رواية اسيرة بين يدي قاتل ابي كامله وحصريه بقلم نور آل زيادة

بغداد،، ١١ صباحآ

–مدام وين تحبين اوصلج؟

–حاليا في طريقي الى احد متاجر التسوق المعروفه في العاصمه بغداد وصلت الى وجهتي وطلبت من السائق ينتضرني

نزلت رفعت راسي للسما أنضر للغيوم ألي واضح انو محمله بالأمطار

دخلت وأشتريت بعض الملابس والعطور وكل النواقص ألي محتاجتهن ماخليت شي مااشتريته وكأنما انتقم من الفلوس بهل الطريقه او احاول اعوض شي نقص بداخلي مااعرف شنو كنت افكر واني اشتري الاشياء ألي احتاجها وحتى ألي مااحتاجها بس مجرد اصرف

بهل الأثناء سمعت رنة جهازي اكثر من مره بس ماكلفت نفسي حتى انو اشوف منو المتصل توقفت بعد ماحسيت بالتعب بالرغم للأن ماحسيت نفسي شفيت غليلي بس الجو هم ميساعد الضاهر راح تمطر طلعت واني محمله بالأكياس نزل السائق استقبلني واخذهن مني

مشت السياره دقائق وبدا المطر يتساقط ضليت اشاهد قطرات المطر ألي بدت تبلل كل شي

قطع صفنتي صوت رنة جهازي طلعته من الحقيبه كان المتصل ساره جاوبت عليها واجاني صوتها..

ساره -هاي سوسو وينج كم مره اتصلت ومتردين

رفعت عيني بملل ورديت…

سيلين-وين يعني برا تعرفين من اطلع ماارد على اتصالات وهسه اني مشغوله ممكن تتصلين غير وقت

ساره -نعتذر عيني حضرت الكونتيسا هزينه العرش مالتج،،، دولي لج هاي ويامن هيج تحجين احجي عدل لاأجي اسحلج وين ماكنتي هاي فيكاتج بيعيها على المگرود ثامر موعليه

سيلين-هههه استفزيتج موو

ساره-لا متكدرين تستفزيني لأن حاليا موبحالج اني

سيلين،،، لعد شكو متصله عليه

ساره،،، ضايجه ومحتاره ورايدتج بموضوع من ترجعين اتصلي بيه

سيلين،، خير بيج شي ساره؟

ساره،،، لا هيج مجرد محتاجه افضفضلج

سيلين،، تمام من ارجع اتصل

نهينا اتصالنا بمجرد رجعت الهاتف للحقيبه اجاني اتصال رديت بسرعه من غير مااشوف المتصل منو،،، كان على بالي ساره رجعت اتصلت نست تكلي شي،، خابت ضنوني من اجاني صوت المتصل

ام شاكر: هله بنتي،،، شلونج؟

سيلين: هممم،، بنتي؟!! لازم الموضوع مهم؟

ام شاكر: دردي السلام شبيج هيج تحجين ويايا اكو وحده هيج تحجي ويا امها معقوله مااشتاقيتيلنه،، مااشتاقيتي لأمج؟

سيلين: عوفج من هل الكلام والأسطوانه المجروخه وأطلعيلي بالنضيف شتريدين مني؟

ام شاكر: مااريد منج شي بس گلنا ألي ميسأل علينه احنا نسأل عليه،،، مشتاقيلج انتي وسيوفي تعالو خلي نشوفكم موكافي ماحنيتي هم كولي اهلي واخوتي اجي اشوفهم شلونهم عايشين،، ميتين،،، محتاجين شي مامحتاجين

سيلين،،، ههه،،، هنا مربط الفرس من الاخير ولا هل المعمعه كلها كولي نريد منج فلان شغله ليش تطوليها وهي گصيره

ام شاكر: لا بنتي الله يسامج شطالبين منج وبعدين واذا طلبنا خلفناج وكبرناج وزوجناج احسن زواجه وعايشه ومتهنايه بفضلنه،، شيصير لو تساعدين اهلج شنو يعني

سيلين،،، من الأخر،، شتريدين؟

ام شاكر: اني ماأريد شي بس اخوج مرته على ابواب ولاده والدكتوره كلتلها لازم نولدج قيصري

سيلين: اي تگوم بالسلامه اني شكو

ام شاكر: شلون انتي شكو اكلج محتاجه عمليه وتعرفين اخوج ماعنده

سيلين،،، ليش موعنده وضيفه ومااضن ثامر مقصر عليه بشي ينطي راتب زين وكل مايحتاج شي يساعده واذا على العمليه مو ألا ست الحسن والجمال تولد بمشفى اهلي ودوها حكومي

ام شاكر: شلون تقبلين بنت اخوج تنولد بمستشفى حكومي؟

سيلين: ليش بنت الباشا وأني ماادري؟ حالها حال العالم مواكثر الناس تولد بالحكومي لواهلها بناتهم موكله بالحكومي

ام شاكر:، يعني حق،، باطل،، انتي تولدين بأرقى مستشفيات بغداد وينصرف عليج ملايين وهدايا وذهب ومرت ابني تولد بالحكومي،،، ليش انتي هم قابل على كولتج بنت الباشا لونسيتي فضلنا عليج لتنسين كل ألي انتي بي هذا بفضلنا

سيلين: مسكت اعصابي ورديت بهدوء عكس ألي بداخلي

_من الاخير فلوس ماعندي وحتى لو عندي فلس ماانطيكم تريدون اطلبوا من ثامر هو ميقصر وياكم يعرف شلون يرد الجميل اما اني بنيه عاق وناكره للجميل

