سكتوا عبود طب يسبح واحنا كعدنه بالهول سألتها على الاء گالت
عــفراء:: اجت تلعلع وتغلط ابن عمج طكاني ومدري شني، منذر كالها ياهي مالتنه ضلت تصيح عليه جا مو انتَ ابن عمي ورضيت بيهم علمود يطونك مرره؟
كالها انا ردت اطي مريم اختي كبل لا تتزوج بس انتِ وامج جلبتن وردتنهم.
سكتها ومن طلع من يمي جانن اخواته المتزوجات هناه هم ضلن يحجن يكللي لو منذر طاكج هيج اخوتج يرضون سكتت منهن.
-يمه كون انه ولا اسكت.
-لا تسكتين تسكتين من تشوفين حجيج ما يجيبلج غير وجع الراس.
رفعت اكتافي ما ادري، الثاني يوم ولدنه بالمستشفى يجون كد السبح والتبديل ويرحون، بريا صاحي وضال يصيح ما يريد يشوف واحد بيهم بس مــيثم ضال يمه، وهـــب يتوسل بيه يريد بس يحاجيه وبريا يسد عيونه منه.
ثالث يوم يله طلعوه للبيت ركضت اعاين من السياج، شفته كاضينه مــيثم وطرواده وجهه مورم وكوه يمشي، مالحكت آشوف هواي اتوسلت بزهره تطلع تعاين وتجي تحجيلي راحت تركض شويه واجتني كضيتها ومركزه وياها كالت
زهره:: ددي
-جدج؟
-اي.
-شبيه؟
-تض بييا دله بعد لا توون معالب
-كض بريا كاله بعد لا تسوون مقالب؟
-اي
-وبعد شصار؟
رفعت اجتافها عود ما ادري، هديتها ضليت احوس يا من يجيب عبود واسأله شويه وسمعت صوته ضليت بالحوش متانيه لمن طب جلبت بيه
-ها شصار؟
-وخرري شمالج الغسل، شني؟
-شمالك غير اسأل عليهم.
مشه للهول عفراء كاعده تلكط تمن، كالها
عبود:: عود صايره حنينه الاخت تسأل الجذابه.
غميته وطبيت كعدت يم عفراء كالتله
-لا صدك شني؟ شلونه بريا حاجه وهـــب لا؟
عبود:: تموتن على العلوم وراثة هاي يجوز ورثتنها من امي.
زهرة:: ابود لا تغط عامي.
رنـــه :: تكلك عبود لا تغلط علي امي.
ضحك وجراها يبوس بيها كال
عبود:: بعده بريا شلون المصدوم، حتى انا من طبيت اسلم عليه ماحاجاني، وكلش متسودن من وهـــب ما يريده .
عــفراء :: يمووي اسبوع ضل متعذب شلون ما ينصدم.
عبود:: مسولف الميثم شويه، يكله افقد الوعي ومن اكعد الكه الجريذيه تاكل بجسمي، يكله خلوني بمچان اظلم وباليوم لو يطوني شربة ماي لو ما يطوني.
عــفراء:: عساها بعافيتهم.
عبود:: وعلي هذا الضابط شريف ما تيهه بريا اجاه للمستشفى كاله والله خليت صياحهم للصبح كاب.
رنـــه :: همزين كضوهم ورجعوا فلوس طــروادة جايبهن دين.
عبود :: وصيهد رجع ال٨٠ مليون مال جدي شمرهن عليه شمر.
رنـــه ::ضحكت بشماته وكمت اخذت التمن من عفراء غسلته وطبخته لمن اجه طــروادة تعبان حييل هم رجعنه سألناه على بريا گال
طــروادة :: بعده بعده لمن ترجع عافيته شويه شويه يرجع طبيعي.
عــفراء :: على وهـــب انه خطيه هسه يموت من القهر من يشوف بريا ما يريده.
طــروادة :: سوه فلك بجه والله كسر گـــلبي يكله اكتلني ولا تدير وجهك مني
رنـــه :: خطيه. والله انه بجيت عليهم.
عبود :: يا بويه ذلتنه ذلتنه ساعة السوده يوم البجيتي عليهم.
