أبقي يمي
وخلي هاي الدنيا كلها تصير ضدي،
هاچ چفي..
وصححيلي اغلاطي كلهاا
المهم خليني على گدچ
وانتِ هم صيري على گدي.
══━━━━✥◈✥━━━━══
جــويريه :: بمجرد حسيت مخالبه على جسمي حسيت بگلبي وكف اريد اكدر ارفع ايدي وادفعه او رجلي تعيني وأشرد كانما تحددت ومن الرهبة والخوف العشته أنكتم صوتي وغواش غطى عيوني طحت مغمى علي وما ادري اذا طيحتي بيّن مخالبه لو بالگاع.
وفجأة أحس بصوت يمي وايد تهزّ جتفي اريد افتح عيني ما اكدر والصوت الاسمعه مو صوت شخص واحد، شخصين، رفعت جفني كوه على روحـــي والمح وهـــب وصيهد گدامي كاعدين ووهب مشغل ضوه تلفونه يضوي على وجهي ويرجع يفره على وجّهه صــيهد خازرني بغضب ونتر
صــيهد:: شتسوين هنااا؟
رفعت راسي من التراب واتلفت بخوف مخروعة كعدت على حيلي وهمه وكفوا اثنينهم يباوعولي واني من الرعب العايشته رجعت أتلفت وامسح على راسي وجسمي بقوة اتخيل ملمس المخالب بعده على جسمي
وهـــب :: هاي شبيها،طنطل انتِ؟
رجعت ليوره اتنفس بقوة وهم منتظريني احجي سحكت على شي دنكت عيني اشوفهن الفلوس بسرعة شلتهن ومشيت اركض عايفتهم وراي، الخوف سيطر على كل ذرة بجسمي
اريد الزم اي شي ممكّن ينقذني عقلي تشتت وكل تفكيري صار نلزمت راح انذبح.
دفعت باب المطبخ مثل المخبله اريد ادخل وصار بوجهي جدي شهكت فاتحة عيني على وسعها وهو بس لمح الفلوس بأيدي مد ايده بسرعة جر شعري وحجابي ورفع ايده ضربني على وجهي بكل حيله يصيح
شعلان:: تبووكيني ووولج يت نضال تبوكيني.
طاحن الفلوس وجلبت بأيده حرف مايطلع مني احس بضرباته على وجهي وحرورة دم نزلت من خشمي والمح ام صــيهد وخالي وليد اجوا يركضوان هي تحاول تطلعني من ايده وخالي وليد يعاونه عليَّ، ما ادري يا ضربه التوجع اكثر بعدني ما متحمله وجعها وتجيني الضربه الثانية اقوه منّ القبلها.
وما ادري جم مره ركع راسي بحواف الحايط ياخذني مناه ويرجعني مناه كمت اسمع صوتهم مثل الصدى وبالكوه فاتحه عيني. احس بحرورة الدم تنزل من كصتي على طول وجهي ومن خشمي على حلكي الصوت الوحيد الجنت مركزه اسمعه صوت جده وهي تصيح
-ياا جلبه يابت الجلبه.
وام صــيهد حطت روح بروح وياي بكل حيلها تحاول تطلعني من ايدهم والمح مــاسه وبدور نزلن يركضن بــدور وكفت على صفحة تخاف وماسه ركضت وي امها تجر بيهم من عندي صوتها وهيه تصيح
مــاسه ::عوفوها، موووتوها موتوها يابه كافي راح تموت.
صريخها اعلى صوت بيهم، اندفع باب المطبخ غمضت عيني گبل ما المح منو الدخل واحس بأيد جرتني بقوة من بينهم ندفعت للباب طحت على حيلي ورفعت راسي الهم خالي وليد ووهب يردون يلزمونه وهو يريد يلزم جدي ويصيح بحركه
صــيهد :: لا تطكهااااا.
رفعت ايدي الترجف اريد امسح الدم من وجهي، خالي وليد لازم صــيهد بقوة وجدي طلع من بينهم يغلط ويسب بس يريد يوصلني فلت من وهـــب واجه بكل قوّة يدفرني ويفشر،وشه صارت بأذني من صوت الصريخ والصياح.
جراه وهـــب من يمي يدفعه وصيهد دفع ابوه حيل وجر جدي من دشداشته بس يريد يوصله الايده ويصيح
-لا تطكهااا كتلك لا تطكها اموتنك بالحسين اموتنك.
وهمه يصيحون باكتنه وكل واحد بيهم يجر بصفحة وكفوا وهـــب وخالي وليد لازمين صــيهد اللي يريد يلزم جده وجده بس يريد يوصلني ويحلف كل يمين اليوم يذبحني صاح بصوت عالي
صــيهد :: فننننك تذبحها فنك، اناااا الاذبحك يشهد الحسين انااا الاذبحك.
وجدي من وره خالي ووهب يشيل ايده ويضرب صــيهد وهمه لازمينه جريت روحـــي للزاويه ورا الباب حاضنه رجلي الصدري واباوع الرجليهم مدافعهم كل شوي احسهم راح يدوسون علي ويرجّعون لبعيد.
طبوا بيت خالي شاكر يصيحون شكو وجدي يصيح عليهم
-باكتني بت نضال باكتني الليله اذبحها الليله اموتها.
صيح وهـــب على البنات وطلعن من المطبخ يركضن، دنك جر شالي من جوه رجليهم شمره علي مهادد وصياح وناس لازمه ناس، صــيهد يريد يكتل شعلان، ووهب واكف كدامي حاميني من خالي شاكر اليصيح
-بس اطونياهااا.
صــيهد:: اناا الاخذت فلوسك انا الاخذتهن وهيه شافتني باكتهن مني حتى تردهن الك، ولك يهوودي انتَ كافر وتطكها هيييج خرب اهل اهلك.
رفع ايده خالي وليد وضرب صــيهد على وجهه يغلط عليه وهوه ما مهتم يريد بس يوصل الجدي ويضربه لزموه مرتضى وخالي وليد شهكت ارجع بروحي للباب اكثر واني اشوفه افتر يريد يجيني دفعه وهـــب عني ورجع شاكر جر وهـــب يغلط عليه وميلاد وجده من يمهن يغلطن ويتعاركن وي ام صــيهد
ضميت راسي بين رجليه وبس أسمع أصواتهم، شهكت ورفعت راسي من أنجرّ شعري هستوه يريد يضرب وفلت صــيهد من بين اديهم دفعه عني وضربه وهمه كلهم هدوا على صــيهد كمت ما اميز منو يجر بمنو بس احس بصيهد سحلني من ايدي وطلعني من المطبخ، لمحت الولد كلهم بالحوش واكفين واحد يصيح على الثاني شكو ومايكدرون يدخلون جوه،وصوت الصياح ورانه رج البيت
لازمني من زندي بقوة ويسحل بيه بسرعة، امشي وراه مستسلمه ماعندي طاقة الشي دفع باب الحوش مال بيت. خالي شامل، صار بوجهنه طــروادة هستوه يريد يطلع، ورنه واكفه بباب الهول
دخل صــيهد بعصبية واني بأيده مثّل الجثة بلا روح طببني للبيت، يصيح ويحجي وي طــروادة، بس اسمع صوتهم بدون ما افهم كلامهم، لزمني من اجتافي كعدني بالهول ورنه فوك راسي تحاجيني واني بس فاتحة عيني ما افهم شي اتلفت بخوف ما مصدكه بعدني عايشه اني قبل بدقيقة شفت الموت بعيني، المح صــيهد جر تفكة طــروادة من وره التلفزون ركض وطرواده ركض وراه.