ام شاكر: حجه ويا شاكر وماأنطا

سيلين:، هذا شي يخصكم اما اني معليه بأي شي

ام شاكر:، طول عمرج انانيه وحقيره حسبي الله ونعم الوكبل بيج

سيلين:، قبل لتكمل اسطوانتها ألي اسمعها كل ماارفضلهم طلب نهيت المكالمه ضلت تتصل اخر شي غلقت الجهاز

ضليت اباوع على الشارع ألي انترس ماء المطر بكل هدوء ولاتحرك بيه ساكن من كلامها اصلا فقدت الأحساس من زمان

وصلت للبيت فتح الحارس الباب الرئيسي ودخلنا السياره للكراج انتبهت وجود سيارته الضاهر جاي نزلت وطلبت من السائق يدخل الاغراض ويسلمهن بيد العامله

دخلت للصاله صار ثامر امام انضاري كاعد على القنفه ومرجع راسه مبين عليه تعبان استغربت اليوم جاي للبيت قبل وقته المعتاد ألقيت التحيه،،، عدل نفسه وباوع عليه ورد

ثامر،،، وعليكم السلام،،،، وين جنتي؟

ثامر،: ادري طالعه،،، وين؟

سيلين،: جء،،،جء،،،جء،،، لا ابو سيوفي اعرفك اذكى من هيج معقوله تسألني وين كنت وانته خال ويايا جاسوسك على شكل سائق انته واني نعرف هل شي

ثامر:، بس من حقي اسأل ومن واجبج تجاوبيني لتنسين اني زوجج ابو ابنج وأني المسؤول عنج طلعتج وكل شي يخصج لازم اعرفه لتجبريني ارجع مثل قبل واخليج تنسين شي اسمه شارع

سيلين:، ماكو شي اسمه قبل لأن اني مو سيلين مال قبل واذا ماعاجبتك سيلين هسه بكل بساطه طلكني وجيب وحده على مزاجك

ثامر:، سيليييييين،،،، عدلي اسلوبج لااعدله بطريقتي الخاصه واذا رجعتي فتحتي هل الموضوع اطلكج واسحب كل شي منج وأولهم ابني

سيلين؛، سحبت شعري خليته على جنب وجاوبته بكل برود…

ههه،،، اي شكو بيها اسحب كل شي مني وحتى ابنك اخذه وطلگني عادي شنو يعني ماعندي شي أخسره اصلا مااريد اي شي يذكرني بيك

بمجرد خلصت كلماتي شكو شي على الطاوله ألي امامه طشره وكام اجه باتجاهي وهو مثل البركان امااني مارفلي جفن ولا تحركت خطوه كتفت ايدي وضليت واقفه امامه بكل شموخ

اجه عتني من ملابسي ويتكلم بغضب الى درجه وجها صار احمر دم

ثامر: شايفه نجوم السما اقربلج من الطلاك ومو لأن ميت عليج لا بس ألي املكه مااعوفه انتي ملكي اشتريتج بفلوسي ولليوم ادفع مقابل عليج

سيلين:، راح اغض النضر على هذا كلامك لأن متهمني لاانت ولا كلامك بس اذا تريدني اسد الموضوع ومااحجي بالطلاك شرطي تبطل تدفع مقابل عليه لأن اني موسلعه وتبيعون وتشترون بيه

ثامر:، بس اني بطلت انطيهم حتى اخوج البارحه راد فلوس ماانطيته

سيلين:، وهو المطلوب،، واذا سمعت منطي ميوكف بعيني شي صدكني

ثامر:، شنو تهدديني؟

سيلين:، شلون متعتبرها اعتبرها هذا ألي عندي وانته بعد بكيفك

تغيرت نبرت صوته وصار هادىء دارني عليه ومسك وجهي

ثامر؛، ليش هيج دتسوين سيلينتي؟

نترت ايده وعطت…

سيلين:، كم مره،، كم مره كايلتلك لتكلي سيلينتي

ثامر:، شدعوه واذا دلعتج؟

سيلين،: أكره هذا الدلع افهم يا بشر،، افهم

ثامر:، فهمت خلص اسكتي كافي شبيج متكوليلي لخاطر الله مو چنا زينين ليش رجعتي تخبلتي عليه ليش تغيرتي؟

سيلين،:، ولامره كنا زينين كل حياتنه تمثيل كله وهم كلها كذبه كبيره وشوكت تنتهي هل كذبه مااعرف

ثامر،:، راح تنتهي يجي يوم وتخلصين مني بس انتي شوكت راح يجي اليوم ألي تحبيني او حتى تسامحيني شوكت راح تراعين الله بيه صابر وساكت صار سنين بس لشوكت؟

سيلين،: من يخلص تمثيلك وتطلع من دور المضلوم ألي عايشه،، المازخونيه مالايكتلك

ثامر:،، شنو قصدج؟

سيلين:، انت فاهم قصدي فكافي تفتح مواضيع غالقتها بمزاجي

ثامر:،، سيلين اني احبج واموت عليج حسي بيه عاد

سيلين،: عوف هل الدراما وكلي سيف وين شنو لسه مااجى من الدوام؟

ثامر:، همزين من تذكرتي تسألين على ابنج اي اجه وغدته سميه وراح لغرفته

سيلين،: تمام اخذلي شوور واحضر نفسي رايحه للچيم هاي كتلك حتى لتكول تطلعين ومتكوليلي

