يا شبابيچي تهدن
هي غيمة وعابره شبيچن ترجفن ؟
══━━━━✥◈✥━━━━══
رنـــه :: فاتحه عينيّ بصدمة والخنجر على رگبتي بنفس اللحظة حسيته جرحني ضليت بس اشهك ميته خوف، وايده لازمتني من زندي بقوووة وصوته بغضب يهمس
-أشششش
جرراني للگاع يكعدني وانه احس اذا تنفست الخنجر يذبحني بس اشهك وفاتحة عيني على وسعها واحاول ابعد ركبتي عن الخنجر، من كعدني على حيلي عاف ايدي ولزم رأسي بقوة بجيت اشهك من حسيت زاد وجع الخنجر على رگبتي
من بين اسنانه نطق بغضب كلمة كلمة
بريا :: تغلطين بعد؟
دموعي على خدي وعيني مركزه بعينه روحـــي حسيتها طلعت وجسمي كله يرجف مصدومة اريد اصرخ واخاف من يطلع صوتي انذبح شفت آلموت بعيني، عيوني من الدموع غوشت وروحي فرفحت ضغي على راسي اكثر ينطق بغضببب
-تغلطيييين بعد؟
بصوت يرجف من بين شهكاتي همست
-لا
-تكليلي ابن الروسيه؟
بجيت بصوت اشهك ورفعت اديه اثنينهم الزم بأيده اللازم بيه الخنجر على ركبتي واحجي بصوت يرجف
-وخرره، بريااا.
وهو يقوي لزمته الراسي ويهزني بغضب ينتر
-ياهوه الانخطف وانجلب حيوانه؟ ياهو ابن الروسيه؟
بجيت بخبال من احس حرورة دم نزلت على رگبتي بعد الخنجر شويه عني واني لازمه ايده بقوة احاول ادفعها هي والخنجر من رگبتي عكد حاجبه يعاين الرگبتي ودموعي وخر ايده من وره راسي حطاها فوك جرح رگبتي وحجه بصوت يرجف
بريا:: لا تغلطين عليَّ بعد رنـــه، فهمتي؟
اتنفست بقوة وخرت ايدي امسح دموعي ارجف واهز راسي ااي ااي
-ما اعيدها بس عوفني.
مسح الدم من رگبتي بأيده وابتعد وكف كدامي اتلفت للشرك ومشه للسياج وخر الخشبه وعبر طلع واني لامه روحـــي وابجي بخبال اريد اكدر اكوم على رجليه ماكو ارجف كلي متخبله وألزم برگبتي .
وكفت مستنده على السياج بأيد والثانية مخليتها على رگبتي وعيوني من البجي مغوشة من كد ما رجليَّه يرجفن خطوة مشيت وعثرت طحت على وجهي، زاد بچيي اشهك وايدي حسيتها طاحت على طين جريتها اريد اكعد والمح شي بصفها كعدت على حيلي وقربت ايدي لعيوني المغوشات من الدمع واشوف ايدي غرگانه بالدم فتحت عيني بشهكه ودرت بخوف بصفي جريته الزمه بأثنين اديه بس خليته كدام عيني وشفته راس الطلي صرخت بكل صوتي
بجيت اصررررخ ولازمته بأثنين اديه فاقده واخوتي إجو يركضون
جراني طــروادة من اجتافي وكفني وعبود يضوي على وجهي متسودنين شمره طــروادة من ايدي وجراني الصدرة فاقدة اصرخ واريد ادور راسي عليه وهو كاضني بقوة
طرواده :: اشش اششش رنـــه رنـــه يا بعد روحي عاينــي علي عاينــي
كض وجهي بين اديه بس يريدني اعاين عليه وانه اصرخ وادور بعيوني على الشرك، روحـــي فرفحت جروني للبيت اثنينهم كاضيني صوت الولد بالباب اسمعه يصيحون على طــروادة وهوه ما مهتم لامني الصدره طببني للهول كعد وجراني الحضنه وعبود صاح عليه
عبود :: هدها هدها شني هذا الدم البرگبتج.
وخرني طــروادة عاين الرگبتي متسودن عبود ركض يجيب كطن وطرواده يحاچيني وانه فاقده ابچي واصرخ سد حلگي بأيده عيونه دم
طــروادة :: رنـــه حاچيني رررنه
وخر ايده من حلكي وعبود مسح الجرح بگطن وتعقيم لم وجهي بأثنين اديه ومسح عيوني باصابعه
طــروادة :: أحجي؟
حجيت من بين دموعي بصوتي اليرجف
-بريااا برياا.
ابجي واحجيله وايدي على رگبتي أأشرله شلون خله الخنجر على رگبتي واختنكت من كتله
-كل ما احبب شي يحرمووني منه.
مسح وجهي وعبود جرني الصدره كام طــروادة جر التفكة من وره التلفزون وهوه يگول
-انعل ابو هيّج خوه اليبچيچ ما اريد خوته.
غمضت عيني گـــلبي ممرود ودموعي ينزلن جمر على خدي زهره وحسين ملتمين علي وعبود لامني الصدره، اسمع صوت الولد يم باب الحوش يردون يكضون طــروادة وهوه يصيح بغضب.
“”””
وهـــب :: كاضينه بباب حوشهم بس نريد يحاجينه وهوه شايل سلاحة ويدفع بينه جنه مسودن والشر تارس وجهه خازرنه. يدفعنه بغضب بإيد وحده والثانية كاض بيها التفكه وينتر
-وخررر مالكم شغل وخررر.
وركض من بينه على بيت عمي خليل ركضنه وراه محد فاهم شي كضاه صــيهد يصيح عليه
صــيهد ::شبيييك تسودنت شبييييك؟
طــروادة ::وخرررر عني، تعاااال اطلع چلب اطلللع برياااا.
كلنه واكفين بوجهه نريد بس نكضه اجه مــيثم يركض مايدري شني الفلم كلها تصيح شكو، وخربت من اجوا جدي وابوي وعمي، جراه صــيهد من رگبته بغضب كاضه يصيح
صــيهد:: حاجيني ولك احجي شصااير ؟
وطرواده صاير نار بس يريد يفلت من ايدنه ويطب البريا دفع صــيهد وميثم بحيله يصيح
طــروادة ::يطب بيتي ؟ انااااا يطب بيتي ويحط خنجرة على رگبة اختي والله احط خنجرك بگلبك اطلللللع برياااا اطلع اذا انتَ زلمه اااطلع.
وهـــب :: چلبت بالتفكه بس اريد اجرها منه انا وسلطان ما يهدها چلب بيها كل حيله ، وميثم يكض بوجهه بس يريد يحاجيه
مــيثم :: اسمعني بس اسمعني احاجيك، مريض والعباس مريض طــروادة ولك حاجيني شمالك تسوددنتتت؟
كلها تصيح وتغلط ناس تجرّ بناس طلع بريا واكف بالباب ورانه يحجي بهدوء يگله
بريا:: حاسبني انا استاهل.
