رواية رماد الاعتراف الفصل الرابع 4 بقلم زهراء سعد
وينهن شو ما شفتهن
وينهن دورتهن خطوة خطوة
وما لكيت سنينهن
ياحيف بيامي المضن
والقشمروني بطيبهن
“هدى” ..
بذيج الفجرية انه كاعدة اتنواع علىّ ابوي جسمة حامي و يون من راسة ضليت وياه لحد ما طلعت الشمس، كعدته و سويتلة الريوك خليته كبالة يباوع على الاكل و جسمة نحلان مابي حيل ياكل
صرت انه اسوي اللكمة و أوكلة من ايدي
رجعت فرشتلة و طلعت للبستان ولو اليوم حيل تأخرنه عبن ابوي مريض بس شلت المنجل و بيدت ألم المحصول هل قاسمة الله
شلت الصناديك و على طارمة فرشت و لگطت الخضرة، كعد ابوية شافني اشتغل وحدي
كلي عوفيها اليوم ما اطلع وحدي مالي واهس
كتلة اليوم انه وياك و ما اعوفك
اكعد يمك و اعاونك و اسليك و نبيع سوية شتكول
المهم انه عندي متنام تبقى وياية لان النوم للمريض بوية ماهو زين مو انت هيج تكلي؟
ضحكت و كمش كصيبتي، صاير عندج اللسان يهدوة
_يابوية هو منوه الماعندة اللسان اليوم انه عندي وانت عندك و الگاطعات عنه هم عدهن اللسان
ترك كصيبتي و ضل يعاين بعيوني، حسيت نفسي جفصتها زايد و طلعت بيها گبل شكد صايرة غبية و امسلت بالكلام
وكفت يمه كتلة: يبوي انه ابنيتك و يمك و مستحييل اعوفنك و هسه تعال عايني و خلينه نطلع لسوك
_كومي لبسي عباتج
حاول يبين نفسه طبيعي بس انه ادري هو مشتاگلهن
و يريد يشوفهن، عاد هنه الحقيرات ماصدكن ابوية
يزعل عليهن حتى بفاتحة امي ما اجن ولا حضرن
مزاعلتهن الى يوم القيامة عبن هنه يستاهلن الگطعه
لبست عباتي و طلعت ورا ابوي خلينه المسوواك
بسيارة وصلنه للعربانه مالتنه رتبت المسواك و هو كاعد
جانو كاعدين يمه يلي يبعون مخضر و مسواك مثلنه
و يحجون وياه و اني كاعدة يم البسطية مالتنه
من راحو اجه يمي كالي، ماترحين اليوم لبيت عبد القادر
_لا يبوي انه اليوم يمك و ما اعوفك
_لا روحي خلي اوصلج انه هسه زين و الزلم الخيرة يمي ما عايفيني
_شلون يهون عليّ عوفك يبوي و اروح
_و ميصير تعوفين شغلج خاف تصيرلج مشاكل بسببي انتي خلصي هل شهر و بعد لا ترحين
_هاي هية يبوي مثل متريد
امنه البسطية يم البگاليين و اخذني بسيارة بس انه كلبي مو مطمن و خايفة على ابوية
وصلنه للبيت و تفاجئت من لكيت ناس و عوائل
و سيارات عسكرية واكفة اباب بيت عبد القادر
نزلنه اني و ابوية و طببني جوا سلمني بيد هلا و وصاني مثل كل يوم يالة سودة علية راح
هلا و ام ضلال كومة حجو علية لان تأخرت طلعو جايين خوالهم العساكر من كربلاء واحنه لسه ما طابخيين شي
نزعت عباتي و هلا وياية بدينه بطبخ و سرى و امها واكفيين يم نسوان برا يسلمون و يستقبلون
الظاهر جايين كلهم عائلة شكبرها، أذن أذان الظهر و راحو الجماعة يصلون بالمسجد اليمنة و النسوان بالبيت
بقى الاكل يتهدر و خلصت كلشي بس احس روحي هلكت من التعب
طلعت برا بالحديقة افتر شفت سرى خطفت من وراية رحت وراها حتى احجي وياها
بس شفتها واكفة ويه شاب ورا البيت و تبسبسون بينهم كوة اسمع الحرف من سرى لان هي نبرة صوتها
عالية بس الولد كلشي ما سمعت منه
سمعت سرى تكول: شبيك متكلي، انت مو تدري امي و امك ميتراهمون
_اي اي اعرف انت ابن خالي
_يوو كافي سد المووضوع، لا تنسى اني محجوزة لبن عمتي
_اي روح تزوج اني معلية بيك، يلا خليني اروح اني معلية بيك
درت وجهي و تحركت من مكاني و رجعت وكفت بالحديقة بس احس كلبي يريد يوكف من الخوف اخاف شايفيني واني اتسمع الهم
حسيت بحركة وراية عرفت سرى رجعت للبيت
شافتني واكفة بس غلست و ماحجت
شوية و طلع نفس الشاب يتمشى حتى يطلع برا
صارنه بوجهه بعض، تقدم علىّ كلي انتي منو
_انه هدى
_اول مرة اشوفج هنا
تلعثم اللساني و استحييت اكله اني اشتغل هنا
اشرت للبيت كتلة كرايبي يم كرايبي
ابتسم ابتسامة خفيفة و طلع برا..