عيني وراهم ورنه لازمه وجهي بأثنين أديها أسمع صوتها واباوع لوجها ما افهم شنو تحجي هوسه صياح براسي، جرتني الصدرها ورجعت بعدتني تمسح بوجهي وتحجي، شهكت وفتحت عينها على وسعها من سمعت صوت طلقات، جرت ايدها وطلعت تركض.
مــاسه :: مكابلينهم نعاين من باب المطبخ نبجي خايفين صــيهد اخذ جــويريه وطلع، ووهب يدفع بيهم ويصيح
وهـــب ::كالكم صــيهد هوه الاخذ الفلوس مو البت، هيه شافته من اخذهن وردت باكتهن منه حتى تردهن الكم.
وجدي وعمي شاكر متسودنين ماكدرلهم وهـــب اخذوه تدفع للحوش وامي تجر بيه منهم خايفه عليه ركضت لشباج المطبخ اعاينلهم التموا الولد كلهم بلا مايفهمون شصاير واكفين وي وهـــب بوجهه جدي وعمي وابوي ومرتضى،
والمح صــيهد طب للحوش يركض والتفكه بأيده يصيح على جدي وطرواده وراه كضه بسرعة يريد يجرها من ايده وهوه يتلاوه وياه وجدي يصيح
شعلان:: هدووه هدوه فوك ما بايكني يريد يكتلني.
وصيهد متخبل يجرون بالتفكه من ايده وهو بكل حيله مچلب بيها ومايرضى يهدها ووهب كاض جدي وعمي شاكر ويصيح عليهم
وهـــب:: كاافي تكفوا الشر.
صياح ورعب، عيني تفتر بينهم من واحد الواحد، امي كعدت بالگاع مهدود حيلها وتصيح على صــيهد
ام صــيهد :: ولك يمه صــيهد يمه تعال ليه.
وصيهد الشر يتطافر من عيونه ومايسمع احد شما يجرون التفكه منه ينترها بكل قوته مادري شلون فلت من أيدهم وجها على جدي وابوي هستوه يدوس الزناد ودفعوها الولد ثارن الطلقات صرخنه بخوف مغمضين عينه وفززتني صرخت امي من صاحت
ام صــيهد :: يممممه وهـــب يمممممه.
شهكت مخروعه والمح وهـــب متكود بالگاع صرخت وركضت مثل المخبله من بينهم بس اريد اوصله وهمه التموا عليه يتراكضون كابلناه نصرخ واشوفن الگاع انترست دم وصوته يخرش صــيهد لمه الصدره وهو فاتح عينه النه ويهمس بصوت يخرش
وهـــب :: كتلتني خايب.
-صوابك ووووين ها خويه ها حاجيني.
فوك راسه نصرخ متخبلات وهوه جلب بأيد امي يبوس بيها ويحجي
وهـــب :: يمه انا احبنج والله.
وصيهد داخ مايشوف يصيح على الولد بصوت يرجعف
ســليم بسرعة لف الجفيه وخلاها على بطن وهـــب ضغها بقوة والولد من بينه شالوه يغلطون عليه
بريا:: انجب مابيك شي انجب هيه طلقة.
وسلطان جابلهم السيارة ، ما اشوف منّ آلدموع اريد اكض امي ما اكدر اروحن وراهم وارد على امي، طــروادة جر صــيهد وطلعوا بساع بساع صعدوا بالسيارات وراحوا واحنه ضلينه لا احنا للسما ولا الگاع طاحت امي وانه اعاين مابيه اسوي شي اشوفن رنـــه ركضت رشت عليها ماي صحتها وهي ايدها على گلبها وتصيح
-يايمه يا وهـــب يمه.
ابوي كاعد بالحوش صافن بالفراغ وجدي يحجي بخوف
شعلان:: مابيه شي مابيه شي هسه يردون.
ركضت بدور جابت عباية امي وجواريبها من صاح ابوي
“انا رايح وراهم” امي كالتله “أنا وياك اخذني اضلن هنانه اموتن”
لبستها جوارييها ابجي
-يمه اروحن وياج يمه فـــدوه يمه وهـــب هذا.
جلبت بيه واكفه ورنه ركضت للبيت جايبتلي عبايه وجواريب صعدت امي بالسيارة صعدت وياها البس وانه بالسيارة امسح عيوني ويردن يغوشن من الدموع وامي على السانها بس
-يا حاضر الشدات أحضرنه
وابوي ما ادري شنو حاجاها صاحت عليه
ام صــيهد :: يكون وهـــب يموت احرگكم بليله ظلمه بيت شعلان كلكم وروح اهلي ما خليت واحد بيكم يشم الهوه.
غلط عليها يسب باهلها لزمت ايدها ابجي واسكتها محروك گلبها، لمن وصلنه للمستشفى لكينه سليم وبريا بالباب وكفوا تلكونه كالهم ابوي
-ها بويه.
ســليم :: ها عمي اخذوه للعمليات.
يحجون والخوف تارس وجهم بريا الدمعه بعينه، كاضه امي من ايدها ساندتها وهي كل شويه تريد تطيح، مشه ابوي كدامنه واحنه وراه دار وجهه ســليم وهو يكول
ســليم :: شعفتج غطيها طالعه.
جريت الحجاب على كصتي زين، ومشيت سانده امي وهمه ورانه، الولد تارسين الممر وكفوا واجوا علينه من شافونه الا صــيهد كاعد بزاويه لام رجليه الصدره وحاط راسه عليهن ماكام
حتى من امي حاجته.
رفع راسه لمحني خزرني ووكف رغم محد من ولدنه عاينلي اجه بسرعة گاد امي من ايدها كعدها على الكرسي يحجي وي ابوي بتهديد وجراني من أيّدي للزاويه وضل وأكف كدامي.