مشيت عليه اجره اريد اخذه للبيت وهمه كاضين طــروادة الصاير بارود يابه اذا نهده ياكل بريا بسنونه گد ما محروك گلبه
صاح جدي
شعلان :: ولك تريد تطك بريا علمود هالزعطوطه
دار عليه طــروادة متسودن خازرة ينفض غضب
طــروادة :: اطكه واكسررر راسه وانعل ساس اهله هالخايسس.
وليد:: مستهتر انت محد واكف بعينك اخوتك هذول تعاديهم علمود رنـــه ؟
طــروادة:: اعاددديهم اعاديهم وادوس على خوتهم هيج خوه ما اريدددها
بريا ::انا غلط تعال طكني.
وهـــب ::درنه عليه انا وصيهد نريد نطببه للبيت وصيهد اعصاب دفع بريا حيل وهذا شاخط شال ايده طك صــيهد بوكسي على وجهه وهوه تسودن، جا غير كون ينكض مناه طــروادة ومناه صــيهد جابونه تدفع بس يردون يكضون بريا وانا وميثم وسليم وسلطان وابوي وعمي واكفين بوجهم
سلطان جر صــيهد يغلط عليه
سلطان:: ولك تسودنتتت اطي مجال
صــيهد :: انعل اهل اهلك ابن الخايس تطكنييي اسمط جد جدددك اليوم.
وليد:: انجب انجب سد حلكك.
مــيثم :: طــروادة جاي اكلك الخاطري الخاطري انا مالي خاطر يمك بالحسين بريا تعبان اعذره فـــدوه اروحلك اعذره.
كاض طــروادة بس يريده يسكت وهذا الف شيطان براسه رنـــه يا رنـــه وبريا واكف بمچانه متاني عقوبته صاح جدي على مــيثم
شعلان:: الاغم تتوسل بيه عليمن، ولك طــروادة مو اخذها مره البريا اخليه يدك عليها ليل ونهار سد حلكك وولي مناه اغممم.
طفر طــروادة متسودن كضاه صــيهد وهوه يصيح
طــروادة :: تحلم وروح ابووووي تحلم مايلوح الگااع التمشي عليهاااا.
شعلان:: انجب خايس تعاندددني؟ اريدن اشوف زلمه ياخذها هذا بريا من هاليوم ناهي على رنـــه ياهو اليگربلها بعد.
جا جيب اليسكت طــروادة بعد عفنه بريا وكلنه التمينه كاضينه وهوه يسب وينعل بشعلان صاح بريا
بريا :: طــروادة لا انهي عليها ولا شي مالك شغل بشعلان يحجي وحده.
داروا على بريا يغلطون عليه جدي وعمي شاكر وابوي جرينه طــروادة نريد ناخذه البيته گاله
طــروادة :: اسمعني اسمعني اگطعها واذبها للچلاب ولا أزوجها بيوم الواحد شايل اسمك سمعتنييي شعلان سمعتننني والله، وروح ابووووي اخلي چيله بكصته اليفك حلكه ويفكر ينهي على رنـــه.
صــيهد :: خرررب خرب اهل اهلك تحرررك، خرب اهلك امشي
جراه حيل واحنه وياه بس ســليم ضل وي بريا، مــيثم كاض طــروادة ويتعذر منه
مــيثم :: والله انا انا اعتذر من رنـــه انا اجيبلها عشر طليان مو واحد.
نحجي وي طــروادة ونجر بيه للبيت جنه مسودن كاضينه من كل مچان ونسحل بيه هوه وتفكته يحجي بحرگه
طــروادة:: ولك معادينها معادينها الله اكبر تردون تسودنونهاا ولكم جاهل جاهل هيه هذا يذبح دجاجاتها هذا يذبح طليها ويحط خنجره على رگبتها لنعل ابوكم لا ابو كل شريف بيكم.
صــيهد:: لا تخبطط انچب.
-يكض رنـــه ؟؟ برياااا يمد ايده على رنـــه اكتله مــيثم وروح ابوي اكتله لا تكلي الخاطري، الخايس يكون يروح فـــدوه للتراب التدوس عليه هيه.
وهـــب :: طببناه للحوش تدفع دار علينه حط ايده بصدري وصدر صيهد دفعنه على الباب بقوة متسودن ويصيح
طــروادة:: اطلعووووا اطلعوا بره ما اريدنكم ولا اريدن خوتكم، اطلعووووا
وكفنه مصدومين بيه نتر صــيهد
صــيهد::شو ضليت تخبط انتَ؟
طــروادة:: انتَ اخررر واحد تفك حلگك، اطلععع يله ما اريدن اشوف وأحدّ بيكم، خياااس چلاااب.
سلطان::شنّي السالفة طــروادة ياهي مالتنه احنه صلي على محمد
وهـــب ::اطلعوا انا اضلن يمه
حجيت وتقدمت يم طــروادة اريد اكضه دفعني عليهم يصيح بخبال
-امشي وليي، بيكم خير انتم؟ كلكم مسممكم دم شعلان .
دفعنه كلنه لباب الحوش وميثم بس يريد يحاجيه
مــيثم ::طــروادة انا اعتذر والله انا اعتذر وينها رنـــه أعتذر منها
صــيهد :: راح اطكك على حلگك لا تدفعني شو تسودنت انتَ فد نوب؟
طــروادة:: اششش اشش سد حلگك ، ياهو الاجه وحرك گلبها ياهو الاجه وراد يطكها تايهتلللكم؟؟؟
وكلام الله غير افصم ظهوركم فصم، مــيثم شاربي مو علي اذا بيوم خليت بريا يوصل طرف من ثوب رنـــه خاف شعلان يضحك عليه ويجي ينهي عليها وروح الحسين اكتلنه لا عباالك خاطرك يوكف بعيني.
دفعنه بره الحوش وركع الباب بوجهنه يغلط ويسب واحنه واحد يعاين بوجهه الثاني صــيهد غلط عليه وراح معصب شلون حاجاه هيج وطرده گال مــيثم
مــيثم :: بريا مريض يابه مرريض ماجاي يتحمل حجايه ورنه تغلط.
سلطان :: من تغلط خل يجي يگول الاخوها شني يحط خنجر على رگبتها على يا اساس يطب للحوش بالختله ويكض البت معورها شاك رگبتها يگول طــروادة.
مــيثم :: هسه لو مخلينه شايفينها نأخذها للمستشفى اصيح عليه ؟
وهـــب :: لا لو متعوره هواي جا اخذها هوه، راح اروحن البريا انا.
حجيتها ودرت على صوت بريا وسليم وصل يمنه يحجي بلا تركيز
بريا :: اريد احاجي طــروادة انا غلطتت وياه اريد اعتذر منه
كضاه مــيثم يحاجيه
مــيثم :: امشينا للبيت مو هسه تحاجيه بعدين برياا
هز راسه لا
بريا :: زعل مني، تندمت انا والله تندمت ما ادري ليش هيج سويت خلني اعتذر منه بس اووكف خلني اعتذر منه ونرد للبيت.