بنفس هذا الوقت اجتني هلا تركض كالت تعالي اكلج شسمعت هسه
_سمعتي منو؟
جان كل فكري تكلي هم شافت سرى وياه هذا الولد
بس صدمتني من كالت: طبيت ارتب السفرة يم النسوان و سمعت ام ضلال تكول اني ماعندي مرة الساجر
عندي بس سرى و هي مخطوبة لابن عمته من هي و صغيرة بس انه عندي الكم مرة تناسبكم و تخبل و تصبر على سوالف ساجر
ام ساجر: منو هاي
ام ضلال: هسه انتي كليلي ليش تريدين تزوجين ابنج غير اعرف
ام ساجر: شوفي احبيبة ساجر بعمر الشباب و مصادق ولد طايحين الدرب و البخت.و علمو على سوالف النسوان
و هذا يومية جافتلة على بيت، لو رايح الأماكن مشبوها ابو كلي لازم انزوجة هسه يتحمل المسؤلية و يثگل و يعقل بعد لا يطلع و لا يطب و يكمل دراستة بالسلك العسكري
ام ضلال: شفتي هاي لبنية التشتغل عندي
ام ساجر: لااا ام سرى خو ماخذلة وحده تشتغل بالبيوت
ام ضلال: ما مشتغلة گبل بس يمي الله شاهد و البنية علمته على ايدي ماعدها احد بس هي و ابوها
يعني على كد ايدج لا تنسين ترا سيرة ساجر واصلة للبصرة حتى من يجي هنا ميكعد راحة يا عيني
على الاقل هاي تجيبيها يمج و انتي تعلميها و هم شفتيها شكد حلوة اعيونه ذيج العيون لوساع و شفته صغيرونه وييين تلكين بجمالها
ام ساجر: لعد ما انطيها مهر خاف بعدين ميريدها و يطلگها
ام ضلال: اصلا لا تنطين خلي هي و ابوها يسجلون بستانهم بأسم ساجر ترا همه عدهم گاع جبيرة بالقرنه و مكانه صاير حلو و تجاري
بس انتي اخذيها بالكلام الحلو…
هلا: باعي هدى شما يحجون وياج انتي رفضي اشو اني ما مرتاحتلهم ابداا اني علية حجيتلج يلي سمعته و بعد انتي بكيفج
ضليت مصدومة من كلامها ما اعرف شحجي
عفتها و ماحسيت نفسي غير واني بغرفة سرى
حتى هي شافتني و ضلت مصدمة كعدت يمها ابجي
على الكلام يلي وصلني و شلون هيج ماخذيني بالعين الصغيرة
سولفتلها كلشي حجته الية هلا و هي كعدت تواسيني و تمسح دموعي
فجأة صارت تضحك علية.. كالت يمعودة هلا تجذب عليج.. اكص ايدي اذا هي متريد هل القسمة
_وين اكو احسن من ساجر تخييلي كل حياتج راح تتغير يعني هسه انتي هنا تشتغلين حتى تساعدين ابوج
هناك غصبا ماعليهم يهتمون بيج و بيتج تكعدين بي انتي و ابوج و ديرين بالج علىّ بدون متشتغلين ولا تعبين انتي حتى ابوج يرتاح
_بس اني ما اعرفة و الولد يمكن ميريدني
_ يمعودة اذا مشكلتج يم هاي محلوله هو هنا من يجي اسوي خطة و اخليج تشوفي
_قبل شوية من جنت برا طلع شاب يطلع عمرة بال٢٥
هيج و سألني من وين انتي ، جذبت و كتلة اني كرايبهم، هو هذا الولد نفسه
_تلبكت شوية و كالت: اي هوي شفتي يعني
_اي شفته، و شفته جان يمج هم
_اي صحيح احنا اخوان ترا و الولد حباب جان يسالني على ابن عمتي انتي مو تعرفين اني هم راح اتزوج، الله والله ما مصدكة هيج و نصير سوية متزوجات
هسه بعد لازم نتغالب منو تجيب الولد اول
_ماعرف شكلج بس خايفة و ما مطمنة ابداا
_لا تثقين بكلام هلا ترا مبينه هاي متريدلج الخير
اكيد سوت هيج لان غارت منج لان انتي خطبوج و هي لا و راح تضل تشتغل طول عمرها هنا
هسه تعالي فتحت الكنتور و طلعتلي فستان زهري مرتب و مستور، يلا كومي البسي شوفي شكد حلو
اشتريت اثنين واحد الي و واحد الج لان اعتبرج مثل اختي
رحت عليها حضنتها اخذت الفستان اباوعله، اكلج بس مو احسه لونه قوي كلش
_لونه فاتح يخبل انتي ليش تحبين الوان العجايز متكليلي حتى هل شيلة اشمريها تلعب ستين نفس
اني انطيج حجاب من عندي يخبل و يلوكلج
هي تحجي و تدفعني للحمام، طبيت و قفلت الباب
باوعت على فستان، البسة؟ شسوي هسه
توكلت على الله لبسته و طلعت و لبست الشال منها
نزلت للمطبخ جانت هلا واكفة على لماعين بس وجهه مغثوث مني و اني هم ماحاجيتها ضايجة من تفكيرها اذا صدك هيج تفكر بية
خلصت شغلي و المرة شافتني و سألتني على ابوية و خواتي واني ما قصرت حجيتلة كلشي بتفاصيل
لحد ما ام ضلال كالتلي روحي جيبلنه العصير
العصر ما رحت درست، لان جنت تعبانه ضليت كاعدة بالبيت لحد ما اجه ابوية اخذني
و ثاني يوم ام ضلال كعدت حجت وياي و فهمتني انو الناس يريدون يشوفوني و تريد من يجي ابوية تكعد تحجي وياه
و حتى فهمتني و كالت احسن مهر الج هو انو انتي تكعدين ابوج وياج بالبيت او تختارين تكعدي ابيت صغير يمج و قريب عليج حتى كل شوية ترحين و تشوفي