طــروادة:: هاي ياهي البجت رنـــه ؟ ولج انتِ مو تكولين اكرهم؟
رنـــه :: لا والله انقهر عليهم انه اكره بس صــيهد وبريا وميثم وسليم وسلطان وسـ…
سكتت من صاح عبود
عبود :: اذا كلتي سجاد اكتلج.
وكفت وره ظهر طــروادة كتله
-اكثر واحد اكرهه سجاد
كاملي متحلف وطرواده حاميني يضحك ويكلي
طــروادة :: تكول انه اكره بسس اهم شي بس وتعددهم كلهم.
وكف عبود بشماته يعارف شلون يحرك گـــلبي غمزلي كال
-ترحين فـــدوه السجاد
-انت وسجاد ترحولي فـــدوه
-ذااك فراشمن المشروررر، غسلوه من الصبح.
ضحك يصيح
-يا خايسه جا انا النايم عليه لو حسين، تعال خايس ليش تنام على فراشي
وحسين كالب وجهه ياكل ويعاين للتلفزون كاض الريموت وطرواده خازرنه حتى مانكله ابو فراش المشرور.
كامت عفراء تطبخ المرگه من تجي نضل بس نضحك وحتى حسين وزهره اعوفهم ما اتعارك وياهم التهي وياها، وره الغدا كاعدين نشرب چاي وطفت الكهرباء صارت تسمط سمط من الحر طــروادة روحه طافره واني جلبتله
-طــروادة جيبلي طلي.
-ذاك آليوم شفت طلي هلكدوته شويه اصغر من زهره متت عليه ردت انزل اجره من الشارع عبود ما خلاني.
عبود:: وعلي هاي هواي تمسلت.
– طــروادة انه ليمت كايلتلكم على شي؟
طــروادة :: ليمت؟ مره ردتي ارنب مره بلبل مره حمام مره دجاج مره بطوط هسه طلي، امشي وولي.
حجه يضحك وحسين وعبود ضحكوا علي يصيحون
-والله خطيه بجت بجت والله خطيه.
كمت من يمهم ابجي طبيت للغرفه وركعت الباب حيل صاح طــروادة
-امددداج بچوچ.
هيه حاره تكتًل وانه لفيت روحـــي بالغطا مية لفة لمن نمت وكعدت على صوت طلي يمعمع يمي، وخرت الغطا من راسي بسرعة اضــحك لكيتهم حسين وعبود يم راسي
– والله راح اصيح الطرواده، والعباس بس تروح عفراء الا اخليكم انتم تطبخون هم اطبخلكم شي
عبود ::. هذا طلي صغير ربيه
حسين:: ميييع.
كمت من يمهم وجهي مخنزر واريد اتعارك طلعت للحوش اريد أشكي العفراء لكيت يمها طلي جوزي صغيرر حيل ضحكت وركضت يمها
-يمممه يخبل.
عــفراء:: يكول طــروادة خل تداريه حتى بعيد اضحيه نذبحه.
-والله هم اخلي واحد يذبحه، تعال عمــري تعال يا گـــلبي.
شبكته، وعفراء من يمها تصيح
-ايعع.
-هسه اسبحه واريحه .
عبود :: مشطيه وياج
رنـــه :: واسميه عبود
عبود:: والرضا بس تمسينه عبود اذبحه.
زهره:: تميه طيهد.
– لا خيولي النوب الطلي ينچلب
خزرتني عــفراء درت وجهي العب وي الطلي احطله ايدي وينطحها ويركض يكمز بالحوش واركض وراه، عبود سواله شرك صغير على صفحة اله حيل فرحت بيه، ثاني يوم عبود راح جاب شهادتي درجاتي عاليات ، حسين وزهره من زمان جابوا شهايدهم حسين ناجح وزهره راسبه ضلت تبجي بيومها مقهوره.
العصر عفراء لفتلي دولمة لان بالليل تروح لعيالها، ضليت انه امسح الطباخ وهيه كالت راح اروحن آلم الهدوم، مسحته وخلصت وهيه ماكو
طلعت وراها اريد اشوفها وين بس افتريت يم الحبل شهكت فاتحة عيني على وسعها واني اشوفها……..