وهـــب :: هسه هوه طردنه كلنه حتى صــيهد لان محروگ گلبه خله لمن من تبرد اعصابه نجي وتعتذر منه هاه شتكول؟
سكت وكلبي لچمني من تصرفاته اخذناه البيتهم بس وصلنه طب الغرفته وسد الباب وميثم ميت من القهر فشلان من طــروادة ومقهور على بريا.
“”””””
ريـــمه ::الوب وگلبي متگطع من سمعت ابوي يسولف الامي ويكلها
شاكر:: كاص رگبتها رايد يذبحها.
ميلاد :: شوف شمسويتله هالچلبه.
عفت امي وچلبت بأبوي
– يابه فـــدوه اروحنلك ودني على رنـــه خل اشوفنها .
نترت امي تجر بيه
– انچبي وسدي حلگج وين موليه شعليج بيها عساها بالذبح ياهي مالتج.
شاكر:: خيولون بويه مالنه شغل بيهم .
بجيت بقهر صاحبتي هاي شني المالنه شغل بيهم مشيت من يمهم روحـــي طالعه واشوفن سلطان طب للمطبخ مسحت عيوني ورحتله
-سلطان.
دار علي وانه أمسح بعيوني
-شلونها رنـــه ؟
-والله ما ادري طــروادة تسودن طردنه حتى ماندري البت زينه مو زينه.
كضيت ايده مختنگه
-فـــدوه ودني عليها گـــلبي يمها.
يعاينلي ساكت واجت امي وراي تغلط وتصيح
ميلاد:: ماترحين انه كلت ما ترحين شني بعد تحاچين سلطان عود تكسرين حچااايتي؟
هيه تحجي وانه حتى ما التفتت واعاينلها، مركزه بعيون سلطان گال
سلطان :: تعاي يله بساع.
ركضت اجيب عبايتي واسمع الاء تصيح عليه
الاء:: كون انا گايلتلك اريدن لهلي جا گلبت وجهك.
طبيت للغرفه هاجر كاعده تصلي لبست عبايتي أشرتلي بأيدها على كيفج، ضليت واكفه متانيه تخلص صلاتها لمن خلصت وأشرتلي بأصابعها اثنينهن حركة مشي سريعه
( مستعجله وين رايحه )
– اشوفن رنـــه واجي ما ابطي.
هزت راسها خوش نزلت اركض لكيت امي تتعارك وي سلطان وهوه كاعد بهدوء يعاين بتليفونه امي ومرته يحجن ومايرد عليهن لمن وصلتله رفع راسه من التليفون گال يله، طلعت وياه وامي تسب وتدعي.
مشينه البيت عمي شامل دك الباب سلطان حجه شكد بس يريدهم يفتحون الباب ماكو لمن اجه حسين يحجي بصوت ناصي گاله
حسين:: طــروادة ما يرضى نفتح الباب زعلان عليكم.
سلطان:: حسين كله بنات اعمامي وي سلطان اجن الرنه.
راح حسين وشويه ونسمع خطوات واحد چبير انه وره ظهر سلطان واكفه، انفتح باب الحوش رفعت راسي اشوفنه گاله سلطان
سلطان :: شني السالفة خويه؟ هيج هيه، ولك مو چانوا اهلنه يتمالخون واحنه واحد يضحك وي الثاني ما يوم غيضنه طول هسه كايم تسد بابك بوجهنه؟
سكت طــروادة يهز راسه اي وخر سلطان على صفحة وهوه يگلي
-طبي جوه شويه واجي عليج.
فتح عينه طــروادة ما راضي بس وخر من الباب ساكت طبيت للهول ركضت زهره تحضني بستها اسأل
-وين رنـــه؟
مشيت للغرفة گـــلبي سابقني فتحت الباب لكيتها متمدده دموعها على خدها وعبود كاعد يمها يمسح على شعرها ويحجي وياها لمن شافني وكف مبتعد طلع، طبيت بخوف
– رنـــه .
حجيتها ومشيت يمها بجت مغطيه وجها كعدت يمها شالت راسها من المخده الحضني لميتها الي ارجف
-رنـــه عمــري.
بجت تشهك وتهمس بصوت مخنوك
-قهروني ريـــمه قهررروني، يوميه حاركين گـــلبي على شي .
-اسم الله على گلبج، ولج المهم انتِ سالمه يا طلي يا دنيا كلهن يولن.
حجيت امسح بدموعها حركت راسها لا، ودمعتها ما نشفت گـــلبي ممرود عليها ضلت على رجلي متمدده امسح على شعرها هادئة، حسين وزهره كلساع يجون يعاينون من الباب ويطلعون.
شويه وحركت رجلي احاجيه
-رنـــه حسين وزهره متعشين؟ كلساع يجون للغرفة خاف جوعانين؟
همست بصوت ناصي
-معشيتهم.
-وانتِ؟
مسحت دموعها هزت راسها لا
-كلشي ما اريد انه.
رجعت راسها للمخده اعاين الرگبتها مضمدين الجرح مسحت دموعها غمضت عينها
– رناوي اسويلج شويه شوربه؟ ها شگلتي؟
رفعت عينها تعاينلي لزمت ايدي ساكته شويه وغمضت عيونها كمت من يمها احاجيها
– مو تنامين بساع اسويلج شوربه واجي.
سكتت مغمضه مشيت من يمها فتحت باب الغرفة على كيف اعاين للهول ياهو كاعد شفت بس حسين وزهره، طلعت للمطبخ واجت وراي زهره تسولف وأرد عليها گالت
-اتوين تولبه؟
درت عليها احاجيها
-لا زهره لا تحجين هيج
ضحكت بطفوليه وخجل وهي تگول
زهره :: ماعالف.
-لا، تعارفين بله گولي تسوين.
-تسوين.
-عفيييه، شووربه.
-تولبه.
-شووربه
-توولبه.
-شش
-شش
-شو
-شو
-شوربه
-شوربه
-عفييييه
ضحكت هيه مكيفه وراحت لحسين تركض وكفت يم الطباخ اسوي الشوربه ومن اصير يم شباج المطبخ اسمع صوت سلطان وطرواده كاعدين بالحوش يحجون گاله سلطان
سلطان:: داخل بصدمة ولك هوه صــيهد طگه
طــروادة :: على روحه داخل بصدمة جا يذبح اختي؟
-ميخالف زحمه من مــيثم وعلي لو تشوف حاله حاير بينك وبين بريا المايدري شيسويله ويتعدل وهم تدري ولا واحد منعدنا يحمل زعلك، صــيهد ما مسوي شي وانتَ حطيته بالنص.