ابتعدوا الولد من يمنه دنك على امي يبوس ايدها ويحاجيها مختنك
صــيهد :: اموتن يمه اذا وهـــب مات اموتن.
وامي تبجي سكته، مسح وجهه ووكف اتلفت على الولد دايرين وجهم من عدنه اجه يمي ورفع ايده دخل اصابعه بحجاجي يرجع شعري الداخل الحجاب ونزله على كصتي اكثر، لازمه بالعبايه من يم صدري عاين الايدي جراها نزل ردن العبايه عليها متحسر
-المن اجيتي؟
مسحت دموعي وهمست مختنكه
-هذا وهـــب ما اكدر اضلن غاد فـــدوه خلني.
باوع بعيني متحسر هز راسه خوش وضل واكف كدامي طول الثلاث ساعات، لمن طلعوه من العمليات وطمنونه عليه الطلقة بالفراغ جانّ عبالهم ضاره الأمعاء، سجدت امي بالگاع ترجف، لزمها صــيهد وكفها كعدها على الكرسي تتوسل بيه
-بس اشوفنه يمه .
صــيهد :: فـــدوه اروحنلج لا تشلين گـــلبي مايرضون والله، ردي للبيت والباجر الصبح تجين تشوفينه .
بالكوه قنعها وره ما اجه الدكتور يحلفلها وهـــب زين يله رضت نرد للبيت، مشينه وي ابوي ردينه للقريه نزلت آمي ساندتها وصلنه للحوش لكينه جده وبدور ورنه وجويريه كاعدات بالحوش
جده تبجي صاحت على ابوي
-ها ولك وليد راح وهـــب؟
وليد ::لا حجيه طلعوه من العمليات الف الحمدلله.
جرت ايدها امي مني كعدت بباب المطبخ اجتها بــدور تبجي ضمت وجها بصدر امي تشهك، تلفتت اعاين الرنه وجويريه اللي خشمها مورم وعيونها منفخة فوك حاجبها شك يابس الدم عليه، مشيت يمها لزمت ايدها.
-ليش رديتي هنا؟
همست رنـــه بصوت ناصي
رنـــه ::جدج شعلان اجانه يصيح، اللاطش يكلها تعاي ضلمتج باكوني الشاد ظهري بيهم وانتِ التخافين على حلالي، اجيت وياها انه هم خفت عليها.
-نام من نامت عليه حجاره.
نحجي وجويريه بس فاتحه عينها وتنود ساكته، طبوا للبيت مديت ايدي الها اكومها وياي ورنه كالت
رنـــه ::انه رايحه للبيت، جــويريه اذا ما تردين تضلين هناه تعاي وياي.
أبتسمت بخفوت هزت راسها لا وحجت بصوت مخنوك
جــويريه ::خليني هنا، انا عباره عن شر حتى اذا احد راد يساعدني يوصّل للموت.
سكتنه اني ورنه وهي وكفت حانيه ظهرها وكوه تمشي طبت للبيت ورنه لزمتني من ايدي متحسره
رنـــه :: مــاسه ديربالج عليها.
هزيت رأسيّ آي، مشت البيتهم، واهلي طبوا للبيت، طبيت وراهم الغرفة وهـــب اخذت المفتاح وطلعت للمشتمل ماله فتحت الباب وطبيت ادور عليها وماكو فتحت باب الغرفة لمحتها بالنهاية كاعده بالزوايه لامه رجليها الصدرها ووجها احمر عيونها من البجي مورمه وصايرات دم
-ندى.
نزلن دموعها بلا صوت بس شفايفها ترجف تقربت كعدت يمها جريتها من ايدها الصدري شهكت تبجي.
-لا تخافين.
ندى:: سمعت امج سمعت صريخكم من اول ماصار صياح خفت خفتت عليه وماجان خوفي من عبث والله حسسسيت گـــلبي حسني .
-اشش والله زين بالقران زين طلع من العمليات.
رفعت راسها من صدري ترجف تمسح دموعها مختنكه وتحجي بسرعة
ندى:: احلفي احلفي مابيه شي.
-وداعت امي الدكتور كال ثلث ايام ويطلع من المستشفى لان الطلقة صارت بفراغ ما لايحة الأمعاء،الحمدلله
خلت ايدها على گلبها تبجي مديت ايدي لوجها امسح دموعها
-أخوي سبع بحيل الله يرجع احسن من گبل.
هزت راسها اي ان شاءالله، وكفت احجي وياها
-راح اروحن انا، بلكن الصبح هم اجيج.
عفتها وطلعت امي تصلي وتبجي على السجادة عفتها وصعدت فوگ بــدور بفراشها ودموعها على خدها، وجويريه متمدده بس فاتحة عينها الذبلانه وأثار اديهم وحقدهم مطبعهه بوجها.
رحت غسلت ورجعت كعدت يمها مديت ايدي على خدها فرت عينها إلي متحسره همست
جــويريه :: اخوج جا مات من وراي.
-مالج شغل انتِ، لا تكولين هيج.
نگلبت على ظهرها تعاين لعيوني وحجت بصوت يرجف
-مــاسه اني البگت الفلوس مو صــيهد
سديت حلكها بأيدي
-اششش حتى انتِ اقتنعتي صــيهد الاخذهن، اخواني زلم واذا گالوا حجايه همه گدها ويتحملون اليجيهم من وراها، خوش؟
نزلت أيدي من حلكها تحجي
-جدي متحلف بصيهد.
-تدرين صــيهد من زمان هيج، من جنه جهال مره انا كسرت التلفزون واجه صــيهد كتلني بس من ابوي اجه وشافه حمه السجينه حتى يچويني گاله صيهد لا بويه انا الكسرته مو مــاسه وتچوه بمچاني.
ودوم من اسوي شي يكتلني هوه بس يگول الابوي وجدي انا السويت هذا الشي مو ماسه حتى ينكتل بمچاني لان يدري بيهم من يطگون مايرحمون.
ووهب جان حيل وكح يوميه يسويله سالفة وصيهد يكضه يگطعه تگطع وراها يكل الابوي انا السويت هالشي حتى يحمي وهب منهم، ابوي وجدي يگطعونه بالحزام وينطرد من البيت ايام.
يعني ما استغربت لمن اليوم كالهم انا البگت الفلوس هوه هذا طبعه اذا ماگدر يحمي واحد ياخذ التهمه بداله المهم يحميه هذا اخوي .
زفرت نفس بحسرة وغمضت عينها كمت من يمها طلعت من غرفتهن الغرفة وهـــب يا روح اختك سديت الباب وكعدت ابجي كل ما اتذكر عينه من طاح وهيه تفتر بيناتنا وكضته الايد امي .
نمت وانه بغرفته مافزيت الا على صوت امي تدور عليه وجها اصفر وتعبانه
-تعاي بعد امج سوي ريوك الهم خل اروحن الوهب.