ثامر،:، وشوكت نتغدا؟

سيلين،: اني مااريد

ثامر:، وانييي؟

سيلين:،، ومنو مانعك،، تتغدا

ثامر،:، اني انتضرتج ناكل سوا

سيلين،:، واني ماأريد شبعانه

ثامر،:، بس اني جوعان

سيلين،:، خلي سميه تجهزلك الأكل

ثامر،:، سيلين وروح امي مشتهي اكل من ايدج مشتهي اكلج

سيلين:،، واني ماعندي وقت مشغوله. من رخصتك

ثامر:،، سيلين اني تعبان محتاجج تحسين بيه

سيلين: عفته ومشيت ناهيه كلامه

رحت للغرفه دخلت على دريسنك روم( غرفة الملابس) طلعتلي ملابس الرياضه وحضرتهن وتوجهت للحمام واسمع صوت ثامر الغاضب وغلطه وحتى التكسير مااهتميت سبحت وطلعت لكيت اغراضي ألي اشتريتهن بالغرفه شلتهن رتبتهن ونشفت شعري ورفعته وخليت ميكئاب بسيط ولبست تراك رياضي اخذت كل احتياجاتي خليتهن بحقيبه رياضيه وطلعت مالكيت ثامر استغليت فرصة عدم وجوده ورحت بسرعه على غرفة ابني لكيته نايم بسريره رحت حضنته وبسته عدلت نومته وغطيته ولميت ملابسه والهوسه ألي مسويها بالغرفه وطلعت وصيت عليه سميه وطلبت منها تلم الهوسه والكزاز ألي سببه ثامر وطلعت متوجهه للقاعه مارست رياضه لحد ماانتهيت

رحت للچيم ورا الضهر رجعت صار المغرب لكيتهم كاعدين ياكلون كيك وعصير وثامر ماموجود فتت بسرعه اخذت شوور سريع وطلعت طلبت عصير كوكتيل من سميه

سميه: ام سيف تاكلين كيك ويا العصير

سيلين،:، لاشكرا مااكدر هسه اجيت من الچيم

سميه،:، اعرفج متاكلين من هذا الكيك سويتلج كيك خاص،، دايت

سيلين،:، ابتسمت ألها بأمتنان،،، اي تمام جيبيلي قطعه صغيره والعصير بدون سكر كالعاده

جابتهن واكلت واتذكرت جهازي مغلق للان فتحت الجهاز ولكيته مليان رسائل واتصالات من امي ومن ثامر ومن ساره،،،، ساررره،، لحضه،، لحضه نسيتها من شوكت كلتلها من ارجع اتصل بيج شلون نسيتها اتصلت بيها بسرعه ردت…

ساره،: بربج،، بدينج هاي دكه تدكيها بيه

سيلين،:، اسفه حبيبتي والله اعتذر انشغلت وغلقت الجهاز ونسيت ارجع افتحه

ساره،:، لازم الحب نساج؟

سيلين،: ساره بطلي سوالفج التعبانه ياحب ياصخام البين

ساره:،، مممم،،، نسيت انتي متعترفين بشي اسمه حب ياصاحبة القلب القاسي يامحطمه قلب الشايب

سيلين:،، ساره اذا مخابره حتى تلغين لغوه جايفه من هسه اكلج ولي واذا عندج كلام ثاني احجي ولتطوليها

ساره،،: ولج يولي اشو صايره كلش نفسيه

سيلين،:، سارررره!!

ساره:،، افتهمت راح ألغي اكلج سيلين اني شاكه بمؤيد ديخوني

سيلين،،: وطبه مرض وشتسويله

ساره،:،، ولج سيلين موهيج الكلام اشو كل شي انتي عندج عادي

سيلين،:، لأن فعلا عادي انتي واختج ماعدكم سالفه غير ديخونونا هذيج يوميه تاهمته لزوجها ومسويتلها سالفه وانتي نفس الشي هو خطيبج حافي ومنتف ويخاف على الربع ليصرفه هو عليج ماصارف اذا يصاحب غيرج متريد منه يصرف عليها لو تصاحبه لسواد عيونه

ساره،،: واذا سواها المكرود ثامر؟

سيلين،: يسويلي فضل بحيث اضل اترحمله عليه كل حياتي

ساره:، ولج انتي شنو من بشر اكو وحده تكيف رجلها يخونها؟

سيلين،: اي اني،،،، لأن بهيج حاله راح تكون هاي افضل فرصه حتى اتطلك بيها من ثامر وافضل حجه

ساره:، سيلين اني ومؤيد علاقتنه تختلف عنكم اني مااريد علاقتي بي تنتهي ولااريد انفصل عن مؤيد ولااريد يشوف غيري اني احبه

سيلين:، وشدعوه هيج متمسكه بي من حوره لعب بيج طوبه وبعدج ساكتتله صار سنين منتضرته يخطي خطوه بعلاقتكم وهو مغلس بس فالح يتشرط ويتأمر عليج هو وامه وانتي خاضعه ألهم

ساره،:، سيلين اني مومثلج اني اريد اعيش ومااريد مشاكل واصلا اخاف من المشاكل

سيلين:، اي ست ساره اذا انتي هيج جبانه وتخافين من المشاكل واني وحده مشكلجيه شكو متصله بوحده مثلي وبشنو راح افيدج واني حتى نفسي مافايدتها؟

ساره:، لتزعلين مني سيلين بس اني فعلا ماأكدر اعيش واتصرف مثلج اني موبقوتج ولامثل شخصيتج ولا املك قلب صخر اني انسانه بسيطه اريد اعيش يومي وأكون اسره وبس

سيلين:،، يااسره هاي وهو مخليج صار ٨ سنوات وقف؟ دمرج حتى دراسه حرمج منها شنو هذا ضعفج

ساره: علساس هسه انتي حالج احسن مني مو ضليتي مدمغه للرايح والجاي سنين

سيلين: شكرا على كل هل المديح ست ساره من الاخر شتريدين؟

ساره،:، ساعديني اريد اكشفه

سيلين،: واذا كشفتي شيتغير اول وتالي راح تكعدين وتسكتين وتستسلمين على شنو غاثه نفسج مرات الانسان يبقى بالضلام افضل لأن النور الزايد يعمي