اني هم وافقت على كلامها و العصر من اجه ابوية حجت وياه و شرحتلة كلشي بتفاصيل ابوية رفض اول مرة و حتى ثاني يوم من اجينه هم حجيت وياه و رفض
ورا تلاث ايام ابوية كال افكر فد اسبوع و ارد الجواب، بهذا الاسبوع ابوية كعد يمي و حجيالي
و كلي بكيفج انه ما اريد اجبرج اذا توافقين انه موافق و اذا ترفضين انه ارفض
تذكرت كلام ام ضلال من كالت احسن مهر الي هو ابوية
يجي يكعد يمي يعني اني هم مراح اعوفه
رديتله الجواب كتلة اني موافقة بس شرطي هو انت تجي تسكن وياي و ما تعوفني لحد ما اموت
ورا الاسبوع ابوية رد الجواب هو موافق و بنفس الاسبوع جابو المشية بس كلها صارت بالحسينية يلي يم بيت عبد القادر و عمامي جانو حاضرين و نسايبنه ازواج خواتي
وانه هم ام ضلال اشترتلي نفنوف ابيض شيفون و بي صفحة ستن يخبل لبسته بيوم العقد
و هو طب للبيت شافني و باسني من راسي كدام
النسوان و لبسني كلادة و محبس
وقتها من الفرح احس روحي طايرة اني مو بالگاع
احلى وقت عندي و احلة يوم شفته بحياتي كلها
ورا اسبوعين اجه ساجر و ابو لبيتنه و حجو وياه ابوية على مود الزفة كالو انتو بعد تعالو الكربلاء
و احنا انزفهم من بيتنه للفندق و المشتمل مالتك قريب حييل عليها
وافق ابوية و لمينه كلشي يخصنه بالبصرة و بعنه المسواك بنص سعرهن لان مندري وين نوديهن بعد
و رحنا الكربلا..
الطريق جان شطولة نمت و كعدت و بعدنه بطريق
خليت راسي على جامة و اني اتذكر بكل لحظة مرة علي اني و اخواتي، شكد تمنيتهن وياية اليوم
و يفرحن الفرحي مثل ما انه فرحتلهن، راح اتزوج
و اروح الناس غربة و انزف من يمهم و انه غريبة
مالي احد غير ابوي، صح ابوية متأمل بالغريب احسن من الگريب بس الموضوع يوجع الگلب عبن وحيدة
بعد ما تكسرت رجلية من الكعدة و صلنه و اخيرا
و ستقبلوني اهل ساجر بصلاوات، كعدت يمهم يومين و الثالث هو يوم عرسي بس طيلة هل ايام
انه ماشفت ساجر كلما اسأل علي كالو يشتغل بالبيت
يلي راح يعيش بي ابوية
بيوم العرس ودتني خالتي ام ساجر لصالون و لبست بدلة و مناك طلعت الزفة كبل للفندق ما رجعوني للبيت بس طبت ويانه مصورة
اخذتلنه صور بالغرفة و كتها ساجر جان لابسة قاط ابيض و شحلاته طالع بس ماكدرت اعاين اهواي
استحي اخلي عيني بعينة اكتفيت يومي كلة بسكوت
و ابوية هم طب حضني و بوسني و وصاني على
زوجي طول الوقت كلامه هو يحجي وياية و يبجي
وانه ابجي وياه ماعرف ليش رغم انه وياه مراح نتفارگ اهواي
ثاني يوم اجو عمام ساجر رجعونه للبيت و هم صفكات و هوسات واصلة الراس الشارع
المدينة كلها درت ساجر تزوج و صار الهدوة.
من يومها جنت اروح لابوية اطبخله و اكعد اكل وياه يالة ارجع للبيت عيالي ماذابين علي شغل بس اغسل المواعين
وقتها ساجر ما صار زوجي بس صار نصي الثاني
غطاي و فراشي جان ميكدر يفارگني ساعتين
يروح لدوامة بسحل من ورا ابو و يرجع من الشارع يصيح بأسمي، و ابوية من يشوفه جان فرحان
بأهتمامة دائما يكلي الحمدلله اخذتي الشخص المناسب و يلي يلوگلج جان مطمن و فرحان بية
فرح موش قليل، بيوم جمعنه اني و ساجر للبيت
و سويت الغدة و اكلنا سوية، ابوية فتح موضوع البستان و كال الساجر: اني كبل جان عندي بستان
اجبيرة ماخذة نص الگرنه و جنت ازرعة و احصد خيرها و ابيعه بسوك جنت عايش بخيرهاا
بس تعرف ابني انه ماعندي ولد الله رزقني بخمس بنات و نعمة البنات، جانن وياية و مشاركاتني بكلشي
ميخلني حتى ادنك و ازرع اذا مو كلهن يمي و ياخذن البذرة من ايدي
بس من زوجتهن لولد اخوية كلت ذولي هم مثل ولدي و هم راح يجون يعنوني، بس صار العكس
ما اريد وطول عليك يبوية انه اريد انطي حصة هديوة حتى اذا متت اموت مرتاح
ساجر: اسم الله عليك عمي عمرك طويل و تضل خيمة فوك روسنة لحد ميجيك حفيذ و يكبر كدام عيونك
هدى: بوية شجاب هذا الكلام على بالك اليوم
انه بدونك ما اعيش، خليك خيمة فوك راسنة واكف وياية بكلشي ربي يحفظك الي و يخليك طول العمر وياي
شلاگم: اعرف بوية اعرف بس هاي الحياة هي فاينة
اذا مو اليوم هيج حجيت باجر
يلي اريدة اريد اسجل بقية الگاع و الحصى الاكبر الج و البيت هم الج انتي اكثر وحدة تعبتي و ياية
و يبوية انتي تستاهلين
ساجر: شوف عمي هذا مالك و حقك بس عمي اذا ردت اسجل الگاع بأسم مرتي اكو أجرأئات روحة و رجعة و للمحكمة واني ماكدر اخلي مرتي تفتر
والله عمي اخاف عليها خليها الگاع بأسمك و هي كلنا نعرف هاي الگاع الهدى حتى خواتها اخذن حصتها مو معقولة ياخذنها و يعوفن اختهن