كمت بسرعة، بس صليت وركضت للمطبخ وره الريوك راحوا كلهم حتى جدي وجدتي، بس فرغ البيت رحت يم ندى مارضت تاكل وبس تبجي عفتها ورديت للبيت، لمن اجت امي گالت
أم صيهد ::يسلم عليجن وهـــب زين هاليومين يطلعونه ويگول خل مــاسه تدير بالها على اللبالي، شنهي اللباله؟
سكتت مرتبكه
-ما ادري يمه خاف هيج يضحك عليج.
سكتت امي تعبانه عبالك كبرت عشر سنين بطيحة وهـــب
“”””””
وهـــب :: ليش مخلينكم يمي ما يطلعونكم ؟
بريا:: الغسل، فوك ما مكابلينه وكاعدين
ضحكت موجوع
-مابجيتوا علي؟
ســليم:: لا، انتَ مصوب ودمك بطولك وبريا يصيح بس عيش بعد مانسوي بيك مقالب.
ضحكنا اغلط عليهم صاح بريا
بريا:: وعلي جا ســليم ضل ينذر يگول اذبح خروفي العزيز بس يطلع وهـــب بسلامه.
وهـــب :: الله والحسين من زمام مخيل عليه كل ما اشوفنه اتمنى اذبحنه واشوي معلاكه كون من زمان متصوب.
طــروادة :: أنجب اسكت هسه المثلك بس يون انتَ شمالك تلغي من صحيت الهسه؟
وهـــب :: لان ماشايف صــيهد وعلي، وينه ليش مايجي.
مــيثم :: ما يرضى كاعد بره شنسويله نجره؟
وهـــب :: لا شني تجره خروف هوه؟
ضحكوا بريا وسليم بصوت عالي وطرواده يخزر بيهم
طــروادة :: يابه اسكتوا صدك جذب زحمه لا يطردونه هوه داخلين بالشافعات انلصموا.
حجه وطلع الصيهد سكتت عيني للباب ادري بيه شكد مقهور هسه، شويه وطب هوه وطرواده منزل عينه
-جا ليش حارمني من هالوجوه ماتدري بيه بس اشوفنك اطيب.
اجه يمي دنك علي بسته احاجيه وهوه ساكت
-يابعد روحـــي .
وخر وايده على جتفي يسأل
-موجوع؟
هزيت راسي لا
-شفتك وراح الوجع
-انجب.
ضحكت امسح على ايده راحوا الولد من يمنه كعد بصفي كاض ايدي ويحجي صوته رايح
-وهـــب …
-اشش لا تحجي شي، الصار صار والحمدلله عدت على خير نحمد الله ونشكره، مسامحك مساحك لا تعتذر اخي.
حجيتها اضــحك شال ايده طكاني راشدي مبتسم
صــيهد:: طيحتك هدت حيلي.
-والله انا عبالي اليوم كاعد بباب الجنه.
-شيوصلك للجنه ولك شلك بهاي الدروب؟
-ههههه، دوم تكلي ترى أرميك ارتاحيت من حطيتها ببطني؟
ضحك يمسح بوجهه
-راح تضل طول العمر تذكرني بيها ها ؟
-لا لا، بس مرتين باليوم شسالفة هههههه.
ابتسم كاعد يمي اريدن احاجيه اخاف ينسى انا مصوب ويكتلني تحمحت رفع راسه الي يسأل
-ها؟
-صــيهد، انا هيج ما اطيب، اكولن لو تخابر على تلفون امي وتگل الماسه تروح يم مرتي احاجيها واسمع صوتها حتى شوي استعجل وبسرعه اطيب، ها شتگول؟
رفع حاجبه
-لا والله؟
-أي والله، الشاعر يگول::
“مايوچد اليوجعنه طبيب
احنا اليشافينه بس صوت الحبيب.
-وطكات نعالي هم تشافيك ترجعك حصان ها شتكول نجرب؟
درت وجهي منه زعلان واحجي
-صوبني ببطني طبعاً متقصد تصوبني متحلف بيه من زمان.
-اااااااخ يا بويه.
صيحت كاض بطني دار يمي خايف
-هاا شني؟
-اااااااخ يا يمه يا ام صــيهد يمه.
احجي وفاتح تك عين اريدن اشوفنه جان خايف ومن شاف عيوني وكف عدل گال
-وعلي أجيبك براشدي أصحّيك شمالك تسودنت؟
-بداعت نجمة السلف… اوكف اوكف انتَ مو صوبتني ما اسامحك الا تكلي ياهي نجمة السلف.
-اهووووه يا طلابة الماتخلص.
-عمي شني راح ناكلها گول اسمها نمونه هوه اسم.
-تخسى تعارف اسمها وتضل بالطالعه والنازله تصيح بيه اسكت ترى متحملك لان مصوب.
-بداعتها بداعتها زين كلي هيه منين من عدنه من ال شعلان؟
-هاه يعني مو من القريه جا من السلف؟
-شني السالفة منين جا؟
-مالك غرض وانطم سد حلكك لا تذكر هذول بيها.
دار وجهه ضايج سكتت شويه ورجعت اضــحك عليه
وهـــب:: جا اذا مو من عدنا شلون سويتها نجمة سلفنه.
-بكيفي انا ما اشوفن نجمة ترهم السلفنه غيرها، عدك اعتراض.
-اي عدي اريدن مرتي تصير نجمة سلفنه شني هاي مادري يا صايعه تريد تسويها علينه نجمه.
حجيتها اشاقيه خزرني ومد ايده ساد حلكي يسويلي بغضب
-اششش، وهـــب اموتنك اذا تغلط خوش؟ لا تعيدها.
هزيت راسي خوش منها وعرفت اخوي وين واصل، كعد يمي ساكت شويه وخابر امي فاتح السماعه صوتها من تحجي بلهفه
-ها يمه ها صــيهد شلونه اخيك.
-زين يمه يريد يحاجي البنات مــاسه وبدور.
-هسه اصيحهن، وهاي رغد اجت تبجي عليه.
وهـــب :: اطينياها يمه.
شوي وحجت رغد وهي تبجي
-شلونج
-شلونك يابعد عمــري وهـــب خويه.
-عليمن تبجين ولج، زين انا لا تخافين.
-صــيهد مايعوف السلاح لمن واحد منكم يمووت؟
حجتها وهيه تبجي رفعت راسي الصيهد نظراته للفراغ يعاين بقهر
-قدر هذا بعّد أخوج لا تكولين هيج، مــاسه وينها.
-الو وهـــب شلونك؟
-جنت زين سمعت صوتج ورديت نوجعت.