ساره،:، مااكدر اعيش بهل شك اريد اتأكد

سيلين،:، واذا تأكدتي؟

ساره:،، معناها صار الوقت

سيلين،:، هههه،،، صدكتج والله هسه على العمود شتريدين اني جاهزه؟

ساره،:، اريد اراقبه

سيلين:، راقبي منو مانعج

ساره:،تعرفين مااكدر اطلع ولاأطب وعمامي وامي فوك راسي كوليلي شسوي؟

سيلين،: انتي سالفتج سالفه والمشكله خاضعه وساكته للكل لهذا مسيطرين عليج

ساره:،، فضيني،، شسوي؟

سيلين:، هو خطيبج التحفه حاير بالدين والدراسه والشغل كل عقلج يخون حبيبتي اخذيها مني اهل السكر والعربده يدورن صداقات ونسوان بالحرام واهل الدين يدورون زواج ومقولتهم المشهوره مثنى وثلاث ورباع وانتي خطيبج بخيل وحافي انتي ماكدر يتزوجج للأن كل عقلج يتزوج غيرج

ساره:، اي صح مؤيد يستحرم مومال علاقات بس هسه صار فتره مامرتاحتله اخاف متزوج شسمه…. اقصد متعه

سيلين:، خلص شوفيلج واحد يراقبه وقشمري على اخته الصغيره جيبيلها هديه وأسحبي منها الكلام

ساره،:، ادور بس وين ألكي واحد يراقبه

سيلين:،، هسه تأكدي من شكوكج والله كريم يله روحي خلي اشوف ابني

ساره،: عابت يله رايحه،،،، باي

سيلين،:، نهيت الأتصال وبلشت ادرس سيف لساعه ١١ ليلا يله خلصت وشفت دفاتره ورتبتهن وراح لغرفته

رحت ورا طلعتله ملابسه مال الدوام بدل ملابسه لملابس النوم ونام بسريره غطيته وطلعت

الغريب للان ثامر ماكو رحت لغرفتي سويت عناية قبل النوم لبشرتي ولقدمي وغيرت ملابسي وطلعت احد كتبي وبلشت اقرا حتى لاانسى ألي درسته لأن ثامر رفض امارس المهنه بعد مااتخرجت بس خلاني اخذ هوية النقابه وأكعد بالبيت واني لسه عندي امل بهل شي لهذا دائما اراجع معلوماتي حتى لاانسى

غفيت وأني ماسكه الكتاب كعدت منتصف الليل وثامر ماكو طلعت من الغرفه متوجهه للمطبخ لكن انصدمت واني اشوف ثامر على الارض ركضت أله شكله غريب وانفه نازف دم خفت اعترف خفت احتاريت عليمن اتصل اخوته؟ لاطبعا شنو هذوله الحثالات اتصل بيهم فكرت بأهلي وهم استبعدتهم

حاولت اصحي جبت مي رشيت على وجها وماصحا،،، هنا تأكدت وضعه يستوجب مشفى ماترددت واتصلت بالأسعاف نقلته للمشفى بعد ماامنت سيف يم سميه

دخلو للطوارىء طلع الكتور المناوب ورحت سألته على حالته جاوبني….

_ ضغطه مرتفع بس سبب الاغماء غير واضح ومؤشراته الحيويه متدل على انو ألي بي بس مجرد ارتفاع بالضغط

ضليت انتضر بعد مامنعو دخولي أله لأن حولوا للعنايه

صراحه حسيت بتأنيب الضمير لأن الضهر غثيته وخصوصا هو وضحلي انو هو تعبان ومحتاجلي بس اني غضيت النضر عن شكله التعبان وعن كلامه وتجاهلته

ضليت انتضر الى ان صحا دخلت اشوفه كان وجه اصفر وشكله كلش تعبان من دخلت وجه نضره ألي وشفت بعيونه عتاب بس ماحجه ولا كلمه توجهت اله وكلتله…..

_الحمد الله على سلامتك غمض عيونه من غير جواب كتله…

_ ثامر اتصل على اخوتك لو لا؟ مااتصلت لأن كلت يجوز انت مترغب بهل شي

جاوبني بصوت تعبان….

ثامر،: ماكو داعي لتتصلين بأي شخص بس بالسايق لأن اريد اطلع

اثناء كلامه دخل الدكتور المناوب وبدا يوضح وضعه من كال…

الدكتور،:، ضغطك مرتفع لكن مو ألى درجه توصل لهل حاله لهذا تحتاج فحوصات شامله

سيلين: شنو بي بالضبط؟

الدكتور،: اني شاك بشغله بس الفحوصات هي ألي راح تأكد شكي

سيلين:، بدا يوضح الدكتور حالته وانو محتاج متابعه وراحه واثناء كلامه

استوقفه ثامر من طلب مني اطلع وهو يعرفني اكيد راح انفذ من دون نقاش لأن هذا طبعي مااحب التطفل وفرض نفسي على اي شخص

طلعت ثواني وتذكرت اني نسيت حقيبتي وبيها الجهاز بالداخل ردت ارجع اخذهن قبل ليبلش يفحصه فتحت الباب وقبل لاادخل استوقفني كلامهم

ثامر:، اني سويت هواي تحاليل وفحوصات ومفراز وأشعه وكل شي واكدولي عندي ورم بالدماغ وراسلت اكثر من طبيب بالخارج بعد ماارسلت الفحوصات واخرها تواصلت مع بروفسور بهل مجال وأكدلي هل شي ومقرر اسافر هل الفتره

الدكتور:،، ياريت لو تستعجل بهل ألشي اذا انته تأكدت لأن حالتك الواضح بدت تدهور وهل شي واضح من الاغماء ونزيف الأنف ألي عندك