و اني و اهلي عدنه خير من الله اعيشة ملكة ما تفيدها الكاع
شلاكم: ميخالف لازم انطيها الكاع ما اريد ابقيها بأسمي، يعني معقولة اكو اجرأئات صعبة
ساجر: اي عمي صعبة و ما اريدها تتبهذل رايحة جاية انت شلون سجلت الكاع بأسم بناتك الباقيات
شلاكم: سجلتها بأسم ازواجهن و هنه وافقن
ساجر: لعد خلاص سجل الگاع بأسمي و اني اهتم بالقضية النقل و اهلي يشهدون و هي تشهد و كدام الكل اكول هل كاع بأسم هدى
شلاگم: هاي هية بوية مثل متريد
باوعلي و أكد علية، انتي موافقة أبنيتي؟
هدى: اي بوية انه ماعندي سند بحياتي غيرك انت و ساجر و ربي يحفظكم و يديمكم الي
ثاني يوم من هل كلام اجه ساجر و جايب المحامي
و نقل الگاع و البيت بأسمه و كال اني راح اهتم بالباقي
ضل يومية يروح للمحكمة و مرة اخذ ابوية وياة
و كتبو بالعقد انو هو مشتريها بأربعة تالالف
و كلي راح اروح للبصرة اشوف اذا يحتاجون شغل بأوراق النقل راح وكتها اسبوع و رجع
جان كاعد بيت عمته ام ضلال و الصبح يكول اطلع اشوف شغل الکاع
بهذا الاسبوع ابوية تمرض مرضة قوية نام بيها بالافراش مايكدر حتى يكوم، طلبت وقتها من ساجر يروح للبصرة و يخبر اهلي و عمامي و خواتي لازم يجن يشوفن ابوية بأخر ايامه صار اهواي يحجي بيهن
و يحجي عن امي و حياتنه گبل، ساجر ما كال لا
رجع للبصرة و تأخر يومين هناك الليلة الثالثة
جنت نايمة يم ابوية متعودة اكعد من الفجريات
ويه الصلاة هم نصلي و هم اسوي الريوك و نتريك
شغلت الاضوية و رحت الغرفة ابوية فتحت الباب
شفته واكع بالگاع و طالع مادة بيضة من حلگة مبين
رايد يكوم بس واگع، لحظتها انتهى كلشي انتهى الدلال و العز راحت المحنة راح ابو الحجاية الحلوة
بهل وكعه لجمتني و رجعتني لموتت امي بس هل يوم و بهل الحظة عرفت شنو اليتيم اي بثواني بس حسيت نفسي يتيمة وحيدة، شفت و حسين بمعنى الظلام الحقيقي يلي يكسر روحي حضنته بأيدي و اني امسح هل مادة
نزلت دموعي غصب و ايدي ترجف
همست بأذنه بصوت خافت يرجف الگلب بوية..
يا عيون هدوة اكعد ينور عيونه..
ما تحملت صرخت بأسمه بووية اروحلك فدوة اكعد يشمعت بيتي اكعد
بقيت بسااعة جسمي يرجف حاضنته و ابجي
بالأخير گويت كلبي و كمت اركض
رحت لبيت عيالي ادك بالباب كلهم نايمين
كمت اصرخ كل ماعندي قوة احس صوتي راح و محد يسمعني
_يمعودييين يهل المروة سندي انهد حيلة
ياااابة اكعدو اكعدووو عاونوني على ألطم
راح حيلي يبوي لا تعوفني وحيدة
بوية لاااا تيتمني، بوية ماعندي غيرك
.. هل لحظة ولا انساها
اجه عمي فتح الباب شافني منتهية و ألطم على وجهي: عمي الحكلي عمي راحح ابوية راح سندي
تيتمت الحكولي..
راح ابوية
نهد حيلي و كعدت بالگاع، من الفجعه يلي صارت بية ايدي ماكدر ارفعها و الطم و دموعي نشفت
بصدري نااار تحترك بي احس روحي تريد تطلع
اريد اصرخ بس وكتها ما جان يطلع وياي غير ونين
البيت كله كعد و رحو شالو ابوية و كبل للمستشفى
و اني كابلني النسوان يهدن بية بس ياهدوء يضل بية
يا صبر يصبرني و اني شفت موتت عزيز كلبي
وحيدي و سندي و ابوية راح كلشي
هسه من صدك احس ضهر بعد ماعندي و كل حلم النه راح من ابشع الحظات يلي شفتهن و يلي مرن بحياتي
طبن خواتي التابوت محطوط كبالي
لا اكو صريخ ولا اكو لطم محد من الموجودين نزلت دمعة عينها
وانه الوحيدة يلي املخ بوجهي، طبن الگاطعات طبن الماراضي عليهن ابوية ولا على غيابهن
طبن يسألن حتى يشوفنه بس لكنه تابوت ممدود بالگاع
عاونني على لطم عاونني البجية يبنات ابوية
راح وصفيت وحيدة بين الغربان راح و نهد حيلي
شفاد الزعل هسه و شفادت الفلوس الرباجن هسه
صار جوا التراب مابقالنه احد ولا احد يلمنه بسفرتنه
ضلينه وحيدات غريبات ما تلاگة بيجن ولا اشم ريحتجن، ضليت الوحيدة المعزولة و البعيدة
يلي كسر كلبي يلي ابوية أمني عندة عافني يومين بأصعب اوقاتي بأصعاب لحظاتي ما مر علية ولا شافني
شكد سألته يكلي ماكدر اشوفج تبجين
بس على الاقل جان يكدر يمسح دمعتي و يطبطب على ضهري
اسبوع و الحياة بنسبة الهم رجعت طبيعية الا اني
هنا احس الحياة انتهت
من بعد هذا الاسبوع ساجر تخرج من الدورة العسكرية صار يداوم و يرجع من الدوام يروح للبصرة و يبقيني ليالي و ايام وحيدة ماعندي احد
لحد ما مريت صدفة من غرفة خالتي و اسمعها تحجي وياه..