-ههههه شلون صرت، صــيهد شلونه خوما مقهور؟
عاينت الصيهد تحسر ساكت
-يبجي عليّ من الصبح الهسه.
-سوده عليه مات من القهر عليك.
-اكلج خومايمج احد؟
-لا اجيت للمطبخ وحدي.
-شفتي ندى؟
-اي رحتلها امس بالليل والصبح رحت يمها بس تبجي عليك.
-اه صدك؟
-وعلي.
-اكلج دسدي الخط وخل التلفون عدج ضلي شويه يمهن النوب غافليهن روحيلها وخابرينه.
-يا امي ماعدها رصيد بس ترميشه.
صــيهد:: رمشي وانا اخابر
سدت التلفون وضلينه متانينها بالنص ساعة وهيه ماكو
مــاسه:: ضميت تلفون امي بصدري وطلعت من يمهم اتلفت طبيت للمشتمل لكيتها نايمه وفزت بس دغيتها
-وهـــب يريد يحاجيج.
كعدت عدل تمسح بوجها طلعت التلفون رديت خابرت على رقم صــيهد طلع مابيه ولا شويه رصيد وما رمش ضليت متانيه بلكن همه يخابرون نص ساعة وخابر صــيهد فتحت الخط
-الو
عاط
-ثوله صاررلج ساعة.
-مو والله طلع مابيه رصيد.
حجيتها واجاني صوت وهـــب الولهان
-وينها ندى ؟
فتحت السماعه وانطيته الها بس سمعت صوته بجت وخرت على جهه بس اسمعهم وابتسم وحدي گالها
-عبالج متت وضليتي هاه؟
-لاا، بس خفت عليك.
تحجي وتشهك تمسح بدموعها وهو ساكت شويه وگالها
-إمسحي دموعج بطه.ما اعوفنج انا.
مسحت دموعها وتحجي بهمس
-الله عليك هسه انتَ زين؟
-اي والله يجوز هاليومين يطلعوني،عاينــي مــاسه تدير بالها عليج ووصيت صــيهد هم خافن تحتاجين شي كليلهم خوش؟
-اي بس عفيه بسرعة ارجع اخاف من انتَ ما موجود.
حجتها وصوت حسرة وهـــب وصل يمي من گالها
-ارجع ارجع وانا الممنون ارجع والله لو يهدوني هسه اجيج.
-لا لا، ولا تلح على الدكتور خله هوه من يتأكد صرت زين يطلعك.
ضحك كالها خوش وسدّ التلفون مديت ايدها الي اخذته منها ووكفت يم الباب مبتسمه اني كل ظني هي حبيبته الوهب كلتلها
-هلكد تحبينه؟
مسحت عيونها ساكته دنكت ورجعت باوعتلي گالت
-شكراً مــاسه على كلشي.
سكتت وفهمت ما تريد تحجي عفتها وطلعت، يوم مر لا انه ولا جــويريه مداومات، وصيهد ابد ما اجه للبيت بس ولد أعمامي يجون ويرحون بين البيت والحصاد وبين المستشفى .
ريـــمه ::شكد حاولت اصالح سلطان وسليم بس ابد ما اهتموا، يجون من الشغل يبوسون هاجر يحاجونها ويعبرون من يمي جنهم ماشايفيني اعاين الهاجر تأشر وتشرح
“يحبونج بس زعلانين “
هزيت راسي اي اجت هيه حضنتني تبوس بخدود، عفتها ورحت الابوي كاعد بالدوانيه ويعصر برجليه
-ها يابه؟
رفع راسه الي
-ها بويه، ما تسويلي چويه؟
-صار من عيوني، شبيك شو كاض رجليك؟
-مشيت للگيعان وضلن يوجعني.
عفته وطلعت جبتله الچاي وزيت الزيتون امرغ بيه رجليه مداهم الي تلمست رجله والحرك تحسرت بقهر ابوي نص جسمه محروك علمودي غمضت عيني اتذكر گبل من جان عمي شامل عايش، يوم من الايام امي راحت الاهلها اخذت هاجر وسليم وسجاد، وانه مارضيت ردت اضلن حتى بعدين اروحن يم بيت عمي شامل احب اروحن البيتهم وي البنات واحب سوالف عمي شامل.
للعصر مرتضى وسلطان طلعوا وابوي ضل يمي لمن نمت وطلع.
لاگي رنـــه تلعب يم البستان طاكها، وعفراء ما راضيه طالعه تركض محاجيته هم طكاها بخشبه على راسها وخله دمها بطولها.
بوكتها عمي شامل ما موجود طالع للبر يصيد طيور،
لمن طرواده راجع من آلمدرسه لاكي عفراء دمها يسيل
هد على ابوي تعارك وياه ابوي غلط عليه ويصيح عليه من تصير زلمه اوكف كدامي اخواتك اكتلهن واكسرهن محد يفك حلكه
عافه وراح البيت جدي وطرواده عباله البيت فارغ وكلنه وي امي رش نفط على بيتنه وشعله، الهاليوم اتذكر من فزيت على الصريخ وصوت ابوي من يصيح باسمي، الهاليوم مانسيت شلون النار أكلت البيت ، وانه بس فاتحة عيني بصدمه واصرخ.
والمح ابوي طب للبيت باب الغرفة كاب وهو يصيح
-احترك وياج وما اعوفنج ريـــمه بويه.
واحترك نص جسمه وماكدر يوصلني اعاين للنار آكلت اهدومه وهوه ما مهتم يريد يوصل يريد يطلعني،طب طــروادة ببطانيه طفه اهدوم ابوي يصيح عليه اطلع، وابوي ما يرضى، طب طــروادة للغرفه لفاني بالبطانية وطلعني من الغرفه للهول جراني ابوي الحضنه وطلعني من وسط النار بجه على حرك جتفي الي أثره الهاليوم وهو نص جسمه محروك .
لهسه اتذكر شلون عمي شامل كتل طــروادة وهو يحلفلهم ماجان يدري بيه بالبيت، من يومها وانه عندي كل هالكون بجف وابوي بجف بالصح بالخطأ ما افضل بشر عليه ولا اشوفن اغلاطه.
فززتني من ذاكرتي ايده المسحت على راسي وهوه يكول
-ياهو وياج شو ضايجه.
ابتسمت وامرغ برجله
-محد، بويه هم شفت وهـــب ابن عمي وليد شلون صار.
-زين زين، اخوتج گالوا زين.
-روح شوفه انتَ هم عيب من عمي وليد.