سيلين،:،ابتعدت بسرعه عن الباب بعد ماسمعت هل الصدمه اكذب اذا اكول تاثرت عليه بس بنفس الوقت مااتمناله الأذيه او حتى الموت لأن يبقى هل الشخص ابو ابني

اجا السائق ورجعنا للبيت هو دخل للغرفه بس ساعدته يغير ملابسه ونام على السرير غطيته فتح عيونه مبتسم لأن هل شي يصير لأول مره بحياتنه الزوجيه

ثامر؛، سيلينتي خفتي عليه؟

سيلين،،غمضت عيني اكتم غضبي اتجاه هل الاسم (سيلينتي) فتحتها شفته صافن عليه منتضر مني جواب ارتبكت وماعرفت شلون اجاوبه لأن اعرف كلامي شكد يأثر عليه سواء سلبيا او ايجاببا لهذا جاوبته بكلمه….

_انت زوجي وابو ابني واني موحجر اكيد تأثرت من شفتك بهل الحاله

ثامر:، سيلين لوتدرين شكد احبج ماكان كرهتيني لهل درجه

سيلين:، الحب افعال ثامر موكلام

ثامر،: حاولت مااقصر وياج بأي شي كل طلباتج كانت اوامر شنو بقى اسوي حتى تحسين بيه؟

سيلين:،ماانكر كل شي سويته ألي وهل شي شفعلك اليوم من وكعت،،، لكن نسيت اهم شي ماسويته ألي…

تطلب مني أحس بيك وانته مااهتميت لمشاعري ولاحسيت بيه،،،، ماردت منك لاجاه ولامال ولا أي شي بس ردتك تحس بيه بس ماألومك لأن اني كل الاشخاص ألي بحياتي ماحسوا بيه يمكن انته رغم كل شي افضل منهم

ثامر،: سيلين بداعة ابنا انطيني فرصه وسامحيني كل ألي سويته وياج لأن حبيتج وردتج ألي يمكن صدك ضلمتج وحوبتج بينت بيه

سيلين:، ماكو داعي لهذا كلامك وانت مابيك شي راح تصير زين اصلا هسه الصبح تكعد وانته بخير وبما انو الباجر جمعه اني راح اطبخلكم النهار كله بعد شتريد كول سيلين مادارتني واني مريض

ثامر:، هههه،،، ياريت لومن زمان متمرض وشايف كل هل حنيه منج ولج اروحلج فدوه

سيلين:، نام هسه وارتاح وان شاء الله تصبح زين

عفته ينام ورحت غيرت ملابسي الجو ممطر رحت لغرفة ابني لكيته نايم وسميه فارشه يمه ونايمه ماردت اكعدها واطير النوم من عينها عفتها بمكانها غطيتهم زين لأن الجو بي بروده وطلعت

رجعت للغرفه لكيت ثامر نايم رحت للمطبخ سويتلي كوب حليب دافىء ورجعت وكفت امام نافذت الغرفه ضليت اتأمل نزول المطر يمكن اكثر الناس تحب المطر اما اني المطر من اشوفه يفتحلي جروحي ومع ذلك اضل اتأمل السما من تمطر وكأنما هل منضر يسحبني غصب عني ويذكرني بكل شي عشته بحياتي

درت وجهي على ثامر نايم بعمق بس وجها اصفر وذبلان اشوف الشيب كثران عنده هل الفتره رغم هو كلش يعتني بنفسه ثامر رجل يبلغ اثنان وخمسين من عمره اكبر مني ب٢٥ سنه

اتذكر اول مره من شفته واني راجعه من المدرسه كان شخص واگف يم بابنا تقريبا بعمر والدي بس هو مرتب كلش ومبين مريش خصوصا هل شي واضح من سيارته الفخمه وصلت يمه وكتله…

_ تفضل عمو منو رايد اندار عليه وابتسم بوجهي وكلي….

ثامر:، هذا بيت ابو شاكر؟

سيلين:، اي هو،،، تفضل

ثامر،: شيصير منج ابو شاكر؟

سيلين،:، يصير ابويه

ثامر:،، ماشاء الله،،، ممكن تصيحي ألي

سيلين:، دخلت صحت والدي ومن يومها صار يتردد وعرفت هل شخص يصير معارف شخص يعرف والدي وبما انو والدي يشتغل موضف بالأمانه فأجه حتى يساعده بموضوع يخصه

ومره طلعت للدوام وصار بوجهي انتبهتله كصني بنضراته وهل شي اربكني رغم اني اصيحله عمو لهذا حتى سلام ماسلمت عليه تجاهلته ومشيت لكن توقفت من سمعت صوته…

ثامر: شلونج،،، شنو ماعرفتيني؟

سيلين:، هلو عمو اسفه ماانتبهت

حسيته ضاج جاوبني…

ثامر،: اني موعمج وليش تكبريني ترا اني بعدني بشبابي ومامتزوج للان

سيلين،: شفتك بعمر بابا لهذا صحتلك عمو وهل شي طبيعي انو احترم شخص بعمر والدي اذا جاي على بابا فبعده مااجا

شفت وجها صار ينطي الوان عفته ومشيت

ورا ايام سمعت امي ووالدي يحجون بي على انو متقدم لخطبتي انصدمت من تصرفه بعمر بنته وبكل صلافه جاي يخطب صح ضجت خصوصا من سمعت امي تقنع بوالدي حتى يوافق لكن ارتاحيت من والدي رفض

ضلت امي ايام ضايجه الى ان انخطبت وتمت الموافقه وراها ثامر اختفى لكن بعد فسخ خطوبتي والمشكله ألي صارت وخلت الناس كل واحد يتكلم شكل وامي واخويه شدو ويايا وكأنما صرت عار عليهم وهاي حقيقه احنا بمجتمعنا المراه بفسخ الخطوبه تعيش مثل تجربة الطلاق بعد الزواج الناس تنبذها وهل التخلف كان احد الاسباب ألي دمرت حياتي وفتحت المجال حتى يرجع يتجرء ثامر انو يخطبني بس الفرق هل مره الكل كان موافق