_اطلگها.. وين اخليها متكلي وين اخليها حتى ابوها مات
ساجر: ماعرف يمه شوفيلج حل مثل ماجبرتيني عليها و جذبتي علية و كلتي هاي كرايب بيت عبد القادر و خليتني اتزوجها هسه هم شوفيلج حل وخلصني
_مو لبنية ما مأذيتك و كال سجلتها بأسمك و شحلاته حتى احلها منه ذيج اصلا سمرة
ساجر: يمة سرى من زمان احبها وهسه ورا ما نفصلت من ابن عمتها اقتنعت نتزوج اني وياها و شرطت اطلك هدى
_ايي ورا ماشبع بيه و ذبها و انت تاخذ افضالاته
_يمة شبيج يا فضالات هي بس خطوبة ما اتراهمو و اطلكت و اصلا بذيج الفترة يومية بيتهم و يومية يمها شلون ما احبها
_اني اكول تبقى بالبيت و بعد لا تروح ابقى يم مرتك و بدون مشاكل احسلك
_ديلا اني جاي تحليلي المشكلة شوف شتكلي، ثاني شي انتي شلون تخليني اكمل حياتي ويه وحدة جانت تشتغل خدامة ابيت عبد القادر!
ليش كذبتو علية و كتولي گرايب سرى و بت حسب و نسب تالي طلعت خدامة و أمية كلشي متفتهم!
_ و انت شمدريك!؟
_غير سرى كلشي حجتلي عليها و شلون جانت تكدي منها الملابس شلون ارجع و اباوع بجهرتها اصلا
جزت نفسي منها اصلا
_يمة لبنية مالها احد لا اطلكها و ترجع الذيج الحية يلي طالعه على امها ولك شتترجة من وادم باعت هل ابنية و انطت فوكاها فلوس بس حتى انت تتزوج و متلفي بيتهم و هسه هم تزوجت و كابلت بتهم وكعدت
_خلي يكون بمعلمج كل عائلتها تدري اني اريدها
و هي تريدني و غير هذا الكلام ماعندي، يلا في امان الله
فتح الباب و انصدم بية واكفة كبالة تعداني و طلع برا
هل كلام ماخمش كلبي بالاساس اني كلبي ميت صار
بس المن اعاتب؟ يلي سميته امي باعتني؟ لو يلي سميتها اختي و اخدمها تلي ما حلى بعينها غير رجلي
لو من رجلي نفسه؟ ويامن احجي و المن اشكي وانه ماعندي احد
صح عمي و عمتي اعترضو على زواجه اول ايام
بس هو خله الفكرة براسة و راح كسرني و تزوجها بذاك العرس صار واني مامر على زواجي غير ست اشهر و على وفاة ابوية اربع اشهر
شمروني بالمشتل الصغير لحد يجيني ولحد يوصلني
وحيدة فريدة و الاكل يجيني اكل و انام
حتى طلعة للحديقة مالي واهس اطلع واني اسمع صوت سرى تضحك يم المشتل و تسمعني
فديوم حسيت صارت عزيمة و اسمع صوت ناس تبارك و ناس تنطي هداية بس ما فهمت شكو
من اجتي بت عمتهم تسلم علية. سألتها كالت زوجة ساجر الجديدة حامل!
انخمش كلبي وكتها اجذب لو اكول فرحت الها لا متستاهل ابداا
كسرتني حيل هي و ذاك الأمنت بي يلي حبيته من كل كلبي و وثقت بي يلي ردته سند و صارلي موس
محطوك على رگبتي..
كعدت على السجادة الصلاة و ادعي يارب اريد عدالتك يارب اريد تريح كلبي، عيوني نشفت من دموعي و حيلي مهدود
نمت بذاك اليوم و كل أمنيتي ما ارجع افتح عيني
تمنيت اروح يم ابوية
تمنيت اطلع منا و بعد ما ارجع
تمنيت و تمنيت بس كلشي ماكو..
الأمنية تبقى امنية مراح تتحقق…
روحي خلصت و صبري خلص و حيلي نهد ضعفت حييل اجوع اهواي بس ما اشتهي اكل
تلعب نفسي من كلشي حتى من البشر عزلت نفسي حتى من ضوة الشمس
مر شهرين على العزيمة.. كعدت من النوم بنص ليل مفزوعة
فتحت عيوني حييل تعبانه
تحركت بالكوة فتحت الثلاجة شفت شكو اكل طلعته اكل
حاولت ألزم ورقة و قلم اكتب بس ماخطر ابالي شي
فتخت الباب و طلعت
واخيرا شتميت ريحة الرطوبة و الجو
السما شكد صافية و النسمات هادى جانت علاج نفسي بنسبة الي
بالحظة نسيت كل ألم عشته بهل دقيقة تمنيت
البس شيلتي و عباتي و اطلع لسوك. اويلي
هيج و ارجع للبسطية مالتنه و ابيع لحد ما يهل الظهر..