هز رأسه خوش وسكت كمت من يمه متجاهله حجي امي
الثاني يوم ولدنه كلهم بالمستشفى وي وهـــب،
وامي تفتر وراي وتسأل شعري الكصته رنـــه وينه وكل شويه اكلها عندي ضامته ومن تكلي جيبيه اعوفها وامشي،
طلعت للحوش ومن بين الخوص اعاين البيت عمي شامل شفت عبود اخذ رنـــه وحسين وزهره للمدرسه، طبيت للبيت كضتني امي من ايدي تصيح
-شعرررج وينه الكصته رنـــه وين ودته؟
-عدي ضامته
الاء:: يا عمه جذابه انه وفرح شفنه رنـــه اخذته بأيدها
ميلاد:: كون صدك ولج ريـــمه كون صدك؟
نترت خازرتهن
-جذذب عدي جبته.
مشيت من يمها وهي تدعّي متخبله وتصيح هسه اريد شعرج جيبيه، سويت ريوك وكعدت وي هاجر اسألها
-الولد هم اجوا؟
هزت راسها لا وتشرح من البارحه راحوا
-هاجر، طــروادة وسجاد وياهم؟
هزت راسها اي، سكتت افكر، غسلت المواعين وطلعت اكنس الحوش لمن كملته وشفت كلمن ملتهيله جريت عبايتي وطلعت بسرعة من حوشنه الحوش بيت عمي شامل
فتحت الباب وطبيت خايفه بس مأمنه محد هناه خليت ايدي على گـــلبي من شفت هاسكي مربوط بسلسلة بس من لمحني وكف يزير عليَّ، عفته وفتت للبيت بسرعة طبيت الغرفة رنـــه ادور على شعري وماكو طلعت من غرفتها الغرفة الولد هستوني اتلفت ادور وانفتح الباب شهكت فاتحه عيني على وسعها وهوه هم عاينلي مصدوم.
رجعت ليوره مرتبكه سد الباب بسرعة مثل الخايف نتر
طــروادة :: شعدج هناه؟؟؟
بلعت ريك مرتبكه واكض بعبايتي
-مالك شغل.
-انتِ شتررردين تخربيني وي الولد شتردين؟؟؟
نترت بصوت عالي
-ما اريدن شييي بس شعري عد رنـــه اريده.
ركض بسرعة سد حلكي بغضب راسي نركع بالحايط خازرني ويصيح
-سلطان بالدوانيه اذا سمع صوتج وفهم غلط احركج وكلام الله احررركج بت ميلاد.
دفعت ايده من وجهي خايفه من سلطان مسحت وجهي، اتلفت بحيره وغضب صاح
-اطلعي بره.
-اررريد شعري.
دار عينه للميز يم احذيته شامر كصيبتي جراها وشمرها على وجهي كضيتها رفع ايده يحذر
طــروادة :: لو اصب عليج نفط واحركج بهالساعة مايرفلي جفن احمدي ربج واشكريه اخوتج صحباني وواكفين بعيني.
أبتسمت بأستهزاء احجي واني داخلي يرجف
-سويتها گبل ما تصعب عليك هسه.
تدري ؟ ما متندمه ولا شويه لان حركت گاعك تستاهل اكثر من هيج، بس احمد الله رنـــه اختك صاحبتي وواكفه بعيني.
ضحك يهز راسه متحلف
-خير ان شاءالله بت ميلاد خير ان شاءالله، اطلعي بره يله نگستي بيتي.
مشيت من يمه بسرعة اريد أفتح الباب فتحه هوه بهتت ورجلي تبندت من لمحت سلطان توه طالع من باب الدوانيه دفعني طــروادة وطلع بسرعة يحجي وياه گاله
سلطان:: وين وليت، ما تسويلنه ريوك خل نروح الوهب.
طــروادة :: لكيت حيه ولك والتهيت بيها.
-بغرفتي بس ماكتلتها شردت بلكن ترد مره ثانية حتى احركها.
-عمي ديربالك منين طبت للغرفه.
-بعد هيه حيه منين ماجان تطب، تعال تعال اكعد وانا اسويلك الريوك.
بس لمحته اخذ سلطان للدوانيه وسد الباب طلعت أركض البيتنا طبيت الغرفة امي شمرت كصيبتي عليها
-هاج وكفي رنـــه من شرج.
-خل اخذه اذبه بالشط حتى يرد شعرج يطول.
عفتها ورحت يم هاجر گـــلبي يدك حيل خايفه من سلطان خاف طــروادة يحجيله..
رنـــه ::رجعنه من المدرسه وبعد ما اروحن مناه الاول امتحان صارت مسلته بس نروح ونرد، گال حسين
حسين:: من نوصل سويلنه مرگه سمج للغده.
زهره :: لااا لحم نليد.
هزيت ايدي اعايلنهم
-اسويلكم خبز وچاي، بس انه وياكم اليوم .
عبود:: جا تموتينهم من الجوع اطبخيلهم شمالج.
غلست منه وصلنه للبيت وراح بدلت وطبيت اصلي وهمه طبوا يمي للغرفه يكلولي
حسين ::يله اكضي صلاه.
زهره :: اطلين اطلين تلساع اطلين تاافي.
ضليت اصلي مغلسه منهم طلعوا من يمي، صليت قضاء مال يومين انجلبت بيهن ومامصليتهن، لمن طلعت للهول لكيتهم يعاينون للتلفزون وغافين احس بروحي نمردت متندمه لان انجلبت عليهم.
مشيت للمطبخ سويت لحسين سمج وحميت لزهره مرگه وبيها فخذ دجاج كعدتهم غسلوا واجوا التمينه على الصينيه
-انه اعتبر هسه امكم، سويتلكم اكل مثل ماتردون.
عفطلي حسين نترت
-حيوان والله ماخليك تاكل تره.
هز ايده ماراضي ومد ايده ياكل آكلت وياهم وكل شويه متعاركين، انه اتناگر وياهم حتى لو همه ساكتين لازم احجي لو اتشرط عليهم، الورا الغدا درستهم كملوا وطلعوا يلعبون بالحوش وآنه ادرس بأول امتحان، للعصرية جعت
كمت خليت شكر بالخبزه ولفيتها اخذت كتابي وطلعت بالحوش عاينتلهم يلعبون وي هاسكي ودجاجاتي يفترن على صفحة فرشتلي بساط وكعدت اقرأ واكل باللفه اجاني حسين يركض
حسين :: شنهاي لفتيش؟
-لفة شكر.
-اطيني عضه
-والله هم اطي.
-شمالج والله اعضن شويه هلكدووت.
خليت اللفه بحلكي اكل سريع واحجي
-ذاك الشكر وروح سويلك ما اطي انه.
بس عضيت لگمه ووخرت اللفه من حلگي خمشها من ايدي وشرد صيحت اغلط وطب طــروادة وعبود
طــروادة :: صوووتج ولج شبييج؟
وكفت بعصبيه احجي متحلفه بحسين
-همشش لفتي من ايدي جنه مجلوب.