رفضت وبچيت وكل شي سويت بس هل شي مافاد اخر شي توسلت بوالدي حتى يرفض لكن كسرني بردت فعله

انهاريت لأن صدقا مااكدر اتخيل ولو ل لحضه انو اوافق على شخص بعمر والدي ماناقصني شي ولاسويت شي غلط حتى اتزوج بهل طريقه

لكن اهلي كان ألهم رأي اخر امتنعت عن الاكل والشرب وطول الوقت بس دموعي هي سلاحي الوحيد كنت انسانه بريئه وجبانه رادوا يجهزوني واني رفضت اروح لأي مكان وياهم ورفضت كل شي لكن امي ماقصرت راحت وياهم وسوت كل شي على مزاجها

بيوم العقد رفضت وكنت متصوره خلصت لكن بمجرد نطقت هل الكلمه حسيتهم راح يموتوني من الضرب صرت ابجي واعيط وكتله لثامر بصريح العباره مااريدك واكرهك ولو عندك كرامه عوفني لكن هل كلام ماهز شعره منه

وبعد الأذيه ألي حصلتها والضرب من امي وشاكر وتوسلات والدي انو مااخزي امام الناس الحاضره نطقت كلمة موافقه وللان مااعرف شلون نطقت هل كلمه يمكن الخوف والضرب والترهيب خلاني انطق هل الكلمه

مرت ايام و أجا يوم العرس قبل بيوم بلشوا امي وخواتي يجهزوني وغصب عني سولي كل شي واني بس دموعي وكلمة مااريد هي ألي اكدر اسويها لكن لاحياة لمن تنادي

شفت حنيه بنضرات ابويه وتأملت يساعدني لكن والدي انكسر وكسرني من تمرض واخذوا للمستشفى

أجا يوم العرس واخذوني على ارقى مركز تجميل ببغداد كنت رافضه كل شي اخر شي امي طلعت الكل ولزمتني ضربتني ضرب مبرح وصارت تهددني وماكو بلسانتها غير كلمة اني عايبه وعار ولازم يطمون عاري لو بالزواج لو يموتوني لسبب لليوم مااعرفه ولاألي ذنب بي ذنبي الوحيد انخطبت وماصار نصيب والسبب مومني بأنتهاء الخطوبه

لبسوني البدله غصب وطلعوني كل شي مافهمت ومااعرف غير انو اليوم اعدامي موزواجي

اجت الزفه واخذوني لبيت عباره عن قصر مو بيت بأرقى مناطق بغداد دخلوني والموجودين من المعازيم كلهم ينضرولي نضره استحقار ألي

كانت حفله بسيطه خصوصا وأني اقل من عشر دقائق واخذتني امي واخواتي للغرفه وتوصي بيه وطلعت

بمجرد انو طلعت غيرت ملابسي وفتحت التسريحه لأن كانت بسيطه وسبحت لبست تراك وطلعت امشط شعري

دخل ثامر ونضراته كلها لهفه وفرح اما أني استقبلته بكلمة اكرهك ورفضي أله من حاول يجبرني ختلت بالحمام وقفلت الباب

ضل يهدد ويغلط حتى افتح الباب بس ماسمعتله اخر شي صار يقنعني بهدوء حتى اطلع بس ماطلعت ضليت للصبح على هذا حالي الى ان سمعت صوت اشخاص بالبيت عرفت اهلي اجوي طلعت لكيت بالبيت خالتي وبنت خالتي استغربت سلمت عليهم بس انتبهت لابسات اسود ووجوهن موطبيعيه سألت شنو الصاير ووين اهلي ماردت خالتي بس بنت خالتي جاوبتني الجواب ألي هز كياني ودمرني

— عمو ابو شاكر مات،، ابوج البارحه مات

كانت كلمات نزلت عليه كالصاعقه انهاريت اكبر انهيار بحياتي

اقل من شهر شفت ضيم سنين خسرت كل شي وهسه خسرت ابويه الشخص الوحيد ألي احسه يحبني

طلعت اركض مثل المجنونه لحكوني ورجعوني واخذوني لبيت اهلي كان ثاني يوم للفاتحه

راح ودفنوا من غير مااودعه انتهيت وتدمرت ايام اني فاصله عن العالم ورا اسبوع اخذني ثامر لبيته والغريب ورغم وضعي وحزني يريد نتمم زواجنا رفضت وتهسترت وملخت نفسي يله عافني

واستمر هل رفض ألى ان صار اربعين ابويه ورحنا للمقبره بعد الاربعين رجع اخذني لبيته ورا يومين رجع فتح نفس الموضوع ومن شافني مصره على قراري عافني او هذا كان تصوري

ثاني يوم اجوي امي وشاكر وافتهمت هو شاكيلهم وكان كلام امي بصريح العباره انو اني بيه شي لهذا رافضه ثامر ومااكتفت بكلامها صدمني كلام شاكر من كال انتي اذا محافضه على شرفج اثبتيلنه هل شي

كانت احد اكبر الطعنات ألي حصلتها بحياتي اهلي يطعنون بشرفي وامام الشخص ألى زوجوني أله غصب

انطوني مهله لثاني يوم اثبت هل شي وألا اموت ويغسلون عاري

بيومها تمنيت الموت ولا اسمع هل الكلام من الاشخاص ألي همه اهلي وربوني ويعرفون شنو اني وشنو اخلاقي