اشتاقيت اهواي الذيج الايام و اشتاقيت لأبوية مو بيدي
كعدت على ثيلة و اني اباوع على سما جانت الدينا صافية و النجوم بانية
واني عيني فوك حسيت باب الشارع انفتح
عدلت كعدتي و لفيت حجابي
رفعت راسي هو جان واكف كبالي يباوع
اجه يمي يمشي بخطوات بطيئ اخذ مكان و كعد بصفي
جان يباوع على نجوم مثلي و ماحجة ولا كلمة
قررت اكوم، كمش ايدي
ونطق هل كلمتين يلي خلتني انهار من البجي
_اشتاقيتلج اهواي
حضني و حاول يهديني بس الشعور يلي بكلبي صعب اشرحه الاحد اكتفي بسكوت احسن
اخذني للمشتمل و رجع يحجي وياية و يوضحلي حقيقة مشاعرة تجاهي رغم ماجنت المس منه اي حب حقيقي بس شعوري اتجاهه هو حب و انكسار
بنفس الوقت!!
ضل وياية لثاني يوم الصبح كعدت و هو بعده نايم
توقعت مراح يرجع لان ادري بي خلاص تزوج واني صرت شي منسي
بس تفاجئت من رجعي يمي ثاني يوم و جايب العشة بأيدة
ثالث يوم و رابع يوم لحد اسبوع كامل تقريبا اكثر وقته هو يمي
ماجنت ادري زوجته مو بالبيت و هو ديضيع وقت وياية لا أكثر
بعد هذا الاسبوع ماشفت وجهه ابداا
كسرني الكسرة الثانية بعد مارجعت تعلمت عليّ و على سوالفة بساعة من الساعات حسيت اكو صوت غير صوت ونيني اكو صوت يشاقيني و يضحكني
بس هو ينساني شما اخلي اكبالة ميكفي و اني بعينة انسانه رخيصة..
تعبت منه و تعبت و كرهت نفسي اهواي
كرهت أهمالة و كرهت روحي شكد رخيصة
بعد كل هذا الهجر توقعت راح يعوضني عن كلشي
بدر منه و كسرني..
بس شسوا هو كملها للكسره يوم بعد يوم اخذ من صحتي و عافيتي اخذ اجمل و احلى ايام عمري
صرت ادعي على نفسي اموت و اخلص لان تعبت و طاقتي خلصت وياه ما اريده كرهته حييل
لو يذبني بشارع ولا ابقى قريبة علي بعد.
نمت و قررت خلاص بليل اطلع منا.
نمت بكل عزيمة و قرار..
فتحت عيوني باوعت الضوة طالع صبح الفجر هسه شلون اطلع.!
حاولت اكوم بس حيلي مهدود ماكدر كلشي بية يأذيني كل جزء مني يوجعني
وكفت اغسل وجهي الدنيا تفتر بية توقعت لان مماكلة من البارحة الظهر و الى الان
فتحت الثلاجة غير اكدر اطلع شي اخلي بحلكي ماكدر الدوخة خبلتني.. ضليت كاعدة فترة كلت بالكي تخف بس زادة ما نقصت
لبست حجابي و طلعت بعد ما اتحمل حتى ألم صار بضهري..
رحت للبيت و طبيت من باب المطبخ. جايبين وحده تطبخلهم بس دخلت و هي ما عارضت عرفت همه حاجيلها علية
كبل تلكتني خالتي كوة تحركت رغم هي مو سمينه كلش بس وقتها مفاصلها مأذياتها.
كعدت يمها كتلها ساعديني رحمي بحالي راح اموت
صاحت على مرت حماها لبنى هي معاونة طبيب
اجتي قاست الضغطي طلع عندي هبوط
صاحت على الطباخة مسوتلي ريوك و كلاص عصير
اكلت لكمتين ماكدرت اكمل الباقي نفسي تلعب
خالتي شكت بالموضوع من شافتني صحيت
كلتلي امشي لغرفتي حتى ترتاحين..
نمت بغرفتها لضهر كعدت و هي يمي عدلت كعدتي
عيب ابقى انطيها ضهري رغم ادري بيها هي ما تحجي
عدلت المخدة و هي تسألني..
_جاوبيني هدوة ساجر جاي يمج بالفترة الراحت
هزيت راسي بأي
_شوكت؟
_راح يصير شهر تقريب..