-لا يا مامسوي شي هوه البداها، شتحب رنـــه يقهرونها بيه ليشش؟ صــيهد ذَبح دجاتها وشمرهن بالحوش وبيومها تسودنت وبجت لمن ملت، وهذا الخايس ابن النعال فوگ ما ذابح طليها يحط الخنجر على رگبتها شلون كالتله أبن الروسيه انعل ابوك لا ابو الروسيه.
-مو هيه الله يسلمها هم تغلط مو مثل عفراء عليك الحسين تذكر بيوم واحد من عدنه حاجه عفراء ؟ احنه نستحي ونخجل من أخلاقها، رنـــه شويه وكحه وتغلط ما تحترم، والولد هم مسودنين.
-من تغلط يجون يگلولي انا احاسبها مو همه.
سكت سلطان محتار وانه اسوي بالشوربه واسمعلهم شويه وگاله
سلطان :: اروحن انا وخل عبود حسين اي واحد يرد ريـــمه للبيت.
ضل ساكت طــروادة لمن راح سلطان درت وجهي للطباخ مرتبكه اخوط بالشوربه سمعت باب الهول انفتح وزهره تحجي وياه بلعت ريك بخوف من انفتح باب المطبخ درت عيني اله يعاين بغضب دار عينه للطباخ همست
سكت وطلع زفرت نفس براحه متوتره غسلت اديه وضليت واكفه يم الجدر رجع طب للمطبخ بأيده تفاحة وبرتقاله، وكفت على صفحة مرتبكه اجه يم السنك غسلهن واخذ صحن هم غسله وكف يكصصهن بلا ما يعاين عليَّ حجّه ببرود عبالك مو وياي كلمة كلمة
طــروادة :: اليحرگ گـــلبي مره احرگ گلبه العمر كله.
بلعت ريك خايفه اعاين عليه كمل تكصيص عاف السجينة شال الصحن ورفع راسه عاين الوجهي أبتسم ببرود وطلع من المطبخ
حچاياته هزن گـــلبي هز مسحت وجهي بس اريد انساهن
حضرتلي صحن اصب بيه شوربه خليته بصينية وطلعت شفت الصحن الاخذه منطيه الزهره وحسين ياكلون ويعاينون للتلفزون، مشيت لغرفة رنـــه فتحت الباب الصينيه بأيدي لكيتها كاعده وطرواده كاعد كدامها يحجي وياها وهيه منزله راسها وبس دموعها تصب، كام وكف من طبيت انه، صرت على صفحة وهوه طلع.
كعدت يم رنـــه وكلتها شويه كوه اكلت عفت الصينيه على صفحة وحجيت وياها
-رنـــه عليج العباس كافي تقهرين بروحج، عيــونج راحن من البجي عليمن؟
مدنكه عينها تهز راسها لا ودموعها ينزلن وحده وره الثانيه كعدت بصفها جريتها الصدري ساكتات اثنينا يمكن ساعه مرّت همست صوتها رايح
-تصاحبنه ريـــمه؟
-انا مازعلانه منج بس انتم بيت عمو شامل تتزعلون ههههه.
ابتسمت ابتعدت من صدري مسحت وجها بأيدي
-رنـــه اروحن؟ بس عليج الله لا تبجين بعد.
هزت راسها اي،كمت اخذت الصينية وهيه كامت وياي تريد تغسل طلعنه من الغرفة بس طــروادة بالهول عاين گبل الرنه گالتله
-حسين وزهره وين؟
-ناموا، شلون صرتي؟
ريـــمه :: مشيت للمطبخ وهيه تحجي وياه بهدوء تعبانه صوتها من البجي كوه يطلع غسلت الصحن والصينية رنـــه واكفتلي يم الباب كملت ودرت عليها كضيت اديها
-يله رنـــه رايحه انه ديربالج على روحج.
هزت راسها اي
رنـــه :: شكراً لان اجيتي.
ابتسمت امسح على ايدها
-شعدي غيرج وما اجي؟
مشينه انه وياها للحوش كتلها
-وين عبود خل يوديني؟
وتلفتت بخوف خاف يجيني هاسكي
-اظن عبود مو هناه
-يا جا اخافن من هاسكي انه خاف يجيني.
-مو هناه هاسكي، مصاحب ورايح وره صاحبته، روحـــي لا تخافين.
ضحكت وهيهز مبتسمه كوه على روحها وتحلف
-والله مصاحب يركض وراها عايفنه.
-عوفيه چلب يريد يعيش حياته يتزوج يخلفله چلب چلبين يدارونه بكبرته.
-هههه.
مشيت اريد اطلع وصلت يم باب الحوش واجه طــروادة طلع كدامي وهوه يگول
طــروادة :: امشي.
مشه كدامي وانه ضاله واكفه بباب الحوش دار عليَّ ساكت دنكت مچلبه بالعبايه كل حيلي مشيت وراه مدنكه وظلمة على ساعة اعثر بشي، نمشي بصف السياج مدنكه حيل وامشي وراه بلا ما أرفع راسي
شهكت ورفعت راسي خايفه من سمعت صوت هاسكي اجاه
-يممه.
ومشيت بسرعة بصفة وهاسكي اجاه يركض هوه يريد يشم طــروادة وانه عبالي يريد يعضني چلبت بظهر طــروادة بالقميص وفريته فر خايفه ارجف واحجي وهوه يكله
-ها ابو الچلبات عايفني اليوم هسه يله تذكرتني.
هوه يحجي وياه وانه اصيح
-عضاااني عضاني.
-مو يمج مو يمج.
يصيح يريد يفلت روحه مني وهاسكي يريد يفتر داير ماداير طــروادة يشم برجليه وانه مجلبه بظهره وافتر كل ما هاسكي يجي من صفحة اشرد من صفحة
-هدديني ما يعضج هديني.
-يمه اجاااني اجااني.
-هاسكي هاااسكي خاب عضها وفكني
حجه هيج وانه كضيته بأثنين اديه جلبت كل حيلي واسحل بيه اريد اوصل البيتنه
-لا تكضييييني نعلعله خرب رووووح سلطان.
-يمه يييمه يمه .
اصيح خايفه واجر بيه احتمي وهاسكي يفتر علي يريد يشمني جنه وحش شگده عضه وحده يموتني نتر طــروادة
-يااابه هددديني ما يعضج.
عفت قميصة واكفه بصف السياج حييل وهوه كدامي وهاسكي كعد كدامنه گاله
-هاسكي روح للبيت
أشرله على البيت كام هاسكي وكف مشه باتجاه بيتهم وطرواده مشه البيتنه وانه ورّاه أتلفت خايفه من هاسكي ، گال
-امشي.
خطوتين مشيت وادور اتلفت عليه بس لمحنه مشينه اجانه يركض هو ركض وأنه ركضت جلبت بأيد طــروادة متخبله
-اااجاني.
وصل يمه هاسكي يفتر علي انه احلف عليه يريد يعضني مبين مبين من وجهه
-يريد يعضني
-اي شم بيج ريحة شاكر .