كلامهم دمرني ومع ذلك ماخضعت لأن كنت متأمله يقتلوني واخلص واموت مضلومه

لكن ثامر كان أله رأي اخر كان مستعد يسوي اي شي حتى اكون أله وميخسرني حتى لوكان هل شي بالغصب صرت زوجته فعليا لكن عن طريق ا،غ،ت،ص،ا،ب،بالحلال عشت ابشع شي ممكن تعيشه اي بنيه تعامل ويايا ثامر بوحشيه وساديه

الصبح اجوي اهلي يتأكدون بنفسهم من عفتي وطهارتي

استقبلهم ثامر وصرت اسمع هلاهل امي وفرحت الكل وأولهم ثامر كانت اصواتهم عباره عن خناجر تنغرس بيه طعنات متتاليه من كل الاشخاص واقرب الناس ألي فرحانين لأن دمروني ونهو شي اسمه سيلين

من هل دقيقه متت وانولدت انسانه ثانيه داخلها حجر طلعت ألهم وعطت بصوت عالي…

_ اطلعوا برا مااريد اشوف اي واحد منكم

الكل سكت وانصدم بردت فعلي لأن بحياتي كلها مارفعت صوتي عليهم طول عمري كنت بنت مطيعه وبريئه وطيبه ويا الكل لكن بفضلهم راحت

يمكن لا بل اكيد غلط السويته ويا اهلي لكن المريت بي كان اكبر من تحمل عقلي واعصابي

ثامر،:، شنو هل الكلام سيلين؟ هذوله اهلج

سيلين:، اني موصرت مرتك وهذا بيتك والمفروض بيتي؟

ثامر:،، اكيد بيتج

سيلين:، وبما انو هل بيت بيتي مااريدهم ببيتي

ام شاكر:، من اكلج انتي عار تضوجين من كلامي اكو وحده تسوي سوايتج بأهلها

سيلين:، صراحه لا ماكو في حال انتو كنتو اهلي بس اني من هل الدقيقه ماعندي اهل اني يتيمه وألي دمرني وماشاركني كل ألي عشته مااريده بحياتي مااريد اشوفكم بعد انتو بعتوني واخذتوا ثمني بس صدكوني كل واحد سعى بدماري ماراح اسامحه ولاابريكم الذمه وذنبي بركبتكم كلكم وانت اول واحد ياثامر

انتو بالنسبه ألي كلكم متوا طلعوا من البيت ومن حياتي

من يومها عشت جسد بلاروح ورغم رفضي لثامر لكن ماعافني مرات اكدر اهرب منه ومرات يغصبني وارجع اعيش تجربتي القاسيه ويا

عشت حياتي ويا غصب بغصب وهل شي خلاني اكرهه اكثر لأن ولامره حس بيه اواتنازل علمودي وبالعكس كان يغصبني على كل شي

بعد مرور سنه صرت حامل وكان هل خبر صاعقه بالنسبه ألي من هول الخبر فقدت عقلي وسويت كل شي حتى انزل الطفل لكن سبحان الله هل شي ماصار

اما ثامر من عرف بهل شي سوه عليه رقابه حتى صار يحاسبني على النفس وعلى اثر هل شي دخلت بأكتئاب شديد وتركت الاكل مرت اشهر الحمل بالمستشفى بسبب نقص الغذاء

كان ثامر طاير ومتلهف انو يصير اب لأول مره بحياته وسوا كل شي وداراني وحتى بطل يغصبني على اي شي عافني على راحتي خصوصا بعد مااستشار معالجه نفسيه بسبب وضعي النفسي الى ان ولدت ابني ماكدرت اتقبله بالبدايه لكن بعدين تقبلته

كنت امثل انو اني مااريده لأن اعرف ثامر راح يستغل ابني كنقطة ضعف اتجاهي صرت اعرف كل تفكيره هو واهلي

اهلي اجوي اكثر من مره ورفضت مقابلتهم ومره گلبي حن وقررت اطلع اسلم عليهم خصوصا واني صرت ام والمفروض احس بيهم وبمشاعرهم يمكن صدك همه فكروا بمصلحتي من وجهت نضرهم حتى لوكانت الطريقه غلط بالنهايه اني بنتهم واكيد مو قصدهم اذيتي

وصلت للاستقبال ووقفني كلام امي وشاكر وهمه يتفاوضون ويا ثامر على مبلغ من المال تراجعت واني اسمعهم طلع ثامر مسوي لأمي راتب خاص واخويه مشغله ويا وجايب عرسان لخواتي الاكبر مني ثنينهن

كل هذا وجايين اليوم يريدون منه بعد والله شنو احنا زوجناك بتنا بعمر الورده وهذا اقل شي تقدمه ألنا

من سمعتهم رجعت انهاريت واني بأيام النفاس كنت متصورتهم جايين يشوفوني اني وابني طلع جاين بسبب طمعهم

دخلت شايطه عليهم من كميه الرخص ألي حسيت بيها كنت مجرد بضاعه او سلعه يتفاوضون عليها

حياتي تدمرت وعشت وياوحش من اجل مال

بسبب شوطتي تخربطت ونمت مستشفى اسبوع حتى حليبي نشف

ومن يومها شرطت على ثامر ميدخلون بيتي وألا اني اطلع لو اموت نفسي

بعد مده رجع ثامر يتوددلي ورفضته كالعاده وخيرني بين حقوقه برضايه او يتزوج عليه واني رفضت وبعد ما مل مني قرر يتزوج واني ماأهتميت نهائيا اكتفيت بكلمة حسبي الله ونعم الوكيل دمرت حياتي وانت تريد تعيش حياتك وراح خطب وبعد شهر من خطوبته فسخها لأن ماعجبته