غماني عبود وهو يصيح
عبود:: الغسل حتى الغسل، سويلنه عشا جوعانين.
طبوا للبيت وحسين رفع ايده يركص عود يحرك بكلبي ويعض اللفه ويهز رأسه متلذذ بالعضه
-اكضك وعلي الخايس ابو فراش المشرور.
بس سمعني كتله هيج ذب روحه بالگاع يصرخ ويبجي عبالك كارصته حيه اجوا يركضون طــروادة كبل جرني من اذني عباله كاتلته
-والعباااس ما طاكته.
وعبود راح لحسين جراه من اذانه يصيح
عبود:: شبيييك ولك؟
طــروادة :: بيش طكتك بطبر؟
حسين:: تكلي ابو فراش المشرور الوصخه ام الكمل.
ويبجي بصوت عالي عود تره أثرت علي وانه اذني نمردت بأيد طــروادة، عبود طك حسين ويصيح عليه
عبود:: اذا سمعتك تغلط عليها بعد الا اعلكك بالبنكه امشيي.
طب حسين للبيت يرعد ويركع بالبيان طب وراه عبود يريد يكتله وطرواده جر اذاني حيل
طــروادة :: انتِ زعطوطه ؟ حالج حالّ حسين تسودنتي؟
هد اذاني وطكاني على ظهري يغلط
-أنجبي انجبي حالج حال الزعاطيط حاطه دوبج من دوب حسين.
عفته وطبيت للبيت ادردم مشيت للغرفه واحجي احجي واغلط على حسين اجه وراي كاض نعاله
طــروادة :: وولج اسكتي اسكتي.
وعبود اجه هم يحجي بعصبيه
-ترحين فدوووه الزهره.
دنكت ساكته ووجهي مخنزر طلعوا من الغرفه وانه بيني وبين نفسي اصيح ولا اسويلهم عشا مايستاهلون، شويه لمن راحت الرعونه من عدي كمت فتحت باب الغرفة لكيتهم بالهول كاعدين
يسوو بالريموت مال التلفزون مكسور ويلزكون بيه بعصارة الاميري، بس حسين زعلان بغرفة اهلي.
عفتهم وفتت للمطبخ اسويلهم عشا، وافكر بحسين عفت الطباخ ورحتله لكيته دافن روحه بالفراشات
-حسين يله والله بعد ما اكلك ابو فراش المشرور.
-مهموشه علمود لفه مال شكر نهمشتي.
-اسويلك لفه هسه؟
سكتت محتاره شلون اصالحه وهوه يبجي
-وعلي ما اعيدنها لا تبجي فـــدوه شبيك.
عوج حلكه يعيب علي
-جذابه بالحسين يوميه تجين ما اسويها ما أسويها بعد اانننن.
عفته وطلعت رجعت للمطبخ وشفت عبود راح صالحه وجابه اخذتلهم العشا وكعدنه كال طــروادة.
-باجر عفره تجي خابرتني مساع تسلم عليكم.
-تبات؟
-اندري جا اسألها؟
سكتت مكيفه بلكن تبات يمنه، وصدك ثاني يوم من الصبح اجت وطرواده ماجان موحود راحوا يطلعون وهـــب من المستشفى وحسين وزهره يتشكولها مني حسين يكلها
حسين:: يوميه تكتلنه.
-والله جذاب ولا مره طاكتهم اصلاً صرت مثل امهم واشبكهم يله انام.
عــفراء:: زهره كولي الصدك، رنـــه تطككم؟
زهره :: لا ما اططنه، بس كل لحسين ابو فلارش مشلور
وحسين بجه اجه ابود ططه وطلواده ططاها.
عــفراء :: صايره ناس اطط ناس شني السالفه رنـــه.
حركت حلكي مناه ومناه وحسين يعاينلي بشماتة شلون زهره فتنت، غمزتله وأأشرله بحاجبي للساحة، فهمني هوه وهم دك روحه بالگاع ويصيح
-شوفيهااا شوفيهاا هم كالتلي.
رنـــه :: والله ماحاجيه عفره شكد جذاب هذا.
غلط علي وكامتله عفراء شرد للحوش وضل يصيح بكل صوته
-رنـــه بيهااااا كمل رنـــه بيهاااا كمل
تسودنت طلعت وره اركض اريد اكطعه وعفراء هم ركضتله، بسرعة صعد فوك البيت
-انزززل بالعباس الا اموتنك.
وهو يهوس فوك البيت ويصيح بصوت عالي
-رنـــه ام الكمل رنـــه ام الكمل ماكلها الوصخ رنـــه الخايسه رنـــه بيها كمل يا ناااااس
عــفراء:: انزل اليوم اخليهم يموووتونك ولك حسين والله اذا كضيتك انزززل.
خلاني انشال وانركع من القهر متخبله واريد اصعدله وتكضني عــفراء وهو يهوس ويصيح خله الكل يسمّع التفتنا على صوت واحد من بره السياج صاح عليه
مــيثم :: انززززل انزززل اذا اجيك اكطعك، انزززل.
وهو بسرعة نزل متخرذل مايدري شلون ينزل وكفت متحضره اريد اكطعه وكضته عــفراء جرته من اذانه وكل ما اريد اكضه تدفعني وتطكني، ماخلتني اكتله، ضليت متحلفه ليمت ماتروح عفراء اكتلنه.
كامت عفراء تسوي غدا اخذت كتابي ووكفت يمها بالبدايه زعلت مني النوب ضلت تحجي وياي تعلمني سألتها
-زينين عيالج؟
-عمتي وعمي حيل زينين وياي، بس اخواته المتزوجات من يجن عبالك كارهاتني، وعادي ما اهتم والله، اكولن يوم يومين ويرحن.
-جا منذر ما يحاجيهن.
-لااا يمه جا ما اسولفله انه النوب يكره اخواته.
-خل يكرهن ليش معادياتج وانتِ ما مسويتلهن شي
-لا حرام عليَّ اخرب بينهن وبين اخوهن، احنه هم عدنه اخوه وباجر عكبه يتزوجون شنسوي نلكه.
سكتت وهيه تفتر بالمطبخ تطبخ وتنظف شوي وكتلها وانه اغمز
-منذر يحبج؟
ضحكت وطكتني على ايدي
-من زمان من جنّت اكتلنه، ومن عرست رغد عباله انه يكول بيوم عرسها انا مكابل بيت عيالها وادخن كضيتلي باكيتين جكاير والاغاني الحزينه وعايش الجو.
-هههههههه شكد فاهي.
-اكو ناس ماجانت رايدتني اله همه كايليه تزوجت المسكين ضال كاض الشارع يم عيال رغد يفتر هههههه
وانه ناصبه عليه كل ما يحجي وكتله اسكت العاشك الحزين.