_كبل كلتلي كومي بدلي هسه اخذج لدكتورة تفحصج
_خالة اني محضرة روحي ابوس ايدج طلعيني منا اريد اطلع و ما اريد ارجع يمه كرهته والله كرهته
_عوفي هذا الكلام و اسمعي مني بعدين افهمج
جانت تحجي بصوت ناصي خفت اجادلها
عفتها و طلعت
فتحت الباب و طلعت جانت سرى واكفة و بطنها بدت تبين، باوعتلي و دارت وجهه
لزمت بطنها بأيد و الأيد الثانية تهز بأيدها
وكفت يمها و كتلها
_ليش هو منو المفروض يهز أيده؟
والله صلفه! فوك كل يلي سويتي و تخلين عينج بعيني؟!! الله يحرمني من ها صلافتج
_لج انتي لو بيج خير ما حاشرة نفسج بين عائلة لا تعرفيها ولا تعرفج خلي عندج كرامة و اطلعي
أستغليت حركان دمهي و لعبت بأعصابها
_ تؤ تؤ.. ضاگت بيج الدنيا و ماحلى بعينج غير حلالي
شكد نفسج دنيئ لعد
صاحت بصوت عالي و كانها تريد تهجم علية
_احترممممي نفسج افتهمتي، اذا انتي هسه باقية على ذمته فهذا بسببي اني الي الفضل قبلت و خليتج حال القندرة القديمة بالبيت مركونه بصفحة و محد بحالج
_يجي يوم كلبج يلجمج على السويتي بية و دمعت اليتيم و دعوته متخطي عند رب العالمين
عفتها و رجعت للبيت ابجي منهارة و روح مابية حتى ارجع الحزني مرة ثانية
بدلت و كعدت برا انتظر خالتي تطلع، ماردت اطب جوا و ارجع اشوف هل بومة مرة ثانية
والله شوية و طلعت كوا تمشي اشرتلي على السيارة صعدت يمها و ابنها خالد هو يلي وصلنه لدكتورة، تحاليل و فحوصات كملت كلشي و اطتني علاج الدكتورة و رجعت للبيت و دمعتي بخدي
طلبت مني ارجع وياها للبيت و اتعشة اليوم يمهم
شكد رفضت بس اصرت علية
رجعت هلكانه تعبانه و التعب واضح علية
طبيت جانو كلهم ملتمين سلمت و كعدت يم خالتي
ما تحركت،
سألها عمي ليش راحت لدكتورة شنو شبيج
_مابية شي بس وديت مرة ساجر دكتورة
ساجر: ليش شبيج.. وجهه السؤال الية
بس خالتي جاوبته
_ مابيها شي يمة بس صلاوات حامل و بين عليها الحمل
الصدمة انرسمت على وجوهمم كلهم محد فتح حلكة بكلمة وكال، انتهى السكوت بصوت سرى و هي تصيح و تبجي و تتعارك ويه ساجر
_منيييين حامل هل خدامة… احجي منين
انت مو كتلي مالي علاقة بيه ولا بحياتي راح اوصل الها
ساجر: كااافي اسكتي كومي طبي الغرفتج
سرى: لا ما اطب، فهمني ليش تروح. الها اني بشنو مقصرة وياك
ام ساجر: شنو هي بكيفج مرته واله حق بيها و هي أولة منج انتي المنو اصلا
ابو ساجر: معليج انتي اسكتي همه ابينهم عسمى يحتركون هو رادها
لزمها من كتفها و كل ما عندة طبو الغرفتي السابقة
و شمرة بالگاع سمعت صراخ و حجي بينهم و صوتها طغى بالبجي
عمي طلع و عمتي كالت امشي طبي للغرفتي
محمد و خالد و معاذ اخوان ساجر كل واحد راح بكتر محد ادخل اصلا
كلمة حجتها سرى و اثرت بية حييل و مستحيل انساها..
_جان المفروض ما اقبل بيك المفروض اصلا ما اصدك بكلمة رجال ضحك على مرته على مود ورثها
واحد اصلا خان زوجته وياي اني شلون رضيت بي؟
بعدها سمعت صوت الراشدي يلي سكتها
احترك الجو و الذنب مو ذنبي اخذت جنطتي و طلعت من البيت كله رجعت لبيتي نمت على فراش
ابوية هنا الحنان و السند، هنا الحياة الحقيقية و الأمان..
ثاني يوم صبحت بعين ساجر و هو كاعد يمي
فزيت بمكاني
_شجابك هنا؟
_لازم نحجي
_الباب مقفول شدخلك
_هو بيت منو؟؟ اصلا
_و هسه شتريد
_لازم تنزلين الطفل
_اطلع برا
_افتهمي اني مراح اتحمل مسؤليته
_اني امه و اني ابو، اذا ابني انولد يتيم مابية شي
_لج والله ما اكتبة حتى بأسمي
_هذا ابنك و ذاك ابنك شنو الفرق، ليش لازم واحد يموت حتى يدلل الثاني ليش؟ ابني اله الحق يجي
و يعين امه و يبقى وياي الكبرتي ما حصلت شي من الدنيا غيرة هذا حلم ابوية، ما اصدك فد يوم راح اشيل فارس بأيدي
_هيج انتي تسوين مشاكل بحياتي اسمعي مني و نزلي هذا مو الوقت المناسب ماكدر اشيل مسؤلية طفلين
_انت اساس المشكلة
_عدلي كعدتج و انتظرج برا نكعد و نسوالف
_ ماعندي كلام غير ابني يضل ابني و يضل فوك راسي لحد ما اموت
نظراته تركزت على بطني كل امنيته هسه يقتلة
لفيت ايدي على بطني جاوبته
_موتي اهون من أذيته!
_وعد مني يصير عندج طفل مني و نعيش سوية بس مو هسه افتهمي مو هسه
_ شتقصد
_اتفهمي هسه ماكدر اشيل مسؤلية طفلين و علاجج و علاجها و مصاريفكم، بعد ولاودة سرى عبد القادر
راح يسجل المركز يلي بغداد بأسمي و وقته راح اكدر
اشيل المسؤليتج و مسؤلية ابنه
_فارس يبقى برحمي و اجيبة و اشيلة بأيدي اربي
و اكبره و يصيرلي سندي بهل دنيا، غير هذا الكلام اطلع برا
مشاعري اتجاهك اليوم مشاعر كرهه و حقد انت انسان مييت بنسبة الي من اليوم مستعدة البس عليك الاسود
و بيوم موتك من الدنيا البس الاحمر احتفل بموت
اب الشيطان مثلك
رفع ايده راد يضربني بس تراجع بأخر لحظة
بصق بالگاع و طلع برا..
من يومها محد شال مسؤليتي غير خالتي و عمي
علاجي تعبي و مرضي و أذيتي و الشيطان ما وصل
من ذاك اليوم و اني فعلا لبست الاسود..