سكتت مركزه وي هاسكي بس يتحرك شوي انه اجر طــروادة
-هديني عمي باليتني بلوه انتِ شني تكضين بيه؟
هو يحجي وانه ولا مهتمه اسحل بيه گال
– هذا باب حوشكم انه راح اكض هاسكي وانتِ روحـــي وحدج.
-واذا ركض وراي؟
-ياخذله وذرة لحم منج.
-يممممه
كضيت ايده كل حيلي وهوه يشيل روحه ويركعها بس يريدني اهده وانه مجلبه بيه عبالك غركانه وكاضه بحبل، دنك كض هاسكي هديته بسرعة مبتعده گال
– يله روحـــي انه راح اضلن كاضه.
-بروح امك لا تهده عليَّ.
-ما اهده روحـــي
رجعت ليوره اعاين عليه وارجع اخافن من ادير وجهي يهده وهاسكي يعاينلي بحقد احسه يريد بس يكضني يفلسني تفلس
شويه ابتعدت عنه ودرت وجهي ركضت وعباتي طايره وراي واسمعه يصيح علي
-اجااج.
ركضت بكل سرعتي وصلت الباب حوشنه ودرت عليه شفته اخذ هاسكي وراح، طبيت للبيت مكطوع نفسي مناه انه هابطه بسبب هاسكي وتلكتني امي بالغلط والسب.
“”””””
رنـــه :: القهر البگلبي ماكو شي يبرده كل ما أحاول انسى الكه دموعي على خدي سكته، نمت كوه على روحـــي للصبح فزيت وماكمت من فراشي سمعت طــروادة هوه سوالهم ريوگ وانه احس جسمي متكسر وگلبي يوجعني ولا كمت، جبرت روحـــي ارجع انام فترة وحسيت حسين وزهره يمي فتحت عيني بتعب كاعدين كدامي مبتسمين.
حسين:: تعاي طــروادة وعبود يردونج.
-شكو؟
زهره:: تعاي وتوفين.
زفرت نفس متحسره كمت غسلت وهمه متانين بس شافوني مسحت وجهي اجوا يركضون كل واحد كاضني من ايد
-هاه هاه شكو شبيكم؟
احجي وهمه يجرون بيه بره طلعوني للحوش طــروادة واكف مبتسم ويمه صخلة صغيره حيل وبصفها قفص چبير بيه دجاجات مختلفات على العندي، درت لنهاية الحوش على صوت عبود صاح
عبود::نفتحلج حديقة حيوانات والله.
عاينت للحديقة بيها بطات اثنين وعلى گن الدجاج قفصين واحد بيه طيور الحب اثنين وواحد بيه بلبل ويم الخضرة أرانب اثنين اعاينلهن مختنگه اجه طــروادة يمي
-ما اريد بعد ما اريد شي هم يموتونهن،
عبود:: يا زلمه اليوصلهن بعد
طــروادة :: شحددهم فنهم التدنولهن.
بجيت مقهوره وهوه وعبود لاميني الصدرهم ويحجون وياي طبينه للبيت يحاولون بس يفرحوني بشي ماكدروا احس انكسر واهسي بعد ماعندي لهفة تجاهه اي حيوان، شويه وسمع صوت بريا بالباب يصيح على طــروادة يريد يصالحه وطرواده عينه بعيني تحسر وأشر العبود اكعد لا تفتحله الباب.
عبود :: البارحة نص الليل من ردينه انه وسجاد لكيناه كاعد بباب الحوش بس يريد يحاچيك، طــروادة بريا معذور لا تنسى شني الجان عايشه بس هالمره اعذره.
عاينت الطرواده ساكته وهوه عينه على عبود هز راسه لا
طــروادة :: كل مره يغثونها ويبچونها اكولن ميخالف واسكت كاموا يتمادون هسه خل يشوفون وجهي الثاني اعلمهم شلون يبجون رنـــه.
وكام طــروادة طلع من وره السياج راح للگيعان بس حتى ما يحجي وي بريا، طلعله عبود، ضليت كاعده بالبيت وحسين وزهره يلعبون مكيفين على الحيوانات، الا اني مبتعده احس كلشي طالع من نفسي .
“””””””””
مــاسه :: ردنه بس نروح نشوف رنـــه صــيهد مارضى يصيح مچلوبه هيه واخوها، سكتنه منه امي تعضلنه شفه عود اسكتن على اساس احنه راح نرد عليه اول وتالي مغلسين، طلعوا كلهم من البيت حتى جده اخذها ابوي تشوف اختها، ضلينه بس احنه وامي ملتمين يمها بالهول.
كاعدين انه وجويريه على صفحة نتشاور على بــدور ونضحك مسويه روحها مواته اربعه وعشرين ساعة منسدحة هوه صــيهد اصلاً نسى النتائج، گالت جــويريه.
جــويريه :: شوف وشوم امج يموتن.
عاينت الامي اضــحك، داكه بكصتها بين حواجبها نجمة وبحنجها خط بالطول وداير مادايره نقاط وحده مقابيل الثانية
وبأيدها داكه مثل الأسوار وباصابعها كلهن داكه فوك كل اصبع ثلث نقاط بشكل مثلث
-ولج هاي گبل يتسابقن ياهي التدك اكثر مستهترات مو مثل هسه حارماتنه من كلشي
جــويريه :: ههههههه اي والله وجانن يلبسن كصير ومايلبسن حجاب، النوب باوعي بعد بس بخدودها ما داكه.
مــاسه :: حرامات لو انه الچبيرة جا دكتلي امي گبل بس يصير عدها واحد اول ما يسجل بالمدرسه تاخذله تدكله
داكه الرغد سوار ونقاط شلون البأيدها وداكه الصيهد صقر على زنده وداكه الوهب عگرب بأيده،جانت امي تموت على الدك من صرنه على حظنه بطلت.
ضحكت جوري وكعدت عدل كالت بجديه
-ندك؟
-ياا؟صار قديم ولج.
-واذا؟ احنا عاجبنه وحابينه واذا قديم؟
-والله اني ودي بس ما ادري خاف يوجع.
بــدور سمعتنا اجت يمنه تقنع بينه اي دكن بس هيه تخاف تكول بس اعاين عليجن وكمنه انه وجويريه وره امي للمطبخ نتوسل بيها گالت
-يمه قديم صار ياهو اليدك هسه
جــويريه::عاجبنه خاله اني اريد نفس دك امي وكلش بنفسي فـــدوه والله ما نخليه يبين الاحد باوعي احنا اربعه وعشرين ساعة لابسين دشاديش وحجابات محد يشوفهن.
مــاسه ::اي يمه فـــدوه جا مو انتِ داكه يله يمه مادام محد هناه فدوووه.
عافت البأيدها ودارت علينه تحجي
إم صــيهد::فلك صابجن كون راح اروحن البدعه اذا لكيتها اجيبنها واذا ماهيه بعد ماتكللي.
بــدور ::اي والله.