-تذكرررت من شافج بالبستان فتح عينه عبالك شايف وحش.
-خاب غير اثر فشختج الهسه براسه يگول وعلي اكره رنـــه فد نوب لان فشختني بحجاره.
راحت ضحكتي متخوصره
-وانتِ ساكتتله ؟
ضلت تضحك وانه احجي عليه محروك گـــلبي منه، كبل الغدا بشويه اجوا جايبين وهـــب يدكون هورنات مثل الزفه مكيفين بيه ردت بس اشوفنهم من طبوا البيت جدي ماكدرت.
مــاسه ::من الصبح نركض نرتب ونسوي غدا مكيفين اليوم يطلع وهـــب، رحت الندى اخذلها ريوك وهم لكيتها من الصبح كاعده متانيه جيته.
رجعت للبيت اروحن مناه واجي مناه، جــويريه ماتكدر تحرك جسمها كله يوجعها ضلت فوك وبدور بارده تفت گـــلبي يله تكمل الشغلة، كبل الغدا يله اجوا ركضت اعاين من شباج المطبخ نزلوه صــيهد وطرواده الحد باب الحوش طــروادة عافهم وراح، سنده بمجانه ســلطان.
وسليم واكف بالحوش كاض خروف من الصبح جان رابطه بحوشنه وجراه يم رجل وهـــب ذبحه، طلع جدي شبك وهـــب وهوه يكله
شعلان:: يابعد روحـــي ياجدي تحميني بروحك بويه تحميني بروحك .
وهـــب :: ههههه هم صح اي اي .
وصيهد يخزر بيه وامي تطش عليه جكليت مشوه يردون يطببونه للهول، ركضت الباب المطبخ الداخلي اعاين، امي صاحت على رغد
-بطانيه يمه بطانيه جيبي هناه يمنه يتمدد.
نزلوه على الفراش، امي تبوس بيه والولد يضحكون عليه لان يكلها
-بعد يمه هناه بهذا الخد.
دنك سلطان شال دولكة الماي من الگاع وصب ماي بالكلاص يريد يشرب، طلعت رغد من غرفة وهـــب تركض وبأيدها بطانيه ما منتبهه للولد تمشي وتحجي وي امي فزت والتفتت من طاحت الدولكه من ايد سلطان ودنك بسرعة متخرذل يلم بالكزاز وامي تصيح عليه
-انكسر الشر انكسر الشر عوفه يمه لا تتعور ايدك.
وهو بس مدنك ويلم بالكزازا ورغد واكفه مثل الصنم والبطانيه بأيدها كل هذا ما لفت نظري الحد ما لمحت عيون صــيهد شلون تعاين الرغد يله دك گـــلبي بخوف عاكد حاجبه ويتلفت بينه ويين سلطان، جر البطانيه من ايدها غطه وهـــب وأشرلها روحـــي اجت للمطبخ بسرعة عركانه وعيونه متروسه دموع. صــيهد نتر على سلطان
صــيهد:: كاااافي كالولك عوفه كوم .
وكفّ سلطان الكزاز بأيده ومن شاف نظرات صــيهد اله شلون خازره گاله
-ماكسرت كلبك ترى دولكه.
حجاها وطلع من البيت، راح صــيهد يم الولد يكصبون الخروف بالحوش، واحنه نحضّر بالغدا وهوسه الحد العصر وهـــب دك رجل
وهـــب :: صــيهد ودني هناك
ام صــيهد:: يمه غير تضل يمي عيني عليك.
وهـــب :: يمه والله غاد ارتاحن .
سكتت امي محتاره وصيهد اشرلي بسرعة روحـــي، طلعت ركض للمشتمل
-أختلي بالغرفة راح يجيبون وهـــب هناه.
ركضت للغرفه وانه اخذت فراش مديته أله بالهول، جابوه صــيهد وامي وابوي وياهم، امي شافتني فارشتله بالهول كالت
-غاد مــاسه افرشيله بالغرفه.
بلعت ريك ساكته اعاين الصيهد ووهب راساً كالها
-لا يمه هناه هناه ارتاحن ما اريدن الغرفه.
نزلوه للفراش غمض عينه موجوع وايده على بطنه وامي حايره بيه خايفه باس ايدها كالها
-مابيه شي هسه انامن شويه لليل اصحى.
وصيهد يعاينله ماعاجبه ولا راضي على جيته هناه بس ساكت گالهم
صــيهد :: يله امشونه خل ينام، انا كلساعه اجيه.
وامي ما ترضى تعوفه وهـــب كبل سوه روحه يشخر گالت امي
-سوده عليه من الوجع يشوخر.
ام صــيهد:: من الجذب، تعاي يمه خليه يرتاح وهـــب الا يضل وحده يله يطيب انا اعارفنه.
دنكت امي باست راسه ماكدر وخر الغطا من وجهه باس ايدها
وهـــب :: يا بعد روحـــي يمه، روحـــي ارتاحي لليل تعاي يمي.
-يله يمه نام نام.
وكامت طلعنه من يمه انه مبتسمه الصيهد عود يعني اني شريكه وياكم بالجريمه وأعرّف السالفة كبل نتر
-شبيج؟
-مابيه شي.
-أمشي يله.
دنكت ومشيت بسرعة طبيت للمطبخ.
لليل ابوي وجدي يتعاركون لان جدي يريد يطرد صــيهد من القريه وابوي ما يرضى صاحت امي
-امشي مــاسه صيحيلي صــيهد.
لبست عبايتها وطلعت ركض المشتمل طبيت باب الهول مفتوح فتحت عيني على وسعها مصدومه واني اشوف….
رابط مباشر للحصول على أرقام جلوس الصف التاسع 2025 اليمن عبر موقع YemenExam الرسمي
هاتف Honor 2025: إمكانيات خارقة وسعر مذهل مع شاشة رائعة وبطارية جبارة!
دليل شامل للإبلاغ عن الجرائم المهددة لأمن المجتمع في السعودية لكل مواطن ومقيم
تحويل الصور إلى نمط Studio Ghibli بالذكاء الاصطناعي مجانا: أفضل الأدوات ورابط مباشر لتجربتها
وفاة صانع المحتوى اليمني نزيه سوار في حادث مأساوي بشاطئ الحديدة عام 2025
حالة الطقس اليوم الأربعاء 2-4-2025: ارتفاع الحرارة ورياح نشطة تضرب هذه المناطق
كيفية تسجيل التلاميذ الجدد بالسنة الأولى ابتدائي في المغرب 2025-2026 عبر منصة مسار
وفاة اليوتيوبر اليمني نزيه سوار غرقًا في الحديدة.. تفاصيل الحادث ومطالب بتأمين الشواطئ اليمنية