رجع يتوددلي ويعبرلي عن حبه ويجيب الهدايا وحتى سجل بيت بأسمي وسياره حتى ارضا عليه عباله يغريني بفلوسه كنت مستغربه ليش بطل يغصبني على حقوقه لكن بعدين عرفت هل شي مو نبل منه لكن بسبب المعالجه النفسيه كالتله اذا ضل يتعامل ويايا بهل طريقه ممكن افقد عقلي

كنت اتمنى اتطلك منه بس وين اروح لكن من سجل البيت بأسمي هل شي حفزني وبلشت اخطط للطلاك

اخذت ابني ورحت سكنت ببيتي بعت جزء من الذهب ورفعت دعوى طلاق

عشت بحرب ويا ثامر واتحملت حتى اخلص منه لكن خابت امالي بيوم جلسة المحكمه من اهلي شهدو ضدي وثامر اثبت انو اني موبكامل قوايه العقليه واستغل فتره مرضي النفسي وعلاجي عند الدكتوره ومع الأسف اهلي شهدوا ويا

وهنا اكون خسرت القضيه وخسرت كل شي وحتى يعاقبني دخلني مصحه لفتره عشت بيها اسوء ايام حياتي

طلعني و رجعت ويا وكنت مجبوره

ومااكتفى بهل عقاب راح خطب وقرر يتزوج حتى يذلني لكن القدر كان اسرع

قبل خطوبته اجاني خبر محاولة اغتيال ثامر وعلى اثرها انقلبت بي السياره وهل حادث وصل ثامر للموت وضل سنه ميكدر يمشي وسوا عمليه يله كدر يمشي

بعد ماتعافى حاول يحسن علاقته ويايا اما بالنسبه لموضوع زواجه فنغلق من يوم الحادث

ثامر صار يهتم بيه اكثر بس الغريب بطل يطالب بحقوقه الزوجيه كنت مامهتمه اهم شي ميغصبني على شي لأن ولامره كدرت اتقبل ثامر كزوج ألي اعرف هل شي حرام لكن زواجي كله حرام كله صار تحت التهديد والغصب معاملة ثامر الوحشيه ألي خلتني ولايوم أتقبله

بعدها من تحسنت صحته كل شي سوا حتى يحسن علاقتنه وبدا ابنا يكبر وثامر صار يسفرنا ويوفرلي كل شي اطلبه دللني دلال موطبيعي

وهل شي خله علاقتي بي تتحسن صارت علاقتنه حلوه صح مابينا علاقه زوجيه لكن صرنا اصدقاء وبينا ود وأحترام صرنه عائله لطيفه وهل شي خلاني اتنازل وأعدل علاقتي بثامر خصوصا مابقالي غيره بهل حياة واني هم تعبت اريد اعيش واربي ابني

استسلمت لواقعي ورضيت بنصيبي وضليت اقنع نفسي حتى اعيش كنت دائما اردد وعسى ان تكرهوا شيئا وهو خيرا لكم وعسى ان تحبو شيئا وهو شر لكم

قبل انخطبت لشخص من اختياري كنت متصورته صح وبنضري اختاريت الشخص الصح وهو هذا الشخص ألي دمر حياتي وخله اهلي وثامر يلعبون بيه وبسبب هل شخص والدي توفى

مرت الايام وطلبت من ثامر اكمل دراستي رفض بالبدايه وصارت مشكله بسبب هل شي بس بعدين وافق لأن كان يحاول بكل الطرق يرضيني

قدمت ومع الاسف طلعتلي اكثر كليه وقسم اكرهم لأن يذكروني بالماضي ردت اغيره لكن ثامر ماوافق وكلي اني ردت تدرسين قانون حتى بالمستقبل تديرين اعمالي واملاكي لأن انتي ام ابني وصراحه قنعني كلامه

بمرور الوقت علاقتي هواي اتغيرت ويا ثامر صرنا اصدقاء نكعد ونسولف ويستشيرني بأعماله صرت اهتم بالبيت وبأبني

رغم ثامر جابلي عامله للبيت لكن كان كلش مغرم بطبخي ماكنت اعرف اطبخ لكن ساره خبيره بالطبخ علمتني هي وامها لأن همه الاشخاص الوحيدين ألي اتواصل وياهم هي صديقة الطفوله كنا ندرس سوا وعلاقتنه اكثر من خوات

بلشت اداوم بشرط سائق ياخذني ويرجعني رغم اني تعلمت اقود السياره بس هذا كان شرط ثامر حتى اداوم

حياتي من بعد حادث ثامر اخذت طريق اخر عشت سنين مليانه عز ودلال ورغم هل شي ألي بالگلب بقى بگلبي ماكدرت احبه بس بطلت اكرهه تغاضيت عن اخطائه بحقي لأن حسناته شفعتله بس اكو شغله بي تغيرت وماحبيتها كان يشك بيه بحيث كل مااغافله ألكي يفتش بجهازي وكان عندي شك السائق جاسوس خاله يراقبني لأن وين مااروح حتى داخل الحرم الجامعي يكون موجود

ماكنت اهتم لأن ماعندي شي اخاف منه ولاضلت عندي مشاعر تخليني اتأثر بالناس بعد خيبات الأمل ألي عشته بحياتي

بعد اربع سنوات تخرجت لكن ثامر رفض انو امارس اي مهنه رجعت للوحده ورجعت حالتي النفسيه تنتكس هنا قرر يرجع يسفرني ماخله دوله ماسفرني ألها

خلال هل سنين صرت شابه ناضجه وواعيه اكتشفت العالم بالسفر واكتسبت المعرفه والتطور من مراهقه بسيطه بنت عائله بسيطه الى شابه يافعه راقيه بكل المقاييس العز والدلال غيرني بس ماكنت اعرف شنو خفايا هل الدلال ولا شنو كان منتضرني