-انتِ هم تردين؟
بــدور ::لا بس هنه انه اشجع بيهن
مــاسه ::ضحكنه وامي لبست عبايتها وهيه تحجي علينه ما راضيه مدري شلون قنعناها ضلينه احنه بالبيت وهيه طلعت تجيب مريه اسمها بدعه كعدنه نخطط شنو ندك گالت بــدور
بــدور :: انه لو ما اخاف ادكن نخله وحصان .
جــويريه ::مزرعه هاي، اني اسوي نفس دگ امي چانت جده داكتلها برگبتها نجمات وبأيدها نقاط داير ماداير معصمها بس هذا ما اسويه خاف ينشاف اسوي بس النجمة.
مــاسه:: انه اريد بأيدي طيور اثنين اصغار نفس البأيد جده وعلي حلوات.
نحجي ونضحك مكيفين لمن اجت امي وجايبه المره وياها كتلنه الخوف وحده تكول للثانية انتِ بالاول تالي جــويريه راحتلها كالتلها
-اريد نجمات صغار اثنين على رگبتي.
المره كالتلها
-لا مايصير على رگبتي اسويهن الج هناه على صدرج جد اذانج
هزت راسها جــويريه راضيه وانه وبدور نعايلنها من شفتها انه ردت انسحب كتلني الخوف لمن خلصتها بــدور وامي سحلني للمره مديتلها ايدي
-خاله بس نقطه اريد بكد حبة العدس كلشي ما اريد.
بــدور :: لا خاله ارسميلها هناه طيور صغااار كلش اثنين.
مــاسه :: يممممه يمممه متت
اصيح وهيه حتى بعدها ما حاطه الابره على ايدي كضتني بــدور الحقيره تضحك فتحت ايدي الها من باطنها فوك الچف بشويه دكتلي وانه اصيح
-خاله طير واحد كافي خاله كاافي كافي.
وامي اخذها الواهس تكلها مناه ارسمي ومناه ومحدداتني لمن كملت راسمتلي طيور اثنين ناعمات ورغم الوجع جنه مكيفين بيهن وفرحانات وكلساعه نعاينلهن.
امي بساع اطت المره فلوس وراحت كبل ما يردون للبيت ووصتنه كون محد يشوفهن،صعدنه للغرفة وبدور الخبيثة كل شويه وكالت
بــدور :: مــاسه الا اكولن الصيهد عليج.
-فنج بالحسين ادفنج دفن.
ضلت تتغامز وتهدد وجويريه تضحك علينه، لليل وره ما اجوا اجدادي وتعشوا طبوا الغرفتهم صاحت علي امي مديت راسي من الدرج احاجيها
-ها يمه؟
-اخوتج جوعانين انزليلهم.
نزلت بسرعة لكيتهم كاعدين بالمطبخ اثنينهم يسولفون سألتهم
-شتردون شسويلكم؟
صــيهد :: قوزي، كلشي الچان عسى ما خبزه وچاي.
وهـــب :: انا ما اريدن ميوسه هيج كاعد احجي وي صــيهد هسه راح اروحن.
هزيت راسي خوش صــيهد كاعد على مخده يمي بالمطبخ يگلب بتليفونه سويت چاي وجبت جبن من الثلاجة، وهـــب راح وهوه مقيدني دام كاعد هناه متانيه الچاي يفور. ومحد بينه يحجي المطبخ هدوء يوتر شويه وگال
بلعت ريك ودرت عليه ادعي ما يسألني شي ميل ركبته على صفحة رافع حاجبه جنه يكلي ترى كاشفج ومغلس، گال
صــيهد:: چا ليش راسبه بدرس؟
ضليت ساكته اعاينله واطكطك باصابعي
-الكسولي اذا مانجحتي بالدور الثاني الا ابطلج وازوجج لحميد الاعمى مدري المسودن خوش؟
-لا انجح وعلي انجح.
-نشوف.
درت وجهي للچاي لمن كمل صبيتله وحطيتله الجبن بصينية وي خبزة انطيتهن اله وكعدت يمه گال
-كبل الامتحان تعاي انا ادرسج
هزيت راسي اي وحجيت بگلبي
“لو ارسب وتزوجني اسهل من اجيك تدرسني”
اتذكر من جنت سادس ابتدائي جذبت عليه كتله ماعدي امتحان وبعدين سمعني احجي وي بــدور واكلها باجر عدي امتحان ومادراسه ولزمني من ال١١ بالليل وي كل درس راشدي جانت هاي اخر كتله انكتلها خلاني كاعده للصبح عقوبة يدرسني ويكتلني منها وتوبني ماجذبت بعد
مدلي كلاص الچاي كال
-صبيلي بعد
مديت ايدي اريد اخذه منه ولان كاعده من مديت ايدي نرفعت الردن وبين الدكّ البأيدي فتح عينه عاف الكلاص طاح بالگاع وكض ايدي جراها عليه شال الردن وانه احس روحـــي راحت گبل كتله
-هاي امي دكتلنه احنا مارضينه وهيه كوه علينه دكتلنه امي هاي كنالها احنه كنالها صــيهد ما يرضى كالت الا تدكن،
عاف ايدي ساكت كال
-مالي غرض سوالف نسوان اسكتي.
سمعته بس من الخوف ما اسكت ابرر ابرر واحجي الغي بلا فايده اشرح بذمة وضمير وكله جذب مخليته براس امي
-حتى جــويريه مارادت كالتلها لا وي مــاسه دكي حلو الدك واستحينه من امي دكينه بس احنا هسه هم راضييين كنالها لاااا مانريد.
رفع راسه الي يحجي
صــيهد:: خووش، اسكتي مالي شغل بس عاينــي يشهد الحسين اذا وانتِ رايحه للمدرسه لو رايحه مناه مناه وتشيلين الردن حتى يبين ترى اكصص اديج فهمتي؟
هزيت راسي اي
-لا وعلي ولا اخليه يبين دوم مغطيه اديه انه.
-عفيه.
حجاها ورجع دنك ياكل صبيتله چاي اخذه من ايدي ووخر من الصينيه شلتها ووكفت على السنك اغسلها بين ماشرب الچاي واجه وكف يمي خله الكلاص بالسنك وضل واكف يعاينلي درت عيني اله متوتره گال
صــيهد :: أحم، اكلج شسمها بت عمتي جــويريه.
-كلشي ما مسويه وعلي
دار وجهه يستغفر سكتت بخوف رجع عاينلي حجه بهدوء
صــيهد ::شدگت؟
-هاه؟
سكت يعاين لعيوني وانه انسطرت مافاهمه كح شعل جكاره دخن وهوه يكول بعدم اهتمام
– شبيج مو تكولين امي دكتلنه انتِ وبت عمتي شدكتلجن.
-هااه، انه هذن الطيور اثنين وجوري نجمه، بس شنو والله يوجعن انتَ شلون دكولك صقر شكده شكبره شلون ما نوجعت.
-صغير جنت ما اذكر.