مر ست اشهر و سرى ولدت ابن ساجر الاكبر سلطان
تحت اشراف دكتورة و بأحسن المستشفيات الاهلية
بس غلطة وحدة بالعملية كلفت سرى مشاكل برحم
منعته من الانجاب بحياتها، صح بالاول نقهرت عليها
بس بعدين كلت هاي حوبتي و رب العالمين طلعها بيها
اجه سلطان الولد المدلل
و صار روح ساجر ابنه و غلاته يلي يفدي بروحة
بعد تلاث اشهر بس اجه ابني فارس، فارس ايامي
و كبرتي و حناني هو مو بس ابني هو ابوية و سندي
ولدته بالبيت تحت اشراف قابلة لان ساجر رفض
ينطني اي فلس حتى اروح للمستشفى
اعرف تندم ورا ما صوتي ملئ المكان الخوف يلي سيطر عليّ، صار يروح و يرجع للبيت
و يطلب من امه ياخذوني للمستشفى بس بعد وين
فات الاوان ب١٢ الظهر واني اسمع صراخ سلطان من الخوف
و بنفس و الوقت سمعت صوت ابني دموع الفرح يلي اندمجت ويه دموع الحزن بوقت واحد حملته بحضني و نسيت
كل ألم حسيت بي كلشي نسيت..
جنت احجي وياه و اسمي فارس، يا حبيبي و يا فتحت عيني، ياروح امك و عمرها والله إلا افديك بروحي
خالتي شالته و اخذته الساجر يلي بعدة واكف بالباب
كلتله، اجاكم فارس، امه سمته فارس
بوجود عمي و اخوان ساجر اخذ ابنه و كبر بأذنه
و كال: واني اسميك عقيل!!
ام ساجر: امه تريدة فارس
ساجر: ابني واني يلي اسمي
خالتي اخذت الطفل منه بغضب و دخلته يمي، كالت اسبوع و نروح سوية انطلعله بيان اني اعرف قابلة معروفة
و هي وتمشي اموره
اهتمت هي بطفل واني بين النايمة و بين يلي تبجي و تون مادري شلون خلصن اول تلاث ايام
على الاقل صرت اتحرك امشي انيم فارس ارضعة
صار هو عالمي المصغر بالبيت..
يلي استغربت منه، ماشفت احد أجه و شافني ولا احد اجه تحمد السلامتي بس اتذكر بولادة سلطان
جنت اسمع الناس تبارك جنت اشوف من بعيد النسوان و الخطار رايح جاي و المباركات و الذبيحة
بس من اجه فارس كلها صار عدها انشغالات!
كلهم تذكرو شغلهم و دوامهم و ماشفت احد
لحد ورا اسبوع رحنا اني و عمتي للقابلة يلي تعرفة
طلعت البيان حتى انسويلة الجنسية و سميته فارس
رغم عمتي كالت ساجر ميقبل ويريدة عقيل
و اني رفضت رفض قاطع هو اصلا جان دم برحمي
و ما رادة و راد يتخلص منه مو هسه ورا ما ولدته
صا عزيز و يريد يسمي بكيفه هو اصلاً ماله حق بي.
جنت انانية بشكل مو طبيعي اتجاه ابني احبه حب
بحياتي ماحبيت بشر بكده..
اني اهتم بي و بأيدي اوكلة و بحضني انيمة ماخليته يحس حتى بشعور انو يحتاج اب
بس الغيرة سكنت فؤادة من دخلو للمدرسة، جانو يرجعون سوية ساجر يتلكة ابنه سلطان بصلاوات و الحضن
و فارس ينساه
ملابس سلطان من احسن الملابس
بس ملابس فارس هنه ملابس سلطان القديمة
ابني جان هادئ و عاقل لدرجة جان يشوف كلشي
و يسكت ميحجي ماجنت ادري ابني كل هاي المواقف خزنهن بعقلة و بحياته مراح ينساهن
فارس جان اشجع من سلطان بس محد منتبه
فارس جان ياخذ درجات اعلى من سلطان بس محد انتبه..
فارس جان ميطلب حتى حقة بس محد جان منتبه
فارس تعارك بالمدرسة هنا كلها تنتبه ولازم ينكتل
ابني كبرته بدمع العين و شربته من همي و بقى شعور الاب فارغ بداخلة، ضل الغريب بين اهله!!
هو هذا ابن بت شلاگم و ذاك أبن بت عبد القادر
غلاة الأبن من غلاة الأم
بس ياحظك يا فارس صرت بركن مرفوف فارغ و علىّ كومة تراب
يا ابني انت العالي لو ما يندراك
باجر يندمون اللي ضحكوا وراك
ذكي وبصبرك تكسر الضيم كسر
فارس وهديتي من الله على الصبر
الخامس من هنا
اخترنا لك
نزلات البرد: كل ما تحتاج معرفته بعد إصابة شيخ الأزهر بها
رواية احببت الوريث الفصل الثاني 2 بقلم فاطمة رافت
رابط تهنئة عيد الفطر وزارة الصحة: صمم بطاقتك الخاصة الآن مجاناً وبسهولة!
الـ«سي آي إيه» تستخدم المسيّرات لتعقب كارتيلات المخدرات
وظائف المعاهد الأزهرية: 4474 فرصة عمل متاحة.. تعرف على الشروط وطريقة التقديم
كيفية الاشتراك في مسابقة الكتاب المبين بإذاعة القرآن الكريم 2025 بسهولة!
موعد مباراة مصر وسيراليون في تصفيات كأس العالم وتفاصيل اللقاء المرتقب
رواية الهارب من العتمة فارس واسماء كاملة جميع الفصول بقلم مجهولة
About the author