سكتت رجعت اغسل مواعين وهوه ضال واكف يمي شويه وراح يم الباب ورجع يدخن ويتمشى بالمطبخ خلصت غسل سديت الماي گال
-وين؟
-هاه تريد بعد شي؟ راح اروحن انام.
هز راسه لا ما ادري شنو يريد يحجي وكف يمي يسأل
صيهد ::اكلج شسمه جــويريه وين دگتلها امي خوما بمچان يبين من تطلع؟
-هاااه لا لا دكته بصدرها مناه يم رگبتها مايبين دوم.
احجي وأأشرله على رگبتي هز راسه خوش گال
صــيهد::يله راح اروحن انا امشي نامي انتِ.
هزيت راسي اي وركضت فوك لكيتهن نايمات انه هم ضميت روحـــي ونمت وانه احلم اكمل دراسه واتزوج واحد خارج القريه يختلف عنهم بعاداته وتقاليده، الحد ماكعدتني امي وحطمت احلامي الجنت ابني بيها من كالت
-تعاي يمه يله.
كمت صليت ونزلت وياها على فد وكفه من الصبح لوره الغدا لمن طلعوا جدي واعمامي يله شويه كعدنه بالهول يم جده مادري شبيها وي جــويريه معاديتها وهيه بس ساكته امي راحت للخياطه جابت خياطاتنه منها وصعدنه نجربهن تغطت جــويريه بجرجف حتى تبدل وتقيس الثوب كالتلها بــدور
بــدور :: شكد بيج شــامات انه عبالي بس بركبتج
مــاسه :: بله جوري ماشفت.
وخرت الثوب من يم صدرها تراويني وعلى زندها متروس شامات كتلها
-وعلي نفس شامات عمتي نضال اذكر من تمرضت هناه مره امي بدلتلها وشفتهن.
بــدور :: جذبت جذبت تشكين وتركعين بالجذب.
جــويريه :: لا صح بــدور امي جان بيها هواي شــام.
بــدور :: اي بس هاي مويسه تجذب عود هيه جبيرة وحافظة شامات عمتي خاب كمي.
مــاسه :: كمتلها اريد اكتلها وهيه تركض وتضحك كتلها
-تعااي اسألي امي تعاي.
مشت تريد تنزل گبلي تسألها ركضت كضيتها دفعتها ونزلت اركض على الدرج امي مگبالتني كاعدات هيه وجده اركض على البايات واحجي وبدور وراي تركض وجويريه تضحك اجت ورانه
مــاسه :: يمه عليج الله شوفي شامات جــويريه البصدرها مو نفس شامات عمتي نضال.
احجي بسرعة وهيه تعضلي بشفتها وتأشر بعيونها وانه الغي الغي ما مهتمه لمن نزلت الاخر بايه ودرت عيني وين جاي تأشر قصص وروايات عراقية كرار صلاح واشوفه صــيهد متمدد بالهول بالجهه الثانية يعاين بتليفونه بلعت ريك ساكته وزودتها بــدور من اجت وراي هم ماتدري بيه تصيح
بــدور :: لا يمه شامات جــويريه جوزيات عمتي سود
وامي تعض بشفتها وترد ليوره صاح بصوت رجفنه
صــيهد:: هووواي تاكلن تبن صايرررات، وعلي من اگوملجن
غلط علينه وامي تأشر اصعدن فوك ركضنه صعدنه وجويريه نسحل بيها ضلت تلطم من ورانه .
رنـــه :: كل ما اشوف جرح رگبتي يزيد كرهي الـبيت شعلان كلهم ماكرهتهم من عبث، بالبداية هملت كل الحيوانات مالي نفس بيهن وطرواده كل ما يجي من الكيعان يسألني عليهن شويه شويه اندمجت وكمت اهتم بيهن واخلص وياهن نص يومي وهوه كل ما يجون الولد ما يطلعلهم بريا يجي وشكد يضل كاعد بالباب بس يريد يحجي وي طــروادة ومن مايطلعله يروح وبكل مره يوكف على بابنه يتوسل جنت أتشفى شمتانه من يتجاهلهم طــروادة
الحد ما عبود ضل يحجي
عبود :: رنـــه گولي الطرواده صالح الولد ترى هوه مايحمل فراگهم متعلم عليهم كل يوم يلتمون.
-خيولون للموت ما اخلي يصالحهم بعد.
-لا تضلين تمسلتين هسه يتمرض من وراج وعلي هسه ينجلط من القهر علمودج، من ليمت طــروادة مفارگهم هلكد انتِ ماتشوفينه ماله واهس بشي وحتى ما يضحك؟
سكتت وكمت من يم عبود ضايجة منه وهوه طلع شويه ورد للبيت بأيده خنجر فتحت عيني وكفت بوجهه
-شني هذا؟
-مالج شغل وخري
-والحسين ولا اوخر كلي منيلك هذا.
شهكت ايدي على صدري
-يا خايس وشلون تاخذه؟
-حالي حال الولد شبيجج؟
-انتَ ليش ما تفتهم غير طاردنه هوه وخله طــروادة بدون خنجر المفروض انتَ هم ماتاخذه يا مطي.
دفعني يغلط وطب للغرفة يضمه احسه مايحب جدي بس ما ادري ليش يسوي هيج ضليت افكر من يدري طرواده شراح يسوي بيه، سكتت منه
لمن الغروب وي الصلاة اجه طــروادة من الگيعان سبح وكعد بالهول سويتلهم عشه مركزه بيه صدك ضايج لو عبود يجذب علي، شفته ياكل سكته ابد ماحجه شي ومن خلص العشه كاعد يعاين بتليفونه ماله خلك، تحسرت بحيرة حاجيته
-طــروادة ، احجي وي الولد كافي تضل زعلان منهم بس اذا عادوها بعد دوم للموت لا تحجي وياهم.
عاينلي مركز وياي گال
-خيولون يرحولج فـــدوه.
-لا صالحهم، اشتاقيت اسويلهم چاي وأدعي عليهم.
ضحك ومد ايده جراني الصدره
-ما اصالحهم الا بريا يعتذر منج وانتِ ترضين.
درت عيوني مكيفه
-اي كون يكض اذانه ويتوسل بيه اسامحه للصبح
-جا انتِ لو ماكو باب للصلح لو يتوسل بيج للصبح؟
-جا لا تنسى شلون ذبح الطلي وحط الخنجر على رگبتي والحسين راد يذبحني هوه مدري شلون عافني النوب المسودن تعارض من انخطف فد نوب.
وخرني من صدره لمن اندك الباب كاملهم.
وهـــب :: اخذنه بريا وصيهد الطرواده، بريا يريد بس يصالحه وصيهد يصيح انا اروحن بس اشوفنه ما اصالحه ولا اريده، وسلطان يحرك گلبه من يگله
سلطان :: هوه هم ما يريدك عده انا شيسوي بيك.
يخلي صــيهد يشتعل وينطفي من الحركه فتحلنه الباب طــروادة ، صــيهد دفعه طب للدوانيه وبريا واكف كدامه محتار سلمنه عليه وطبينه للدوانيه كلنه كعدنه بريا مدنك وصيهد وجهه مايكصه السيف شويه وگاله مــيثم
مــيثم :: انتَ الچبير العاقل وبريا أخوك الصغير وغلط
وانتَ شاهد على حالته والمر بيه مو سهل صح هذا مو تبرير للسواه بس كلكم تعارفون بريا مو هيج ولا مره بعمره داس بيت واحد منكم اذا انتم ما موجودين
هالمره غلط وانتم إخوته الكبار يا تحاسبونه وتتصالحون يا تكولون مانريدكم بعد حتى اخذنه واشوفلنه ديره نروحلها.
سلطان :: شني السالفة ماصايره ؟ شبيك مــيثم عمي ياما تزاعلنه وياما صارت سوالف، شني خربت خوتنه؟ نتزاعل مناه نرد مناه، وطروده هم ما يرضى على حجيك، مو صح طــروادة؟
طــروادة ساكت يدخن طفه الجكاره بالنفاضه عاين البريا الكاعد يمي مدنك گاله
طــروادة:: الموضوع مو يمي مد ايده على رنـــه وبچاها عود يعتذر منها اذا رنـــه رضت انا رضيت.
وهـــب :: عاينه واحد بوجهه الثاني وصيهد يدخن مضيك عيونه بأستهزاء
مــيثم :: حگ والله حگ يعتذر منها.
صــيهد :: خاف انا هم تريدني اعتذر منها استاذ كهلان؟
طــروادة :: لاا، انتَ حتى اعتذارك ما تريده.
كام طلع وصيهد متحلف بيه وميثم يحجي وي بريا ويكله
-انتَ غلطت وي البنيه تعتذر منها لا يقل شانك ولا يطير من طولك.
رنـــه :: كمت وي طــروادة وكفت يم باب الدوانيه ماطبيت وهوه فتح الباب وضل واكف عاينتلهم كام بريا وكف داير وجهه عليهم وحجه بهدوء
بريا:: انا اعتذر منج رنـــه.
سكتوا كلهم دار طــروادة علي وحجه بصوت الكل يسمعه
طــروادة :: وانتِ حبيبتي اعتذري من اخوج لان غلطتي عليه.
فتحت عيني بصدمه عاينلي ومد ايده يكض ايدي همس بصوت بيني وبينه
-اعتذري رنـــه .
احس عيوني اشتعلن نار من الحرگه درت وجهي منه الهم همست مخنوگه
-انه اعتذر لان غلطت عليك وكتلك إبن الروسيه.
بريا :: ولا يهمج.
نترت ايدي حيل من ايد طــروادة وطبيت للغرفة افور اريد اصرخ كد ما حرك گـــلبي بجيت خنكه لمن راحوا واجه يمي غطيت وجهي اسوي روحـــي نايمه جر الغطا من وجهي فتحت عيني كعد يمي مبتسم
-دريت بيج راح تبجين.
-ليش تخليني اعتذر منه ليشش؟
مد ايده يمسح عيوني
-منو الغلطان الاول رنـــه؟ انا لا قللت منج ولا قللت من بريا حاسبته وخليته يعتذر منج وكدامهم حتى يصير درس الهم محد يتطاول عليج بعد، وخليتج تعتذرين منه لان انتِ غلطانه، الف مره حاجيتج الف مره كتلج الغلط مايجيب غير الغلط بس ما تردين شترديني شسوي؟
مسحت دموعي احجي بخنگه
-حسيتهم ضحكوا علي من اعتذرت.
-لا بالعكس يعني انا اسوي شي يقلل منج لو يهينج؟
هزيت راسي لا ابتسم
-عزيزة ابوي تضلين دوم عزيزة لا تخافين ما اسوي شي يهينج .
كام طلع من يمي كمت وراه غسلت وجهي اعايلنه لبس وراح يريد يطلع سألته
-وين رايح؟
-صــيهد متانيني بالحوش مو تطلعين نريد نروح للگيعان.
-تصالحتوا انتَ وياه؟
-ههه اي شني هم تردينه يعتذر منج يله اصالحه؟
-لا .
ضحك اجه يمي كرصني من خدي وراح، سديت الباب وراه ومشيت لفراشي.
ندى:: حيل ابتعدت عن وهـــب ما أريد يتأذى من اسافر اني أحمّل الأذيه لان متعوده بس ما اريد هوه يعيش هيج شعور، حاولت اكرهه بيه يضحك عليّ يعاين لعيوني ويگلي
-نزرعتي بروحي بعد.
واسكت بحيره الطريقة الوحيده البعدته عني التجاهل ينغث حيل ويبتعد شكد اتعذب بهالبعد بس اصبر اصبر لان هذا اللازم يصير.
وكت ظهريه وواكفه يم الشباج فاتحته هواي لان هوه گايلي وكت الظهر ينامون افتحيها براحتج محد يطلع شلع البسمار وكمت افتحها هواي بالاخص لمن تطفى الكهرباء .
افتح الشباك اعاين للساگيه والعصافير على الشجر والبطوط بالساگيه
رفعت عيني لصوت البلبل ينقر على تينه الحد ما طاحت بالگاع يم الساكيه شكد صارت نفسي بيها تمنيتها قريبة يم الشباك وأكدر اخذها، راح على تينه ثانية وكد ما راوي بس ينقرها تطيح
متّت عليهن.
تمنيت وهـــب موجود واكله يروّح يجيبهن واني اعاين درت عيني الغير جهه من الشباك على صوت بطه اشوفها مچلبه بشباك صيد مشمور يم الساگيه چلب بيها وهي تصيح وتريد تفلت منها وكل ما تحاول تچلب اكثر اباوعلها ميته قهر عليها راح يخنگها وتموت، نفسها البطه اللي دوم وهـــب يگلي هاي تشبهج سمينه وبيضه مثلج.
افتريت بالمطبخ بحيرة شسوي وارجع اباوعلها تشابك عليها اكثر وهي تصيح عبالك تريد بس احد يساعدها بلعت ريك بخوف اتذكر وهـــب من گال الظهريه حاره ينامون ومحد يطلع
دك گـــلبي بخوف مرتبكه خليت العبايه على راسي ومشيت للباب متردده فتحته وطلعت ارجف كلي مشيت بسرعة اركض كعدت يمها على حيلي أتلفت بخوف محد موجود فتحته منها راحت تركض على اخواتها وكفت ردت ارجع بسرعة وصارت عيني على التينات الطيحهم البلبل مشيت خطوتين الهم اخذتهم وافتريت بسررعة اركض اريد ارجع للبيت شهكت فاتحة عيني من صاروا بوجهي زلم اثنين يعاينولي اهتز كلبي من الخوف صاح واحد منهم
شعلان :: هاااي ياهي؟
يتبع…
السادس عشر من هنا
